வைகோ என்ன செய்யவேண்டும்?

          வைகோ எனக்கு மிகவும் பிடித்த தலைவர் என்று இருந்து அதன்பின் பிடிக்காத தலைவர்களுள் ஒருவர் என்று ஆகி சில வருடங்கள் ஆகிறது.

          பேச்சுத்திறமை, எழுத்துத்திறமை, தலைமை ஆளுமை, தமிழ் மட்டுமின்றி ஆங்கிலத்திலும் நல்ல புலமை, தமிழ்நாடு மட்டுமல்லாது இந்திய நாடு ஏன் இலங்கை மலேசியா போன்ற உலகின் சில பகுதிகளிலும் மதிக்கப்பட்ட தலைவர்.

          கலைஞர் கருணாநிதி அவருக்கு பலமுறை MP பதவி கொடுத்து அழகு பார்த்தார். வைகோவுக்கும் கலைஞர் மேல் அதீத பாசம் இருந்தது. ஆனால் ஸ்டாலினுக்கும் இவருக்கும் ஒத்துப்போகவில்லை .ஒரு கட்டத்தில் தன் மகன் ஸ்டாலினுக்கு  மேல் போய்விடுவாரோ என்பதால் சிறிதே ஓரம் கட்டப்பட்டு இறுதியில் ஒதுக்கப்பட்ட வைகோ வெளியே சென்று வேறு கட்சி ஆரம்பிக்கும் நிலைக்குத் தள்ளப்பட்டார். இலங்கை சென்று பிரபாகரைப்பார்த்தது என்ற காரணம் ஒரு சாக்குதான்  .

          ஆனால் திமுகவில் இருந்த பலருக்கும் வைகோவின் மேல் பற்று இருந்தாலும்  கருணாநிதியை விட்டுவிட்டு அவரை ஆதரிக்கும் அளவுக்கு இல்லை என்பதால் வைகோ வளர முடியவில்லை.

          தேர்தல்களிலும் தனித்து நிற்குமளவுக்கு பலமில்லை என்பதால் அதிமுக மட்டுமல்ல, வெட்கத்தை விட்டு மனஸ்தாபத்தில் பிரிந்து வந்த திமுக கூடவும் மாறி மாறி கூட்டணி வைக்க வேண்டிய நிலை.

          ஆனாலும் திமுகவை விட அதிமுகவில் அதிக மூக்குடைப்புகள் நடந்தன. அதுவும் போன தேர்தலில் நடந்தது மிக அநியாயம். தோற்கும் பக்கம் நின்று விஜய்காந்தைப் பிடித்துக் கொண்டு வீரவசனம் பேசி அசிங்கப்பட்டதோடு, தான் ஜெயிப்பதல்ல திமுகவை தோற்கடிப்பதே என் இலட்சிய திட்டம் என்று சொல்லி தரம்  தாழ்ந்தார்.

வைகோ செய்த தவறுகள்:

1.   என்னதான் மனஸ்தாபம் இருந்தாலும் தன்னை வளர்த்த தலைவரை அனுசரிக்காமல் வெளியே வந்தது. இவருக்கு இணையான ஒருவர் திமுகவில் இப்போது இல்லை .

2.   தமிழகப் பிரச்சனைகளை அதிகமாக முன்னெடுக்காமல், நீண்ட நெடிய காலமாக இலங்கைப் பிரச்னையையே பேசி தமிழக மக்களிடமிருந்து அந்நியப்பட்டது. வளர்த்து விட்ட தலைவரான கருணாநிதியை பலசமயம் மிகவும் கீழத்தரமாக திட்டியது.

3.   கொள்கைப் பிடிப்பின்றி மாறி மாறி கூட்டணிகள் அமைத்து ஏன் பிஜேபி கூடவும் கூட்டணி சேர்ந்தது.

4.   கூட்டணி சேர்ந்தும் ஜெயிக்க முடியாமல் சட்டசபையில் பங்கெடுக்க முடியாமலே போனது.

