சோழனுக்கு பாண்டியன் குறைந்தா போனான் ?

ஆஸ்டின் ,டெக்சஸ் பயணம் -பகுதி-5

        அவர் பெயர் நந்திதா பெரி (Nandita Berry). 2014 ஜனவரி முதல், கவர்னர் ரிக்பெரி (Rick Perry) அவர்களால் தனிப்பட்ட முறையில் அப்பாய்ண்ட் செய்யப்பட்டவர் நந்திதா. ரிக் பெரி, நந்திதா பெரியை நியமித்ததில் ஏதோ உள்குத்து இருக்கிறது என நினைக்க வேண்டாம். நன்றாக ஸ்பெல்லிங்கைப் பாருங்கள் Rick Perry வேறு & Nandita Berry  வேறு.

        இந்த நந்திதா ஹைதராபாத்தில் பிறந்து வளர்ந்து, சட்டம் படித்து தனது 21ஆவது வயதில் சட்ட மேற்படிப்புக்காக அமெரிக்கா வந்தார். படித்து முடித்து லாயராக பிராக்டிஸ் செய்து மைக்கேல் பெரி( Michael Berry) என்ற அமெரிக்கரைத் திருமணம் முடித்து, Rick Perry யிடம் பதவியில் அமர்ந்துள்ளார் என்பது இவரது சுருக் வரலாறு.

Nandita Berry

         டெக்சஸ் மாநிலத்தின் 109-ஆவது உள்துறை மந்திரி (Secretary of State) பொறுப்பேற்ற - நந்திதா அமெரிக்க மாநிலங்கள் முழுவதிலும் இந்தப் பதவியில் உட்காரும் முதல் பெண் மற்றும் முதல் இந்தியர் என்ற பெருமை பெறுகிறார். Secretary of State என்பது மிகவும் பெரிய பதவி.

அவரின் பதவியில் அவருக்குள்ள பொறுப்புகள் சில:

1.         மாநிலத்தின் தலைமை தேர்தல் அலுவலர் (Chief Election Officer)

2.         மெக்சிகோ நாட்டினுடன் உள்ள எல்லாத்தாவாக்களை தீர்க்கும் லயசன் அலுவலர்.

3.         டெக்சஸ் மாநிலத்தின் Chief Protocol Officer.

4.         ஸ்டேட் சீலின் பொறுப்பு இவரிடம்தான்.

5.         அரசு ஆவணங்களின் பொறுப்பு.

6.         அரசின் கொள்கை முடிவுகளை வெளியில்  பத்திரிக்கைகளுக்கு அறிவித்தல்.

 வெறும் 200 டாலர்களுடன் 21 வயதில் அமெரிக்கா வந்த இவர் இவ்வளவு உயரத்திற்கு முன்னேறியது நிச்சயமாக மாபெரும் சாதனைதான். அதுமட்டுமல்லாமல் பல நிறுவனங்களின் நிர்வாகத்துறையின் டைரக்டராகவும் பொறுப்பில் இருக்கிறார்.

அவற்றுள் சில கீழே:

1.         Houston Zoo

2.         South Asian Chamber of Commerce

3.         Houston Area Women's Center

4.         Community Family Center of Houston

இவர் இந்தியர் என்பதில் நமக்குப் பெருமைதானே.

      அதன் பின்னர் எலிவேட்டரில் ஏறி 2ஆம் மாடியை அடைந்தோம். அங்கிருந்து கீழே பார்க்கும் வியூ மிகவும் அழகாக இருந்தது. பள்ளிக்கொயர் பாடும் பாடல்கள் அப்படியே மிதந்து மேலே வந்தன.

          அப்படியே பக்கத்தில் நுழைந்தால் செனட் சேம்பர் இருந்தது. டெக்சஸ் மாநில 31 செனட்டர்களும் (நம்மூர் MLA  மாதிரி) இங்குதான் கூடி சட்டமியற்றுவார்கள். ஸ்டீபன் ஆஸ்டின் அவர்களின் மிகப்பெரிய பெயின்ட்டிங் அங்கிருந்தது. அதுதவிர நுழைவாயிலின் இருபுறமும் ஹென்ரி ஆர்தர் மெக்கர்டில் (Henry Arthur MCARDLE 1836-1908) அவர்களால் வரையப்பட்ட இருபெரும் ஓவியங்கள் இருந்தன.

Governor's Lounge 

           அதனை தாண்டிச் சென்றால் டெக்சஸ் மாநில ஆளுநரின் வரவேற்பரை இருந்தது. காலங்காலமாக கவர்னர்கள் பயன்படுத்திய கண்ணாடி, ஷேண்டலியர் ,  மார்பிள் மேஜை சோஃபா ஆகியவை அங்கு இருந்தன. 

Pastor Johnson

பாஸ்டர் ஜான்சன் அங்கு சென்று கவர்னர் இருக்கையில் அமர்ந்து போஸ் கொடுத்தார். கம்பீரமாகத்தான் இருந்தார். சோழரத்தம் அல்லவா? பாண்டியன் என்ன சோழனுக்கு குறைந்தா போனான் என்று விரைந்து சென்று நானும் போய் உட்கார்ந்தேன். இன்னும் ஒருவர் பக்கத்தில் உட்காரும் அளவுக்கு இடமிருந்தது. ஹ்ம்ம் பாண்டியன் குறைந்துதான் போனான்.

