பைத்தியக்காரர்களும் பரதேசியும் !!!!!!!!!!!!!!

The American College, Madurai

1975 சி.எஸ்.ஐ ஆலயம், தேவதானப்பட்டி.

அன்றைக்கும் ஜபார் வந்து என் அருகில் உட்கார்ந்தான். சி.எஸ்.ஐ பள்ளிதான் ஞாயிற்றுக்கிழமைகளில் தேவாலயமாகிவிடும் அல்லது தேவாலயம் தான் திங்கள் முதல் சனி வரை பள்ளிக்கூடமாகிவிடும். ஆரம்பப்பள்ளியின் தலைமையாசிரியர் என் பெரியப்பா ஜெயராஜ் அவர்கள். அவர்கள் தான் ஆலயத்தையும் நடத்துவார்.

நாங்கள் வந்து என் பெரியப்பாவின் மகன்களுடன் சேர்ந்து, உட்காரும் பலகைகளை வரிசையாகப் போடுவோம்.  போட்டு உட்கார்ந்தவுடன் ஜபார் ஓடிவந்து என்னருகில் உட்கார்ந்தான். ஜபார் ஒரு முஸ்ஸிம். மனநிலை சரியில்லாதவன். ஆனால் ஞாயிற்றுக்கிழமைகளில் எங்கிருந்தாலும் மணியடித்தவுடன் ஓடிவந்துவிடுவான்.  அதன் பின் என் பெரியப்பா தரும் சில்லறைக்காசுகளை சந்தோஷமாக பெற்றுக் கொண்டு ஓடிவிடுவான். அவன் உடைகள் அழுக்காக ஷேவிங் செய்யாத முகத்துடன் இருப்பான். அவன் பேச மாட்டான். ஆனால் ஆலயம் நடக்கும் போது நாங்கள் பாடும்போது ராகமாக "பிபிபிபிபி" (BBB) என்று கூடவே பாடுவான். என்னவோ தெரியலை, எப்போதும் என் பக்கத்தில்தான் உட்காருவான். நான் எழுந்து வேறு இடம் போனாலும் அங்கேயும் வந்து விடுவான். ஆரம்பத்தில் ரொம்பவும் பயந்த நான் அப்புறம் பழகிவிட்டேன். இப்போது நினைத்தாலும், அந்த பிபிபிபி காதில் ஒலிக்கிறது.

1978  உயர்நிலைப்பள்ளி, தேவதானப்பட்டி

“டே ய் மகேந்திரா மே மாச லீவுக்கு மாமா வீட்டுக்கு மெட்ராசுக்குப் போறோம்".

"உங்க மாமா வீடு எங்கடா இருக்கு?”

'கீழ்ப்பாக்கம்'

"அங்கதாண்டா பைத்தியக்கார ஆஸ்பத்திரி இருக்கு பார்த்துப்போடா".

மாமா வீட்டுக்கு வந்த சமயம், கீழ்ப்பாக்கம் தெருவில் நடக்க ரொம்ப பயமாயிருக்கும், ஒரு வேளை பைத்தியக்காரர்கள் தப்பித்து வந்துவிட்டால் என்னாவது என்று.

1981-அமெரிக்கன் கல்லூரி மதுரை - NSS

Meenakshi Amman Temple

என்னுடைய நண்பர்கள் எல்லோரும் மீனாட்சியம்மன் கோவில் கூட்டத்தை ஒழுங்கு செய்ய மிகுந்த சந்தோஷமாகப் போனார்கள். மீனாட்சியம்மன் கோவில் டூட்டிக்கு எப்பவும் போட்டி இருக்கும். எதுக்குன்னு நான் சொல்லித்தான் தெரியனுமா? அம்மன் தரிசனம் அமோகமாய் நடக்கும் இடமல்லவா.ஆனால்  என்னவோ தெரியலை என்னைக்கூப்பிட்ட NSS தலைவர், "ஆல்ஃபி நீ பாலமந்திர் மெண்டலி ரிட்டார்டடு ஹோமுக்குப்போ"என்றார்.

1985 சமுகப்பணிக்கல்லூரி, மதுரை  

Madurai Institute of Social work

மெடிக்கல் & சைக்கியாட்டிரிக் (Medical & Psychiatric) சோசியல் வொர்க் என்ற சப்ஜக்ட் படிக்கும் சமயம் மற்ற எல்லோரும் ஹாஸ்பிடலில் வேறு வேறு டிபார்ட்மெண்டுக்குப் போனார்கள். என்னைக் கூப்பிட்ட பேராசிரியர் கண்ணன், "ஆல்ஃபி உனக்கும் ரேகாவுக்கும் ராஜாஜி மருத்துவமனை என்றார்".

"என்ன டிபார்ட்மெண்ட்?," என்றேன்

"மன நலப்பிரிவு", என்றார்.

ரேகா ஒன்றும் சொல்லவில்லை. எனக்குத்தான் என்னடாது எங்க போனாலும் இது தொடருது என்றிருந்தது. அங்கு நிறைய கதைகள் தெரிந்து கொண்டோம். பின்னர் சொல்கிறேன்.

1986 - பேராயர் இல்லம் மதுரை.

"ஆல்ஃபி, நீ சோஷியல் வொர்க் முடிச்சுட்டேல்ல", என்றான் ஜேம்ஸ்.

 'ஆமடா ஃபர்ஸ்ட் கிளாஸ்ல"என்றேன்.

"போய் எங்கப்பாவைப்பாரு, ஒரு வேலையிருக்கு".