5.   தனிப்பட்ட செல்வாக்கால் ஒருமுறை கூட ஜெயிக்க முடியாதது.

6.   உணர்ச்சி வசப்பட்டு எடுத்த கடைசி நேர முடிவுகளால் சுயமரியாதையை இழந்து போனது.

7.   தன் கூட இருந்த இரண்டாம் கட்ட தலைவர்களை வளர்க்க முடியாமல் போனதால் இழந்து போனது.

8.   கடைசி நேர குளறு படிகளால் காசு வாங்கி விட்டார் என்ற கெட்ட பெயரும் வந்தது

         இப்படி சொல்லிக் கொண்டே போகலாம்.

வைகோவின் தற்போதைய நிலை:

1.   தான் கூட்டுச் சேர்ந்த மக்கள் கூட்டணி இப்போது ஒன்றுமில்லாமல் போனது. குறிப்பாக விஜய் காந்தின் கட்சி.

2.   தனித்து நிற்கும் பலம் இப்போது மதிமுக, தேதிமுக, விடுதலைச் சிறுத்தைகள், இரு கம்யூனிஸ்ட்டு காட்சிகள், பாமகா, சீமான் என்று யாருக்கும் கிடையாது.

3.   ஜெயலலிதாவுக்குப் பின்னைய அதிமுக என்பது அழியும் திராவிட முன்னேற்றக் கழகமாக ஆகிப்போனது.

4.   ஊழலில் ஊறிய, குண்டர்கள் மற்றும் கோமாளிகள் கூட்டமான அதிமுகவுக்கு அவரால் இனி ஆதரவு அளிக்க முடியாது.

5.   சசிகலா, தினகரன், கும்பலிடமும் போகமுடியாது. கொள்கையை விட்டு வெறும் பணத்திற்காக நாஞ்சில் சம்பத் அங்குதான் இருக்கிறார்.

6.   எந்த ஒரு நபருக்காக திமுகவை விட்டு வெளியேறினாரோ அதே நபரான மு.க.ஸ்டாலினிடம் போக வேண்டிய நிலை.

7.   அவருக்குப்பின் கட்சியை வழி நடத்தும் வலிமை யாரிடமுமில்லை.

வைகோ என்ன செய்ய வேண்டும்?:

1.   மு.க. ஸ்டாலினிடம் முழுவதாக ஒப்புரவாகி, தன் கட்சியை திரும்பவும் தாய்க் கட்சியான திமுகவுடன் இணைக்க வேண்டும். ஏனென்றால் அவருக்குப் பின் இதுதான் நடக்கும் என்பதால் இப்போதே செய்ய வேண்டியது அவசியம். எம்ஜியாரே இதைச் செய்ய நினைத்தபோது வைகோ ஏன் செய்யக்கூடாது? ஏனென்றால் அவருக்குப்பின் நிச்சயமாக மதிமுக சுவடில்லாமல் அழிந்துவிடும்.

2.   முடிந்தால் அன்பழகனுக்கு ஓய்வு கொடுத்து பொதுச் செயலாளர் பதவியைக் கோரிப் பெறலாம்.

3.   முதலமைச்சர் பதவி ஸ்டாலினுக்குத்தான் என்றும் எக்காலத்திலும் அதற்கு முயற்சி பண்ண மாட்டேன் என்றும் வாக்குக் கொடுத்துவிட வேண்டும். வீண் பிரச்சனைகளை இது தவிர்க்கும்.

4.   மீண்டும் பாராளுமன்றம் புகலாம். இல்லையென்றால் ஏதாவது தமிழ்ப்பணி எடுத்துக் கொண்டு வாக்கு அரசியலிலிருந்து முற்றிலுமாக ஒதுங்கிக் கொள்ளலாம்.

5.   திமுகவின் உள்கட்ட பல்கலைக்கழகம் ஒன்றை ஆரம்பித்து அதற்கு துணை வேந்தர் ஆகலாம்.

