அற்புத எழுத்தாளர் அசோகமித்திரன்!

FETNA  2017 இதழில் வெளிவந்த எனது கட்டுரை

அசோகமித்திரன்

            தமிழ் கூறும் நல்லுலகம் கொடுத்த சிறந்த படைப்பாளர்களுள் அசோகமித்திரன் குறிப்பிடத்தகுந்தவர். இவரது இயற்பெயர் ஜெகதீஷ் தியாகராஜன். 1931-ல் செகந்திராபாத்தில் பிறந்த அவர் தன் 20 வயது வரையில் அங்குதான் இருந்தார். 1952ல் தந்தை இறந்தவுடன் என்ன செய்வது என்று திகைத்த போது, தந்தையின் நண்பரான பிரபல இயக்குனரும் பத்திரிகையாளருமான S.S.வாசன் அவர்களிடமிருந்து  சென்னையில் இருந்த அவருடைய ஜெமினி ஸ்டூடியோவில் வேலை செய்ய அழைப்பு வந்தது. இதுவே படைப்புலகில் அவருக்கு நிகழ்ந்த திருப்புமுனை. அங்கு இருந்த 10 வருடங்களில் அவருடைய எழுத்துத் திறமை பீறிட்டுக்கிளம்பியது. 

    படவுலகின் அனுபவங்களை “இல்லஸ்ட்டிரேட்டட் வீக்லி ஆஃப் இந்தியா”, என்ற பத்திரிகையில் பத்திகளாக எழுத ஆரம்பித்து பின்னர் அது புத்தகமாக வெளிவந்தது. அதன் பெயர் "மை இயர்ஸ் வித் பாஸ்"( My years with Boss). S.S.வாசனைத்தான் அப்படிக் குறிப்பிட்டார் என்று சொல்லத்தேவையில்லை. அதன்பின்னர் அவருடைய படைப்புகள் மளமளவென்று வெளிவந்தன. இருநூறுக்கு மேற்பட்ட  சிறுகதைகளையும் பன்னிரண்டு நாவல்களையும் எழுதியிருக்கிறார். சிறந்த கட்டுரைகளையும், விமர்சனங்களையும் எழுதுவதிலும் வல்லவரான இவர் "கணையாழி" என்ற சிறப்பான இலக்கிய இதழின் ஆசிரியராக பலகாலம் பணியாற்றினார். தன் சொந்த அனுபவத்துடன் கற்பனை கலந்து நகைச்சுவையுடன் எழுதுவது அவரது தனிக்கலை. அதோடு எளிய நடையில் எவரும் புரிந்து கொள்ளும் வகையில் எழுதுவதும் அவரது சிறப்பம்சம். விரைவிலேயே அவருடைய படைப்புகள், இந்தி, மலையாளம் மற்றும் தெலுங்கில் மொழிபெயர்க்கப்பட்டன. 

Add caption

     என்னை மிகவும் கவர்ந்த அவர் எழுதிய "18-ஆவது அட்சக்கோடு" ஆங்கிலத்திலும் மொழி பெயர்க்கப்பட்டிருக்கிறது. அதனைப்பற்றிய என்னுடைய பதிவைப் படிக்க  இங்கே சொடுக்கவும் (http://paradesiatnewyork.blogspot.com/2017/04/blog-post_11.html) தன்னுடைய படைப்புகளுக்காக பல விருதுகளைப்  பெற்ற இவர்,  "அப்பாவின் சிநேகிதர்" என்ற சிறுகதைத் தொகுப்புக்காக இந்திய நாட்டின் உயரிய விருதான 'சாகித்ய அக்காடெமி' விருது வென்றார். கடந்த மார்ச் 2017ல் தனது 85-ஆவது வயதில் அவர் இந்த உலகைவிட்டு மறைந்து போனாலும் தமிழ் உள்ளவரை அவரின் நினைவும் புகழும் நிலைத்திருக்கும் என்பது உறுதி.

தி.ஆல்ஃ பிரட் தியாகராஜன், நியூயார்க்.  

(www.paradesiatnewyork.blogspot.com)

இலங்கைக்கு இந்தியா கொடுத்த புத்தர் சிலை !!!!!!

