மரண தேசம் மெக்ஸிகோ !

படித்ததில் பிடித்தது.

டெக்ஸ் வில்லரின் தீபாவளி ஸ்பெஷல்

மரண தேசம் மெக்ஸிகோ

சன்ஷைன் வைப்ரரி - சிவகாசி.

என்னுடைய சிறுவயது கதா நாயகர்களான, இரும்புக்கை மாயாவி, லாரன்ஸ் & டேவிட், ஜானி - நீரோ வரிசையில் அடுத்து வருபவர் டெக்ஸ் வில்லர். ஏனோ அன்று முதல் இன்று வரை, வேறு எந்தச் சினிமா கதாநாயகர்களும் என்னை அவ்வளவாக ஈர்க்கவில்லை.

வைல்ட்  வெஸ்ட் என்று சொல்லக்கூடிய அமெரிக்காவின் மேற்குப்பகுதியில் வாழ்ந்த செவ்விந்தியர்கள், கெளபாய் ஆகியோர் உலவிய பகுதியின் அடிப்படையில் அந்தக்கால கட்டத்திலேயே வாழ்ந்த விதத்தில் கற்பனையாக அமைக்கப்பட்ட ஒரு கதா நாயகன்தான் டெக்ஸ் வில்லர். நவஜோ (ஆங்கிலத்தில் நவஹோ-Navajo) என்று அழைக்கப்பட்ட செவ்விந்தியர்களின் தலைவரான 'இரவுக்கழுகார்' என்று சொல்லப்படும் திறமை வாய்ந்த டெக்சஸ் ரேஞ்சர்தான் டெக்ஸ் வில்லர். இவரது கூட்டாளி சற்றே வயதான கிட் கார்சன். இவர்களுடைய சாகசங்கள் அன்று தொடங்கி இன்று வரை ஐரோப்பாவின் புகழ்பெற்ற காமிக்ஸ் கதைகள்.

டெக்ஸ் வில்லர்” 

'டெக்ஸ் வில்லர்” என்ற கதாபாத்திரத்தைப் படைத்தவர் இத்தாலியின் 'மிலன் ' நகரில் 1908ல் பிறந்தவரான ஜியோவனி லுயிஜி பானெலி ( Giovanni Luigi Bonelli) என்பவர். 1937ல் காமிக்ஸ் தொடர்களை ஆரம்பித்த இவர் 1948ல் கெளபாய் சார்ந்த காமிக்ஸ் கதைகளை படைக்க எண்ணிய சமயத்தில் உருவானதுதான் டெக்ஸ் வில்லர் பாத்திரம். இவர் 2001ல் இறந்து போனாலும்  இவரைத் தொடர்ந்து வந்த பல எழுத்தாளர் அதன் உயிர்ப்பை இன்றுவரை சுவாரஷ்யமாக வைத்திருக்கிறார்கள். டெக்ஸ் வில்லர் உருவானவுடனே இது மற்ற கதாநாயகர்களை பின்னுக்குத்தள்ளி முதலிடம் பெற்றது.

Giovanni Luigi Bonelli

பானெலியின் கதைகளுக்கு ஓவியராக அமைந்தவர் 1917ல் பிறந்த அரேலியோ காலெப்பினி. டெக்ஸ் வில்லரின் இதழ் 1 முதல் 400 வரை அனைத்து அட்டைப் படங்களையும் இவர் தான் வரைந்ததாகவும் 1994ல் இவர் மரணமடையும் வரை இவரே டெக்ஸ் வில்லருக்கு ஓவியராக இருந்திருக்கிறார். இன்றும் இத்தாலியில் பானெலி குழுமத்தின் மூலமாக நம்பர் 1 ஆகத் திகழ்ந்து சுமார் 2 லட்சம் பிரதிகள் விற்கின்றன என்று சொல்கிறார் பானெலி நிறுவனத்தின் தற்போதைய உரிமையாளர் டேவிட். இவர் நிறுவனரின் பேரன். இதுதவிர ஃபின்லாந்த், நார்வே, பிரேசில், ஸ்பெயின், துருக்கி, பிரான்ஸ், அமெரிக்கா, ஜெர்மனி, ரஷ்யா, ஹாலந்து ஆகிய பல நாடுகளில் அவரவர் மொழிகளில் இது வெளிப்படுகிறது.  (தகவல்கள் S. விஜயன் -லயன் காமிக்ஸ்)