      மறுபுறம் இன்னும் பெரிய மன்றம்  வந்தது.இங்குதான் டெக்சஸின் 150 House Of Representatives உட்கார்ந்து மாநில அலுவல் நடத்துவார்களாம். மேஜைகளும் சேர்களும் கீழே கார்ப்பெட்டுகளும் மிக நேர்த்தியாக இருந்தன. இதுதான் இந்த பில்டிங்கிலேயே மிகப்பெரிய அறை என்றும் சொன்னார்கள். 1836ல் நடந்த போரில் பயன்படுத்தியிருந்த  டெக்சஸ் கொடி காட்சிப்படுத்தப்பட்டிருந்தது. அதன் பக்கத்தில் பெரிய நூலகம் ஒன்றிருந்தது. “Legislative Reference Library” என்று சொன்னார்கள்.

Senate Chamber

           அங்கிருந்து  செல்லும் அலங்காரமான கிரானைட் படிகளில் மேலே சென்றோம். அங்கு மிகப்பெரிய மற்றொரு மன்றம் இருந்தது. அதுதான் சுப்ரீம் கோர்ட் என்று சொன்னார்கள். இடவசதி பத்தாமல் போனதால் 1959-ல் தனிக்கட்டடத்திற்கு மாற்றப்பட்டதாம். ஆனால் 1888 முதல் 1959 வரை இங்குதான் செயல்பட்டதாம். இப்போதும் இது சில முக்கிய மீட்டிங்குகள் நடப்பதற்கு பயன் படுத்தப்படுகிறது. முதன்முதலாக இங்கு நீதிபதிகளாக இருந்த Abner Lipscomb, John Hemphil & Royal Wheeler ஆகியோரின் ஓவியங்களும் காணப்பட்டன.

Supreme Court

         நல்ல வரலாற்றுச் சிறப்பு மிகுந்த கேப்பிடல் பில்டிங்கை பார்த்த திருப்தியுடன் கீழிறங்கினோம். அங்கிருந்து நேராக ஓட்டலுக்குத் திரும்பி பெட்டிகளை எடுத்துக் கொண்டு ஆஸ்டினுக்கு ஒரு குட்பை சொல்லிவிட்டு ஏர்போர்ட் வந்து சேர்ந்தோம்.  

         ஏர்போட்டில் நாங்கள் மூவரும் செக்யூரிட்டி செக்கிங் முடித்து உள்ளே நுழைந்தோம். பாஸ்டர் ஜான்சன் சில நிமிடங்களில் வந்துவிடுவதாகச் சொல்லிச் சென்றார். நானும் சதக்கும் உள்ளே போய் விமானத்தில் உட்கார்ந்தோம்.

     சில நிமிடங்களில் “லாஸ்ட் கால் ஃபார் ரேட் ஹினா சமி”, என்ற அறிவிப்பு தொடர்ந்து வந்தது. சதக்தான் மறுபடியும் கண்டுபிடித்தார், “ஆல்ஃபி உங்க ஆளைத்தான் கூப்பிடுறாங்க”, என்று.  அய்யய்யோ மறுபடியும் முதல்ல இருந்தா ? 
அந்த முதல் கதையைப்  படிக்க இங்கே சுட்டவும் 

http://paradesiatnewyork.blogspot.com/2015/03/blog-post_9.html

முற்றும்.

உப்பும், உறைப்பும், கடுப்பும், வெறுப்பும் !!!!!!!!!!

ஆஸ்டின் ,டெக்சஸ் பயணம் -பகுதி-4

     பாஸ்டர் ஜான்சன் அவர்கள் பிறந்த போது அமெரிக்க அதிபராய் லிண்டன் ஜான்சன் இருந்ததனால், அவருடைய அப்பா அந்தப் பெயரை வைத்தாராம். ஆனால் அவர் ஜான்சன் அமெரிக்காவில் வந்து செட்டிலாகி, இங்கு ஜான்சன் மியூசியத்தைப் பார்வையிடுவார் என்று கனவு கூடக் கண்டிருக்க மாட்டார். அதனை நேரில்  பார்த்து மகிழவும் முடியாத வண்ணம் சிறுவயதிலேயே இறைவனடி சேர்ந்து விட்டார்.

நகருக்குள் நுழைவதற்கு முன் இதோ உங்களுக்காக

1. 

   Austin in the night

ஆஸ்டின் டெக்சஸ் ஒரு சில தகவல்கள்.

1.    ஆஸ்டின், டெக்சஸ் மாநிலத்தின் தலைநகரம் .

2.    கொலராடோ ஆற்றங்கரையில் அமைந்துள்ளது இப்பெரு நகரம்.

3.    மொத்த அமெரிக்காவின் மக்கள் தொகையில் 12-ஆவது பெரிய நகரம், டெக்சஸின் 4-ஆவது பெரிய நகரம்.