  இலங்கையில் பரதேசி -23

இதற்கு முந்திய பகுதியைப்படிக்க  இங்கே சொடுக்கவும்.

http://paradesiatnewyork.blogspot.com/2017/09/blog-post_11.html

Ulpenge Queen's Bathing place

காவல்காரன் என்ற போலீஸ்காரன் என்ற செக்யூரிட்டி, கிட்ட வந்து அங்கிருந்த போர்டைக் காண்பித்தான். (No trespassing) நோ டிரெஸ்பாஸிங், பாதுகாக்கப்பட்ட பகுதி என்று எழுதியிருந்தது. மராமத்து வேலைகள் நடப்பதால் உள்ளே செல்ல அனுமதியில்லை என்று சொன்னான்.

அதனைப்பற்றி மேலும் தெரிய வந்த விஷயமானது, இந்த வளாகத்தை ஆக்ரமித்த பிரிட்டிஷ்காரர்கள் இந்தப்பகுதியையும் எடுத்துக் கொண்டு அதனை நூலகமாக மாற்றிவிட்டார்களாம். ரசனை கெட்டவர்கள். சுதந்திரம் வாங்கியபின் இந்தப்பகுதி இந்தக் கோவிலின் போலீஸ் அவுட் போஸ்ட்டாக செயல்பட்டதாம். ஆனால் இப்போது சிறிது சிதிலமடைந்து மராமத்துப் பணிகளுக்காக மூடப்பட்டுள்ளது. இதனை அமைத்த விக்ரமராஜசிங்கே நல்ல ரசனைக்காரன்தான். இயற்கையையும் செயற்கையையும் இணைத்து பொதுவான ஏரியில் மறைவான குளிக்குமிடத்தை அமைத்த அவனை உளமாற பாராட்டினேன். சில சமயங்களில் ராணிகளுடன் ராஜாக்களும் ஜலக்கிரீடைக்காக வருவார்களோ என்றும் நினைக்கத் தோன்றியது.

Under Repair

மறுபடியும் சளசளவென்று அதே சத்தம் கேட்க, காவல்காரனையும் மீறி ஆர்வத்துடன் எட்டிப் பார்த்தேன். அங்கே தெள்ளத் தெளிவான ஏரி நீரில் சிறிதும் பெரிதுமாய் ஒரு மீன் கூட்டம்  தண்ணீரைக் களைந்து கொண்டும் துள்ளிக் கொண்டும் சளக்புளக் என்று நீந்திக்கொண்டிருந்தன. அது என்ன மீன் என்று காவலனைக் கேட்க அவன் முறைத்துப் பார்த்துவிட்டு நகர்ந்து விட்டான்.

மீன் கூட்டம்

உடனே விரிந்த என் கற்பனைகள் ராணியும் தோழிகள் புடை சூழ மீன்களுக்குப் போட்டியென நீந்தி விளையாடி நீராடி மகிழ்ந்த காட்சிகள். அப்படியே மறுபுறம் போனால் கலோனியல் பில்டிங் என்பதை பார்த்தவுடனே தெரிந்தது. ஒரு மாபெரும் சிலை ஒன்று இருந்தது. அது ஒரு புத்த பிட்சுவின் சிலை. அவர் பெயர்  அமோகவஜ்ர தேரோ  . 

அமோகவஜ்ர தேரோ

இலங்கை பிரிட்டிஷ்  ஆட்சிக்கு உட்படுத்தப்பட்டபோது இங்குதான் அதன் கவர்னர் தங்கியிருந்தாராம். கண்டியின் சீதோஷ்ணம் மலையக குளிரிச்சியினைக் கொண்டதால் வெள்ளைக் காரர்களுக்கு இது மிகவும் பிடித்த இடம். இந்த பில்டிங்  சர்.ஜேம்ஸ் லாங்டன்  என்பவரால் 1880-ல்  ஆண்டு கட்டப்பட்டது. பல கவர்னர்கள் இங்கே தங்கியிருந்தனர். அந்த இடம் இப்போதும் பளபளவென்று இருந்தது. ஒரு புறம் அலுவலகம் இருந்ததால் அனுமதியில்லை. மறுபுறம் ஒரு சிறிய மியூசியமும் விற்பனை இடமும் இருந்தன.