இந்த வெளிநாட்டுக் கதா நாயகர்களுக்கு தமிழ் வடிவம் கொடுத்து மொழிபெயர்ப்பில் புதுமை படைத்து தமிழகத்தில் வெளியிட்டவர்கள் முத்து காமிக்ஸ், லயன் காமிக்ஸ் குழுமத்தின் தந்தையின் வழியில் வந்த தனயனான விஜயன் அவர்கள். தன்னுடைய தனிப்பட்ட காமிக்ஸ் ஆர்வத்தினால் இந்தக்குழுமத்தை தொடர்ந்து நடத்தி வருகிறார். உலகின் தலை சிறந்த காமிக்ஸ்களை தமிழில் அறிமுகபடுத்தி எங்களையெல்லாம் லண்டனுக்கும் பாரிசுக்கும் நியூயார்க்குக்கும் அழைத்து சென்றது இந்த நிறுவனம்தான். அந்தக் கதைகளில் ஈர்க்கப்பட்டுத்தான் நான் உலகப் பயணம் செய்கிறேன்.  நியூயார்க்கில் வந்து  வாழ்கிறேன். நியூயார்க்கிலிருந்து மதுரை சென்ற போது சிலமுறை முத்து காமிக்ஸ் நிறுவனத்திற்குச் சென்று வந்திருக்கிறேன். ஒரு முறை விஜயனைப் பார்க்கவும் எனக்கு வாய்ப்புக்கிட்டியது .

இந்தத் தீபாவளி மலர் எந்தத் தீபாவளிக்கு வந்தது என்று எனக்கு ஞாபகமில்லை. ஆனால் இப்போதுதான் படிக்க சந்தர்ப்பம் கிடைத்தது. இரண்டு நெடுங்கதைகள் இதில் உள்ளன. ஒன்று மரணதேசம் மெக்சிகோ, இரண்டாவது நீதியின் நிழலில்.

மரணதேசம் மெக்சிகோ :

இந்த டெக்ஸ் வில்லர் கதையை எழுதியவர் கிளாடியோ நிஸ்ஸி 1938ல் அல்ஜீரியாவில் 1981 முதல் பானெலி குழுமத்தில் இணைந்த இவர் 1983 முதல் 225 டெக்ஸ் கதைகளை எழுதியிருக்கிறார். CID ராபினை உருவாக்கியவரும் இவரே.  (தகவல் S .விஜயன் )

Paradesi with Vijayan

இந்தக் கதையின் ஓவியர் மேன்ஃபிரட் சமர். 1933-ல் ஸ்பெயினில் பிறந்த இவர் ஐரோப்பாவின் பல முன்னணி நிறுவனங்களில் பணியாற்றியிருக்கிறார். டெக்ஸ் கதைகளுக்கு இவர் முதன் முதலில் வரைந்தது இந்தக் கதைக்குத்தான்.  

மெக்சிகோ பார்டரில் கடத்தப்பட்ட குழந்தைகளை டெக்ஸ் வில்லரும் கிட் கார்சனும் எப்படிக் கண்டுபிடித்து மீட்கின்றனர் என்பதுதான் கதை. கடினமான குதிரைப் பயணம், சாவின் விளிம்பில் எப்போதும் இருப்பது, திட்டமிட்ட சாகசங்கள், மிகப்பெரிய கொடூரமான நிறுவனத்தை இருவராய் நின்று  வீழ்த்துவது என்று பரபரப்புக்கு பஞ்சமில்லாத கதை. ஆரம்ப முதல் இறுதிவரை விறுவிறுப்பு சற்றுக்கூட குறையவில்லை.