Tonkawa Comanche

4.    1835 முதல் ஐரோப்பிய குடியேற்றம் நிகழ்ந்தது. ஆனால் அதற்கு முன்னால் Tonkawa Comanche, & Lipan Apache என்ற சிவப்பிந்தியக் குழுவினர் இங்கு வாழ்ந்து வந்தனர்.

5.    வழக்கம்போல் இவர்கள் இங்கிருந்த சிவப்பிந்தியக்குழுவினரை  துரத்தியடித்தனர் அல்லது கொன்று குவித்தனர்.

6.    1835-36ல் டெக்சஸ் மக்கள் மெக்சிகோவுடன் போரிட்டு சுதந்திரம் பெற்றனர். அதன் பின்னர்  தனிப்பட்ட குடியரசானது. இதற்கென்று தனியாக பிரசிடன்ட்கள் தேர்ந்தெடுக்கப்பட்டனர்.

7.    1861ல் நடந்த உள்நாட்டு யுத்தத்திற்குப் பின்னர் டெக்சஸ் அமெரிக்க ஐக்கிய நாடுகளில் இணைந்து ஒரு மாநிலமானது.

8.    Fortune 500 என்று சொல்லக்கூடிய கம்பெனிகளின் தலைமை அலுவலகங்கள் அல்லது கிளை அலுவலகங்கள் இங்கே இருக்கின்றன. AMD, Apple Inc, Ebay, Google, IBM, Intel, Texas Instruments, 3M, Oracle, Dell ஆகியவை அவற்றுள் சில.

மதிய உணவு அருந்த ஒரு ஜெர்மன் ரெஸ்டாரண்டுக்கு அழைத்துப் போனார் டாக்டர் ஜெரால்ட். ஜெர்மன் குசின் ஓக்கேதானே என்றதற்கு "முகமதுவும் ஜான்சனும் தலையாட்ட, நான் தான் மறுபடியும் 'ஙே' என்று முழித்தேன். ம்ஹீம் மறுபடியும் பட்டினிதான் என்று நினைத்துக் கொண்டேன்.

ஹலால் சாப்பிடும் முகமதுவுக்கு மீன் விலக்கில்லை.அதனால் மீனுக்கு தாவிவிடுவார். ஜான்சனுக்கு எதுவும் விலக்கில்லை. நான்தான் பாவம். ஆனாலும் மெனுவில் இருந்த அரிசி சாதத்தைப் பார்த்ததும் துள்ளிக் குதித்து ஆர்டர் செய்துவிட்டு, கூட வெண்டைக்காய் (okra) பண்டம் ஒன்றையும் ஆர்டர் செய்தேன்.  

உப்போ உறைப்போ எதுவும் இல்லாத வெற்று சாதத்தை, கடுப்போ வெறுப்போ இல்லாமல் எப்படி சாப்பிடுவது?. ஆனால் வெண்டைக்காய் பஜ்ஜி நன்றாக இருந்தது. ஏதோ மாவில் தோய்த்து அப்படியே பொரித்திருந்தார்கள். கரகர மொருமொருவென்று சுவையாகவே இருந்தது.

உண்டு முடித்து கேபிடல் பில்டிங் பார்க்கப் போனோம்.

Texas Capitol Building 

உள்ளே நுழைவதற்கு முன் அதனைக்குறித்த சிறு குறிப்பு:

1.    முதன்முதலாக 1853ல் கட்டி முடிக்கப்பட்ட 140 அடி உயர கேபிடல் கட்டிடம் 1881ல் தீக்கிரையானதால் இந்தப் புதிய கட்டிடம் கட்டப்பட்டது.

2.    கிபி 1882ல் ஆரம்பிக்கப்பட்டு அஸ்திவாரம் அமைத்து முடித்து டெக்சஸ் சுதந்திர தினமான மார்ச் 2, 1885ல் 12010 பவுன்ட் எடையுள்ள மூலைக்கல் பதிக்கப்பட்டது. பாருங்கள் பேஸ்மெண்ட் எழுப்புவதற்கே மூன்று வருடங்கள் முழுதாய் ஆயிருக்கிறது.

3.    1886ல் இரண்டாவது மாடி முடிக்கப்பட்டு 1887ல் காப்பர்(Copper) தகடுகளால் கூரை அமைக்கப்பட்டது .

4.    1888ல் தாமிரத்தினால் (zinc) வடிவமைக்கபட்ட சுதந்திர தேவி சிலை கூரையின் மேல் நிறுவப்பட்டது.

5.    1888ல் மே மாதத்தில் திறக்கப்பட்ட இதன் மொத்த உயரம் 566 அடி, அகலம் 288 அடி மற்றும் கட்டி முடிக்க ஆன மொத்த செலவு $3.7 மில்லியன் டாலர், அப்பவே மில்லியன் என்றால் இன்றைய ரேட்டுக்கு எங்கேயோ போய்விடும்.

6.    முழுதும் சிவப்பு கிரானைட் கற்களால்  கட்டப்பட்ட இந்தக் கட்டிடத்தில் தான் டெக்சஸ் மாநில சட்டசபை கூடுகிறது. அரசாங்கம் செயல்படுகிறது.

