Monday, August 14, 2017

பிக்பாஸ் ஜூலி ஏமாளியா இல்லை கோமாளியா?

பிக் பாஸ் பதிவு 1

Related image
Juliana 
பிக் பாஸ் நிகழ்ச்சியைத்தொடர்ந்து பார்ப்பவர்களுக்கு, ஜூலியோட என்ட்ரி ஞாபகமிருக்கும் என நினைக்கிறேன். சிவப்புத்துணியைத் தலையில் கட்டிக்கொண்டு ஒரு பொதுவுடமைப் புரட்சிப் பெண்ணாக வந்தார். கமல் கூட அதைப்பற்றிக் கேட்டது ஞாபகமிருக்கிறது.
ஜூலி உலகமெங்கும் வாழும் தமிழர்களுக்கு ஏற்கனவே தெரிந்த முகம்தான். ஜல்லிக்கட்டுப் போராட்டத்தின் எழுச்சிப் போராளியாக அனைவரும் பாராட்டத்தக்க வீரப்பெண்ணாகத்தான் ஜூலியை நாம் அறிந்திருந்தோம். ஜூலியைக் கொன்றுவிட்டார்கள் என்ற புரளி காதில் விழுந்த போது பதறாதவர்கள் யாருமில்லை என்று சொல்லலாம்.
அப்படிப்பட்ட ஜூலி  சற்றும் எதிர்பாராத விதத்தில் பிக்பாசில் என்ட்ரி கொடுத்தது ஆச்சரிய அதிர்ச்சி. பெரும்பாலும் திரைத்துறையைச் சேர்ந்த மற்ற போட்டியாளர் மத்தியில் ஜூலியைத் தேர்ந்தெடுத்த பிக்பாஸ் அடித்தது மாஸ்டர் ஸ்ட்ரோக் என்று நினைத்தேன். ஜூலியை சாமான்யரின், சிறுபான்மையினரின், பொதுமக்களின் பிரதிநிதியாகத்தான் எல்லோரும் பார்த்தனர்.
ஆனால் எவ்வளவுக்கெவ்வளவு ஜூலிக்கு மக்கள் ஆதரவு இருந்ததோ எவ்வளவுக்கெவ்வளவு அவர் மேல் பரிவும் பாசம் காட்டினார்களோ, அதைவிட அதிகமான வெறுப்பையும் அவர் சம்பாதித்துக் கொண்டது ஒரு நகைமுரண். எவ்வளவுக்கெவ்வளவு ஜூலி உள்ளே வரும்போது மகிழ்ச்சியடைந்தார்களோ அவ்வளவுக்கவ்வளவு வெளியேறியதில் மகிழ்ச்சியடைந்தார்கள். ஜூலி ஏமாளியா? இல்லை கோமாளியா?.
Related image
Arthi, Julie and Gayathri 
 திரைத்துறையைச் சேர்ந்த காயத்ரி, சிநேகன், ஆர்த்தி நமீதா மற்றும் சக்தியால் ஜூலியை அவர்களோடு சரிசமமாக ஏற்றுக் கொள்ள முடியவில்லை. படுக்கை ஒதுக்குவதிலிருந்து இது ஆரம்பித்தது. அதோடு ஆர்த்தியும் காயத்ரியும் தாங்கள் சார்ந்த கட்சிகளுக்கு எதிராக ஜூலியின் போராட்டம் அமைந்ததால் மேலும் வெறுப்பு கொண்டனர். அவர்கள் தனியாக சந்திக்கும்போதெல்லாம் ஜூலியே அவர்களின் பேச்சுடைத் தலைவியாக பேசுபொருளாக இருந்தார். இது ஜூலி போகும்வரை நீடித்தது.
அவர்களுடைய ஒதுக்கி வைத்தல், நையாண்டி ஆகியவற்றை பொறுக்க முடியாமல் ஜூலி முதல் வாரம் எப்பொழுதும் அழுது கொண்டுதான் இருந்தார். அவருக்கு ஆறுதலாய் இருந்தது பரணியும் ஓவியாவும் மட்டும்தான். இந்த இருவரும் பிறரால் ஒதுக்கப்பட்டது அதன்பின் தான் நடந்தது.
அழும்போதெல்லாம் கட்டிப் பிடி வைத்தியம் செய்த சிநேகனும் அதனை போலியாகவே செய்தார். அதன்பின் பெண்களுடன் சேர்ந்து கேலி செய்தது அநியாயம். பரணி பாடவேண்டிய கவிஞர் பெண்களுடன் பொரணி பேசும் ஆளாக இருந்தது சகிக்கவில்லை. அதற்காகத்தான் அடிக்கடி அவர் சேலை உடுத்தும்படி வந்ததோ.
முதல் இரண்டு வாரங்களில் அதிகமான பேரால் நாமினேட் செய்யப்பட்டும் மக்களுடைய ஏகோபித்த ஆதரவு இருந்ததால் காப்பாற்றப்பட்டார் ஜூலி. அதோடு அவருக்கு எதிராக இருந்ததால்தான் ஆர்த்தி வெளியேற்றப்பட்டார். இதனை அறிந்து உணர்ந்து செயல்பட்டிருந்தால் ஜூலி வெளியேறி இருக்க மாட்டார். முதல் இரண்டு வாரங்களில் இந்த பிக்பாஸ் டைட்டிலை ஜெயிக்குமளவிற்கு அவர் ஒரு பலமான போட்டியாளராக இருந்தார் என்பதில் எந்த சந்தேகமில்லை. ஆனால் அதுவரை மக்கள்  மனதில் நம்பர் ஒண்ணாக இருந்தவர் தன்னுடைய பச்சோந்தித்தனத்தால் அதளபாதாளத்தில் சரிந்தது ஒரு எதிர்பாராத நிகழ்வு.
Image result for big boss julie entry

ஒடுக்கப்பட்டவர் ஒதுக்கப்பட்டவரோடு ஒன்று சேருவது ஒரு இயற்கையான நிகழ்வு என்பதால் பரணி ஜூலிக்கு ஆதரவுக்கரம் நீட்டினர். பேண்ட் ( Friendship Band) கூட கட்டிவிட்டார். தங்கையென உருகினார். ஆனால் முதன்முதலாக ஒடுக்கியவர்களோடு இணைந்து உதவி செய்த பரணியை ஜூலி ஒதுக்கியது அவர் செய்த மாபெரும் தவறு. மக்கள் யார் பக்கம் என அறியாமல் ஜூலி எடுத்த முடிவு சுத்த பைத்தியக்காரத்தனம். அதனால் உள்ளே நாமினேட் ஆகாமல் இருந்திருக்கலாம். ஆனால் வெளியே மக்களின் ஆதரவு சரியத்துவங்கியது.
ஓவியா தவிர எல்லோராலும் ஒதுக்கப் பட்ட பரணி, மன உளைச்சலில் உழன்று வெளியே போனால் போதுமென்று செயல்பட்டு வெளியேறினார். வயிற்று வலியால் அவதிப்பட்ட ஜூலியை நடிப்பு என்று எல்லோரும் ஒதுக்கிவிட, ஆதரவுக்கரம் நீட்டி  அரவணைத்தவர் ஓவியா. ஆனால் அப்போது அதனை  ஏற்றுக் கொண்டுவிட்டு அடுத்த நிமிடத்தில் ஓவியா மேலேயே பழிபோடும் அளவுக்கு ஜூலி தரம் தாழ்ந்த நிகழ்வு  அவள்மேல் இருந்த கொஞ்சநஞ்ச அனுதாபத்தையும் தகர்த்தெறிந்து. ஆனால் யாருக்காக ஜூலி இதைச் செய்தாரோ அவர்களும் ஒதுக்கிவிட, ஜூலி தன் இறுதிச்சமயத்தில் தன்னுடைய இயல்பை முற்றிலுமாக இழந்து எப்போதும் ஒரு சோகநிலையிலேயே இருந்தார். ஜூலியின் செயல்களில் எது நடிப்பு எது இயல்பு என்னும் வித்தியாசம் தெரியாத அளவுக்கு போனதால் மக்கள் முற்றிலுமாகக் கைவிட்டுவிட்டார்கள்.
Image result for snehan consoling  julie
Snehan
மாற்றம் என்பது ஒவ்வொருவர் வாழ்க்கையிலும் தேவைதான், ஆனால் அந்த மாற்றம் என்பது சுயநலமாக இருந்தாலும் பிறரினைப் பாதிக்காமல் இருக்க வேண்டும்.
ஜூலி மட்டும் இதனை நன்கு புரிந்து கொண்டு செயல்பட்டிருந்தால் பிக்பாஸ் டைட்டிலை வெல்லுமளவிற்கு சென்றிருப்பார். அவருக்கிருக்கும் தனிப்பட்ட திறமைகள் நன்றாகவே வெளிப்பட்டன. பாடுவதைச் சொல்லவில்லை. பாடுவது கர்ண கொடூரமாக இருந்தது. ஆனால் ஆடுவது நன்றாக இருந்தது. VJ போல ஆன்கரிங்  செய்தது நன்றாக இருந்தது. நல்ல பெயரில் தொடர்ந்து நிலைத்திருந்தால் வெளியே வரும்போது பெரிய ஸ்டாராகக் கூடிய வாய்ப்புகள் அனைத்தும் இருந்தன. ஆனால் இப்போது ஓடி ஒழியக்கூடிய அளவில்தான்  இருக்கிறது.
வெளியே போகும்போது கூட காயத்ரி, சக்தி, சிநேகன், ஆகியோரின் அன்பையும் முழுமையாக பெற்றுவிட்டோம் என்று நினைத்துத்தான் வெளியே போனார். கமல் போட்டுக் காட்டிய குறும்படம் கூட அவ்வளவு தாக்கத்தை ஏற்படுத்தவில்லை.
ஓவியா அவருடன் நட்புக்காட்ட பல வாய்ப்புகளை வழங்கினார். அதில் ஒன்றையாவது பயன்படுத்தி மாறியிருந்தால் மக்களும் மாறியிருப்பார்கள். இப்போது எவ்வளவுதான் மன்னிப்புக் கேட்டாலும் டூ லேட்.
தன் சொந்த இயல்பை விட்டு, சுயநலத்திற்காக சிறுபான்மையினரை வெறுத்து தவறான வழிகளில் ஈடுபடுதல், பொய்யான முறையில் செயற்கையாக நடத்தல் இவையெல்லாம் அழிவுக்கு வழி என்பவை ஜூலியின் மூலம் நாம் கற்றுக் கொள்ளும் பாடம். இப்போது ஜூலிக்கு எல்லாம் புரிந்திருக்கும் புரிந்து என்ன பயன்?
இப்போது ஜூலி ஏமாளியா அல்லது கோமாளியா என்றால் கோமாளியாக்கப்பட்ட ஏமாளி என்பதுதான் என் பதில் .