நீதியின் நிழலில்:

இதனை எழுதியவர் டி.ஆன்டோனியோ வரைந்தவர் ஃபிவிப்புச்சி. தான் சின்னவயதில் இருக்கும்போது தங்கள் கிராமத்தில் நுழைந்த அமெரிக்கப்படை தங்கள் அன்னை, தம்பி உட்பட  மொத்த கிராமத்தினரையும் கொன்று குவித்து விடுகிறார்கள். அந்த முழு தாக்குதலையும் வழிநடத்தியவன் லாபார்ஜ் என்ற ஸ்கெனட் ஒருவன். இவன் நாய்களைப் பழக்கி மனிதர்களை குறிப்பாக செவ்விந்தியர்களை வேட்டையாடுபவன். அதிர்ஷ்ட வசமாக உயிர் தப்பிய ஒரு செவ்விந்தியன் தான் வளர்ந்த பிறகும் தன் கிராமத்தலைவன் இட்ட கட்டளையை நிறைவேற்றி தேடியலைந்து  தன் நண்பனுடன் லாபார்ஜைக் கொல்ல விளைகிறான். அவன் கண்டுபிடித்தானா? பழி வாங்கினானா, இதில் வில்லர் எங்கே வருகிறார்? அடிபட்ட கார்சன் உயிர்பிழைப்பாரா? என்று சென்றும் கெளபாய் திரில்லர் இது.

வாங்கித்தான் படித்துப் பாருங்களேன். காமிக்ஸ் பிரியர்களுக்கு இது களிப்பான விருந்து. மற்றவர்கள் ஒருமுறை படித்தால்  டெக்ஸ் வில்லருக்கு வாசகராய் விடுவீர்கள்.

பானெலி குழுமம் வாழ்க, முத்து / லயன் காமிக்ஸ் குழுமம் வாழ்க, உங்கள் பணி தொடரட்டும், சிறக்கட்டும்.

-முற்றும்.

 

லாரன்ஸ் & டேவிட் !!!!!!!!!

படித்ததில் பிடித்தது

லாரன்ஸ் & டேவிட் துப்பறியும் “வான் வெளிக்கொள்ளையர்”

         அப்போதெல்லாம் என் வீட்டில் டிவி கிடையாது. ரேடியோவில், காலையில் ஒலிக்கும் திரைப்படப் பாடல்கள் (உபயம் : இலங்கை ஒலிபரப்புக் கூட்டுஸ்தாபனம்), திருச்சி வானொலி நிலையத்தில் வெள்ளிக்கிழமை இரவு ஒலிக்கும் முத்துச்சரம், புதன் இரவு தொடர் நாடகம், ஞாயிற்றுக்கிழமை வரும் ஒலிச்சித்திரம், இது தவிர தினத்தந்தியில் சிந்து பாத் (இப்போதும் வருகிறதாமே? முதுகில் இருந்து இறங்கி விட்டானா ?), கோகுலத்தில் “பலே பாலு”, அம்புலிமாமாவில் விக்ரமாதித்யன் (தன் முயற்சியில் சற்றும் தளராத) இவைகள்தான் உச்சபச்ச பொழுதுபோக்கு வீட்டுக்குள். வெளியே தேவதானப்பட்டி சிவராம் டாக்கீசில், அழுது வடியும் சிவாஜி படங்கள், ஆர்ப்பாட்டமான எம்ஜியார் படங்கள் (என் அப்பாவால் தணிக்கை செய்யப்பட்டவை மட்டும்) இல்லையென்றால் புராணப்படங்கள்.  

இதையெல்லாம் மீறி உன்னதமான பொழுதுபோக்காக இருந்தவை 'முத்து காமிக்ஸ்' கதைகள். இதில் வந்த சூப்பர் ஹீரோக்களின் சாகசங்கள் மனதைக்கவர்ந்தவை மட்டுமல்ல, நம்மையும் சாதிக்கத் தூண்டுபவை. இவர்களுள் எனக்கு மிகவும் பிடித்த ஜோடிகளில் ஒன்று லாரன்ஸ் & டேவிட். இவர்களின் சாகசங்கள் அடங்கிய "வான் வெளிக்கொள்ளையர்"--ன் மறுபதிப்பை சமீபத்தில் வாசித்தேன்.

இந்தக் கதைகள் எல்லாம் எத்தனை கனவுகளை எனக்குள் புதைத்தன, எவ்வளவு அறிவாற்றலை விதைத்தன என்பதை நினைத்துப் பார்க்கும் போது மிகவும் ஆச்சரியமாயிருக்கிறது.