Johnson,Gerard,Mohamed and me 

வாருங்கள் உள்ளே போவோம், கிரவுண்ட் ஃப்ளோரில்  படிக்கட்டுகளில் ஏறி உள்ளே நுழைந்தவுடன், ரோட்டன்டா என்று சொல்லப்படுகிற ஹாலுக்கு முன்னால் காவல் தூதுவர்கள் போல ஸ்டீபன் F ஆஸ்டின் (Stephen F Austin) மற்றும் சாம் ஹீயூஸ்டன் (Sam Houston) அவர்களின் முழு அளவு சிலைகள் இருபுறமும் நின்றன. எலிசபெத் நேய் (Elisabet Ney) என்ற சிற்பியினால் வடிவமைக்கப்பட்டு 1903ல் நிறுவப்பட்டவை இவை. இவர்கள் இருவர் பெயரில் தான் டெக்சஸின் இருபெரு நகரங்களான ஆஸ்டின் மற்றும் ஹீயூஸ்டன் நகரங்கள் பெயரிடப்பட்டன. இதே சிலைகளின் மாதிரிகள் வாஷிங்டன் டிசியிலும் இருக்கின்றனவாம்.

Stephen Austin

அதன் இருபுறத்திலும் இரு மிகப்பெரிய சித்திரங்கள் இருந்தன. (Oil Painting On Canvas). டெக்சஸில் நடந்த இருபெரும் போர்களைச்சித்தரித்த அந்தப் படங்கள் டெக்சஸின் மிகச் சிறந்த ஓவியரான வில்லியம் ஹென்ரி ஹடில் (William Henry Huddle 1847-1892)அவர்களால் வரையப்பட்டது.

அதனைத் தாண்டி ஹாலில் நுழைந்தால் அது பல மாடங்களைக் கொண்டு வட்டவடிவில் அமைக்கப்பட்டிருந்தது. அதில் ஒரே கூட்டமாக இருந்தது. என்னவென்று எட்டிப்பார்த்தால், அங்கே அழகான சீருடை அணிந்த இளம் சிறுவர்களும் சிறுமிகளும் நின்று கிறிஸ்மஸ் கேரல் பாடல்களை பாடிக்கொண்டிருந்தனர். 

முழுவதும் வெள்ளைப் பிள்ளைகள் இருந்த இடத்தை உற்று நோக்கினால் ஓரிரு கறுப்புப் பிள்ளைகள் இருந்தன. அட மேலும் பார்த்தால் நம் இந்தியப் பிள்ளைகளும் அதில் இருந்தனர் அவர்களை நோக்கி கையை அசைத்தேன். கண்கொள்ளாக் காட்சியான அது காதுகளையும் இனிய இசையால் நிறைத்தது. சிறிது நேரம் அங்கிருந்து அப்பாடல்களைக் கேட்டோம். அந்த ஹாலின் மார்பிள் தரையில் பெரிய சீலும் (The Great Seal) அதனைச் சுற்றி டெக்சஸ் மாநிலத்தின் ஆறு சீல்களும் வரையப்பட்டிருந்தன.    

வலதுபுறம் திரும்பி கார்டனில் நடந்தால் அங்குதான் செக்ரட்டரி ஆஃப் ஸ்டேட் (Secretary of State) அவர்களின் அலுவலகம் இருப்பதாகக் கூறினார்கள். அன்றைய நாளில் அவர்கள் இல்லை. ஆனால் கிட்டப் போய்ப் பார்த்தால் என்ன ஆச்சரியம். அவர் ஒரு பெண், அதுவும் இந்தியர்.

தொடரும் (அடுத்த பதிவில்   முடியும்)

ஆறாம் தெரு அதிசயங்களும் அதிபர் ஜான்சனும் !!!!!!!!!

ஆஸ்டின் ,டெக்சஸ் பயணம் -பகுதி-3

6th Street

அப்படியே அதிர்ந்துவிட்டேன். இந்தப்புறம் செத்துக்கிடந்த தெரு, மறுபுறம் உயிரோடு இருந்தது மட்டுமல்லாமல், உற்சாகமாய் இருந்தது. தெரு முழுவதும் விதவிதமான பப்கள் இருந்தன. ஒரே பாட்டும், ஆட்டமும் கும்மாளமுமாய் இருந்தன. கிட்டத்தட்ட எல்லாப் பப்புகளிலும் லைவ் மியூசிக். தெருவெங்கும் இளம் ஜோடிகள் வண்ணத்துப் பூச்சிகளாய் அலைந்து கொண்டிருந்தனர். பக்கத்தில் தான் பிரபலமான மிகவும் பெரிய டெக்சஸ் யுனிவர்சட்டி இருக்கிறதென்று சொன்னார்கள். பெரும்பாலும் அந்த மாணவர்கள் தான் ஜோடி ஜோடியாய் இரவுப் பாடம் படிக்க வந்தனர் போலும்.

அதைப் பார்த்தவுடன் தான் தெரிந்தது. நான் சிக்ஸ்த் ஸ்டீரீட் போக வேண்டும் என்று சொன்னவுடன் ஏன் பாஸ்டர் ஜான்சன் என்னை ஒரு மாதிரியாகப் பார்த்தார் என்று.