தொடரும் 

அன்பு நண்பர்கள் அனைவருக்கும் என் இனிய சுதந்திர நாள் வாழ்த்துக்கள் .இந்தியர் அனைவருக்கும் குறிப்பாக விவசாய மக்களுக்கு இந்த அரசியல் வியாதிகளிடமிருந்து சீக்கிரம் சுதந்திரம் கிடைக்கட்டும் . 

Image result for என் இனிய சுதந்திர நாள் வாழ்த்துக்கள்


Thursday, August 10, 2017

அமெரிக்க எலியும் பரதேசியின் கிலியும் !!!!!!!!!!!!!



ஒரு நாள் வெள்ளி மாலை ரிலாக்ஸ் செய்யும் தருணத்தில், நானும் என் மனைவியும் புதிதாக தரவிறக்கம் செய்யப்பட்ட “ஹீரோ டாக்கீஸ்” என்ற தளத்தின் மூலம் ஒரு தமிழ்த் திரைப்படத்தை பார்த்துக் கொண்டிருந்தோம். அப்போதுதான் அதனைப் பார்த்தேன்.
நான் நியூயார்க் வந்து வாழும் இந்த 17 வருடங்களில் பேச்சலராக (?)  தங்கியிருந்த முதல் வருடத்தை விட்டுவிட்டால், குடும்பம் வந்த பிறகு பேச்சிலர் (பேச்சு இலர்) ஆகி 2 வீட்டில் மட்டுமே வாடகைக்கு குடியிருந்து பின் 11 வருடமுன் நான் இப்போ குடியிருக்கும் வீட்டை வாங்கினேன்.
நான் இருந்த இரண்டாவது வீடு ஒரு மூன்று குடும்ப வீடு. அதில் முதல் தளத்தில் (இந்திய வழக்கின்படி கிரவுண்ட் ஃபிளோர்) எங்களுக்கு முன்னாலும் ஒரு தமிழ்க்குடும்பமே இருந்தது. எனவே எலிகளுக்கும் கரப்பான் பூச்சிகளுக்கும் பஞ்சமேயில்லை. மூணு நேரமும் ரொட்டியைத்தின்னு போரடிச்சுப்போய்  அவைகளுக்கு இந்திய அதுவும் தமிழ் உணவு ரொம்ப பிடிக்குமாம்.   ஹவுஸ் ஓனர் மிகவும் நல்லவர்தான். ஆனால் இந்தப் பிரச்சனையை அவரால் இறுதிவரை தீர்க்கமுடியவேயில்லை. வேற வழியில்லாமல் அவைகளையும் குடும்பத்தில் ஒருவராக சேர்த்துக்கொண்டேன்.
ஆனால் சொந்தமாக வீடு வாங்கியபின் இந்த எலி மற்றும் கரப்பான் பூச்சிகளை முற்றிலுமாக ஒழிப்பேன் என்று உளமாற உறுதி கூறுகிறேன் என்று எனக்கு நானே கூறிக்கொண்டேன்.ஊரில் இருக்கும்போதுகூட என் வீட்டில் தங்கியிருந்த  வேலைக்காரப்பெண் எவ்வளவு சொன்னாலும் கரப்பாண்பூச்சியை அடிக்க மாட்டாள் . ஏன்னு  கேட்டா அது லட்சுமியாம் . அப்புறம் லட்சுமியை துரத்திட்டேன் .ஆமாங்க அவ பேரும் லட்சுமிதான் .
அதே போல இரண்டு குடும்ப வீடு ( Two Family house) வாங்கியவுடன். (கற்பனையை ஓட விடாதீங்க, ஒண்ணு வாடகைக்கு விட). முதல் வேலையாக முதல் தளம், இரண்டாவது தளம் மற்றும் பேஸ்மென்ட் ஆகியவற்றில் ஆயிரம் டாலருக்கு மேல் செலவு செய்து எலி மற்றும் கரப்பான் பூச்சிகளை ஒழித்துக் கட்டினேன். அன்று முதல் இந்த 11 வருட காலங்களில் எலியும் இல்லை கரப்பானும் இல்லை.
கோடை காலங்களில் மட்டும் சிறு வகை பட்டுப் பூச்சிகள், எட்டுக்கால் பூச்சிகள் ஆகியவை தென்படும். அவற்றை அவ்வப்போது அகற்றிவிட்டால் போதும்.
images (19)

அதைப்பார்த்தேன்னு சொன்னேன்ல .இருங்க கதைக்கு வரேன். நாங்கள் பார்த்த அந்தப்படத்தின் பெயர் "என்னோடு விளையாடு". அந்தப்படத்தில் ஒரு காட்சி. சென்னையில் வேலைகிடைக்கும் தன் அண்ணணை அங்கு இருக்கும் தன் தோழியின் அறையில் தற்காலிகமாக தங்கிக் கொள்ளலாம் என்று அனுப்பி வைக்கிறார் ஒரு தங்கை. (நம் சென்னை இவ்வளவு முன்னேறி விட்டதுன்னு யாரும் என்னிடம் சொல்லவேயில்லை) பெண்களின் சகவாசம் பிடிக்காத (?). அந்தப் பையன் வேறு வழியின்றி (?) அங்கு தங்க, அவர்களுக்குள் அடிக்கடி முட்டிக் கொள்ளுகிறது. ஒரு கட்டத்தில் அந்தப்பெண் அவனை வெளியே போகப் பணிக்க அவனுடைய பையிலிருந்து ஒரு சுண்டெலி வெளியே ஓட அந்தப்பெண் அந்த எலியைப் பிடித்தால் மட்டுமே நீ வெளியேற வேண்டும் என்று சொல்லிவிடுகிறாள். இரவு முழுதும் கண்விழித்து எலியைப் பிடிக்க முயன்றும் அவனுக்கு ஆட்டம் காண்பிக்கிறது எலி.