1960-களில் அறிவியலில் முன்னேற்றமடைந்த நாட்டிலிருந்து வெளிவந்த இந்த காமிக்ஸ்கள் 1970-களில்தான்  நமக்கு தமிழில் கிடைத்தாலும், எவ்வளவு புதுமைகளை எனக்குள் சொல்லியிருக்கிறது என்பதைத்தான் உங்களோடு பகிர்ந்து கொள்ள விழைகிறேன்.

வெளி நாட்டின் முக்கிய இடங்கள்:

'வான்வெளிக் கொள்ளையர்' காமிக்ஸில், லாஸ் ஏஞ்சலஸில் ஆரம்பித்து, ஹீயூஸ்டன், டெக்சஸ், அரிஜோனா மாநிலம், நியூயார்க் மற்றும் லண்டன் ஆகிய இடங்கள் வருகின்றன.  

யோசித்துப்பாருங்கள், எட்டு வயதிலிருந்து 10 வயதுக்குள் இந்த இடங்களெல்லாம் எனக்கு அறிமுகமாகிவிட்டன. இப்போது மேலே குறிப்பிட்ட அனைத்து இடங்களையும் நேரில் பார்த்துவிட்டதோடு, நியூயார்க்கில்தான் வாழ்கிறேன் என்று நினைத்தால் அது ஆச்சரியம் இல்லையா.

படிப்பதோடு இந்த இடங்களையெல்லாம் நேரில்பார்க்கத்தூண்டியது இந்த காமிக்ஸ்கள்தான் என்றால் நம்புவீர்களா?.

'மஞ்சள் பூ மர்மம்' தான் லண்டனின் தேம்ஸ் நதியைப் பார்க்கத்தூண்டியது.

தலைகேட்ட தங்கப்புதையல்தான் - மெக்சிகோவை பார்க்கத்தூண்டியது.

அது மட்டுமல்ல இந்த இடங்களுக்கெல்லாம் நேரில் சென்ற போது புதிதாகப் பார்ப்பது போலவே எனக்குத் தெரியவில்லை. இன்னும் பார்க்க வேண்டிய இடங்கள் லிஸ்ட்டில் இருக்கின்றது.

விமானங்கள்:

விமானங்களை பக்கத்தில் பார்ப்பதற்கு எனக்கு வெகுகாலம் பிடித்தது. எங்கள் ஊரின் மேலே தொலைதூரத்தில் ஜெட் விமானம், வானத்தில் வெள்ளைக்கோடைப் போட்டுக் கொண்டு போகும் போது, நாங்கள் வெளியே வந்து விமானம் மறையும் வரை பார்ப்போம். ஆனால் காமிக்ஸ் மூலம் நான் விமானத்தில் பயணித்தேன், விமானங்களைப் பற்றி அறிந்துகொண்டேன். குறிப்பாக 'வான்வெளிக்கொள்ளையர்' காமிக்ஸ் மூலம் நான் அறிந்து கொண்ட பலவற்றுள் சில கீழே.

·         விமானத்தில் தானே செலுத்தும் கருவி.

·         சுவாசக்கவசம்

·         ஹெலிகாப்டர்

·         பாராச்சூட்

·         பெரிய விமானம் சின்ன விமானத்தை விழுங்குதல்.

·         ரடார்

·         சூப்பர்சானிக் போர் விமானங்கள்.

யோசித்துப்பாருங்கள் அந்த வயதில் எத்தனை புதிய விஷயங்கள்.

அதிநவீன விஞ்ஞானம்:

அதுமட்டுமல்ல, அலாரம் பொருத்தப்பட்ட அடையாள வில்லை, பென்சில் ரேடியோ, டிரான்ஸ்மிட்டர்கள், அணு ஆராய்ச்சி நிலையம், மேலும் கம்ப்யூட்டர் பிரிவு. நான் ஐந்தாவது படிக்கும் போதே கம்ப்யூட்டர்களைப்பற்றி தெரிந்து கொண்டது காமிக்ஸ் மூலம் தான். ஆனால் உபயோகப்படுத்த ஆரம்பித்தது முதுகலை முடித்து மூன்றாவது வேலையில் தான்.  