 ஒவ்வொரு பப்பின் முன்னாலும் நின்று கொண்டிருந்த பார்டெண்டர் பெண்கள் தெருவில் போவோரை ஷாட் 3 டாலர், 2 டாலர் 1டாலர் என்று கூவிக்கூவி அழைத்துக் கொண்டிருந்தனர்.

Mohamed

திடீரென்று எங்கள் முன்னால், தலையில் இறகுகளை செருகியிருந்த கோமணாண்டி டங்காமாரி கறுப்புக் கண்ணாடியணிந்து சென்று கொண்டிருந்தான். உடம்பு முழுதும் பச்சை குத்தியிருந்தான். மொட்டையடித்த பெண்கள், முடி வளர்ந்த ஆண்கள் என்று எல்லோரும் ஒரு தினுசாகவே இருந்தனர். ஒரே ஒரு பப்பில் நுழைந்து பார்க்கலாம் என்று போனோம். அரையிருட்டில் சிறு மேடையில் லைவ் ராக் இசை அதிர்ந்து கொண்டிருக்க, கையில் கிளாஸ்களை ஏந்தி ஆணும் பெண்ணும் நடனமாடிக் கொண்டிருந்தனர்.

Live Music

நமக்கு எந்த சம்பந்தமுமில்லாத இடம் என்று தோன்றியபின், ரூமுக்குத் திரும்பினோம். அடுத்த நாள் காலை, ஆஸ்டினின் சில பகுதிகளுக்கு அழைத்துச் செல்வதாக திட்டமிட்டபடி ,டாக்டர் ஜெரால்ட் 9 மணிக்கு வந்தார் . அவருடன் சென்று நாங்கள் போன முதல் இடம் LBJ ( President Lyndon B. Johnson)மியூசியம். 

1. 

   Lyndon Johnson and Lady Bird

அமெரிக்காவில் ஒரு பழக்கம் இருக்கிறது. பதவி முடித்த ஒவ்வொரு ஜனாதிபதிக்கும் அவர்களின் சொந்த ஊரில் ஒரு மியூசியம் அமைத்து, அவர்களின் முழு வரலாற்று ஆவணங்கள்,  வீடியோக்கள், சாதனைகள் மற்றும் அவர்கள் பயன்படுத்திய பொருட்களை காட்சிப்படுத்தி வைப்பார்கள். அடுத்த தலைமுறை அவரைப்பற்றி அறிந்துகொள்ள அது ஏதுவாயிருக்கும். அப்படி அமெரிக்காவின் 36வது அதிபர் லின்டன் B. ஜான்சன் அவர்களுக்கு சிறப்பாக அமைக்கப்பட்ட மியூசியம் தான் இது.

With Lyndon Johnson

பிரம்மாண்டமான கட்டிடத்தின் முன், லின்டன் ஜான்சனின் முழு உருவச்சிலை இருந்தது. படம் எடுத்துக் கொண்டு உள்ளே நுழைந்தோம். கட்டணம் செலுத்தியவுடன் கட்டிட வரைபடம், உள்ளே உள்ள காட்சிப் பொருட்களின் விவரங்கள் அடங்கிய கைப்பிரதிகள் வழங்கப்பட்டன.

Limousin of LBJ

லாபியில் LBJ  அவர்கள் பதவி  முடிந்து டெக்சாஸில் தங்கியிருக்கும் போது பயன்படுத்திய லிமோசின் கம்பீரமாக நின்றிருந்தது. அங்கிருந்து உள்ளே நுழையும் வழியில் பலவித முக்கிய சட்டங்களுக்கு கையெழுத்துப் போட்ட பல பேனாக்களும், எந்தப் பேனாவில் எந்த சட்டம் உருவானது என்ற விவரங்களும் வரிசையாக இருந்தன. அதன் அருகிலேயே இருந்த 360 டிகிரி திரையரங்கில் அவருடைய சுருக்கமான வரலாறு ஒரு 10 நிமிடத்தில் காட்டப்பட்டது. அதனைப் பார்த்துவிட்டு வெளியே வந்தால், ஜான்சன் அவர்களின் பல மணிநேர (643 மணி நேரம்) டெலிபோன் பேச்சுகள் தொகுக்கப்பட்டு வைக்கப்பட்டிருந்தன.

அங்கிருந்து  மேலே சென்றால் 'கிரேட் ஹால்' என்ற மிகப்பெரிய ஹால் வந்தது. ஒருபுறம் ஜான்சன் அவர்கள் பதவியில் இருந்தபோது நடைபெற்ற முக்கிய நிகழ்வுகள் ஆவணப்படுத்தப் பட்டிருந்தன. மறுபுறத்தில் ஜார்ஜ் வாஷிங்டன் துவங்கி, இருந்த 42 அமெரிக்க அதிபர்களின் படங்களும், First Lady என்று அழைக்கப்படுகிற அவர்களின் மனைவியரின் படங்களும் வரிசையாக இருந்தன. அதற்கு மேல் நான்கு மாடி அடுக்குகளில் 45 மில்லியன் பக்கங்களை கொண்ட ஜான்சன் அவர்களின் "ஆர்க்கைவ் லைப்ரரி" இருந்தது.

