நியூயார்க்கில் ஒரு பரத நாட்டிய விழா !!!!!!

Subiksha 

நண்பர் செந்தமிழ்ச்செல்வன், பரிமளா தம்பதியினரின் மூத்த மகள் சுபிக் ஷாவின் பரதநாட்டிய அரங்கேற்றத்திற்கு அழைப்பிதழ் மூன்று மாதம் முன்னேரே எனக்கு வந்துவிட்டது.  வந்தவுடனே கண்டிப்பாகச் செல்ல முடிவெடுத்து நாளைக் குறித்து வைத்துக் கொண்டேன். அது கடந்த சனிக்கிழமை (09.16.2017) அன்று ஃபிளஷிங்கில் உள்ள ஹிண்டு டெம்பில் கலையரங்கத்தில் இனிதே நடந்தேறியது. மாலை 4:30  மணியளவில் ஆரம்பித்து 9:00 மணியளவில் முடிந்து பின்னர் இரவு உணவுடன் நிறைவு பெற்றது.

Add caption

மாலை  4:00 மணிக்கெல்லாம் பரதேசி அங்கு ஆஜர். நண்பர்கள் தமிழ்ச் சங்கத் தலைவர்கள் சிவபாலன் தம்பதியினர், ரங்கநாதன் தம்பதியினர், விஜயகுமார் தம்பதியினர் பாலா தம்பதியினர் ஆகியோர் ஏற்கனவே வந்து வரவேற்க அவர்கள் அருகில் இருந்த இருக்கையில் அமர்ந்து கொண்டேன். தலைவர்கள் பக்கத்தில் அமர்ந்ததாலோ அல்லது என் புகழ் (?) பெருகியதாலோ என்னவோ, பலர் வந்து எங்களை போட்டோ எடுத்தனர். இது சாப்பிடுவது வரை தொடர்ந்தது.

இந்த அரங்கேற்றத்திற்கு எப்படியெல்லாம் திட்டமிட்டார்கள் என்பதைக் கண்டு வியப்பில் ஆழ்ந்தேன். முதலாவதாக இதற்கென ஒரு வெப்சைட் இணையதளம் (http://subhiksha.net) உருவாக்கப்பட்டது. பிறகு நண்பர்களுக்கு ஒரு எலக்ரானிக் அழைப்பிதழ் அனுப்பப்பட்டது. அதுவும் மூன்று மாதங்களுக்கு முன்னரே. அதன்பின்னர் இரண்டு மாதம் முன் அழகிய அழைப்பிதழ் வந்து சேர்ந்தது. அழைப்பிதழுக்கென்று தனிப்பட்ட ஃபோட்டோ ஷூட் செய்யப்பட்டது, அதனைப் பார்க்கும் போதே தெரிந்தது. பல வண்ண ஆஃப்செட்டில் சுபிக்ஷா பலவித உடைகளில் நடன முத்திரைகள் பிடித்து நின்றிருந்தாள். அவ்வப்போது மறந்துவிடக் கூடாது  என்றெண்ணி ஈமெயில் ரிமைன்டர்கள் வந்து கொண்டேயிருந்தன.

With Guru Sathya Pradeep 

அரங்கின் முன் ஆங்காங்கே சுபிக்ஷாவின் சிறிய அளவு கட் அவுட்கள் வைக்கப்பட்டிருந்தன. எல்லா போட்டோக்களிலும் சுபிக்ஷா புன்னகைத்துக் கொண்டிருந்தாள். அந்தப் புன்னகை ஆடும்போது துவங்கி முடியும் வரை நிலைத்திருந்தது ஆச்சரியம்தான்.

Dr.Aparna Sharma

மேடையின் திரைகள் உயர்ந்ததும், இடது புறத்தில் சுபிக்ஷாவின் குரு சத்யா  பிரதீப் பெருமையுடன் நடுநாயகமாக அமர்ந்திருக்க அவர் அருகில் பாடகர் டாக்டர் அபர்னா ஷர்மா, வலது புறம் மிருதங்க வித்வான் B.V.கணேஷ், மறுபுறம் புல்லாங்குழல் C.K.பதஞ்சலி மற்றும் வயலின் வித்வான் C.K.விஜயராகவன் இருந்தனர். குரு தவிர மற்ற எல்லோரும் இந்தியாவிலிருந்து வந்தவர்கள். அவரவர் துறைகளில் விற்பன்னர்கள் என்று அறிமுகப் படுத்தியதோடு மட்டுமல்ல வாசிக்கும் போதும் தெரிந்தது. குரு சத்யா  பிரதீப், (www.satyapradeep.com)  லாங் ஐலண்டில் “நிருத்ய சாகரம் டான்ஸ் அக்கெடெமி” என்று நடனப் பள்ளியை ஆரம்பித்து நடத்தி வருகிறார். பல நாட்டிய நிகழ்ச்சிகளை நடத்தியவர். எனக்கு ஏற்கனவே அறிமுகம் ஆனவர் .