6.  உலகமெங்கும் சுற்றி தமிழ்ப்பணி செய்யலாம், இதற்கு அரசியலிலிருந்து ஓய்வு பெற வேண்டியது அவசியம். இல்லையென்றால் அவரது திறமைகளும் உழைப்பும் யாருக்கும் பயன்படாமலே போய்விடும்.

 நன்பர்கள்  அனைவருக்கும் என் இனிய கிறிஸ்துமஸ் தின வாழ்த்துக்கள்.இறைமகன் இயேசு உங்களுக்கு மகிழ்ச்சியையும் நிறைவான மன அமைதியையும் தருவாராக.

பேரரசி சசிகலா வாழ்க !!!!!!!!!!!!!!!!

பெரும்பான்மையான எம் எல் ஏக்கள், எம்பிக்கள், கையில் இருந்தும், பொதுச் செயலாளர் பதவியைக் கைப்பற்றியிருந்தும் நினைத்தது போல் உடனடியாக சசிகலா முதலமைச்சர் பதவியை அடைய முடியவில்லை.

ஜெயலலிதா இறந்து போனதைத் தொடர்ந்து துக்கம் அடங்குவதற்குள், வர்தாப்புயல் மற்றும் ஜல்லிக்கட்டு விவகாரம் வந்து தாமதப்படுத்தியது. ஒரு புறம் தீபா குடைச்சலைக் கொடுக்க இப்போது பன்னீர் என்ற ருசி கண்ட பூனை புயலாக எழுந்துள்ளது. அது தவிர சொத்துக் குவிப்பு வழக்கின் இறுதித் தீர்ப்பும் வந்து இருந்த கொஞ்ச  நஞ்சம் நம்பிக்கையையும்  தகர்த்துவிட்டது

 இப்போது  சசிகலா என்னதான் செய்யமுடியும் ?.

பரதேசியின் பகிரங்க ஆலோசனைகள் :

1.   உடனடியாக ஜெயலலிதாவின் சொத்து மதிப்பை துல்லியமாகக் கணக்கிட்டு அதனை எம்.எல்.ஏ. எம்பிக்களிடம் தெரிவித்து அதனை அனைவருக்கும் பகிர்ந்தளிப்பதாக உறுதி அளிக்கலாம். இதன் மூலம் அவர்கள் திட்டுக்கு அடங்காவிட்டாலும் துட்டுக்கு அடங்கிப்போக வழியுண்டு. உள்ளே இருந்தாலும் வெளியே இருந்தாலும் ஆட்சியை தொடர்ந்து நடத்தலாம்.

2.   தீபாவிடம் பேசி அவர் ஏன் தனியாக ஃபிளாட்டில் தங்க வேண்டும் போயஸ் கார்டனுக்கு  வந்துவிடலாம் என்று சொல்லி அழைத்து வந்துவிட்டால் போதும். பிறகு தானாக மற்றவை( ?) நடந்துவிடும்.

3.   பன்னீர் செல்வத்திற்கு ரகசியமாக மிடாஸ் ஆலையை எழுதி வைத்துவிட்டு, கண்ணீர் செல்வம், வெந்நீர் செல்வம் ஆனதின் பின் இப்போது மிடாஸ் ஆலையின் அதிபராக தண்ணீர் செல்வமாக ஆகிவிட்டார் என்று சொல்லி அவரை ஓய்த்துவிடலாம்.

4.   எம்.எல்.ஏக்கள் அனைவரிடமும் பத்தாண்டுக்கு பாண்டு எழுதி வாங்கி கட்சி மாற்றத்திற்கு தடை செய்யலாம்.