mouse trap lures mouse through toilet paper tube to capture in bucket below

அதைப் பார்த்துக் கொண்டிருந்த ,சரியாக அதே சமயத்தில் ஏதோ ஒரு சிறிய வஸ்து கதவு வெளியாக சட்டென வீட்டினுள்ளே பாய்ந்தது. திடுக்கிட்ட நான் என் மனைவியிடம் "ஒரு சுண்டெலி உள்ளே வந்தது".
“என்ன சுண்டெலியா?”
“ஆம் நான் கண்ணால் பார்த்தேன்”.
“பிறகு காதலா பார்ப்பாங்க. ஆனா சுண்டெலி வர சான்சே இல்லை”.
“இல்லை நான் உறுதியாகச் சொல்றேன். அது சுண்டெலிதான்”.
“நானும் தான் பாத்தேன். அவ்வப்போது வரும் பெரிய சைஸ் எட்டுக்கால் பூச்சிதான் அது”.
“இல்லை சுண்டெலிதான்  ரூத்”.
“அது வேற ஒண்ணும் இல்லை படத்தில் சுண்டெலி ஓடுவதை பார்த்துவிட்டு உனக்கு பார்ப்பதெல்லாம் சுண்டெலி மாதிரி தெரிகிறது. முன்னெல்லாம் கனவுலதான் உனக்கு வரும். இப்ப என்ன நினைவிலேயே வந்துருச்சு”.
“கனவுல வர்றது உனக்கு, அது சுண்டெலி அல்ல பாம்பு”.
உண்மைதான். தப்பித்தவறி படத்திலோ டிவியிலோ பாம்பைப் பார்த்துவிட்டால் அன்று இரவு அவள் கனவில் பாம்பு கண்டிப்பாய் வந்து தூங்க விடாமல் செய்துவிடும். அதனால் பாம்பு சீன் வந்தால் சட்டென கண்ணை மூடிக் கொள்வாள்.
எனக்கும் சந்தேகமாய் இருந்தது. ஒரு வேளை சினிமாவில் பார்த்ததனால், வந்தது எலியென்று நினைத்து விட்டேனோன்னு ஒரே குழப்பமா இருந்துச்சு.
அப்புறம் மறந்துபோய் தூங்கிட்டோம். அடுத்த நாள் நான் ஆபிஸ் போனவுடன் என்  மகள் அனிஷா ஒரு டெக்ஸ்ட் அனுப்பியிருந்தாள் . 'ஐ சா தி திங்கி”   என்று. அப்புறம் போனில் கூப்பிட்டால் இரவு ஒரு எலி அவளை அவனுடைய ரூமில் முறைத்துப் பார்த்ததாகச் சொல்லி இரவெல்லாம் தூங்கவில்லை என்று சொன்னாள்.
அவளும் கற்பனை செய்கிறாளோ? என்று எண்ணி என் மனைவிக்கு போன் பண்ணி “எலியைப் பார்த்த கதையை மகளிடம் சொன்னியா?”, என்றேன். “இல்லையே பயப்படப் போறாங்கன்னு ரெண்டு பேர்ட்டயும் சொல்லலை”, என்றாள். அப்போதும் என் மனைவி நம்பவில்லை.
அடுத்த நாள் மாலை வழக்கம்போல் டிவி பார்த்துக் கொண்டிருக்கும் போது அதே எலி என்னை கிண்டலாகவும் என் மனைவியை முறைப்பாகவும் பார்த்துவிட்டு ஹாலில் கிராஸ் செய்து டைனிங் டேபிளின் அடியில் போனது .(பாருங்க எலிக்குக்கூட என்னைப்பாத்தா கிண்டலா இருக்கு).
அப்பத்தான் என் மனைவியும் நம்புனா.
இத யார்ட்டயாவது சொன்னா நம்புவாங்களா. ஏதோ எலிப்படத்தைப் பார்த்தாங்களாம். எலி உடனே அங்கேயும் வந்துருச்சாம். இப்படித்தானே நினைக்கிறீங்க. அதனாலதான் நான் யார்ட்டயும் சொல்லல. நம்பமாட்டிங்கன்னு எனக்குத் தெரியும்.
அன்றைய நாள் இரவு என் சின்னப்பொண்ணை அவளோடு ரூமில் காணோம். எங்கே என்று தேடினால் அவள் அக்காவோட ரூமுக்குப்போய் ரெண்டு பேரும் கொட்டக் கொட்ட முளிச்சிட்டு இருந்திருக்காங்க ராத்திரி பூரா. என்னன்னு கேட்டா? ராத்திரி எலி அவ ரூமுக்கு போய் உருட்ட அவளும் பயந்து போயிட்டா. எப்படிச் சொல்றன்னு கேட்டா ரூமுக்கு வெளியில இருந்து உள்ளேயிருந்த தேங்காய் எண்ணெய் பாட்டிலைக் காண்பிச்சா. எலி அதன் வெளி லேபிளைக் கறும்பி சுரண்டி போட்டிருந்தது.
உடனே முடிவு செய்தோம். நாளைக்கு  எலிப்பொறி வாங்கிட்டு வந்துறேன் என்று. இரவு எலி குளு (Glue) பட்டைகளை வைத்து மொத்தம் எட்டு இடங்களில் வைத்தோம். என் மனைவி சொன்னாள் எலிக்கு கருவாடு புடிக்கும். அதுக்காகவே வரும்னு சொல்லி தஞ்சாவூர்ல இருந்து எங்க பாஸ்டர் கொண்டு வந்த கருவாட கொஞ்சம் வைத்தாள். வீடு முழுதும் ஒரே நாத்தமா இருந்துச்சு. எப்படியோ சமாளிச்சு மூக்கை மூடிட்டே படுத்துத் தூங்கிட்டோம்.
அடுத்த நாள் காலைல எப்படியும் அது மாட்டிரும்னு  நெனைச்சு காலையில கொஞ்சம் சீக்கிரமா எழுந்து பார்த்தா ம்ஹீம் மாட்டவேயில்லை. சாயந்திரம் வந்து பார்த்தாலும் அது மாட்டல. என் சின்னப்பொண்ணு சொன்னா “இது அமெரிக்கன் எலி கொஞ்சம் சீஸ் வைச்சுப் பாருங்கன்னு சொன்னா”. அன்று இரவு கொஞ்சம் சீஸை கருவாட்டுப் பக்கத்தில் வச்சா என் மனைவி.
நாளைக்குக் காலையில தான் தெரியும், அந்த அமெரிக்கன் சுண்டெலி மாட்டுமா இல்லையான்னு.

முற்றும்

Thursday, August 3, 2017

பாடல்கள் நூறு கோடி எதுவும் புதிதில்லை ! பகுதி 2

Image result for super singers

                         
FETNA  2017 இதழில் வெளிவந்த எனது கட்டுரை பகுதி 2

இதற்கு முந்திய பகுதியைப்படிக்க  இங்கே சொடுக்கவும்.

http://paradesiatnewyork.blogspot.com/2017/07/1.html

      இந்த திரைப்பட இசையால பிழைக்கிறவங்க ரொம்ப அதிகம்.பலபேருக்கு கச்சேரிகள் மூலந்தான் வருமானம். அதோட தமிழர்கள் உலகம் பூரா பரவி இருக்கிறதனால , இவங்க ரொம்ப சுலபமா உலகம் முழுதும் சுத்தி வராங்க. சமீபத்திய ஒரு பேட்டியில உஷா உதுப் சொல்லியிருந்தாங்க, அவங்களுக்கு ஒரு பாட்டு புதிசாக்கிடைச்சாப் போதும் குறைஞ்சபட்சம் முப்பது கச்சேரி புக் ஆகுமாம். அது மட்டுமல்ல. இதுல இசையமைப்பாளர்கள், இசைக்கருவி வாசிப்பவர்கள், பாடகர்களைத் தவிர்த்து, அதே மாதிரி குரலில்  பாடும் கலைஞர்கள் அவர்கள் இசைக் குழுவோடு நாடெங்கிலும் ஏன் உலகமெங்கிலும் கச்சேரிகளை நடத்தியும் பிழைக்கிறாங்க. இப்படி திரைப்பட இசை பலபேருக்கு வாழ்க்கையைக் கொடுக்குது.   அதோட பாட்டுப்போட்டி நடக்காத டிவிசேனல்களும் இல்லை. இது அந்தந்த சேனல்களை பாப்புலர் ஆக்கிறது. விஜய் டிவியின் “சூப்பர் சிங்கர்” நிகழ்ச்சியின் வெற்றி பிரமிக்கத் தக்கது. அந்தந்த பாடகர்களை நாம் நம்ம வீட்டுப் பிள்ளைகள் போலக் கருதி எல்லா நாடுகளிலும் வரவேற்று மகிழ்கிறோம். அவங்க திறமையும் ஆச்சரியமளிக்குது.
Image result for kannadasan
Kannadasan
             இசையமைப்பாளர், பாடகர்கள் வரிசையில் அடுத்தபடியாக வருவது பாடலாசிரியர்கள், இவர்கள் எல்லோரையும் புலவர்கள் அல்லது கவிஞர்கள் என்று சொல்ல முடியாது. நல்ல கற்பனை வளமிக்கவர்கள் இதுல ஈஸியா பாடலை எழுதமுடியும். சிலர் சந்தத்துக்கும் எழுதுவாங்க, பலர் சொந்தத்துக்கும் எழுதுவாங்க. இப்ப இதுலயும் பெரிய போட்டி இருக்கிறதால, கண்ணதாசன், வாலி, வைரமுத்து போன்றவங்க இனிமேல் இத்துறையில் வரமுடியாது. ஏன்னா ஆயிரம் பாட்டை பத்து பேரு பகிருவதற்கும் நூறு பேர் பகிறுவதற்கும் வித்தியாசம் இருக்கில்ல,  அதான் காரணம்.
Image result for Actor MGR