அங்கிருந்து கீழே   படிகளில் இறங்கினால் அங்கு ஒரு மாபெரும் புத்தர்சிலை ஒன்று இருந்தது. கிட்டப்போய்ப் பார்த்தால் அது இந்தியாவிலிருந்து பரிசாக வழங்கப்பட்ட ஒன்று என்பது தெரிந்தது. கீழே இந்திய மூவர்ணக்கொடி பொறிக்கப்பட்டு இருந்தது.

அதனைக் கடந்து மறுபுறம் சிறிது கூட்டமாய் இருந்தது. அது என்னவென்று கிட்டப்போய்ப் பார்த்தால் ஒரு பெரிய யானையை பாடம் செய்து வைத்திருந்தார்கள். 

அது எல்லோருக்கும் பிரியமான கோயில் யானையாம் . அதன் பெயர் மற்றும் வரலாறையும் அங்கே எழுதி வைத்திருந்தார்கள்.

British Governor's palace 

கோவிலின் மறுபுறம் கண்டி பிராவின்சின் கவர்னர் மாளிகை இருக்கிறது. உள்ளே செல்ல அனுமதியில்லை. மறுபுறம் கோவில் வளாகத்தை ஒட்டி ஒரு பழைய பிரிட்டிஷ் கால கிறிஸ்தவ ஆலயம் ஒன்றும் இருந்தது. இப்படி பல அதிசய அற்புதங்களைக் கொண்ட 'தலதா மாளிகை' பலவேறு வரலாறையும், கால மாற்றங்களையும் எடுத்துக் காட்டுவதாக இருந்தது.

Kandy Governor's Residense

ஒவ்வொரு வருடமும் ஜூலை ஆகஸ்ட்டில் பெரிய திருவிழா ஒன்று நடக்குமாம். அதன் பெயர் "கண்டி ஈசலா பிரஹரா (The Kandy Esala Perahera). இந்த விழாவின் சிறப்பாக ஒரு பெரிய ஊர்வலம் நடக்குமாம். பிரஹரா என்றால் ஊர்வலம் என்று அர்த்தம். இது புனிதப்பல்லுக்கு  மரியாதை செய்யும் விதமாக நடத்தப்படுகிறது. இந்த ஊர்வலத்தில் இலங்கையின் பாரம்பரிய நடனங்களான தீ நாட்டியம், சாட்டை நாட்டியம் போன்ற பல்வேறு கலாச்சார நடனங்கள் நடத்தப்படும். இவ்வூர்வலத்தில் யானைகள் அழகான உடைகளால் அலங்கரிக்கப்பட்டு மகாவெளி ஆற்றங்கரை வரை போகுமாம்.

கி.மு.மூன்றாம் நூற்றாண்டில் ஆரம்பிக்கப்பட்ட (நன்றாக கவனிக்கவும் கி.பி. அல்ல கி.மு) முதலில் மழை வரம் வேண்டி நடத்தப்பட்டது. ஆனால் கி.பி. நான்காம் நூற்றாண்டில் இந்தியாவிலிருந்து புனிதப்பல் இலங்கைக்கு வந்த போது இதே  ஊர்வலம் புனிதப்பல் ஊர்வலமாக மாறிவிட்டதாம்.இப்போது நடக்கும் ஊர்வலத்தை 1747 முதல் 1781 வரை அரசாண்ட கண்டியின் அரசன் கீர்த்தி ஸ்ரீ ராஜசிங்கே ஆரம்பித்து வைத்திருக்கிறான். 1815ல் பிரிட்டிஷாரின் பிடிக்கு வந்த பின், அவர்கள் புனிதப்பல்லையும், விழாவையும் புத்த மகா சங்கத்திடம் ஒப்படைத்து விட்டனர். இந்த ஊர்வலத்தில் கோயில் யானையின் அம்பாரியில் புனிதப்பல் ஊர்வலமாக எடுத்து வரப்படும்.

போதும் போதுமென பார்த்து முடித்து, வெளியே வந்து அம்ரியைத் தேடிக் கண்டுபிடித்தேன். “சார் இவ்வளவு நேரமா என்ன செய்தீங்க உள்ளே”, என்று கேட்டான். ஹிஹி என்று சிரித்துவிட்டு "கொழுப்பிற்குத் திரும்பலாம்' என்றேன்.