சிறப்பு விருந்தினர்களாக பிரபல நடன ஆசிரியர் கலைமாமணி ஜெயந்தி சுப்ரமணியமும் பேரூர் ஆதீனம் தவத்திரு மருதாச்சல அடிகளாரும் இந்தியாவிலிருந்து வந்திருந்தார்கள்.      

ஜெயந்தி சுப்ரமணியம் ஆங்கிலத்தில் ஒரு அற்புத உரையாற்றினார். சுபிக்ஷாவின் நடனத்தின் சிறப்புகளை எடுத்துக் காட்டியதோடு பரதக் கலையின் பெருமைகளையும் விளக்கினார்.

பேரூர் மருதாசல அடிகளார் தமிழில் தொடங்கி ஆங்கிலத்திற்குத் தாவினார். அவரின் உரையின் சாராம்சத்தை தமிழிலேயே சொல்லியிருந்தால் இன்னும் சிறப்பாக இருந்திருக்கும்.

மேடையின் மறுபுறம் கலையரசன் தில்லையம்பல நடராஜனின் நடன விக்கிரகம் அமைக்கப்பட்டு அலங்கரிக்கப் பட்டிருந்தது.

நிகழ்ச்சி பரதக்கலை பிறந்த தஞ்சை வழுவூரில் இருக்கும் ஸ்தல விக்கிரகங்களுக்கு ஜெபப் பாடலுடன் துவங்கியது. அடுத்து நாட்டை ராகத்தில் மிஸ்ரஜம்ப தாளத்தில் ஜம்ப் செய்து சுபிக்ஷா உள்ளே வந்து பஞ்சமூர்த்தி அஞ்சலியில் தெய்வங்களுக்கும்,  குருவுக்கும், இசைக்குழுவுக்கும் வந்திருந்த அனைவருக்கும் வணங்கி வரவேற்ற விதத்தில் நிகழ்ச்சி சூடுபிடிக்க ஆரம்பித்தது.

அதற்கு அடுத்து வந்த “அலரிப்பு, ஜதீஸ்வரம், வர்ணம், பதம், திருப்புகழ், தில்லானா ஆகிய அரங்கேற்ற வரிசைகளைத் தொடர்ந்து ஆடி பிறகு மங்களம் பாடி முடிந்தது. ஒவ்வொரு நடனத்திற்கும் ஒவ்வொரு உடையில் மொத்தம் ஏழு உடைகளில் சுபிக்ஷா ஆடியபோது சில சமயங்களில் நியூயார்க்கில் இருக்கிறோமா? இல்லை ஏதோ இந்திரலோகத்தில் இருக்கிறோமா என்ற சந்தேகம் எழுந்தது.

குறிப்பாக நடனத்தின் சிறப்பு அம்சமாக 40 நிமிடம் ஆடிய வர்ணத்தில் தசாவதாரத்தின் பத்து அவதாரங்களை சுபிக்ஷா  தன் முத்திரைகள், முக உணர்ச்சிகள் மூலம் வெளிப்படுத்திய விதம் பிரமிக்க வைத்தது. கூர்மத்தில் ஆரம்பித்து கல்கிவரை பார்த்த எல்லோராலும் எளிதாக விளங்கிக் கொள்ளும் வகையில் அமைந்திருந்தது மிகவும் பாராட்டத்தக்கது.

அதோடு பாடப்பட்ட பாடல்கள் எல்லாமே தமிழ்ப்பாடல்களாக ஒலித்தது மிகவும் பாராட்டப்படக் கூடிய ஒன்று. தமிழகத்தில் அதுவும் தஞ்சைத் தரணியில் தோன்றிய கலையை ஆட,  ஏன் புரியாத தெலுங்கு கீர்த்தனைகளைப் பயன்படுத்த வேண்டும். இதனை செந்தமிழ்ச் செல்வன் செய்யாமல் வேறு யார் செய்யமுடியும்? . குறிப்பாக பதத்திற்கு பாடிய பாபநாசம் சிவன் பாடலான “தேவி நீயே துணை”. பிரபல கர்நாடகப் பாடகி அருணா சாய்ராம் பாடிப்புகழ் பெற்ற “மாடு மேய்க்கும் கண்ணே” ஆகிய பாடல்கள். அதோடு TMS-ன்  கம்பீரமான   குரலில் ஒலித்த “முத்தைத்திரு” என்ற அருணகிரிநாதரின் பாடல் அபர்ணா ஷர்மாவின் அருமையான குரலில் ஒலிக்க சுபிக்ஷா அபிநயம் பிடித்தது நடன நிகழ்ச்சியின் ஹைலைட் என்று சொல்லலாம். தொடர்ந்து வந்த காவடி ஆட்டமும் மிகச்சிறப்பாக அமைந்தது.