                      திரைப்படப் பாடல்களைப்பற்றி சும்மா சொல்லக் கூடாதுங்க. திரைப்படங்கள் மூலம் புகழ்பெற்ற கருணாநிதி, எம்ஜியார், என்.டி.ஆர், ஜெயலலிதா போன்றவங்க நாட்டையே ஆளும் சக்தியாக மாறிப்போனாங்க. குறிப்பா எம்ஜியாரை புகழின் உச்சிக்கு கொண்டு போனது, அவரது நல்லா  திட்டமிடப்பட்ட கொள்கைப் பாடல்கள் தான்.
          பாமர மக்களுக்கு, எல்லாவிதத்திலும் சிறந்த, ஒழுக்கமுள்ள மாவீரன் அப்படிங்கற  இமேஜ் அதிலும் “ஏழைகளின் தலைவன்” ங்கற சூப்பர் ஹீரோ எல்லாச் சமயத்திலும் தேவைப்பட்டுச்சு. அந்த இடத்தை எம்ஜியார் பிடிக்க அவரது பாடல்கள்தான் உதவிச்சு. அதே போல இப்ப இருக்கிற ரஜினிகாந்துக்கும் அதுவே உதவுச்சு. இந்த சூப்பர் ஹீரோ இமேஜை மக்கள் தொடர்ந்து ஆதரிப்பதால் தான் சிவாஜி, கமல் போன்ற சிறந்த நடிகர்கள் அந்த இடத்தைப் பிடிக்க முடியலை.
Image result for actor rajinikanth

                             திரைப்படப்பாடல்கள் நம்ம தமிழர் வாழ்வில் ஒன்றியிருக்கிறது எப்படின்னா, பாடல்கள் எப்போதும் நம்மை  உற்சாகப்படுத்துது, களிப்பூட்டுது. சில நிமிடங்கள் நம்முடைய சொந்த, நொந்த, வெந்த வாழ்க்கையிலிருந்து  மாறுதலைக் கொடுக்குது. நம்ம எல்லா உணர்ச்சிகளுக்கும் வடிகாலா  இருக்கு. “நாஸ்டால்ஜிக் மொமென்ட்” என்று சொல்வார்களே அதேதான்.
          எந்தக் காலகட்டத்தில் நாம வளர்ந்தமோ, அந்தக்கால கட்டத்தின் இசை நம்ம மனசில பச்சக்கென ஆசனம் போட்டு அமர்ந்துக்கிட்டு நகர்வதேயில்லை. அதனாலதான் 70 வயசுக்கு மேல இருக்கிறவங்களுக்கு எம்.எஸ்.வியும், 40 வயசுக்கு மேற்பட்டவங்களுக்கு இளையராஜாவும் அதற்கு அடுத்தபடியாக இருப்பவங்களுக்கு ஏ.ஆர்.ரகுமானும் இசையின் ஆதர்ஷ நாயகர்களாக தெரிகிறார்கள். எல்லாப் பாடல்களையும் கேட்டு மகிழ்பவர்கள் என்னைப் போன்ற ஒருசிலர் தான்.
Image result for ms viswanathan
MSV
          ஆனால் இந்த மூவருமே அந்தந்த காலகட்டத்தில் கோலோச்சியவர்கள் என்பதில் சந்தேகமில்லை . எம்.எஸ்.வி போட்ட "நாளை இந்த வேளை பார்த்து ஓடிவா நிலா", "மலர்ந்தும் மலராத பாதிமலர் போல", "அன்புள்ள மான்விழியே", “உன்னை ஒன்று கேட்பேன்”, "தூக்கமும் கண்களை தழுவட்டுமே" என்ற பல பாடல்களை உதாரணமாகச் சொல்லலாம்.
          அது போல இளையராஜாவின் இசையில், "பனிவிழும் மலர்வனம்", "இளையநிலா பொழிகிறதே", "பொத்திவச்ச மல்லிகை மொட்டு", "சின்னத்தாயவள்", "சுந்தரி கண்ணால் ஒரு சேதி", "கண்ணே கலைமானே",  "என் இனிய பொன் நிலாவே" ,     "பனிவிழும் இரவு" என்று நூற்றுக் கணக்கில் சொல்லிக் கொண்டு போகலாம்.
        இதுல சில பாட்டுகளைக் கேட்கும் போது சில பேர்களும், சில நிகழ்வுகளும், சில இடங்களும் ஞாபகம் வந்து அப்படியே ஸ்தம்பிக்க வச்சிரும். சில சமயங்களில் அந்த நபர்களை நழுவ விட்டுவிட்டோமே என்ற ஆதங்கமும், நல்லவேளை தப்பிச்சோம்னு சில சமயங்களிலும் தோனும். மற்ற இசையமைப்பாளர்களுக்கு  திறமைகள் இருந்தும் இவர்களுடைய பெரிய ஆளுமையில் அமிழ்ந்து போனவங்க என்று சொல்லலாம். அதோட மற்றவர்களை டிரென்ட் செட்டர்கள் என்று சொல்லமுடியாது.
          இப்போது புதிதாக ஒரு இசையமைப்பாளர் இருக்கிறார். அவருடைய இசை முற்றிலும் வித்தியாசமாக இருக்கிறது. அவர் பெயர் சந்தோஷ் நாராயணன் .அவர் டிரெண்ட்  செட்டரா இல்லையா என்பதை சில நாட்கள் கழித்துத்தான் சொல்லமுடியும்.
          தியேட்டரை விட்டு ஓடவைத்த பாடல்களும் இருக்கின்றன. தியேட்டரிலும் வெளியிலும் ஆடவைத்த பாடல்களும் இருக்கின்றன. நம்மையெல்லாம் பாட வைத்த  பாடல்களும் இருக்கின்றன. தியேட்டரைத் தவிர வீடுகளில் இப்போது படங்கள் பார்க்கும் போது, நேரம் கருதியோ இல்லை போர் அடிச்சோ, நம்மில் பலர் பாடல்களைத் தள்ளி விடுகிறோம். அதனால பல பாடல்களை நாம கேட்கும் வாய்ப்பும் வரதில்லை. அதையும் மீறி சில பாடல்கள் ஹிட் ஆகுதுன்னா அதுக்குக் காரணம் பாடல்களின் தரம் என்றுதான் சொல்லனும். அதோடு இப்ப நிறைய FM ரேடியோ ஸ்டேஷனும் வந்து பாடல்களை பிரபலப்படுத்துது. இப்பல்லாம் படங்களைப் பார்க்கும் போது நடுவில பாடல்கள் வருவது எரிச்சலைத் தான் தருது. தேவையான இடங்களில் திறமையாக பாடல்களைத் தரவேண்டுமே தவிர பாடல்களைத் திணித்தால் இதுதான் நடக்கும். வருங்காலங்களில் பாடல்களே இல்லாத படங்கள் வரும்போது என்ன ஆகும்னு தெரியல. அதனால்தான் தனிப்பாடல்கள்,  ஆல்பங்கள் வரணும்னு  நான் நினைக்கிறன் .
                   நம்ம திரைப்படப்பாட்டுக்கள்தான் எத்தனை வகை,. ராகத்தின் அடிப்படையில் அமைந்த கர்நாடக இசைப் பாடல்கள், செமி கிளாசிக்கல் என்று சொல்லப்படும் வகை, ராகங்களின் சாயலில் அமைஞ்ச மெல்லிசைப் பாடல்கள், கிராமத்து தெம்மாங்கு நாட்டுப்புறப் பாடல்கள், குத்துப்பாடல்கள் மற்றும் கானாப் பாடல்கள் இதுல என்னைக் கேட்டா மெல்லிசைப் பாடல்கள் கொஞ்சம் அதிக நாள் நிலைச்சிருக்கும்னு தோணுது.
          சில சமயங்களில் பல பாடல்கள் ஏற்கனவே கேட்ட மாதிரியோ, இல்ல வேறு சில பாடல்களின் சாயலிலோ இருக்குது. எங்க அமெரிக்கன் கல்லூரி இசைக்குழுவில் கூட நாங்க பல்லவியில ஆரம்பிச்சு சரணத்தில வேறு ஒரு பாடலை இணைச்சுப் பாடி திரும்ப அதே பல்லவியில வந்து சேர்ந்திருவோம். உதாரணத்திற்கு சொல்லனும்னா "தேவதை இளம் தேவி உன்னைச் சுற்றும் ஆவி" "சங்கீத மேகம் தேன்  சிந்தும் நேரம்". ஆகிய இரண்டு பாடல்களைச் சொல்லலாம். இது போலப் பல பாடல்களைச் சொல்ல முடியும். இதைப்பத்தி நினைக்கும் போது ஒரு பாட்டு ஞாபகம் வருது. "ஏழு ஸ்வரங்களுக்குள் எத்தனை பாடல்" என்பது ஒன்று. இன்னொரு பாட்டு இளையராஜா எழுதி பாடினது.
          பாடல்கள் நூறு கோடி
          எதுவும் புதிதில்லை
          ராகங்கள் கோடி கோடி
          அதுவும் புதிதில்லை.
உண்மைதானே மக்களே . இன்னும் ஒரு அரை நூற்றாண்டாவது திரைப்பாடல்கள் நம் இல்லத்தையும் உள்ளத்தையும் ஆக்கிரமிக்கும்  என்பதில் சந்தேகமில்லை .
முற்றும்