மலைப்பயணத்தை இனிதே முடித்து கீழிறங்கினோம். சீரான வேகத்தில் காரை செலுத்தச் சொன்னேன். போகிற வழியில் ஒரு ஊரில் அங்கேயே விளைந்த முந்திரிப்பருப்புகள் கிடைத்தன. சென்னைக்கும் மதுரைக்கும் செல்லப் போவதால் சில பாக்கெட்டுகளை வாங்கி வைத்துவிட்டு ஒன்றைப்பிரித்து சாப்பிட்டோம். நல்ல விளைந்த பெரிய சைசில் இருந்த  முந்திரிப் பருப்புகள் பதமாக வறுக்கப்பட்டு சிறிதே உப்புத்தூவி இருந்தது. அந்த மாதிரி ஒரு மொறுமொறுப்பான முந்திரிப் பருப்புகளை நான் அதற்கு முன்பு சாப்பிட்டதே இல்லை.

ஒரு மூன்று மணி நேரப்பயணத்தில் கொழும்பு வந்து சேர்ந்தோம். மணி பத்தாகியிருந்தது. நாளை எங்கே என்றேன். நாளை காலேவுக்குப் போகிறோம் என்றான்.

அங்கே என்ன இருக்கிறது?

அங்குதான் டச்சுக்காரர்களின் கோட்டை இருக்கிறது. அது தவிர கடலில் சென்று கோரல்களைப் பார்க்கலாம் என்றான். அதனைப்பற்றி நினைத்துக் கொண்டு அப்படியே தூங்கிப்போனேன்.

தொடரும்

சர்ச்சிலைக்கொல்ல நடந்த சதி !!!!!

படித்ததில் பிடித்தது

கழுகு தரை இறங்கிவிட்டது.

ஜேக் ஹிக்கென்ஸ் - தமிழில் கொரட்டூர் கே.என் ஸ்ரீனிவாஸ் - கண்ணதாசன் பதிப்பகம்.

வரலாற்று நவீனம் (Historical Fiction), அதுவும் உலகப்போர் சமயம் நடந்தது அதுவும் தமிழில் என்பதால் இந்தப் புத்தகத்தை உடனே வாங்கினேன்.

Winston Churchil

கண்ணதாசன் பதிப்பகத்தில் இப்படி சில முயற்சிகள் செய்திருக்கிறார்கள். எந்த அளவுக்கு வெற்றியடைந்திருக்கிறது? எவ்வளவு பிரதிகள் விற்றது என்று தெரியவில்லை. ஆங்கிலத்தில் எழுதும் நவீனங்கள், இங்கிலாந்திலோ அமெரிக்காவிலோ ஹிட் ஆகிவிட்டால் அதனை எழுதிய எழுத்தாளர்கள் மிகப் பிரபலமடைவார்கள். அதோடு பெரும் பணக்காரர்கள் ஆகிவிடுவார்கள் . அவர்களின் நாவல் கண்டிப்பாக சினிமாவாகவும் வந்துவிடும். உதாரணத்திற்கு டேன் பிரவுனைச் சொல்லலாம்.  

ஆனால் இந்தியாவில் சங்க காலத்திலிருந்து இதனைப் படிக்கும் உங்க காலம் வரைக்கும் இப்படி ஒருவரைக் கூட சொல்லமுடியாது. ஓரளவுக்கு புகழ் கிடைக்கலாம். ஆனால் நட்சத்திர எழுத்தாளர்களுக்கு கூட பெரும் பணம் கிடைக்க வாய்ப்பேயில்லை. ஆங்கிலத்தில் நான்கு புத்தகங்கள் எழுதி சம்பாதிப்பதை இங்கு நாநூறு புத்தகங்கள் எழுதினாலும் அதில் ஒரு சிறு சதவீதம் கூட அவர்கள் சம்பாதிக்க முடியாது. முழு நேர எழுத்தாளர் என்பது இப்போதெல்லாம் சுத்தப் பைத்தியக்காரத்தனம்.  ஏனென்றால் சுஜாதா போன்ற நட்சத்திர எழுத்தாளனின் புத்தகங்கள் கூட 2000 பிரதிகளுக்கு மேல் விற்காதாம்.