5.   முடிந்தால் மு.க.அழகிரிக்கு ஒரு ஆயிரத்தைக் கொடுத்து ( அட கோடிதான் பாஸ்)  அதிமுக முதலமைச்சர் ஆக நிறுத்தி கருணாநிதியின் ஆதரவைப் பெறலாம். அவர் படியவில்லையென்றால் மு.க.ஸ்டாலினை அதிமுக முதலமைச்சர் ஆக்கிவிட்டால் எல்லாம் சரியாகி முடிந்து விடும்.

6.   நடராஜன் அவர்கள் பொங்கல் விழாவில் ஏற்கனவே தான் மாடு பிடித்த கதையைச் சொல்லியதால், தஞ்சாவூரில் சிறப்பு ஜல்லிக்கட்டு ஒன்றை ஏற்பாடு செய்து  ஒத்த மாடோ இல்லை ஒரு தொத்த மாடையோ அடக்குவதற்கு ஏற்பாடு செய்து, மாவீரன் நடராஜனை முதலமைச்சராக ஆக்கலாம்.

7.   பேசாமல் திமுகவுடன் அதிமுகவை இணைத்துவிட்டால், தீபா பன்னீர் இருவரையும் ஒரே சமயத்தில் கவிழ்த்து விடலாம். 

8.   கொடநாடு, சிறுதாவூர், பையனுர் ஆகிய இடங்களை ஆக்ரமித்து அனுபவிக்கும் அனுபவத்தை வைத்து, ஆளுநர் இருப்பிடமான ராஜ்பவனை ஆக்ரமித்து, சொந்தமாக்கி ஆளுநரின் பேரிலேயே எழுதிக் கொடுத்துவிடுகிறோம் என்று சொல்லி முதலமைச்சர் ஆக அனுமதி வாங்கலாம்.

9.   தேர்தல் சமயத்தில் இருந்த டிரக்கில் பணத்தை நிரப்பி டெல்லிக்குச் சென்று சூப்ரீம் கோர்ட்டை அதன் நீதிபதிகள் உள்பட  விலை பேசலாம்.  

Add caption

10.                இதெல்லாம் ஒத்து வரவில்லையென்றால்,அருமையான யோசனை ஒன்று. கட்சியைக் கலைத்து விட்டு தமிழ்நாட்டை தனியாகப்பிரித்து ,தமிழகத்தின் பேரரசியாக முடிசூட்டிக் கொள்ளலாம். தனிநாடாகி விட்டால் உச்ச நீதிமன்றத்தின் உத்தரவு செல்லாமல் போய் விடுமே. என்ன புனித ஜார்ஜ் கோட்டையின் டம்மி பீரங்கிகளைக் களைந்துவிட்டு நிஜ பீரங்கிகளை நிறுவிவிட்டால் போதும். கமிஷனர் ஜார்ஜை படைத்தளபதியாக நியமித்தால் விசுவாசமாக இருப்பார்.

11.                மூன்றாவது வரை மட்டுமே படித்திருக்கிறார் என்பதனை மாற்றி ஏதாவது ஒரு பல்கலைக்கழகத்தில் டாக்டர் பட்டத்தை வாங்கிவிட்டால் முடிந்தது பிரச்சனை டாக்டர் சசிகலா என்று மாற்றிக் கொள்ளலாம். ஏனென்றால் மறுபடியும் ஆரம்பப் பள்ளியிலிருந்து ஆரம்பித்தால் நன்றாக இருக்காது.

12.                ஒற்றர் படைத்தலைவராக சுப்ரமணிய சுவாமியை  நியமித்து விடலாம். தா. பாண்டியனை அரண்மனை பேச்சாளர் ஆக்கலாம்.

13.                அகழியை வெட்டி ஆழப்படுத்தி கூவத்தைவிட்டுவிட்டால் ஒரு பயகிட்ட வருவானா?

14.                அந்தப்புரத்தை விரிவுபடுத்திவிட்டால் நடராஜன் ஏன் கனடா பக்கம் போகப்போகிறார்?

15.                இளவரசி ஏற்கனவே இருப்பதால் வேறுயாருக்கும் தனியாக இளவரசிப்பட்டம் சூட்டத் தேவையில்லை.