1. 

   Oval Office Replica

அங்கிருந்து நகர்ந்து சென்றால் அடுத்தபகுதியில் வெள்ளை மாளிகையின் "ஓவல் ஆஃபிஸ்" (The Oval Office) என்றழைக்கப்படும் அமெரிக்க அதிபரின் அலுவலகத்தை  அப்படியே அமைந்திருந்தார்கள். அது தவிர வெள்ளை மாளிகையின் வாழ்வு முறை, வாழ்ந்த முதற்பெண்களின் விவரங்கள் இருந்தன. அதுதவிர அங்கு வாழ்ந்த முதற் குடும்பத்தைப் பற்றியும் தகவல்கள் இருந்தன.

Linden Johnson

அதனருகில் ஜான்சன் அவர்களுக்கு கொடுக்கப்பட்ட ஏராளமான பரிசுப் பொருட்கள் காட்சிப் படுத்தியிருந்தனர். அவற்றுள் பல நாட்டுத் தலைவர்கள் கொடுத்தவையும் அடங்கும்.

லின்டன் ஜான்சன் அவர்களைப் பற்றி ஒரு சிறு குறிப்பு:

1.    மிகவும் பிரபலமான ஜான் F கென்னடி 1960ல் அதிபர் ஆனபோது, லின்டன் B.ஜான்சன் அவரோடு நின்று துணை அதிபர் ஆனவர் (Running mate).

2.    1963 நவம்பரில் கென்னடி கொல்லப்பட்டபோது, இவர் அமெரிக்காவின் 36வது அதிபராய் ஆனார். அப்போது நிலவிய கடுமையான சூழலை சமாளித்தார்.

3.    எனவே மீண்டும் நடந்த தேர்தலில்  இரண்டாம் முறை அதிபரானார்.

4.    கென்னடியின் கனவான சிவில் ரைட்ஸ் சட்டங்களைக் கொண்டு வந்தார்.

5.    எதிர்பாராத காரணங்களுக்காக வியட்நாம் மீது போர் தொடுத்ததின் மூலமாக மிகவும் விமர்சிக்கப்பட்டார்.

6.    1908 ஆகஸ்ட்- ல் பிறந்து ஜனவரி 1973ல் தனது 65 ஆவது வயதில் மாரடைப்பால் மாண்டார்.   

7.    அவர் 1965ல் கொண்டு வந்த மெடிக்கேர் (Medicare) திட்டம் இன்றுவரை சீனியர் சிட்டிசன்கள் கொண்டாடும் திட்டமாகும்.

- அமெரிக்க வரலாற்றில் நீங்கா இடம் பிடித்த லின்டன் ஜான்சன் அவர்களின் மியூசியத்தைப் பார்வையிட்டது மிகுந்த மகிழ்ச்சி அளித்தது.

பாஸ்டர் ஜான்சனிடம் நான் ஒரு கேள்வி கேட்டேன், “உங்களுக்கும் அமெரிக்க அதிபர் ஜான்சனுக்கும் என்ன தொடர்பு?”, என்று.

தஞ்சாவூரில் பிறந்த பாஸ்டர் ஜான்சனுக்கும், அமெரிக்க அதிபர் ஜான்சனுக்கும் என்ன தொடர்பு இருக்கப்போகிறது ?. என்ன ஒரு முட்டாள் கேள்வி கேட்டுவிட்டோம் என நினைத்த போது, "தொடர்பு இருக்கிறது" என்றார் பாஸ்டர் ஜான்சன்.

தொடரும்

பை ஆல் மீன்ஸ், சோ மீன் ,ஐ மீன் வாட் ஐ மீன் !!!!!!!!!!!!!

ஆஸ்டின்,டெக்சாஸ் பயணம் - பகுதி 2

Rathinasamy என்பது எப்படி Rat Hina samy  என்று அவஸ்தைப்பட்டது என்பதை படித்த ரசிகர்கள் , என் பெயர் எப்படியெல்லாம் மாறிப்போனது என்பதை படித்து ரசிக்க இங்கே  சுட்டவும்  http://paradesiatnewyork.blogspot.com/2013/05/blog-post_17.html

இனி நம் ஆஸ்டின் பயணத்தை தொடருவோம்

1. 

   
   

           நான் சொல்லச்சொல்ல கேட்காமல் கேட்டை மூட , படிக்கட்டுகள் நகர்த்தப்பட்டன

6.05க்கு கேட்டுக்கு வந்த ஜான்சன் ரத்தினசாமியை உள்ளே விட மறுத்துவிட்டார்கள். கதவை  மூடினாலும்,விமானத்தை டிஃபிரீஸிங்  (De freezing) செய்ய அரைமணி நேரம் ஆகியது. உறைபனி பெய்யும் பொழுதே, விமானம் எழும்பிப் பறந்தது. அடிக்கடி பல இடங்கள் பல நாடுகள் பயணம் செய்யும் ஜான்சன் முதல் முறையாக விமானத்தை   மிஸ் பண்ணியிருந்தார் .