Jack Higgins

இங்கு ஒரு சில நாவல்கள் எழுதிப் உலகப்புகழ்பெற்ற ஜேக் ஹிக்கின்ஸ் (Jack Higgins) எழுதிய "தி ஈகிள் ஹேஸ் லேன்டட்" (The Eagle has landed) என்ற புத்தகத்தை வெகுகாலத்திற்குப்பின் கண்ணதாசன் பதிப்பகம் தமிழில் கொண்டுவந்திருக்கிறார்கள். புகழ் பெற்ற புத்தகங்களை மொழியாக்கம் செய்து வெளியிட பதிப்புரிமைக்கு மிகவும் செலவாகும். இது மிகவும் பழையது என்பதால் ஒருவேளை சல்லிசாக கிடைத்திருக்கும் என நினைக்கிறேன்.

Hitler

இரண்டாம் உலகப்போர் மும்முரமாக நடந்து கொண்டிருந்த சமயம். ஜெர்மனின் ஆதிக்கம் கொஞ்சம் கொஞ்சமாக தகர்ந்து கொண்டிருந்தது. ஹிட்லர், ஹிம்லர், கோயபல்ஸ், கனாரிஸ் ஆகியோர் காரசாரமாக விவாதம் செய்கிறார்கள். ஏதாவது செய்து தோல்வியைத் தவிர்க்க வேண்டும் என்ற அழுத்தம். ஹிட்லர் எல்லோர் மேலும் எரிந்து விழ ஹிம்லர் ஒரு விபரீத முடிவை எடுக்கிறார்.

Himmler

அதுதான் இங்கிலாந்துக்கு ஒரு தற்கொலைபாராசூட் படையை அனுப்பி வின்ஸ்டன் சர்ச்சிலைக் கொலை செய்வது அல்லது கடத்திக் கொண்டு வருவது என்பது. ஏற்கனவே இந்த அதிரடிப் பாராசூட் படை இத்தாலியின் சர்வாதிகாரியான முசோலினியைக் கடத்திவந்திருந்தது.

இதற்கு மாஸ்டர் மைண்டாக மேக்ஸ் ரேடில் என்ற ஜெர்மானிய மேஜர் ஒருவர் செயல்பட்டு திட்டம் வகுக்கிறார். இதற்கிடையில் ஸ்டட்லி கான்ஸ்டபிள் என்ற பகுதிக்கு ஒரு சிறு ஓய்வுக்கு ரகசியமாக சர்ச்சில் வருகிறார் என்ற செய்தி ஒரு பெண் உளவாளி மூலமாகக் கிடைக்கிறது.

இங்கிலாந்தின் மேல் கோபங் கொண்ட டெவ்லின் என்ற ஒரு ஐரிஸ்காரர் முன்னே சென்று ஆயத்தங்கள் செய்யும் வேளையில் டாலி என்ற  ஆங்கிலப் பெண்ணிடம் காதலில் விழுகிறார். கர்னல் ஸ்டைனர் என்றவரின் தலைமையில் பாராசூட் படை அந்த ஊரில் ரகசியமாக இங்கிலாந்தின் நட்பு நாடான போலந்து ராணுவத்தின் யூனிபார்மில் வந்து இறங்குகிறார்கள். 

அவர்கள் என்னமாதிரி திட்டமிட்டார்கள்? சரியான திட்டம்தானா? அவர்களின் முயற்சி எந்தளவுக்குப் பலித்தது என்பதை புத்தகம் படித்து தெரிந்து கொள்ளவும் அல்லது திரைப்படத்தையும் கண்டுபிடித்து பார்க்கலாம். இதே பெயரில் திரைப்படமும் வந்து கலக்கியது. 1977ல் இந்தப்படம் வந்தது. மைக்கல் கெய்ன் ஸ்டைனராகவும், டோனால்ட் சதர் லேண்ட் டெவ்லினாகவும், ராபர்ட் குவாலி ரேடிலாகவும், டோனால்ட் பிளசன்ஸ் ஹெய்ன்ரிச் ஹிம்லராகவும் நடித்துள்ளார்கள். நெட்பிலிக்சில் இது இல்லை. நூலகம் போய்த் தேட வேண்டும்.