16.                சுதாகரனை இன்னும் கொஞ்சம் பின்னால் முடிவளர்க்கச் செய்து பட்டத்து இளவரசனாக்கிவிடலாம்.

17.                வெளிநாட்டு பொறுப்புகளை நமது பிரதமரிடமே கூடுதலாகக் கவனிக்கச் சொன்னால் அவர் உவகையுறுவார்.

18.                ஒத்துவரும் எம்.எல்.ஏக்களை அந்தந்த பகுதியின் சிற்றரசர்களாக்கி விடலாம். தன் குடும்ப வாரிசுகளான திவாகரன், தினகரன் , பாஸ்கரன், வெங்கடேஷ் ஆகியோரை, பல்லவ, சோழ, பாண்டிய, சேர மண்டலங்களின் மன்னர்களாக நியமித்துவிடலாம்.

19.                சிரிப்பதற்கு தடை: தமிழ்நாடு சசிநாடு என்று மாற்றப்பட்டு உடனடியாக யாரும் யாரையும் பார்த்து சிரிப்பதற்கு தடை விதிக்கப்படுகிறது. யார்ட்ட? மீறி சிரித்தால் அவர்கள் தலைகள் கொய்யப்பட்டு கோட்டை வாசலில்  தொங்கவிடப்படும்.

20.                விரைவில் முல்லைப் பெரியார் மற்றும் காவிரி நீர்ப்பிரச்சனைக்கு கேரளா மற்றும் கர்நாடகா மீது படையெடுக்கப்படும், இலங்கையில் நடராஜன் தலைமையில் தமிழீழம் அமைக்கப்படும் எனவும் தெரிகிறது.

மு.க. ஸ்டாலின் முன்னால் உள்ள சவால்கள் !!!!!!!!

1966ல் இளைஞர் அமைப்பாளராக தி.மு.கவில்   இணைந்து, 23 வயதில் மிசாவில் சிறை சென்று, சட்ட மன்ற உறுப்பினர், சென்னை மாநகர மேயராக மக்களால் இருமுறை தேர்ந்தெடுக்கப்பட்டு பின் உள்துறை மந்திரியாக வளர்ந்து, துணை முதல்வராக உயர்ந்து, 2015ல் சட்டமன்றத் தேர்தலைத் தனியாகச் சந்தித்து அதிக இடங்களை வென்று, தற்சமயம் சட்ட மன்ற எதிர்க்கட்சித் தலைவராக இருக்கும் ஸ்டாலின் அவர்கள் இப்போது திமுகவின் செயல் தலைவர்.

அவர் திமுகவின் செயல்படும் தலைவராகி பல ஆண்டுகள் ஆனாலும் இந்தப் பொறுப்பு தாமதமாக வந்தாலும், கருணாநிதியின் காலத்திலேயே இது வந்தது மிகவும் நல்லது. இதைத்தான் நானும் என்னுடைய முந்தைய பதிவு ஒன்றில் சொல்லியிருந்தேன். ( http://paradesiatnewyork.blogspot.com/2016/05/blog-post_31.html) என்ன, கருணாநிதியும் பொதுக்குழுவுக்கு வந்திருந்தால் நன்றாக இருந்திருக்கும்.

ஆனாலும் அன்பழகன் மற்றும் துரைமுருகன் புடைசூழ ஸ்டாலின் கருணாநிதியிடம் ஆசி வாங்கும் புகைப்படம் ஒன்று   போதும், இது கருணாநிதியின் சம்மதத்துடன் நடந்த ஒன்று தான் என்று நிரூபிக்க. அதோடு பேராசிரியர் அன்பழகன் அவர்களும் மிகப்பெரிய தலைவர்தான். திமுகவின் பொதுச் செயலாளரான அவர் தலைமையில் பொதுக்குழு நடந்ததும் ஒன்றும் குறைவானதில்லை.