குரு சத்யா ப்பிரதீப்பின் கைத்தாளமும். சுபிக்ஷாவின் கால் சலங்கையும் ஏதோ ரிமோட் கன்ட்ரோல் போல ஒருமுறை  கூட  அச்சுப்பிரளாமல் ஒன்றாக ஒலித்தது. சத்யா ப்பிரதீப்பின் கொன்னக் கோலும் பி.வி. கணேஷின் மிருதங்கமும் அச்சரம் கூட மாறாமல் இருந்தது. அதே மாதிரி அபர்ணா ஷர்மாவின் பாடலும் விஜயராகவனின் வயலினும் ஒன்றோடு ஒன்று இழைந்து  உறவாடி, குரல் எது வயலின் ஓசை என்று  தெரியாத வண்ணம் இனிமையாக ஒலித்தது.

சுபிக்ஷா வைப்பற்றிய குறும்படம் (?) பிக்பாஸ் குறும்படம் போலன்றி மிகவும் சுவாரஷ்யமாக இருந்தது நல்ல ஒரு தொகுப்பு. மற்ற பெற்றோர்களும் இதனைப் பின்பற்றலாம்

பரத நாட்டியம் ஒன்றுக்கே நேரம் பத்தாது என்று நினைத்தால் சுபிக்ஷா பியானோ மற்றும் வயலின் வாசிப்பதிலும் அதோடு கர்நாடக சங்கீதத்தைப் பாடுவதிலும் சிறந்தவள் என்று கேள்விப்பட்டேன். அப்ப படிப்பு எப்படி? என்று கேட்டால் அவுட்ஸ்டான்டிங் அவார்டு, கோல்டன் ஸ்டுடன்ட் அவார்டு  வாங்கிய சுபிக்ஷா விளையாட்டையும் விட்டு வைக்க வில்லை .அவள் பள்ளியின் டென்னிஸ் பிளேயராம்.

சுபிக்ஷா நிச்சயமாக  கடவுளின் ஆசிர்வதிக்கப்பட்ட குழந்தை என்பது மட்டுமல்லாமல் அவளை ஒன்றில் சிறக்க மற்றொன்றை விடவேண்டியதில்லை என்று மற்ற மாணவர்களுக்கு உணர்த்தும் உதாரண மாணவியாகவே பார்க்கிறேன். செந்தமிழ்ச் செல்வனும் பரிமளாவும் கொடுத்து வைத்தவர்கள் தான்.

With the Proud Family

மற்ற எல்லா ஏற்பாடுகளையும் சிறப்பாகச் செய்திருந்தார்கள் குறிப்பாக இரவு உணவு. அலங்கரிக்கப்பட்ட வட்ட மேஜைகளில் உட்கார்ந்து சாப்பிட அறுசுவை விருந்து இருந்தது. எங்கெங்கு எதுவெல்லாம் நன்றாகச் செய்வார்கள் என்று ஆய்ந்து கோதாவரி, தோசா ஹட் போன்ற பல உணவகங்களிலிருந்து பதார்த்தங்கள் வரவழைக்கப்பப்படிருந்தன. நன்றிப் பரிசாக மாட விளக்கையும் தேடித்தேடி ஒவ்வொரு குடும்பத்திற்கும் கொடுத்தனர்.

ஒரு திருமண விழாவுக்கும் மேலாக இந்த அரங்கேற்றம் நடைபெற்றது.

செந்தமிழ்ச் செல்வனின் மொத்த சேமிப்பையும் தன் மகள் சுபிக்ஷாவின் அரங்கேற்றத்திற்கே செலவழித்து விட்டாரோ என்று எண்ணத்தோன்றியது.

சத்யா  பிரதீப்பின் மகள் மாஸ்டர் ஆஃப் செரிமணி பண்ணியதும் சிறப்பாக இருந்தது.

புலம் பெயர்ந்த தமிழ்மக்கள் தம் மொழி, கலை, இலக்கியம் ஆகியவற்றை மறந்தும் துறந்தும் விடாமல் தங்கள் அடுத்த தலைமுறைக்கு எடுத்துச் செல்லும் முயற்சியில் தொடர்ந்து ஈடுபட்டுக் கொண்டிருக்கிறார்கள் என்பதற்கு இந்த நாட்டிய அரங்கேற்றம் ஒரு சிறந்த உதாரணம்.

-முற்றும்.

  

அதிசயப்பண்டமும் அக்ரோபேட்டிக் ஷோவும்!!!!!!!!!!!!