ஜூடோ டேவிட்:

சிலம்பம், மல்யுத்தம், குத்துச்சண்டை, என்பவை பற்றித்தான் தெரியும். கராத்தே பற்றி அரசல் புரசலாக கேள்விப்பட்டிருந்தேன். ஆனால் ஜூடோ பற்றி அறிந்து கொண்டது காமிக்ஸ் மூலம் தான். காமிக்ஸ்களை படித்துவிட்டு என் அப்பாவிடம் ஏராளமான கேள்விகளைக் கேட்டு அவரைத் திணறடித்தது ஞாபகம் வருகிறது.

அகொதீக:

லாரன்ஸ் & டேவிட் கதைகள் மட்டுமல்லாமல் இரும்புக்கை மாயாவியின் கதைகளிலும் இந்த கிரைம் குரூப் வரும். அழிவு, கொள்ளை, தீமை கழகம் என்பது அதன் விரிவாக்கம். சில்லறைத் திருட்டுகளைப்பற்றி மட்டும் அறிந்த என் போன்றோர் 'ஆர்கனைஸ்டு கிரைம்' பற்றித் தெரிந்து கொண்டது காமிக்ஸ் மூலம்தான். அவ்வளவு உயர்ரக ஆயுதங்களைப் பயன்படுத்தும் ராணுவம் போன்ற கட்டுப்பாடுள்ள அகொதீக வைப் பற்றி படித்துவிட்டு ஜெய்சங்கர் படங்களில் வரும் கொள்ளைக் கூட்டத்தையும், கூட்ட பாஸையும் பார்க்கும் போது சிரிப்புதான் வரும்.

தி.மு.க, அ.தி.மு.க, ம.தி.மு.க, அகொதீக என்று ரைமிங்காக வரும் கழகம் என்ற கடைச் சொல்லைப் பயன்படுத்திய அப்போதைய ஆசிரியர் தைரியம் உடையவர்  மட்டுமல்ல கிண்டலும் பிடித்தவர்தான்.  

விச்சு & கிச்சு:

காமிக்சின் முழுக்கதையின் பின் இணைப்பாக தலைகாட்டும் விச்சு & கிச்சு வைப்படித்துவிட்டு வாய்விட்டுச் சிரித்திருக்கிறேன். லாரல் & ஹார்டியை நினைவுபடுத்தும் விச்சு & கிச்சு, மன்னிக்க லாரல் & ஹார்டியைப் பின்னர் பார்க்கும் போது விச்சு & கிச்சு தான் ஞாபகம் வருகிறது.ஒவ்வொரு தடவையும் மேதாவி போல் முடிவு எடுத்து மூக்குடையும் விச்சு கேரக்டரையும், விச்சுவின் முயற்சி எதிர்மறையாக ஆகும் போது, சிரிக்காமல் கமெண்ட் அடிக்கும் கிச்சுவையும் எப்போதும் ரசிக்கலாம்.

என் வாழ்க்கையிலும் விச்சு போன்ற எத்தனை கேரக்டர்களைப் பார்த்திருக்கிறேன்.

மொத்தத்தில் எப்போது படித்தாலும், காமிக்ஸ்கள் சுவையாகவே இருக்கின்றன. புதியவற்றை  கற்றுக் கொள்ள துணையாகவே இருக்கின்றன. அதோடு காமிக்ஸ் கிளாசிக்ஸ் படிக்கும் போது பழைய நினைவுகளைத் தூண்டி 'நாஸ்டால்ஜிக்' உணர்ச்சிகள் துள்ளி வருகிறது. புதுவடிவில் வருவதை நன்றி சொல்லி வரவேற்கிறேன், கலரில் கொடுத்தால் இன்னும் மகிழ்ச்சியடைவேன்.  

லாரன்ஸ் & டேவிட்  வரும் எனக்குப்பிடித்த காமிக்ஸ்கள்:

1.    திசைமாறிய கப்பல்கள்

2.    மஞ்சள் பூ மர்மம்

3.    ஃபிளைட் 731

4.    காற்றில் கரைந்த கப்பல்கள்

5.    ஃபார்முலா X13

6.    சிறைப்பறவைகள்

7.    பனிக்கடலில் பயங்கர எரிமலை

8.    ஃபார்முலா திருடர்கள்

முற்றும்

தங்கக் கொள்ளையரும் நவஜோ வீரர் டெக்ஸ் வில்லரும் !!!!!!