பொறுப்பு ஏற்ற முதல் நாளே முதலமைச்சரை(?) நேரில் சந்தித்து சில கோரிக்கைகளை வைத்தது, மிகவும் நல்ல காரியம்

செயல்தலைவர் என்பது தலைவருக்கு இணையான பதவி என்பதோடு இது பதவியல்ல பெரும் பொறுப்பு என்று முகஸ்டாலின் சொல்லியிருக்கிறார். சொல்வதோடு அதை உணர்ந்து செயல்பட்டால் திராவிட இயக்கம் பாதுகாக்கப்பட்டு அதனை  அடுத்த தலைமுறைக்கு  எடுத்துச்செல்ல  முடியும்.

மு.க.ஸ்டாலின் முன் உள்ள சவால்களை ஒவ்வொன்றாக பார்ப்போம்.

1.   ஆரோக்கியமான அரசியலை முன்னெடுத்து கடந்த கால எதிர்க்கட்சி  என்றில்லாமல் எதிரிக்கட்சி நிலை போன்ற கசப்பான நினைவுகளை களைய வேண்டும்.

2.   எல்லாத் தலைவர்களுடனும் பொது நிகழ்வுகளிலும், தனிப்பட்ட குடும்ப நிகழ்ச்சிகளிலும் கலந்து கொண்டு காழ்ப்புணர்ச்சி அரசியலை கட்டுப்படுத்த வேண்டும்.

3.   “மக்கள் பணியே மகேசன் பணி”  என்று  செயல்பட்டு எந்த முடிவினை எடுத்தாலும் அது மக்களுக்கு உதவுமா இல்லையா  என்று பார்த்து எடுக்க வேண்டும்.

4.   உடனடியாக குடும்ப உறுப்பினர்களை முதலில் தனித்தனியாகவும் பிறகு மொத்தமாகவும் சந்தித்து குடும்ப ஒற்றுமையை நிலை நிறுத்த வேண்டும். இதுதான் ஸ்டாலினின்  தலையாய தலைவலி.

5.   அண்ணன்தானே என்பதால் எந்த விதத்தயக்கமும் இன்றி முக.அழகிரியை மதுரைக்கே சென்று சந்தித்து மனக்கசப்புகளையும் மனவேறுபாடுகளையும் களைய வேண்டும். தேவைப் பட்டால் முக.அழகிரியின் மகனுக்கு ஏதாவது பொறுப்புக் கொடுக்கலாம்.

6.   கனிமொழியையும் ராசாத்தி அம்மாவையும் சந்தித்து, எந்தப் பயமும் வேண்டாம் என்று உற்சாகப் படுத்தி தொடர்ந்து கட்சிப் பணிகளில் ஈடுபடுத்தலாம். அவர் மேல் உள்ள குற்றச் சாட்டு நீங்கும்வரை அரசுப் பணிகள் கொடுப்பதை தவிர்ப்பது நலம்.

7.   முடிந்த அளவுக்கு குடும்ப உறுப்பினர்களுக்கு கட்சிப்பதவி வழங்காமல் மற்ற பொறுப்புகளைக் கொடுக்கலாம்.

8.   கட்சிக்குள் கட்டுப்பாட்டை கொண்டுவந்தாலும் ஒரு நல்ல ஜனநாயக அமைப்பாக செயல்பட உறுதியெடுக்க வேண்டும்.

9.   ஊழலில் ஈடுபட்டு வெளியே தெரிந்தும், தெரியாமலும் இருக்கும் பழம்பெருச்சாளிகளை ஓரம் கட்டி பதவி நீக்கி, கட்சிப் பணியில் ஈடுபடுத்த வேண்டும்.

10.                எல்லோரும் குறிப்பாக கட்சித் தொண்டர்கள் இலகுவில் அணுக முடியும் தலைவராக விளங்க வேண்டும்.