சீனாவில் பரதேசி -21

இதற்கு முந்திய பகுதியைப்படிக்க   இங்கே சொடுக்கவும் 

http://paradesiatnewyork.blogspot.com/2016/08/blog-post_29.html

லீ சிரித்துக் கொண்டே என்னை உற்றுப்பார்த்தான். அவன் பார்த்து,  "நீ பிறக்கும்போதே இப்படித்தான் இருந்தியா இல்லை, இப்படித்தான் பிறந்ததிலிருந்து இருக்கியா ?" என்று. நானும் விளங்காமல் பார்க்க அந்த நீண்ட வரிசையில் என்னை நிற்க வைத்துவிட்டு விலகிச் சென்று தியேட்டருக்குள் சென்று மறைந்தான் . அந்த வரிசையில் முன்னும் பின்னும் இருந்தவர்களிடம், “அந்த லைன் எங்கே செல்கிறது?”, என்று நான் கேட்டதைக் கேட்டு அவர்கள் முழிக்க, அவர்கள் அதற்கு சொன்ன பதிலோ என்னவோ கேட்டு நான் முழிக்க கொஞ்சம்  சமாளித்துக் கொண்டு எனக்குத் தெரிந்த ஒரே சீன வார்த்தையான "சிசியே" என்றேன் (நன்றி). அதைக் கேட்டு அவர்கள் மேலும் முழித்தனர். வரிசை கொஞ்சம் கொஞ்சமாக  குறைந்த போது முன்னால் பார்த்தால், வரிசையில் நிற்பவர்கள் ஏதோ ஒரு பண்டத்தை வாங்கிக் கொண்டு சென்றார்கள். வரிசை இன்னும் கிட்டே சென்றபோது அந்தச் சிறு கடையின் உள்ளே பெரிய வாணலியில் ஏதோ சுட்டுக் கொண்டு இருந்தனர்.  சட்டியிலிருந்து எடுக்க எடுக்க சுடச்சுட வாங்கிக் கொண்டு போனார்கள்.

லீ  இன்னும் வந்து சேராமலேயே, என் முறை வந்துவிட்டது. அருகில் பார்த்தபோது  நம்மூர் தவளை வடை போன்று ஒன்றை எண்ணெயில் பொரித்துக் கொண்டிருந்தனர். ஆனால் அது நல்ல அடர்ந்த பிரௌன் கலரில் இருந்தது. நான் அந்தக் கடைக்காரப் பெண்ணிடம் ஏதோ கேட்க, அவள் சொல்ல முயல ஒன்றும் புரியாமல் என்ன செய்வதென்று தெரியாமல் திகைத்து நின்றேன். அதற்குள் என் பின்னால் நின்ற நீண்ட வரிசையில் சலசலப்பு   எழுந்தது.

சைகையில் நாலு கொடு என்று சொல்லிவிட்டு, எவ்வளவு  என்று தெரியாததால் வாலட்டிலிருந்து கொஞ்சம் பணத்தை எடுத்துக் கொடுத்து, மீதம் கொடுத்ததை எடுத்துக் கொண்டு நகர்ந்தேன்.  

பக்கத்திலிருந்த தியேட்டரின் உயரமான படிகளிலிருந்து லீ இறங்கி ஓடி வந்தான். அவனை நான் முறைக்க அவன் "சாரி டிக்கட்டை பேரம்பேசி வாங்கி வந்தேன்" என்றான்.

"அதைவிடு இது என்ன பண்டம், ஒண்ணுமே சொல்லாமல் போயிட்டியே".

“இதற்குப் பெயர் ?&!!@”

வாயில் நுழையும் பண்டங்களுக்குக்கூட வாயில் நுழையாத பேர்களை ஏன் வைக்கிறார்களோ என்று நொந்து கொண்டே, “சரி பரவாயில்லை , இந்தச் சுருக்கமான பண்டத்திற்கு ஏன் இவ்வளவு பெருக்கமான வரிசை ?”.

“இது சீனப் பேரரசர்கள் மற்றும்  அரச குடும்பத்தினர் மட்டுமே சாப்பிட்ட பண்டம். இது இப்போது பொது மக்களுக்கும் கிடைப்பதால் இவ்வளவு கூட்டம், சரி சரி சீன ஷோவுக்கு நேரமாச்சு ஓடு. நாளைக்காலை 9 மணிக்கு வருகிறேன்”.

உடனே அவனுக்குச் சேர வேண்டிய 160 யுவானைக் கொடுத்தேன். கையில் கொடுத்த டிக்கட்டில் விஐபி 220 யுவான் என்று போட்டிருந்தது.

“ஐயையோ எனக்கு எதற்கு விஐபி டிக்கட் வாங்கினாய் இது ரொம்ப அதிகம்”.

“கவலைப்படாதே இது விஐபி டிக்கட்தான். ஆனால் நீ  60 யுவான் கொடுத்தால் போதும்”

“என்னோட கைட் லைசென்ஸைக் காட்டினால் எனக்கு நல்ல டிஸ்கவுன்ட்  கொடுப்பார்கள்” என்றான்.

220 யுவான் டிக்கட் ,60 யுவானுக்கு கிடைக்கிறது என்பதை நம்ப முடியாமல், சீனாவில் எதுவும் நடக்கும் என்று நினைத்தேன். அந்த டிக்கட்டை வாங்கிக் கொண்டு அவனிடம் விடைபெற்றுக் கொண்டு ஷோவுக்கு நேரமாகிவிட்டதால் ஓடி  தியேட்டரில் நுழைந்தேன்.