முகமது  வேற, வந்துருவார்ல என்று கேட்டுகொண்டே இருந்தார். எப்படியும் வந்துவிடுவார்னு சொன்னேன். ஜான்சன் வருவாரா மாட்டாரா என்ற திகிலுடனே விமானப்பயணம் கழிந்தது.

இரவு பத்து மணிக்கு விமானம் சென்று சேர்ந்தது வெளியே வந்தவுடன், என் செல்போன் உயிர் பெற்று டெக்ஸ்ட் மெசேஜ் உள்ளதை சுட்டிக்காட்டியது. நான் எதிர்பார்த்தது போலவே, பாஸ்டர் ஜான்சன்தான் மெசேஜ் அனுப்பியிருந்தார். 9.30 மணிக்கு கிளம்பிய அடுத்த ஃபிளைட்டில் கிளம்பியிருந்தார். அப்போதுதான் நிம்மதியாய் இருந்தது.

விமான நிலையத்தில் வாடகைக்காரை எடுத்துக் கொண்டோம். “ஆஸ்டின்” அப்போது, டிசம்பர் மாத சென்னையின் இரவு போல இருந்தது. நியூயார்க்  குளிரிலும் , உறை பனியிலும் அவஸ்தைப்பட்டுக்கொண்டிருந்த  எங்களுக்கு அது சொர்க்கம் போல் இருந்தது.ஆனால் ஊரே நிசப்தமாக அடங்கியிருந்தது. எல்லா உணவகங்களும் பூட்டியிருந்த சூழ்நிலையில் ஒரு 24 மணி நேர மெக்டானல்டில் இரவு உணவை முடித்துவிட்டு ஹோட்டலுக்குச் சென்றோம். (என்ன பெரிய இரவு உணவு, ஒரு மெக்சிக்கனும் ஒரு ஸ்மால் ஃபிரென்ச் ஃபிரையுந்தான்). காலையில் கேஃபடேரியாவில் கான்டிமென்டல் உணவு அருந்தும் போது, பாஸ்டர் ஜான்சன் வந்து சேர்ந்தார். இரவு 3 மணிக்குத்தான் வந்தாராம். ஆனால் உற்சாகமாகவே தெரிந்தார்.

Mohamed,Me,Martin Luther,Dr Gerald, Dr Johnson at Concordia

  

கான்கார்டியா பல்கலைக்கழகத்தின் வளாகம் சிறப்பாக இருந்தது. காலை முதல் மாலை வரை தொடர்ந்து மீட்டிங்குகள் இருந்தன.

Concordia University

 மீட்டிங்குகளை ஏற்பாடு செய்திருந்த டாக்டர் ஜெரால்ட் கோஸ்னிக்  எங்களை ஒரு Seafood ரெஸ்டாரண்ட்டுக்கு அழைத்துச் சென்றார். 

1. 

   Freda's Sea Food Restaurant

தஞ்சாவூர் ஜான்சன் ஒரு மீன் பிரியர், கீழக்கரை முகமது மீனிலேயே வாழ்பவர். ரெண்டு பேரும் பலமாகத் தலையாட்ட நான் "ஙே" என்று முழித்தேன். எனக்கு மீன் என்றால் ஒத்துவராது. 'So mean' என்று நினைத்துக் கொண்டே உள்ளே போனேன். அது ஒரு ஹை என்ட் ரெஸ்டாரண்ட். ஒரு டிஷ்சே 20 முதல் 30 டாலர் இருந்தது. மெனு கார்டில் உள்ள ஒன்றும் எனக்கு புரியாத, தெரியாத, அறியாத ஐட்டங்கள். ஜான்சன், முகமது ஜெரால்ட் மூன்று பேரும் ஆர்டர் செய்து முடித்து விட, என்னைப்பார்த்த வெயிட்டரிடம் "ஏதாவது வெஜிட்டேரியன் டிஷ் இருக்கிறதா ?" என்றேன். அவன் திடுக்கிட இவர்கள் மூவரும் என்னை ஒரு ஜந்து போலப் பார்த்தார்கள். அதற்குள் மெனுவில் ஒன்றைக் கண்டுபிடித்து, "எனக்கு ஆஸ்பரகாஸ் ஃபிரை" (Asparagus) என்றேன். அது ஒரு வகை காய். "அது சைட்டிஷ்"  என்றான் வெயிட்டர். "பரவாயில்லை கொண்டு வா", என்றேன். அது மட்டும் போதும் என்றவுடன் மீண்டும் ஒரு மாதிரியாகப் பார்த்துவிட்டுப் போய்விட்டான்.

1. 

   Asparagus Fry

பாஸ்டர் ஜான்சனுக்கு ஒரு முழு நீள சால்மன் வந்தது, கண்ணை முழித்துக் கொண்டு என்னையே முறைப்பது போல் தெரிந்தது. முகமதுவுக்கு கிளாம் ஷெல் மீன் வந்தது. ஜான்சன் மீனை வெட்டிச் சாப்பிட, முகமது ஷெல்லை உடைத்து அதனுள் இருந்த ஒரு குழகுழ வஸ்துவை அப்படியே லபக்கினார்.