11.                தலைவர்களின் தலைவர் என்பதைவிட தொண்டர்களின் தலைவர் என்பது தான் எப்போதுமே உயர்வைத்தரும்.

12.                அடுத்தக் கட்ட தலைவர்களை உருவாக்க முயன்று திமுகவில் திறமையான பலரை தயார்ப்படுத்த வேண்டும்.

13.                அண்ணா அறிவாலயத்தில் அன்பழகன் தலைமையில் திராவிடப் பல்கலைக்கழகம் அமைத்து, திமுகவின் சட்டமன்ற, பாராளுமன்ற உறுப்பினர்களாக விரும்புவர்கள், கட்சிப் பொறுப்புகளுக்கு வருபவர்கள் என எல்லோரும் அதில் பயின்று சான்றிதழ் பெறுவது அவசியம் என்ற நிலையினைக் கொண்டு வரவேண்டும்.

14.                திமுகவின்  சட்டமன்ற உறுப்பினர்கள் உட்பட பொறுப்பிலிருக்கும் அனைவருக்கும் கணிணிப் பயிற்சி அளித்து அடுத்த கட்ட தலைமைக்கு ஆயத்தப்படுத்த வேண்டும்.

15.                தலைமைப் பொறுப்புகளுக்கு மேலிருந்து கீழ் என்றில்லாமல் கீழிருந்து மேல் என்று கொண்டுவரும் நிலையை உருவாக்க வேண்டும்.

16.                கட்சியின் உறுபினர்களிடம் மாத உறுப்பினர் தொகை வசூலிக்கப்பட்டு கட்சியின் கிளைக்கழக பொறுப்பாளர்களுக்கு ஊதியம் வழங்கலாம்.

17.                கிராமங்களில் வளர்ச்சிப் பணிகளை முன்னெடுத்து எல்லாவற்றுக்கும் அரசாங்கத்தை எதிர்பார்க்காமல் கட்சியின் நிதியிலிருந்து செலவழித்து சிறுசிறு பணிகளைச் செய்து முடிக்க வேண்டும். கிராமத்து மக்களும் இத்தகைய பணிகளுக்கு மனமுவந்து உதவுவார்கள். அந்த ஒரு நம்பிக்கையை ஏற்படுத்தி கணக்கு வழக்குகளை பகிரங்கமாக அறிவிக்க வேண்டும்.

18.                ஓட்டுக்கு காசு கொடுக்கும் வழக்கத்தை முற்றிலுமாக ஒழிக்க வேண்டும். எப்போதும் மக்கள் பணி செய்வது திமுகதான் என்றால் மக்கள் மகிழ்ச்சியுடன் உதவுவார்கள்.

19.                எதிர்க்கட்சியாக இருப்பதால் எல்லாவற்றையும் எதிர்க்காமல் எதிர்க்க வேண்டியவற்றை எதிர்த்து, பாராட்ட வேண்டியதை பாராட்டி, வரவேற்க வேண்டியதை எதிர்த்து நல்ல அரசியல் செய்ய வேண்டும்.

20.                எதிர்க்கட்சியில் இருந்தாலும் ஆளுங்கட்சியில் இருந்தாலும் தமிழ்நாட்டின் ஒட்டு மொத்த வளர்ச்சியை முன்னெடுத்து நாடு நல்ல வளர்ச்சியடைய பாடுபட வேண்டும்.

எந்த ஒரு எதிர்க்கட்சியினையும் குறைவாக மதிப்பிடாமல் இருந்து,    இவற்றையெல்லாம் கடைப்பிடித்தால் மு.க.ஸ்டாலின் தனிப் பெருந்தலைவராக உருவெடுத்து மக்கள் மனதில் நீங்காத இடம் பிடிக்கலாம்.  திராவிட இயக்கத்தை அடுத்த தளத்திற்கு எடுத்துச் சென்று சாதி சமய வேறுபாடில்லாத சமத்துவ சமுதாயத்தை அமைக்கலாம்.