இந்தப் புத்தகத்தை மொழி பெயர்த்த முனைவர் கொரட்டூர்  கே.என். ஸ்ரீனிவாஸ்  முடிந்தளவிற்கு முயன்றிருக்கிறார். ஆனாலும் சில அமெரிக்க அல்லது ஆங்கில லோக்கல் ஸ்லாங்களை  அவர் சரியாக மொழிபெயர்க்கவில்லை. சில உரையாடல்களை அப்படியே (Literal) மொழி பெயர்க்கக் கூடாது. அதனை தமிழில் பேசினால் எப்படியிருக்கும் எனக்கற்பனை செய்து தமிழாக்கம் செய்வது அவசியம். ஆனால் கதையின் சுவாரசியம் உங்களை ஆட்கொண்டு மற்ற சிறு தவறுகளை மறக்கடிக்கிறது.

கண்ணதாசன் பதிப்பகத்தின் முயற்சிகளையும் பாராட்ட வேண்டும். இது போன்ற கிளாசிக் நாவல்கள் தமிழில் மொழி பெயர்க்கப் படவேண்டியது அவசியம். ஒவ்வொரு நாவலை எழுதுவதற்கும் அமெரிக்கரோ, ஆங்கிலேயரோ, எவ்வளவு முயல்கிறார்கள் என்பதையும் நாம் அறிந்து கொள்ளலாம்.

இரண்டாவது உலகப்போரில் நடந்த மறைக்கப்பட்ட சம்பவத்தின் அடிப்படையில் எழுதப்பட்ட இந்த நாவலை வரலாற்று ஆர்வலர்கள் படித்து மகிழலாம்.

முற்றும் .  

அந்தப்புர ராணிகளின் அழகிய குளிக்கும் இடம் !!!!!!

இலங்கையில் பரதேசி -22

இதற்கு முந்திய பகுதியைப்படிக்க  இங்கே சொடுக்கவும்.

http://paradesiatnewyork.blogspot.com/2017/09/blog-post.html

கண்டி அரண்மனை 

இந்தத் தாக்குதலில் நன்மையும் பிறந்தது என்று சொன்னேன் அல்லவா.  அதனை இங்கே முதலில் சொல்லி விடுகிறேன். இலங்கையில் சிற்பத்தொழில் கிட்டத்தட்ட அழிவு நிலையில் இருந்தது, கிராமங்களில் உள்ள ஒரு சில குடும்பங்களே இந்தத் தொழிலில் இருந்தனர்.  அவர்களும்  வறுமையில் வாடிக் கொண்டிருந்தனர். அந்தச் சமயத்தில் இந்தத் தாக்குதலால் பல சிற்பங்கள் அழிந்து போனதால் அவர்களுக்கும் மீண்டும் வேலை கிடைத்தது.  அழிந்தும் மறந்தும்போன அவர்கள் தொழில் அவர்களுக்கு மீண்டும் கிடைத்தது அவர்கள் வாழ்வில் மறுமலர்ச்சி உண்டானது.

அதோடு கோவிலின் உட்சுவரில் சில விரிசல்களைச் சரி செய்யும்போது உள்ளே மறைந்திருந்த கீர்த்திஸ்ரீ ராஜசின்ஹா காலத்து ஓவியங்கள் கிடைக்கப்பெற்றன.

இந்தத் தாக்குதலை விடுதலைப் புலிகள் இயக்கம் ஏற்றுக் கொள்ளவில்லை. தாங்கள் செய்யவில்லை என்று மறுத்தது.ஆனால் மக்கென்சி என்ற ஆய்வு நிறுவனம் தன்னுடைய சர்வே மூலம் இது விடுதலைப்புலிகளின்  திட்டம்தான் என்பதை நிரூபித்ததோடு, தமிழ்ச் சிறுபான்மை சமூகத்துக்கு எதிராக கலவரங்களைத் தூண்டுவதே இதன் நோக்கம் என்று நிரூபித்தது. நல்ல காலமாக அப்படி ஒன்றும் நடக்கவில்லை.

ராஜீவ் கொலை, தலதா மாளிகை தாக்குதல் ஆகியவற்றால் விடுதலைப்புலிகளுக்கு அப்போதிருந்து இறங்குமுகம் ஆரம்பித்தது என்று சொல்லலாம். அதோடு இந்திய மற்றும் வெளிநாட்டு ஆதரவுகளையும் அவர்கள் இழந்து போனார்கள்.