                  

Monday, July 31, 2017

பாடல்கள் நூறு கோடி எதுவும் புதிதில்லை ! பகுதி 1


FETNA  2017 இதழில் வெளிவந்த எனது கட்டுரை 


பாட்டாலே புத்தி சொன்னார் !
பாட்டாலே பக்தி சொன்னார் !
பாட்டுக்கு நான் பாடுபட்டேன் அந்தப்
பாட்டுகள் பலவிதம்தான் ! - இளையராஜா.
Image result for ilayaraja singing

         

                 தமிழரோட வாழ்வில சங்க கால முதலிலிருந்து இதைப்படிக்கும் உங்க காலம் வரை இசைங்கிறது நிரவிபரவியிருக்கு. மத்த சமூகங்களோடு ஒப்பிடுறபோது தமிழ்ச் சமூகம் இதுல ரொம்பவே மூழ்கியிருக்குதுன்னு சொல்லலாம்.
          புலவர்களை சேகரிச்சு ஆதரிச்சு பக்கத்தில் வைத்துக் கொள்ளறது நம்ம ராஜாக்களுக்கு ரொம்பப் பெருமை. அந்த சங்க கால காப்பியங்கள், இதிகாசங்கள், பத்துப்பாட்டு போல பாட்டுகள் மட்டும் கிடைக்கலன்னா, நம்ம வரலாறு அப்படியே மண்ணோடு புதைஞ்சு போயிருக்கும். பாணர்கள் விரலியர்ன்னு ஒரு தனி சமூகமே இதனால பிழைச்சுதுன்னா அதுக்கு மேல சொல்றதுக்கு ஒண்ணுமில்ல. அந்தக் காலத்துல பேச்சு நடையில மத்தவங்க பேசினாலும் புலவர்கள் தங்களுக்குள்ள கவிதை நடையிலதான் பேசிக் கொள்வாங்களாம். அந்த மாதிரி, அரசன், தன் மேல நிறைய பாட்டிருக்கா?, பாட்டுடைத்தலைவனா நாம இருக்கமான்னு பரிதவிச்ச காலம் அது. அத விடுங்க கோயில்கள் கூட "பாடல் பெற்ற தலம்"னு சொன்னாதான  பக்தர் கூட்டம் கூட அங்கு போகுது.
               ஆனா இப்ப எல்லாத்துக்கும் திரையிசைதாங்க . பிறப்புக்கும் பாட்டு இறப்புக்கும் பாட்டு, காதலுக்கும் பாட்டு சாதலுக்கும் பாட்டு, தொட்டிலுக்கும் பாட்டு கட்டிலுக்கும் பாட்டு, நாத்துக்கும் பாட்டு கூத்துக்கும் பாட்டு, பக்திக்கும் பாட்டு முக்திக்கும்  பாட்டு, வெற்றிக்கும் பாட்டு, தோல்விக்கும் பாட்டுன்னு வாழ்ந்த தமிழ்ச் சமூகத்தின் புதுமுகந்தான் திரையிசை. அரசியல் கட்சிகள் மீட்டிங் போட்டாலும் சரி, திருமண காதுகுத்து நிகழ்வானாலும், திருவிழாக்கள், உற்சவங்கள் என்று எல்லா விழாவுக்கும் திரையிசை இல்லாமல் நடக்கிறதில்லையே. பாட்டு போட்டாத்தான எந்த விழாவும்  களை கட்டுது. 
Image result for a.r.rahman images

          கூத்தோட மறு உருவம் நாடகம், நாடகத்தோடு புது உருவம்தான் சினிமான்னா அதுக்கு நீங்க யாரும் மறுப்பு சொல்ல மாட்டிங்கன்னு நினைக்கிறேன். கூத்துல உச்சஸ்தாயில பாடின பாட்டு நாடகத்துக்கு வந்து அப்புறம் அதுவே சினிமால மெல்லிசையா மாறிப்போச்சு. நீங்களே சொல்லுங்க, பாரதியார் பாட்டு சினிமால வரலேன்னா நிறையப்பேருக்கு அதுபற்றி தெரியுமா ?. தேசபக்திக்கும் பாச சக்திக்கும் கூட நமக்கு திரைப்படப் பாடல்களை விட்டா வேறு வழியில்லதான. ஏன் A.R.ரகுமான் “வந்தே மாதரம்” பாடலை பாடின உடனேதான  நம்மில பல பேரு அதப் பாட ஆரம்பிச்சோம். இளையராஜா போட்டவுடனே தான  "மரிமரி நின்னே முரலிட" போல பல கர்நாடக சங்கீதப் பாட்டுகள்  நமக்கு தெரிய வந்துச்சு. இப்படி சொல்லிக்கிட்டே போகலாம். அதனால என்ன சொல்ல வரேன்னா திரைப்பாடல்கள் நம்ம வாழ்க்கையில பின்னிப் பிணைஞ்சு , ரத்தத்திலும் சத்தத்திலும் ஊறிப்போச்சு .
Image result for K.V.Mahadevan singing
K.V.Mahadevan
          ஒவ்வொரு இசையமைப்பாளர்களும் ஒவ்வொரு காலகட்டத்தில் ஒவ்வொரு வித இசைகளை உருவாக்கி "டிரென்ட் செட்டர்களாக" இருந்திருக்கிறாங்க . கே.வி. மகாதேவன் கர்நாடக இசைகளிலும், புராணப் படங்களிலும், பக்தி இசையிலும் கோலோச்சி முடிக்க, அடுத்து எம்.எஸ் விஸ்வநாதன் மெல்லிசையில் முத்திரை பதித்தார். அவர் ஒரு முப்பது வருஷம் பேரரசராக  ஆண்டு வந்தபோது அவர் கீழே சங்கர்  கணேஷ், வேதா, வி.குமார் போன்ற சிற்றரசர்களும் இருந்தாங்க. அவருடைய மகாப்பெரிய சாதனையை முறியடிச்சது போல் எங்கோ ஒரு குக் கிராமத்திலிருந்து இளையராஜா என்னும் நாட்டுப்புற இசை “மச்சானைப்பார்த்தீங்களா”ன்னு புறப்பட்டு அடுத்த முப்பது வருஷத்தை  ஆக்கிரமித்தது. 70களின் முடிவிலும் 80கள் மற்றும் 90களில் இளையராஜா இசைக்காகவே  ஓடிய படங்கள் ஏராளம். ஆயிரம் படங்களுக்கு இசை அமைச்சது ஒரு அசுர சாதனைதான். அதுக்குப்பிறகு  முற்றிலும் புதிய வடிவத்தில திரைப்பட இசையை வேறு தளத்திற்கு புயலாக எடுத்துச் சென்றது ஏ.ஆர். ரகுமான் என்ற இசைப்புயல். தமிழ் தாண்டி, இந்தியிலும் கொடிநாட்டி ஏன் உலகமெங்கும் பரவி ‘ஆஸ்கார்’ பரிசு வாங்கிய சாதனை என்பது மிகவும் அரிய சாதனைதான்.
Image result for m.s.viswanathan

          இதுல என்னை மாதிரி ஆட்களுக்கு இளையராஜாவின் இசை ஏன் அதிகமாக பிடிக்குதுன்னா நாங்க யூத்தா இருக்கும் போது(  அடடே  அவசரப்பட்டுட்டேனே, நான் இப்பவும் யூத்துதான் )  எங்களுடைய எல்லா உணர்ச்சிகளுக்கும் தூண்டுகோலாக ஆதரவாக இருந்தது அவரோட இசைதான்.
Image result for sg kittappa