எனக்கு வயிற்றைப் பிரட்டிக் கொண்டு வந்தது. என்னுடைய ஆர்டரும் வந்து சேர்ந்தது. சிறு சிறு ஆஸ்பரகாஸ் குச்சிகள் ஒரு பத்து இருந்தன. மொத்தமும் ஒரு வாயில் அடங்கிவிடும். சரி விடு இன்னிக்கு மீண்டும் பட்டினிதான் என்று நினைத்தேன். அதில் முகமது வேறு "இது எப்படி இருக்கிறது ?" என்று கேட்டு ஒரு இரண்டை எடுத்து மொறுக்கினார்.

என்னை நானே நொந்து கொண்டே, டெசர்ட்டுக்கு வந்த கேக்கை சாப்பிட்டு வயிறை நிரப்புவோம் என்றால், அதிலும் மீன் வாசனை வந்தது. ஒரே குழப்பமாக இருந்தது. அந்த வாசனை பக்கத்தில் இருந்து வருதா? இல்லை கேக்கில் இருந்து வருதான்னு தெரியல. எதுக்கு வம்புன்னு கேக்கையும் தள்ளி வைத்துவிட்டு, வயிறு முட்ட தண்ணீர் குடித்தேன். பை ஆல் மீன்ஸ், சோ மீன் ,ஐ  மீன்  வாட் ஐ மீன்.

ஜெராஸ்ட் கோஸ்னிக் விடைபெற்றுச் சென்றார். அதன்பின் ஒரு டிரைவ் போகலாம் என்று முடிவு செய்தோம். எங்கே போகலாம்? என்று கேட்டபோது, "சிக்ஸ்த் ஸ்டீரீட்"  என்றேன். பாஸ்டர் ஜான்சன் என்னை ஒரு மாதிரியாகப் பார்த்தார். முகமதுவும், "சரி போகலாம் என்னுடைய நண்பர்களும் அதைப் பற்றி சொன்னார்கள்", என்றார். பாஸ்டர் ஜான்சன் ஒன்றும் சொல்லவில்லை. எனக்கும் அதைப்பற்றி ஒன்றும் தெரியாது. ரூமில் இருந்த Site seeing அட்டவணையில் “ஹிஸ்டாரிக் சிக்ஸ்த் ஸ்டீரீட்” என்று போட்டிருந்தது. எனக்குதான் ஹிஸ்டரி என்றால் தோள்கள் தினவெடுக்குமே. அதனால்தான் சொன்னேன்.

பின்னர் கிளம்பி சிக்ஸ்த் ஸ்டீரீட் போனோம். இடது புறம் திரும்பி டிரைவ் செய்தால் கெட்டோஸ் (Ghettos) போல ஒரு ஏரியா வந்தது. சிறிது தூரம் டிரைவ் செய்துவிட்டு ஒரு காஃபி ஷாப் போனோம். பாஸ்டர் ஜான்சன் காஃபிப்பிரியர்.  உள்ளே சென்றால் அது புதிய கான்செப்டில் உருவான பொடீக் வகை சென்ட்டர். அதில் விசேஷம் என்னவென்றால், இருந்த விதவிதமான கொட்டைகளில் , உங்களுக்குத் தேவையான காப்பிக் கொட்டையை நீங்களே தேர்ந்தெடுத்தால், அதை சுடச் சுட அரைத்து அங்கேயே காப்பியை தயார் செய்து, எழும் நுரையில் படம் வரைந்து ஆவி பறக்கத்தருகிறார்கள். எனக்கு காப்பி குடிக்கும் பழக்கம் இல்லாததால் வேண்டாமென்று சொல்ல, இருவரும் மீண்டும் ஒருவரையொருவர் பார்த்துச் சிரித்ததில் ஆயிரம் அர்த்தங்கள் இருந்தன. சரிவிடுங்க அந்தக் கேவலத்தை ஆராய்ச்சி செய்ய வேண்டாம். 

"என்ன ஹிஸ்டாரிக் சிக்ஸ்த் ஸ்டிரீட் இதுதானா ?" என்று  கேட்ட போது,  "ஓ, பாலத்தின் மறுபுறம் போகவேண்டும்", என்று சொன்னாள் அந்தக் கடையிலிருந்து பச்சை நிற முடிக்காரி.

முகமதுக்கு கூர்கில் ஒரு 1500 ஏக்கர் காப்பி எஸ்டேட் இருந்ததால், அங்கேயே பிஸினஸ் பேசி, அந்த செயின் காப்பி ஷாப்புக்கு டைரக்டாய் சப்ளை செய்வதற்கு  ஆலோசனை கொடுத்து, தன விசிட்டிங் கார்டை கொடுத்து, அதன் ஓனரிடம் கொடுக்கச் சொன்னார். எங்கே போனாலும் அதன் மூலம் என்ன லாபம் கிடைக்கும் எனச் செயல்படுவதால் தான் அவர் பில்லியனர், நான் சல்லியனர்.

பிறகு காரை எடுத்துக்கொண்டு பாலத்தின் மறுபுறம் இருந்த ஆறாம் தெருவுக்கு போனோம். அதனைப்பார்த்துவிட்டு அப்படியே உறைந்துபோனேன்.

தொடரும்