விஐபி டிக்கட்டை கையில் வைத்துக் கொண்டு, "ஆஹா நானும் விஐபிதான், நானும் விஐபிதான்”  என்று சொல்லிக் கொண்டே உள்ளே நுழைந்தால் ஒரே இருட்டாக இருந்தது.கொஞ்ச நேரத்தில் கண்கள் பழகிவிட,  தியேட்டரின் பின்புறம் காலியாக இருந்தது. முன்புறத்தில் சிலர் உட்கார்ந்திருந்தனர். அதற்குள் சீனப்  பணியாளன் விரைந்து வந்து நம்மூர் போலவே டார்ச் அடித்து டிக்கட்டைப் பார்த்தான். நானும் நெஞ்சை நிமிர்த்தி பெருமையுடன் பார்த்தேன். ஆனால்  நான் எதிர்பார்த்த விஐபி டிரிட்மென்ட் ஒன்றும் கிடைக்கவில்லை. அலட்சியமாக எங்கேயாகிலும் உட்காரலாம் என்றான். நகர்ந்து முன்னால் சென்றால் சில முன்வரிசைகள் நிரம்பியிருக்க, காலியாக இருந்த ஒரு இருக்கையில் அமர்ந்தேன். என் முன்னால் எல்லா இருக்கைகளும் நிரம்பியிருக்க என் பின்னால் எல்லா இருக்கைகளும் அதாவது முக்கால் வாசி தியேட்டர் காலியாகத் தான் இருந்தது. என் பக்கத்திலும் இருபுறமும் ஒருவருமில்லை. ஆஹா  விஐபி ஆகீட்டேன் என்று என்னை நானே தேற்றிக் கொண்டேன். ஒருவேளை நன்றாய் இருக்காது என்பதால் கூட்டம் இல்லையோ என்று  நினைத்து சிறிது கலக்கமாய் இருந்தது.

சாவகாசமாக உட்கார்ந்து அந்தப்பண்டத்தை எடுத்து சிறிது கடித்தேன். இலேசான இனிப்புடன் இருந்தது. என்னைப்போன்ற சுகர் ஆட்களுக்கு நல்லதுதான் என்று நினைத்தேன். ஆனால் அந்த எண்ணெய் வாசனை ஒரு மாதிரி இருந்தது. இருந்தாலும் பரவாயில்லை என்று அடுத்த கடி கடித்தபோது அந்த எண்ணெய் நெடி  நாசி, நாக்கு, இரண்டையும் தாக்க, அவசரமாக வாந்தி வந்தது. அதோடு சாப்பிடுவதை நிறுத்திவிட்டு, “அடச்சீ இதைச் சாப்பிடுவதற்கா 40 நிமிடம் லைனில் நின்றேன். இதுக்குத்தானா இவ்வளவு நீண்ட வரிசை. இந்த சீன அரச வம்சத்தின் டேஸ்ட் இவ்வளவுதானா?”, என்று நினைத்தேன்.  வாயில் நுழையும் பண்டம் என்று நினைத்தது தப்புதான் . 

சிறிது நேரத்தில் விளக்குகள் அணைய, தியேட்டரின் பிரமாண்ட திரைகள் உயர, படை வீரர்கள் முதலில் அணிவகுத்து வந்தனர். அவர்களைத் தொடர்ந்து வாத்தியக்காரர்கள் வந்தனர். அவர்கள் பின்னால் ஏராளமான மின்னலடிக்கும் அப்சரஸ்கள் வர, தொடர்ந்து பல்லக்கு போன்ற ஒன்றில் சீனப்பேரரசர் உட்கார்ந்து வந்தார். உண்மையிலேயே ஒரு ராஜபவனி போல் இருந்தது.மேடை அமைப்பு, ஒளி ஒலி அமைப்புகள் பிரம்மாண்டமாக இருந்தன.

ராஜபவனி ராஜதர்பாரில் முடிய, பேரரசர் முன்னால் கலைநிகழ்ச்சிகள் ஆரம்பித்தன. அருமையான சீன ஆப்பரா நடனம் ஒன்று நிகழ்த்திக்காட்டப்பட்டது. ஆடிய ஒரு 50க்கு மேற்பட்ட பெண்களும், ஒரே மாதிரி உடையணிந்து தலை அலங்காரங்கள் செய்து, ஒரே உயரத்தில் மட்டுமல்ல ஒரே மாதிரி இருந்தனர். எந்த வித்தியாசமும் இல்லை.

அது முடிந்து, அக்ரோ பேட்டிக்ஸ், ஜிம்னாஸ்டிக் மற்றும் சாகச நிகழ்ச்சிகளும் ஒவ்வொன்றாய் நடந்தன. கண்களைக் கவரும்  அந்த நிகழ்ச்சிகள், ஒரு சர்க்கஸ் கலை நிகழ்ச்சிகள் மேடையில் நடப்பது போல் இருந்தன. வயிற்றின் உள்ளே கேட்ட சத்தம் சாப்பிட்ட சிறிதளவு பண்டத்தாலா இல்லை மின்னல் வேக சாகச  நிகழ்ச்சிகளைப் பார்த்ததாலா என்று தெரியவில்லை.