          எஸ்ஜி கிட்டப்பா, பி.யு. சின்னப்பா, கே.பி. சுந்தரம்மாள், தியாகராஜ பாகவதர், டி.ஆர். மகாலிங்கம் இவங்களோடு குரல் வளம் எப்பவுமே உச்சஸ்தாயி சாரீரம் தான். இது மாதிரி இசை கூத்து, நாடகத்திலிருந்து வந்துச்சு. ஏன்னா அந்தக் காலத்துல மைக்ரோபோன் இல்லாதனால நல்லா கத்திப் பாடினாத்தான் மக்களுக்கு கேட்கும். அதனாலதான் அந்தக்கால கூத்து மற்றும் நாடக நடிகர்களுக்கு சரீரம் நல்லா இருந்தா மட்டும் பத்தாது, சாரீரமும் நல்லா இருக்கனும்னு எதிர்பார்த்தாங்க. அப்படி நாடகத்திலிருந்து திரைக்கு வந்தவங்கதான் மேலே சொன்ன எல்லாரும். ஏன் எம்ஜியார் சிவாஜின்னு ஒரு பெரிய கூட்டமே நாடகத்திலிருந்து திரைக்கு வந்தவங்கதான்னு உங்களுக்குத் தான் தெரியுமே.
Related image
K.B.Sundarambal
          ஆனா அந்தக் காலத்துப் படங்கள்ள வசனம் குறைவாயும்  பாட்டுக்கள் அதிகமாயும் இருக்கும். முக்கால்வாசி, புராணப்படங்கள் அப்புறம் ராஜா ராணிக் கதைகள்தான் இருக்கும். சில படங்களில் 30 பாட்டிலிருந்து 60 பாட்டு வரைக்கும் கூட இருக்கும். முதல்ல படங்கள் வந்த காலகட்டங்கள்ல, நடிகர்களே பாடி நடிக்கணும் அப்புறம் கொஞ்ச நாள்ள சரீரம் நல்லாயிருந்தா போதும் சாரீரம் நல்லா இல்லாட்டி பின்னணியிலே பாடிக்கலாம்னு வந்துச்சு. இது திரைப்பட இசை வரலாற்றில் புதிய சகாப்தத்தை கொண்டு வந்துச்சு. யோசிச்சுப் பாருங்க  பாடறவங்கதான்   நடிக்க முடியும்னா இப்ப இருக்கிற பல பேர் கதி எப்படி இருக்கும்னு.
          பாடறத விடுங்க இப்ப கதாநாயகிகள்  எல்லாம் பேசறது கூட இல்லீங்களே, அதுக்கே பின்னனிக்குரல் வந்திருச்சே. இப்ப சொந்தத் திறமைகள் இல்லாம மத்தவங்க திறமையிலதான அவங்க வளர்றாங்க.
Image result for tm soundararajan
TMS

          அதனால பின்னனிப் பாடகர்கன்னு புதுசா ஒரு சமுதாயம் வளர ஆரம்பிச்சுச்சு. அந்தக் காலத்துல அதிகப்பேர் இல்லாதனால டி.எம். செளந்திரராஜன், பி.பி.ஸ்ரீனிவாசன், எஸ்.பி.பாலசுப்பிரமணியம் போன்ற வெகு சிலரும், பி.சுசிலா, ஜானகி, எல்ஆர். ஈஸ்வரி, சித்ரா ஆகியோரும் பல ஆயிரக்கணக்கான பாடல்களை லெஜன்ட் என்று சொல்லக்கூடிய அளவுக்கு பாடினாங்க. இப்ப பாடகர்கள் நூத்துக்கணக்கில இருக்கிறதால இனிமேல் தலைக்கு 10-20 பாடல்கள் பாடுவதே பெரிய விஷயம். அதனால இனிமேல் லெஜெண்டுகள்லாம் வரவே மாட்டாங்க.  


>>> அடுத்த பகுதியில் முடியும்

Thursday, July 27, 2017

மனது பலவீனமானவர்கள் இதனைப் படிக்க வேண்டாம் !!!!!

Image result for crowded E train car

எச்சரிக்கை 1: மனது பலவீனமானவர்கள், இரத்த அழுத்தம் உள்ளவர்கள் (கொஞ்சம் பார்டரில் இருந்தால் கூட) , எளிதில் உணர்ச்சி வசப்படுபவர்கள் மற்றும் 22 வயதுக்கு கீழே உள்ளவர்கள் இதனைப் படிக்க வேண்டாம் என எச்சரிக்கிறேன். (என்னடா பீடிகை பலமா இருக்கு?).
எச்சரிக்கை 2: எட்டாயிரம் மைல் தள்ளி வாழும் எட்டப்பன் மகேந்திரன் நடுநடுவே பிராக்கெட்டுகளில் என்னை கலாய்க்க வருவான். அவனைப் பொருட்படுத்த வேண்டாமென வேண்டி விரும்பிக் கேட்டுக் கொள்கிறேன்.

அவனை ஒரே அடியில என்னோட ஒன்றரை டன் வெயிட்டை,  ஒரு ஃபுலோவில் வந்துருச்சு ப்ரோ - இறக்கி நசுக்கிறனும்னு தோணுச்சு. மதுரைக்காரைங்களுக்கு ரத்தத்திலேயே கொஞ்சம் வீரம் ஒட்டிட்டு இருக்கும் . நியுயார்க்குக்கு வந்து 17 வருஷம் ஆகியும் அந்த மதுரை மண்ணோட  குணமும், வீரமும், ஆர்வக்கோளாறும் இன்னும் என்ட்ட  அப்படியே இருக்குன்னு நினைக்கிறேன்.( (எலேய் சேகரு இது உனக்கே கொஞ்சம் ஓவரா தெரியல ?).  
வீரத்தோடு கூட கொஞ்சம் விவேகமும் இருந்தா ரொம்ப நல்லதுன்னு சொல்வாய்ங்க. மதுரைக்காரைங்களுக்கு  விவேகத்தில் அந்த 'வி' யை மட்டும் தூக்கிட்டா வர்ற வேகம் மட்டும் கொஞ்சம் அதிகமாய் இருக்கும். என்னோட தினவெடுத்த தோள்களுக்கு இங்க வேலை இல்லாததால, புல்தடுக்கி கீழே விழுந்து தோள் உடைஞ்சு போனது பத்தி உங்கள்ட்ட ஏற்கனவே சொல்லியிருக்கிறேன்.  இன்னும் படிக்கலைன்னா  இந்த லிங்க்கை தட்டுங்க. http://paradesiatnewyork.blogspot.com/2015/05/blog-post_11.html (ஏண்டா புல்தடுக்கி விழுந்து சர்ஜரி ஆனப்புறம்தான தினவெடுத்தது உனக்கு ?)
எந்த ஒரு உடற்பகுதியையும் அடிக்கடி பயன்படுத்தினா அது கொஞ்சம்  பலமிழந்து போகும்ன்னு  சொல்வாய்ங்க. அப்படித்தான் என் கையும் காலும் கொஞ்சம் சின்னதாப் போச்சுன்னு நினைக்கிறேன். அதே மாதிரி ரொம்பப் பயன்படுத்தினாலும் ஓஞ்சு போயிரும்னு சொல்வாய்ங்க அப்படியும் வச்சிக்கலாம். (உன்னோட பிறவியே சித்துப் பிறவின்னு எனக்குத் தெரியும்டா).
அது தவிர எலி பிடிச்சு எலி பிடிச்சு என் வலது கை கட்டை விரல் பக்கத்துல கொஞ்சம் தேஞ்சு போச்சு. நந்தக்குமார்ட்ட சொல்லி ஒரு கார்ட்டிசான் கூட போனமாசம் போட்டுவிட்டார்.
Image result for girls in E train