உற்சாகத்தோடு அப்போதிருந்த மதுரை பிஷப், ஜேம்சின் அப்பா டேவிட் போத்திராஜீலுவைப் போய்ப் பார்த்தேன்.

"வா ஆல்ஃபி உட்காரு".

"பரவாயில்ல இருக்கட்டும் ஐயா"

"ஜேம்ஸ் சொன்னான், சோஷியல் ஒர்க் முடிச்சுட்டாயாம்ல ரொம்ப சந்தோஷம், ஜேம்சைக் கூட சோசியல் ஒர்க்தான் அனுப்பலாம்னு இருக்கேன். சிவகாசி சாட்சியாபுரத்தில் ஒரு சோசியல் ஒர்க்கர் வேலை இருக்கு போறியா.

"நீங்க எங்க சொன்னாலும் போறேன் ஐயா".

ஸ்டெனோவைக் கூப்பிட்டு மடமடவென்று டிக்டேக் செய்ய, 10 நிமிடத்தில் அவரின் தனிப்பட்ட லெட்டர்பேடில் ரெக்கமென்டேஷன் லெட்டர் வந்தது. அழகாக கையெழுத்திட்டு, “ஆல் தி பெஸ்ட்", என்று சொல்லிக் கொடுத்தார்.

என் செட்டிலேயே வேலைகிடைத்த முதல் ஆள் என்று பெருமையுடன் வெளியே வந்து ஆவலாய்த் திறந்து பார்த்தேன்.

பெறுபவர், ஹெட்மாஸ்டர், ஸ்கூல் ஃபார் தி டெஃப் அன்ட் மென்டலி ரிட்டார்டு" என்று போட்டிருந்ததை பார்த்து அதிர்ந்தேன்.

1988, கீழ்ப்பாக்கம் சென்னை.

தேவதானப்பட்டி வந்திருந்த என்னைப்பார்த்து, என் மாமா துரைப்பாண்டியன் சொன்னார், "சேகர் நீ மெட்ராசுக்கு வந்துரு, உன் படிப்புக்கு நல்ல வேலை கிடைக்கும்". மெட்றாஸ்னா எனக்கு ரொம்பப் பயம் ஆனாலும் ஏதோ தயக்கத்துடன் சென்னை வந்துவிட்டேன். ஒரு மாதமாகியும் வேலை எதுவும் அமையவில்லை. அன்று மாலை என் மாமா பெண் வசுதா வந்து சொன்னது. "ஷேகர் என் ஃப்ரண்ட் SCARF ல் வேலை செய்கிறான் அங்கே ஒரு வேலையிருக்கு.

SCARF (The Schizophrenia Research Foundation) பற்றி எனக்கு நன்றாக தெரியும்.

"வேலை SCARF லயா" என்றேன் தயக்கத்துடன்.

"இல்லை வேறு இடத்திலாம், நீ போய்ப்பாறேன்".'

நல்ல வேளை என்று   நினைத்துக்கொண்டு போய்ப்பார்த்தேன்.

வேலை இருந்தது, இண்டர்வியூ இருந்தது, கிடைத்தும் விட்டது. எங்கு தெரியுமா? சென்னை அரசினர் மருத்துவமனை மனநலப்பிரிவு பிரபல மனநல மருத்துவர் Dr.சுப்ரமணியம்  (திருமதி. கரியாலி IAS ன் கணவர்) அவர்களின் கீழே ICMR (Indian Council of Medical Research) பிராஜக்டில் ரிசர்ச் ஆஃபிசர் (Research Officer).

நியூயார்க் 

அதன் பின்னர் இன்னும் ரெண்டு டிப்ளமோ முடித்து மனித வள மேம்பாட்டுக்கு மாறி (Human Resources) சில நிறுவனங்களில் வேலை செய்து நியூயார்க் வந்தேன். இனிமேல்  மனநல  நிறுவனங்களில் வேலை செய்ய வாய்ப்பே இருக்காது என்று நிம்மதியாய்  இருந்தேன்.

நியூயார்க்கில் மாலைக்கல்லூரியில் மாஸ்டர் இன் டிவினிட்டி (Master in Divinity)படித்து முடித்து பட்டம் பெற்ற சில நாட்களுக்குள் பாஸ்டர் கிறிஸ்டோபர் பொன்னுராஜ் அவர்கள் போன் செய்தார்.

"ஆல்ஃபி, பிரான்க்ஸில்  (Bronx) சனிக்கிழமை வேலை செய்ய ஒரு சேப்பலின் (Chaplain) வேணுமாம், நீ போறியா".

“ஸ்யூர் பாஸ்டர் அட்ரஸை ஈமெயிலில் அனுப்புங்கள் ரொம்ப தேங்க்ஸ் பாஸ்டர்". 

Bronx Psychiatry Center

சற்று நேரத்தில் ஈமெயில் இன்பாக்ஸில்  வந்து விழுந்தது. சாப்ளின்  அட் பிரான்க்ஸ் சைக்கியாட்ரி  சென்ட்டர் (Bronx Psychiatry Center).

முக்கிய அறிவிப்பு :

தமிழ்நாடு அறக்கட்டளை சார்பாக வருகின்ற மே 10 ஆம் தேதி , நடக்கும் அன்னையர் தின கொண்டாட்டத்தில் திருமதி உமையாள் முத்து அவர்கள் தலைமையில் நடக்கும் பட்டிமன்றத்தில் அடியேன் பேசுகிறேன் . உங்கள் வருகையையும் வாழ்த்தையும் எதிர்பார்க்கிறேன்.