             சரி வாருங்கள் வளாகத்திற்குள் இருக்கும் மற்ற கட்டடங்களைப் பார்த்துவிடலாம்.

மண்டபம் முன் பரதேசி 

அந்த வளாகம் மாலை மஞ்சள் வெயிலில் தங்க நிறத்தில் ஜொலித்துக் கொண்டிருந்தது. முதலில் நான் பார்த்த கட்டிடம் கண்டிராஜாக்கள் தங்கியிருந்த அரண்மனை. இதுவரை நான் பார்த்த அரண்மனைகளிலேயே மிகவும் சுமாரான அரண்மனை இதுதான். எளிய நீளமான கட்டிடம், சில அறைகளுக்குச் சென்று பார்த்தேன். பிரமாத வேலைப்பாடுகள்  ஒன்றுமில்லை.  ஒருவேளை கோவிலுக்கு அதிகப்பணத்தை செலவழித்துவிட்டு தாங்கள் எளிய முறையில் வாழ நினைத்திருக்கலாம். அல்லது எல்லாப் பணமும் பெரும்பாலும் போருக்கே  செலவு செய்யப்பட்டிருக்கலாம். அல்லது அவர்கள் வாழ்ந்த காலத்தில் சிறப்பாக இருந்திருக்கலாம். கம்போலாவைச் சேர்ந்த மன்னன் மூன்றாம் விக்ரமபாகு முதன்முதலில் (1356-1374) இங்கு அரண்மனையைக் கட்டினானாம். அதன்பின் கண்டி மன்னன் (1469 முதல் 1511 வரை ஆண்ட) சேனா சம்மத விக்கிரமபாகு இங்கு விஸ்தாரமாய் அரண்மனையைக் கட்டி பல வேலைப்பாடுகளைச் செய்தானாம்.

அரண்மனை

இந்த அரண்மனை மஹா வசாலா என்றழைக்கப்படுகிறது. இந்தப்பெயர் பொலனருவா காலத்திலிருந்தே இப்படித்தான் அழைக்கப்பட்டிருக்கிறது. "மாளிகவா" அல்லது மாளிகை என்றும் சொல்லுகிறார்கள். இப்போதிருக்கிற கட்டிடம் முதலாவது விமலதர்மசூர்யாவால் கட்டப்பட்டது.

 பிரிட்டிஷார் கைப்பற்றியபின் இது அவர்களின் அலுவலமாக செயல்படத்துவங்கியது. கண்டியின் முதல் பேரனட் சர் ஜான் டோய்லி  முதன்முதலில் இதனைப் பயன்படுத்தியதைத் தொடர்ந்து, இந்தப் பதவி வகித்த பலர் இங்கு தங்கியிருந்தார்கள். இப்போது இது மியூசியமாகி இருக்கிறது.   

கண்டி தர்பார் மண்டபம்

அதன்பிறகு என் கண்ணில்  பட்டது ஒரு பெரிய கூரைக்கட்டிடம். நான்கு புறமும் திறந்த வெளியாக இருந்த அந்த மாபெரும் மண்டபத்தின் அருகில் சென்றேன். அதுதான் தர்பார் மண்டபம் என்று சொன்னார்கள். இப்படியா வெட்டவெளியில் பாதுகாப்பில்லாமல் இருக்குமென ஆச்சரியமாய் இருந்தது. மேற்கூரை உட்பட முழுவதும் மரத்தால் அமைக்கப்பட்ட மண்டபம். “மகுல் மடுவா” என்றழைக்கப்படும் இந்த மண்டபத்தை மன்னன் விக்ரம ராஜசின்ஹா கட்டியிருக்கிறான். ஸ்ரீ ராஜாதி ராஜசின்ஹா 1783ல் இதைக் கட்டிய போது 58 அடி நீளமும் 36அடி அகலமும் கொண்டதாக இது இருந்ததாம். வேல்ஸ் இளவரசர் ஆல்பர்ட் எட்வர்டு 1872ல் வரும்போது இது புதுப்பிக்கப்பட்டு 36 அடி என்பது 67 அடியாக நீட்டப்பட்டிருக்கிறது.  இந்த தர்பார் மண்டபத்தின் மரத்தூண்களில் அழகிய வேலைப்பாடுகள் அமைந்திருக்கின்றன.