 கார்சனின் கடந்த காலம்

முத்து/ லயன் காமிக்ஸ்களுக்கு  உலகமெங்கும் தீவிர ரசிகர்கள் உண்டு. அவர்களில் அடியேனும் ஒருவன். முத்து காமிக்ஸ் என்ற பெயரில் முதலில் வெளிவந்த போது பொறுப்பாசிரியராக முல்லை தங்கராசன் இருந்த காலத்திலிருந்து (1972 முதல் ஜூன் 1974 வரையில்) இந்தப் புத்தகங்களை தொடர்ந்து படித்து வரும் ஆயிரக்கணக்கான குழந்தைகளுள் நானும் ஒருவன் என்பதை ஏற்கனவே சிலமுறை உங்களிடம் சொல்லியுள்ளேன். முத்து காமிக்ஸின் நிறுவனர் திரு சௌந்தரபாண்டியன் அவர்களின் பின் அவர் மகன் விஜயன் தலையெடுத்த பிறகு லயன் ஆரம்பிக்கப்பட்டது. பின்னர் வந்தது 'திகில் காமிக்ஸ்'. அந்த வரிசையில் இப்போது புதிதாக வருவது 'சன்ஷைன் லைப்ரரி' (Sun Shine Library) என்ற புதிய வடிவில் வெளிவரும் வண்ணமிகு கிராபிக் நாவல்கள். அப்படி சமீபத்தில் வெளிவந்த முழு நீளச் சித்திரக்கதைதான் "கார்சனின் கடந்த காலம்".

முத்து காமிக்ஸில் முதலில் வலம் வந்த சூப்பர் ஹீரோக்களான, இரும்புக்கை மாயாவி, ஜானி நீரோ/ஸ்டெல்லா, லாரன்ஸ் & டேவிட், ஆகியோருக்கு அடுத்த வரிசையில் வரும் முக்கியமான ஜோடி டெக்ஸ் வில்லரும் (இரவுக்கழுகார்) கிட் கார்சனும். 1948-ல் இத்தாலியில் வெளிவந்த காமிக்ஸ்தான்  இதன் மூலம்.

 அமெரிக்காவில் ஆங்காங்கு பரவலாக  வசித்துவந்த செவ்விந்தியர்கள் சிறுசிறு குழுக்களாகப் பிரிந்து வாழ்ந்தனர். அந்தச் சமயத்தில் அமெரிக்காவுக்கு புதிய எதிர்காலத்தை நாடி அலை அலையாக ஏராளமான ஐரோப்பியர்கள் முடிபுகுந்தனர். வந்தேறிய வெள்ளைக்காரர்களை, பூர்வகுடிகளான சிவப்பிந்தியர் எதிரிகளாகப் பார்த்து கடுமையாக எதிர்த்தனர். ஆனால் அவர்களால் நவீன ஆயுதங்களை எதிர்த்து நிற்கமுடியவில்லை. அதோடு அவர்கள் சிறிய குழுக்களாக தனித்தனி தலைவர்கள் கீழ் வாழ்ந்து வந்தனர். காலக்கிரமத்தில் செவ்விந்தியர் எதிர்த்து அழிந்துபட்டனர். சிலர் ஆதரித்து இணைந்தனர், சிலர் நாகரிக வாழ்வைத் தழுவி, இப்போது பெரும்பாலும் ஒன்றாக கலந்துவிட்டனர்.

முக்கியமாக மிட்வெஸ்ட் மற்றும் டெக்சஸ், அரிஜோனா பகுதியில் இருந்தனர். அங்கே சிறுசிறு நகரங்கள் எழுந்த போது, அமெரிக்க அரசாங்கம் அந்த ஊர்களுக்கு பாதுகாப்பாக ஷெரிஃப்களை நியமித்தது. அதோடு ஒவ்வொரு பகுதிக்கும் ரேஞ்சர்களை நியமித்தது. கைத் துப்பாக்கியை கண நேரத்தில் எடுத்து சுட வல்லவர்கள் இவர்கள். சட்டத்தின் காவலர்களாகவும், மக்களின் பாதுகாவலர்களாகவும், கொள்ளைக்காரர்களை பிடிக்கவும் இவர்கள் பயன்பட்டார்கள்.