எலி பிடிச்சுன்னு நான் சொன்னது என்னோட  ஆஃபிஸ் கம்யூட்டர் மவுசை. நந்தக்குமார் என்பது என்னோட நியுரோ சர்ஜன், ஈழத்தமிழர்.
அப்புறம் என்ன நடந்துச்சுன்னு சொல்றேன். கொஞ்சம்  பொறுமையாப்படிங்க.
சம்பவம் நடந்த(?) அன்று ஒரு திங்கள்கிழமை காலை. எப்பொழுதும் போல் கிளம்பி வேலைக்குச் செல்ல ஆயத்தமானேன். என்னோட தனிமூனான ஹனிமூன் மாதிரி அன்னைக்கும்  தனியாத்தான்  போனேன். (பின்ன ஆபிசுக்கு குடும்பத்தோடயா  போவே எலேய் வேணாம் எனக்கு வெயில் கொடுமையை விட உன்னோட கொடுமைதாண்டா பெரிசா இருக்கு)
பேயறைஞ்ச கதையைச் சொல்றேன் சொல்றேன்னு ஏமாத்திட்டு வர்ற தம்பி விசு மாதிரி நான் ஏமாத்த மாட்டேன். இந்த தனி மூனான என் ஹனிமூனைப்பத்தி அவசியம் சீக்கிரமாகவே சொல்லிறேன். இப்ப போன திங்கள் கிழமை என்ன நடந்ததுன்னு கொஞ்சம் விலாவாரியாச்  சொல்றேன்.
          இந்த திங்கள் கிழமை வேலைக்குபோவதும் வெள்ளிக்கிழமை வேலைக்குப் போவதும் ரொம்ப கொடுமைங்க. இரண்டு நாளும் எந்த வேலையும் நடக்கவும் நடக்காது. எந்த வேலையும் ஓடவும் ஓடாது, எந்த வேலையும் நகரவும் நகராது (அடேய் எல்லாமே ஒன்னுதான்ரா) .
கொஞ்சம் தூக்கக் கலக்கத்தில எப்படியோ கிளம்பி ரெடியாகி டாலர் கேபைப் பிடிச்சு சப்வேயில் உள்ளே நுழைஞ்சேன். ஒரு நீள இருக்கையிலே மொத்தம் ஆறுபேர் உட்காரலாம். நடுவில பிடிக்கறதுக்கு கம்பி ஒண்ணு டிவைடர் மாறி இருக்கிறதால, ஒவ்வொரு பக்கமும் மூணுபேர் உட்காரலாம் என்பது நியதி. ஆனா எப்பவும் ஆறுபேர் உட்கார முடியாது. ஒரு சமயம் ஒரு பகுதியில் ரெண்டு தொடை பெருத்தவர் அல்லது இடை பெருத்தவர்  உட்கார்ந்தா நடுவில யாரும் உட்கார மாட்டார்கள். உட்கார்ந்தா சட்னி என்பதால் நானும் அந்த ரிஸ்க் எடுக்க மாட்டேன். ஆனால் ஒரு பெரிய உருவம் இன்னொரு சிறிய நபர் இருந்தால் நடுவில் என்னை ஈஸியாக நுழைத்துக் கொள்வேன். இரண்டு சைடுகளிலும் உட்கார போட்டியிருக்கும். அது கிடைக்கவில்லையென்றால் அட்லீஸ்ட் நடுவில் உள்ள கம்பிக்குப்பக்கத்திலாவது  உட்கார நினைப்பார்கள். நினைப்பேன். இரண்டு பேருக்கு நடுவில் உட்காருவது ஒரு கிடுக்கிப்பிடி போல சிலசமயம் அமைஞ்சிரும்.
ஆனால் அன்றைய தினம் அப்படியில்லை. ஒரு விடலைப்பெண் ஒரு விடலைப் பையன். இரண்டு பேருமே ஆப்பிரிக்க அமெரிக்கர்கள். பொண்ணு அழகா இருந்தாங்கறத சொல்றது  இந்த இடத்தில தேவையில்லைன்னு நினைக்கிறன் . நடுவில் உட்கார அதுவும் நான் உட்கார தாராளமான இடம் இருந்தது. என்பதால் 'எக்ஸ்க்யூஸ்மி' என்று சொல்லிவிட்டு இரண்டு பேர் மேலும் படாமல் உட்கார முயன்றேன். அந்தப்பெண் உடனே நகர்ந்து கால்களை நகர்த்தி, தொடைகளை சற்றே ஒடுக்கி உடலை அடக்கி இடம் கொடுத்தாள்.  அனால் அந்தப் பையன் நான் சொன்ன எக்ஸ்க்யூஸ் மியை கண்டு கொள்ளவே இல்லை. சிலபேர் எப்போதும் காதில் இயர்போனை மாட்டிக் கொண்டு பாட்டுக் கேட்பதால் நாம் சொல்வதை கொஞ்சம் சத்தமாக சிறிது சைகை மொழியையும் சேர்த்து சொல்ல வேண்டும். ஆனால் இவன் காதில் ஒன்றுமில்லை. அவனுடைய இடது பாதி தொடை நான் உட்கார வேண்டிய பகுதியில் 25 சதவீதம் அளவுக்கு இருந்தது. ஆனாலும் நான் உட்கார்ந்து விட்டேன். ஆக மொத்தம் இப்போது 3 விடலையர் அங்கு உட்கார்ந்திருந்தோம். (ஏலேய் சீக்கிரமா சுடலை போற அதுவும்  கடலை மட்டுமே போட முடிஞ்ச உடலை வச்சுருக்கிற நீயெல்லாம்  விடலையா ?. ரொம்ப அட்ராசிட்டிடா  இது)
அவனுக்கு என்ன கோவமோ என்ன பொறாமையோ தெரியல ( பொறாமையா ? வேணாண்டா பரதேசி நான் அழுதுருவேன்). ஒரு வேளை அந்தப்பெண் பக்கத்தில்  உட்கார நினைச்சானோன்னு தெரியல. நான் வந்தத இடைஞ்சல்னு நினைச்சானோ?. இருவருமே ஷார்ட்ஸ்தான்  அணிந்திருந்தார்கள் . ஆனால் அந்தப்பெண்ணின் ஷார்ட்ஸ்  ரொம்ம்ம்ப ஷார்ட். அதனால அந்தப்புறம்பட்டால் என் அந்தப்புரம் கோபித்துக்கொள்ளும் என்பதால்  அந்தப்புறம் படாமல் இந்தப்புறம் பட்டால் பரவாயில்லைன்னு உட்கார்ந்தேன். (டேய் அவனா நீ ? இத்தனை நாள் தெரியவேயில்லையே) திரும்பவும் அவனைப் பார்த்து எக்யூஸ்மி என்று சொல்லி அவன் கண்ணைப் பார்த்தேன். அவன் மேலும் தன் முட்டியால் என் முட்டியை நெருக்க எனக்கு வந்ததே கோபம். தாங்க முடியாது  படாரென்று எழுந்தேன்
மதுரைக் காரன்னா சும்மாவா? தலையானங்கானத்து செரு  வென்ற பாண்டியன், மதுரையை மீட்ட சுந்தர பாண்டியன், வீர பாண்டிய கட்டபொம்மன், வீர மருதுபாண்டியர், பூலித்தேவன் ஆகிய பாண்டிய பரம்பரை யாவும் நினைவுக்கு வர, தோள் தினவெடுக்க, மீசை துடிக்க, உடம்பு படபடக்க, கண்கள் கோபத்தை கொப்பளிக்க, உதடுகள் அதிர, இதயம் துடித்துடிக்க, அப்படியே அவன் பக்கம் திரும்பாமல் எழுந்தேன். என்னுடைய பையை எடுத்து கொண்டு அவனைத் திரும்பிப் பார்க்காமல் அந்த ரயில் பெட்டியின் கடை கோடிக்குச் சென்றேன் .இப்ப என்னா செய்வே இப்ப என்ன செய்வ .

உட்கார இடம் கிடைக்காதலால் நின்று கொண்டே ஆஃபிஸ் போய்ச் சேர்ந்தேன். (ஏண்டா ஓரம் போறதுதான் உன் வீரமா? அடச்சீ நீயெல்லாம் மதுரைக்காரன் போடாங்க இவனே...) 

Monday, July 24, 2017

பல்போனா பதவி போச்சு !!!!!!!!!!

இலங்கையில் பரதேசி -19
Image result for dalada maligawa photos
Pathiripuwa : Dalada Maligawa
இதற்கு முந்திய பகுதியைப்படிக்க  இங்கே சொடுக்கவும்.
http://paradesiatnewyork.blogspot.com/2017/07/blog-post_17.html
பல்லுப்போனா சொல்லு போகும்னு ஒரு சொலவடை இருக்கு. இங்க இலங்கையில பல்லு போனா பதவி போச்சுங்கிற நிலைமைதான் அப்ப இருந்திருக்கு.
அனுநாதபுர மன்னர்கள் செய்தது போலவே, பொலனருவா ராஜ்யமும், டாம்படேனிய ராஜ்யமும் பல்லைக் கைப்பற்றி தங்கள் அருகில் கோவில் கட்டி வைத்துக் கொண்டனர். கம்போலா ராஜ்ஜியம் வலுவடைந்தபோது அவர்கள் புனிதப்பல்லைக் கைப்பற்றி "நியம் கம்பயா விஹாரா" என்ற கோவிலில் வைத்தனர். அதன்பின் அது கோட்டே ராஜ்ஜியத்தின் ஸ்ரீ ஜெயவர்தனபுற கோட்டை என்ற ஊரில் அமைக்கப்பட்ட கோவிலில் சில காலம் இருந்ததை அக்காலத்திய செய்யுள்களான ஹம்சா, கிரா மற்றும் செலாலிகினி ஆகியவற்றுள் குறிப்பிடப்பட்டிருக்கின்றன.
கோட்டே ராஜ்யத்தை ஆண்ட தர்மபாலா காலத்தில் பாதுகாப்புக்கருதி ரத்தினபுரியில் உள்ள 'டெல்கமுவா விஹாரையில் ஒரு அரவைக்கல்லின் உள்ளே பதுக்கி வைக்கப்பட்டிருந்ததாம். அது பின் ஹிரிபிட்டியே தியாவடனா ராலா மற்றும் தேவநாகலா ரத்னாலங்காரா தேரா ஆகிய புத்த துறவிகளால் பத்திரமாய் கண்டிக்கு கொண்டு வரப்பட்டது. கண்டியின் அப்போதைய அரசன் முதலாவது  விமலதர்மசூரியா ஒரு இரண்டு அடுக்குக் கோவில் கட்டி அதில் புனிதப்பல்லை பிரதிஷ்டை செய்தான்.  ஆனால் 1603ல் படையெடுத்து வந்த போர்த்துக்கீசியர் தேவையில்லாமல் அதனைக் கைப்பற்றி தும்பராவில் உள்ள மேட மகானுவாராவுக்கு எடுத்துச் சென்றனர். அது பின்னர் ஆட்சிக்கு வந்த இரண்டாம் ராஜசின்ஹாவின் காலத்தில் மறுபடியும் கைப்பற்றப்பட்டு புதுப்பிக்கப்பட்ட கோவிலில் வைக்கப்பட்டது. அதன்பின் தொடர்ந்து ஆண்ட மன்னர்கள் கோவிலை விரிவுபடுத்திக் கட்டினர்.