 

பெண்கள் மட்டுமல்ல ஆண்களின் உடம்பும் வில்லாய் வளைந்தது . ஆஹா சீனர் ஏன் ஜிம்னாஸ்டிக்கில் அவ்வளவு மெடல்கள் வாங்குகிறார்கள்  என்பதின்  காரணம் அன்றுதான் விளங்கியது. இவர்களுக்கு எலும்பே இல்லை என்றும்  சொல்லலாம்.

ஒவ்வொரு காட்சியும் பிரமாண்டமான ஒளி, ஒலி அமைப்புடன் இருந்ததோடு, ஒவ்வொரு நிகழ்ச்சிக்கும் நடுவில் எந்த இடைவெளியும் இல்லாமல் அதற்கென ஒரு குழு அதிவிரைவாக செயல்பட்டது. இரண்டு மணி நேர நிகழ்ச்சி நன்றாக முடிவடைய, இறுதியில் சீனப் பேரரசர் தன் மனைவியுடன் வந்து கைகாட்டி வழியனுப்பி வைத்தார். ஆஹா நல்ல நிகழ்ச்சிதான் , பீஜிங்கிற்கு வரும் நண்பர்கள் இதனை தவற விட வேண்டாம்.    

                   

வெளியே வந்து ஹோட்டல் அட்ரஸைக் காண்பித்து, ஒரு டாக்சியில் வந்து சேர்ந்தேன். ஜோஹனா சிரித்தவாறு வரவேற்றாள். அக்ரோபேட்டிக் ஷோவுக்கு சென்று வந்ததை சொன்னேன். “ஓ நான் டிக்கட்  கொடுத்திருப்பேனே”, என்று அதே 220 விஐபி டிக்கட் எடுத்துக் காண்பித்தாள். எவ்வளவு என்று கேட்டேன் 40 யுவான் என்றாள். அட அநியாயமே, இது என்ன ஒவ்வொரு முறையும் எனக்கு இப்படியே நடக்குது என்றெண்ணி சோர்ந்து  உட்கார்ந்தேன்.

அப்பொழுது தான் அந்தப்பண்டம் நியாபகம் வர, பண்டத்தைக் காட்டி எடுத்துக் கொள்ளச் சொன்னேன். “நோநோ  நீ சாப்பிடு, நியுயார்க்கிலிருந்து வந்திருக்கிறாய் கிடைக்காத பண்டம்”, என்றாள். “நான் சாப்பிட்டுவிட்டேன் , இது உனக்காக வாங்கினேன்”, என்றேன்.

ஜோஹனா கண்கள் விரிய, முகம் மலர பெற்றுக் கொண்டு மூன்று முறை நன்றி சொல்லிவிட்டு உடனே எடுத்து சாப்பிடவும் ஆரம்பித்தாள்.  எனக்கு மீண்டும் வயிற்றைப் பிரட்ட ரூமுக்கு ஓடினேன்.

தொடரும்.

நியூயார்க்கில் உதயமாகும் ஒரு நடனத்தாரகை !!!!!!!!

Daphne Loyd

நியூயார்க்கில் வாழும் தமிழர்களுக்கு நன்கு அறிமுகமானவர் திரு.பிரேம் லாயிட். நியூயார்க்கில் ஃபிளஷிங் பகுதியில் உள்ள கணபதி ஆலயத்துக்கு வரும் அனைத்து மக்களும் சுவாமி தரிசனம் முடித்து, ‘கனக தரிசனம்’ செய்யப்போகுமிடம் பிரின்ஸ் நகைமாளிகை. இதன் உரிமையாளர்தான் பிரேம் லாயிட்.

இலங்கை நாட்டிலிருந்து புலம்பெயர்ந்து, முதலில் தனிப்பட்ட முறைகளில் விடுகளுக்குச் சென்று நகை வியாபாரம் ஆரம்பித்து, அதன்பின் ஹில்சைட்  அவென்யூவில் இருந்த,  ஹெல்தி லைஃப் என்ற இலங்கைக் கடையின் பேஸ்மென்ட்டில் சிறியதாக ஆரம்பித்து, பின்னர் இப்போது  கணபதி கோயிலுக்கு அருகில் நிரந்தரமாகக்  கடை வைத்து வியாபாரம் செய்கிறார். இதுதவிர வேறுபல கடைகளையும் வைத்திருக்கிறார்.

இவர் ஒரு தமிழர் என்பதால் எல்லாத் தமிழ் நிகழ்வுகளுக்கும் தாராளமாக நன்கொடை கொடுத்து ஸ்பான்சர் செய்வார். இவருடைய தங்கக்கடைக்கு என் மனைவி நிரந்தர வாடிக்கையாளர்.

        பிரேமுக்கு 2 மகள்கள். 2 மகள்கள் வைத்திருக்கும் ஒபாமா, ரஜினிகாந்த், கமல் போன்ற பிரபலங்கள் வரிசையில் பிரேமையம் சேர்க்கலாம். 2 மகள்கள் வைத்திருந்தும், பிரபலமோ இல்லை கரபலமோ இல்லாத ஒருவன் நான் மட்டும்தான் என நினைக்கிறேன்.