இந்த வரிசையில் 'wild west' என்ற பகுதியின் ஹீரோக்களாக சிலகாலம் வெற்றிகரமாக வலம் வந்தவர்கள் குதிரை வீரன் கிஸ்கோகிட் மற்றும் பாஞ்சோ.

 அதன்பின் அறிமுகப்படுத்தப்பட்ட வீரர்தான் செவ்விந்தியக் குழுவில் புகழ்பெற்ற ஒரு பழங்குடியினர் ஆன நவஹோக்களின் (NAVAJO-இந்தப்பெயர் நமது காமிக்ஸில் 'நவஜோ' என்ற குறிப்பிடப்பட்டிருக்கும்)   தலைவர்களுள் ஒருவரான 'இரவுக்கழுகு' என அழைக்கப்படும் டெக்ஸ் வில்லர் தான் நம் கதையின் ஹீரோ. அவருக்கு எப்போதும் உறுதுணையாக இருக்கும் இன்னொரு வீரர் கிட் கார்சன், இருவரும் டெக்சஸ் ரேஞ்சர்கள்தான். நம்மூரில் இருக்கும் ஃபாரஸ்ட் ரேஞ்சர்கள் போன்றவர்கள். 

Tex Villar

குறிப்பாக இந்த நாவலில் இரவுக்கழுகாகும் அவர் மகனும் கிட் கார்சனை நோக்கிச் செல்லும் பயணத்தில் கிட் கார்சன் இளமைப் பருவத்தில் நடத்திய ஒரு சாகச நிகழ்வை தன் மகனிடம் கதைபோல் சொல்லிக் கொண்டு வருகிறார். பின்னர் அவர்கள் கார்சனிடம் இணைந்து திரும்பவும் ஒன்று சேர்ந்து தங்கக் கொள்ளையர்களை எப்படி முறியடிக்கிறார்கள் என்பதுதான் கதை. 

'சன்ஷைன் லைப்ரரி' வெளியீடான இந்த நாவல் உயர்தர வளவளப்பான லித்தோ பேப்பரில் பல வண்ணங்களில் அச்சிடப்பட்டு சிவகாசியிலிருந்து நியூயார்க் வந்து சேர்ந்தது.

Gian Luigi Bonelli

இந்தக் கதையை எழுதியவர்  Gian Luigi Bonelli. இதற்கு அருமையான ஓவியங்கள் தீட்டியவர் Aurelio Galleppinni.

Aurelio Galleppinni

   இதில் முத்துகாமிக்சுக்கு என்ன பெருமை என்றால், மிகச் சிறந்த மொழிபெயர்ப்பு மற்றும் எடிட்டிங். அதுமட்டுமல்ல சிறந்த கதைகளைத் தேர்ந்தெடுப்பதிலும் அதன் உரிமையாளர் விஜயன் சிறந்தவர்தான். அவர்தான் மொழிபெயர்க்கிறார் என்று நினைக்கிறேன். அதையும் புத்தகத்தில் குற்ப்பிட்டால் நலமாய் இருக்கும். 

நமது பிள்ளைகளுக்கும் இந்த மாதிரி புத்தகங்களை அறிமுகப்படுத்துங்கள். தமிழ் மொழியில் ஆர்வம் பிறப்பதோடு, இந்தப் புத்தகங்கள் அவர்களுடைய கற்பனை வளத்தையும் வளர்க்கும். அதோடு கேட்ஜெட்டுகளுக்கு அடிமைகளாக ஆவதையும் தடுக்கும்.

என்னுடைய கற்பனையில் கொஞ்சம் தொப்பி வைத்து ஒரு நல்ல அரபுக்குதிரையில்  ஏறினால் நானும் கிட்டத்தட்ட டெக்ஸ் வில்லர் போலதான் இருப்பேன்

“ஏலே சேகரு  வேணாம்  , ஒத்தக்கையன்னு பாக்கிறேன் , உன்னைப்பார்த்தா

டெக்ஸ் வில்லர் மாறியா தெரியுது எக்ஸ் வில்லன்    மாறியில்ல தெரியுது”.

“அடப்பாவி இந்த மகேந்திரன் எங்க இருந்து வாரான்னே  தெரியமாட்டேங்குதே”

- முற்றும்.