உள்ளே கோவில் வளாகம் மரங்கள் சூழ்ந்து ஒரு மாபெரும் சோலைபோல் காட்சியளித்தது. அதில் நிறைய சன்னிதிகள் இருந்தன. அதில் ஒரு இடத்தில் 'பத்தினி சன்னிதி' ஒன்றிருந்தது உள்ளே நுழைந்தேன். கண்ணகிக் கோவில்தான் அது என்று நினைத்தேன். அநேகமாக மதுரை நாயக்க மன்னர்களால் ஏற்படுத்தப் பட்டிருக்குமென நினைக்கிறேன்.

Image result for Pattini sannidhi in Dalada maligawa
Thank you Trip Adviser 
அதன் பின் முக்கிய தலமான புனிதப் பற்கோவிலுக்குள் நுழைந்தேன். அங்கேயே கோவில் சார்பில் வழிகாட்டிகள் இருந்தனர். உள்ளே போய் கட்டணம் கட்ட, ஒரு தமிழ் பேசும் கைடு ஒருவர் என் கூட வந்து ஒவ்வொன்றையும் விளக்கிச் சொன்னார். முக்கியமாக எண் கோண வடிவ (Octagonal)  பில்டிங் ஒன்றைப்பார்த்தோம். மிக அழகிய அந்தக் கட்டிடத்தை வடிவமைத்தவர் கண்டியின் மிகப் பிரபலமான ஆர்க்கிடெக்டான தேவேந்திர முலாசரின் என்பவர். அதன் பெயர் பத்திரிப்புவா. இது கட்டப்பட்டது ஸ்ரீ விக்ரம ராஜசின்ஹாவின் ஆட்சியின் போது . முதலில் ராஜாக்களின் பொழுதுபோக்கு மண்டபமாக இருந்ததை புனிதப்பல் வைக்க விட்டுக் கொடுத்தனர். ஆனால் தற்போது இது நூலகமாக செயல்படுகிறது. கோவில் கிட்டத்தட்ட நம்நாட்டு இந்துக் கோவில்களின் வடிவமைப்பில் கற்தூண்கள் அமைக்கப்பட்ட மண்டபங்களுடன்  காணப்பட்டது.


ஒருபுறம் இருந்த ஏரியின் அலைகள் சுவர்களை மோதிக் கொண்டு இருந்தன. அந்த ஏரியின் பெயர் போகம்பரா ஏரி. அந்த சுவரில் சிறுசிறு ஓட்டைகள் இருந்தன. அதில் தேங்காய் எண்ணெய் ஊற்றப்பட்ட விளக்குகளை இரவில் ஏற்றுவார்களாம். பெரிய முக்கிய நுழைவு வாயிலின் பெயர் "மஹா வஹல்கடா" என்பது. மேலே இறங்கும் வழியில் பெரிய ரத்தினக் கற்களில் ஒன்றான மூன்ஸ்டோன் இருந்தது. அதன் இரண்டு புறமும் இரண்டு கல்யானைகளின் சிற்பங்கள் இருந்தன. அதற்கு மேலே இருந்த மகரதோரண வாயிலை இரண்டு கிங்கரர்கள் சிலைகள் பாதுகாப்பது போல் வடிவமைக்கப்பட்டிருந்தன.
முக்கிய கற்பக்கிரகம்  போன்ற அமைப்பு இரண்டு மாடிகளாக அமைக்கப்பட்டிருக்கிறது. மேலே இருந்த 2ஆவது மாடியின் கதவுகள் தந்தத்தால் கடையப்பட்டிருந்தன. அதற்கு உள்ளே புனிதப்பல் பூட்டப்பட்டு வைக்கப்பட்டிருந்தது. பார்ப்பதற்கு அனுமதியில்லை. கதவுக்குத்தான் பூஜை போலும் ஏதாவது திருவிழா சமயங்களில்தான் வெளியே எடுப்பார்கள்.

அதற்கு மேலே ஒரு விதானம் போன்ற அமைப்பு பளபளத்தது. "தங்கம் போலத் தெரிகிறதே"  என்று கேட்டபோது தங்கமேதான். தங்கத் தகடுகளால் அமைக்கப் பட்டுள்ளது. அதுமட்டுமல்லாமல். அந்த அறை முழுவதும் தங்கத்தகடுகளால் மூடப்பட்டு இருந்தன. உள்ளே புத்தரின் புனிதப் பல் ஏழு அடுக்குகளைக் கொண்ட  தங்கப் பெட்டிகளின் உள்ளே வைக்கப்பட்டிருக்கிறதாம். ஒன்றின் ஒன்றாக அமைக்கப்பட்ட அந்தப் பெட்டிகள் ஸ்தூப வடிவில் அமைக்கப்பட்டிருந்தன. அது தவிர வெளியே உற்சவத்திற்கு எடுத்துச் செல்ல ஒரு தனி தங்கப் பெட்டியும் உள்ளே இருக்கிறதாம். குறிப்பிட்ட சமயங்களில் மட்டும் கதவைத் திறந்து பூஜைகள் நடக்கும். அப்படியே திறந்தாலும் உள்ளேயுள்ள பெட்டிகளை மட்டும்தான் பார்க்க முடியும்.
ஒரு இடத்தின் மேலே ஏறி தங்க விதானத்தை  அருகில் பார்த்தேன். நம் ஊரில் கல்யாணத்திற்கு பந்தல்போட்டு மேலே வெள்ளைத்துணி கட்டி பூவேலைப்பாடு செய்திருப்பார்கள் அல்லவா அது போலவே இருந்தது. கட்டம் கட்டமாகப் பிரிக்கப்பட்டு ஒவ்வொரு கட்டத்தின் உள்ளும் தங்கத்தில் பூ வேலைப்பாடுகள் செய்திருந்தார்கள். அந்த விதானம் மேற்புறக் கூரையிலிருந்து தொங்கிக் கொண்டு இருந்தது.


ஒரு நாளைக்கு மூன்று முறை பூஜைகள் நடக்குமாம். மல்வெத்தே மற்றும் அசுகிரியா என்ற இரண்டு பகுதிகளைச் சேர்ந்த புத்த பிக்குகள் இதனைச் செய்கிறார்கள். விடியும் வேளையிலும் மதிய நேரத்திலும் மாலை நேரத்திலும் ஆக மூன்று முறை இந்த சம்பிரதாய வழிபாடு நடத்தப்படுகிறது. ஒவ்வொரு புதன் கிழமையும் வாசனை மிகுந்த மலர்களான  நன்னுமுரா மங்கல்லயா என்ற பூக்களை பண்ணிரீல் போட்டு பல மூலிகைகளுடன் தயாரிக்கப்பட்ட நீரில் புனிதப்பலுக்கு அபிஷேகம் நடைபெறுகிறது. இந்த நீர் புனிதப்பல்லில்  பட்டதால் புனித நிராக மாறுவதோடு பலவித நோய்களையும் சரிப்படுத்தும் ஹீலிங் நீர் என நம்பப்படுகிறது. அபிஷேகம் முடிந்ததும் அந்த நீரை அப்போது அங்குள்ளவர்களுக்கு பகிர்ந்து தீர்த்தமாகக் கொடுப்பார்களாம்.
சிறிய பாதைகளில் ஏராளமான ஜனங்கள் முண்டியடித்துக் கொண்டு அங்குமிங்கும் சென்று கொண்டிருந்தார்கள். அப்போதுதான் தமிழ் வழிகாட்டி சொன்னார், “அந்தக் கோவில் இரண்டு முறை தாக்கப்பட்டு சேதப்படுத்தப்பட்டதாக”. யார் அப்படிச் செய்தது என்றால் விடுதலைப்புலிகள் என்று  சொன்னதும் எனக்கு பகீரென்றது.
- தொடரும்.