Prem''s wife, Daphne, Alishya, Prem Loyd

பிரேமின் இரண்டு மகள்களும் மிகவும் திறமை வாய்ந்தவர்கள், படிப்பில் மட்டுமல்ல, நடனம். இசையென்று மிகுந்த திறமைபெற்றவர்.அதில் மூத்த புதல்வியான ‘டாஃப்னி லாயிட்’ ன் பரதநாட்டிய அரங்கேற்றம் கடந்த சனிக்கிழமை ஆகஸ்ட் மாதம் 7 ஆம் தேதி இனிதே நடந்தேறியது.

சிறப்பு அழைப்பாளராகத் தெரிவு செய்யப் படாவிட்டாலும் என் மனைவியின் புண்ணியத்தில் பொது அழைப்பாளராகக் கலந்து கொண்டேன். கணபதி கோயிலின் அழகான கலையரங்கத்தில் இந்த நாட்டிய அரங்கேற்றம் நடந்தேறியது. நாங்கள் செல்லும்போதே அரங்கம் நிரம்பி வழிந்தது. பிரேமும் அவர் மனைவியும் எங்களை வரவேற்று இன்னொருவரிடம் ஒப்படைக்க, அவர் எங்களை அழைத்துச் சென்று முன்வரிசையில் அமர வைத்தார். நானும் பெருமிதத்துடன் திரும்பிப் பார்த்து “நானும் விஐபி தான் நானும் விஐபி” தான் என்று சொல்லிக் கொண்டேன். இருந்தாலும் வேறு விஐபி வந்தால் என்னை எழுப்பி விட்டுவிடுவார்களோ என்ற பயம் ஒரு ஓரத்தில் இருந்தது.

ஒரு கத்துக்குட்டி மாணவி என்ன பெரிதாக ஆடிவிடப்போகிறாள்? என்று நினைத்துப்போன எனக்கு ஒரு இன்ப அதிர்ச்சி காத்திருந்தது. அற்புதமான நடனத்தை வெளிப்படுத்தினாள் டாஃப்னி.

Alishya

பிரேம் தம்பதிகளின் வரவேற்பு முடிந்தவுடன் புஷ்பாஞ்சலியுடன்  நடனம் ஆரம்பித்தது. நடன அரங்கேற்றத்தின் முதல் ஆட்டமான இதில், ஆடுபவர், கடவுளுக்கும் குருவுக்கும், இசைக்குழுவுக்கும் மற்றும் வந்திருக்கும் விருந்தினருக்கும், பூக்கள் தூவி  மரியாதை செய்வார். நாட்டை ராகத்தில் ஆதிதாளத்தில் அமைந்த இந்த இசையில் எழுந்த டாஃப்னியின்  நடனத்திலேயே தெரிந்துவிட்டது, இது வெறும் அரங்கேற்றமல்ல இது அருமையான ஒரு நடன நிகழ்ச்சியின் ஆரம்பம் என்று.

அதற்குப்பின்பதாக  வந்த ரூபக தாள ‘அலரிப்பி’ல் ஒரு தேர்ந்த நடன மங்கையைக் காணமுடிந்தது. அதன்பின் வந்தது  கல்யாணி ராகத்தில் 'ஜதிஸ்வரம்'.  இந்த நடனத்தில் தாளத்துடனும்  ஜதியுடனும்  இணைந்த கால்கள் ஒரு சேர ஒலித்தது அற்புதமாக இருந்தது. குறிப்பாக இதில் வந்த ஒவ்வொரு நடன நிலைகளும் கோயில் சிலைகளை ஞாபகப்படுத்தின.

அடுத்து வந்த 'ஷப்தம்' பகுதியில், பல அபிநயங்களுடன் ,  கண்ணனின் பல்வேறு லீலைகளை எடுத்துக் காட்டின ராக மாலிகையில் அமைந்த இந்த நடனம், ஒரு மோனோ ஆக்ட் என்று சொல்லலாம்.

அதன் பின் வந்த ‘வர்ணம்’ இந்த நிகழ்வின் உச்சக்கட்டம் ஆகும். பலவித பாவங்களை வெளிப்படுத்தின இந்த நடனம் தியாகராஜர் இயற்றிய பஞ்சரத்ன கீர்த்தனை ஒன்றின் வழியாக வந்தது. ஆரபி ராகத்தில் ஆதிதாளத்தில் வந்த இந்த நடனம் பாகவதத்தின் ஒரு பகுதியின் நாடகத்தைக் கண்முன் நிகழ்த்தியது. கிருஷ்ணன், குருஷேத்ர யுத்தம் நடந்த சமயத்தில்  சண்டையிடத்தயங்கிய அர்ச்சுனனுக்கு, தன் விஸ்வரூபத்தை வெளிப்படுத்தி சண்டையிடத் தூண்டிய சம்பவம் வெகு தத்ரூபமாக நடன நிகழ்வாக வெளிப்பட்டது.  

இடைவேளைக்குப்பின் வந்த ‘சிவஸ்துதி’ தில்லை அம்பலத்தை நேரில் கொண்டு வந்தது. அதன்பின் எதிர்பார்க்காத விதத்தில் ஜீன்ஸ் திரைப்படத்தின் நித்திய ஸ்ரீ பாடிய "கண்ணோடு காண்பதெல்லாம்" பாட்டுக்கு டாஃப்னியுடன் இணைந்து அவள் தங்கை அலிஷ்யா வந்து நடனமாடினாள். அக்காவுடன் இணைந்து அழகாக ஆடிய அலிஷ்யா  நானும் அரங்கேற்றத்துக்கு தயார் என சொல்வது போல் இருந்தது.

சலங்கை ஒலி படத்தில் SP. ஷைலஜா ஆடிய ‘ஓம் நமசிவயா’  என்ற பாடலுக்கு டாஃப்னி ஆடி அசத்தியது அதன்பின் வந்தது. மகிஷாசுரமர்த்தினியை சித்தரித்த ‘தில்லானா’வில் புகைப்பட போஸ்கள் பல வந்தன. பின்னர் மங்களம் பாடி  முடிக்க அரங்கேற்றம் இனிதே முடிந்தது.  

Sadhana Paranchi

         தாளம், ஜதி, இசை, பாவம், அபிநயங்கள் நிருத்தம், நிருத்தியம், முக உணர்ச்சிகள் என்று நவரசங்களையும் தன் நடனத்தில் வெளிப்படுத்திய டாப்ஃனி  தன் சிறந்த திறமையை அநாயசமாக எந்த டென்சனும் இல்லாது வெளிப்படுத்தியது  ஆச்சரியமூட்டியது. அதிலும் அவளின் குரு  சாதனா பரஞ்சி அவர்கள் கடைசி சமயத்தில் இந்தியாவில் இறந்து போன தன் தாயின் ஈமச்சடங்கிற்காக சென்றுவிட, குரு இல்லாமலேயே எந்தவித பிரச்சனையும் இல்லாமல் அரங்கேற்றம் அமைந்தது இன்னொரு ஆச்சரியம்.குரு இல்லாத குறையை "சாதனாலயா நடனப்பள்ளியின் துணை ஆசிரியர் பிரியா மாதவன் நீக்கி வைத்து நட்டு வாங்கமும்  செய்தார்.

Orchestra

நடனத்திலும் இசையிலும் மிகவும் அனுபவம் வாய்ந்த ‘சாவித்ரி ராமானந்த் ’ பாடல்களைப் பாட, சந்தியா ஆனந்த் வயலினையும், முரளி பாலச்சந்தர் மிருதங்கமும்  மிச் கீரின்பெர்க் புல்லாங்குழலும் இசைத்தனர். பக்க வாத்தியக் காரர்கள் ஒருவருக்கு ஒருவர் சளைத்தவர்கள் அல்லர். குறிப்பாக வெள்ளைக்கார, மிச் கீரின்பெர்க் கர்நாடக ராகங்களை புல்லாங்குழலில் வாசித்தது ஒரு அதிசயக் காட்சிதான்.

Ahmed Sabarullakhan 

          சிறப்பு விருந்தினர்களாக Dr.M.N. கிருஷ்ணன், கனடாவின் நடன ஆசிரியர், ஜனனி குமார், ஐக்கிய நாடுகளின் இலங்கைத் தூதுவர் அகமது சபருல்லாகான் ஆகியோர் சிறப்பிக்க, இலங்கை ஒலிபரப்பு கூட்டு ஸ்தாபனத்தின் முன்னாள் அறிவிப்பாளர் V.N.மதியழகன் நிகழ்ச்சியை தொகுத்து வழங்கினார். தாமிரா குமார் அதனையே ஆங்கிலத்தில் சொன்னார்.

        நிகழ்ச்சி நிரல், வரவேற்பரை அமைப்பு, விருந்தினர் கையெழுத்திடும் புத்தகம், மேடை அலங்காரம், உணவு உபசரிப்பு, சாப்பாடு மேஜை அலங்கரிப்பு என்று ஒவ்வொன்றையும் பார்த்துப் பார்த்து செய்திருந்தார்கள். டாலர்கள் தண்ணீராய் செலவழிந்திருக்கும்.

அனைவருக்கும் மிகச்சிறந்த அறுசுவை உணவு வழங்கப்பட்டது. கண்ணுக்கு விருந்து முடிந்து, வயிற்றுக்கும் விருந்து முடித்து வெளியே வந்தால் வந்த பெண்களுக்கு வெள்ளிக்காசு நினைவுப் பரிசாக வழங்கப்பட்டது.

ஒரு திருமணத்தை விட அதி சிறப்பாக அரங்கேற்றம் நடைபெற்று முடிந்தது. டாப்ஃனி மேலும் வளர உயர வாழ்த்துக்கள்.

முற்றும்

Add caption