பின்னர் அது பிராதுகளை தீர்த்துவைக்கும் கச்சேரியாகவும், அதன் பின்னர் சுப்ரீம் கோர்ட்டாகவும் செயல்பட்டிருக்கிறது. இப்போது அரசு விழாக்கள் இங்கு நடைபெறுகிறதாம்.

மறுபுறம் ஒரு பழைய கட்டிடம் தனியாக இருந்தது. சதுர வடிவில் கண்டியின்  கட்டிடக்கலையில் அமைக்கப்பட்ட இந்த இடம் தங்கக்கூடமாம். கண்டி மன்னர்கள் காலத்தில் மிகவும் பாதுகாக்கப்பட்ட இந்த இடத்தில்தான் தங்க ஆசாரிகள் தங்கி இருந்தார்களாம். செங்கடகலா அரசு ஆட்சியைப் பிடித்ததில்  இருந்தே  இந்த இடம் கட்டப்பட்டு வழிவழியாக வந்த மன்னர்களால் புதுப்பிக்கப்பட்டு வந்ததாம். இந்த தங்க ஆசாரிகள் மன்னருக்கு மட்டுமே வேலை செய்வார்களாம். அரசுப்பணியாளர்கள் போல அரசரின் பணியாளர்கள். இவர்களுடைய முக்கிய வேலை தங்கக் கிரீடம் செய்வது, மன்னருக்குத் தேவையான வாள், குறுங்கத்தி போன்ற தங்க பாதுகாப்புக்கருவிகள் செய்வது ஆகியவை.  பட்டத்து வாள் என்று சொல்வார்கள். வழிவழியாக வந்த கிரீடங்கள் தவிர, ஒவ்வொரு மன்னருக்கென்றும் தனிப்பட்ட முறையில், தனிப்பட்ட அளவில் தனிப்பட்ட டிசைனில் கிரீடம் மற்றும் ஆயுதங்கள் தயாரிக்கப்பட்டன. அந்த தங்க ஆசாரிகளின் பணிக்கூடத்தின் பின்னே அவர்கள் மற்றும் அவர்களின் குடும்பங்கள் தங்குமிடங்களும் அமைக்கப்பட்டு இருந்தன. நான் போன சமயம் பூட்டப்பட்டு இருந்தது. ஆனால் அந்தக் கிரீடத்தை நான் கொழும்பு மியூசியத்தில் பார்த்தேன். அதனைப் பின்னர் சொல்கிறேன். ஒவ்வொரு இடம் செல்லும் போதும், அந்தக் காலத்தில் அது எப்படி இருந்திருக்கும் எனக்கற்பனை செய்து பார்த்தது.

அதற்கு மறுபுறம் ராணிகள் குளிக்குமிடம் இருக்கிறது என்று சொன்னதை ஒட்டி அதனை நோக்கி நகர்ந்தேன்.

"டேய் பரதேசி அதைச் சொல்றா முதல, ஏதாவது ராணி குளிக்கிறதா பாத்தியா"

"வந்திட்டியா மகேந்திரன், இந்த மாதிரி விஷயம்னா சம்மன் இல்லாம ஆஜராயிருவியே".

"அத விடு பாத்தியா பாக்கலியா"

"ராணிகள் குளிக்கிறத பாத்தா, வெட்டிரு வாய்ங்கடா?

நாயக்கர் ராணிகளை ஏய்க்கற வேலை செஞ்சா மாடுகளை மேய்க்கிற வேலைக்கு அனுப்பிடுவாய்ங்க"

"சர்றா பொறுமையை சோதிக்காத பாத்தியா இல்லியா"

"அந்த இடத்தின் பெயர் 'உல்பங்கே'. கோயிலை ஒட்டி இருக்கிற ஏரியின் ஒரு பகுதியில் இது அமைந்திருக்கிறது. இரு பகுதியா பிரிச்சு, மேற்பகுதியில் உடை மற்றும் அறைகளும் கீழ் பகுதியில் ஏரித்தண்ணீருக்குள் சுற்றுச்சுவர்களை  உடைய இடமும் இருக்கிறது. இது அந்தப்பரந்த ஏரியின் ஒருபகுதியை நீச்சல் குளம் போல் ஆக்கியிருக்கிறது. இங்கு ராணிகள் தங்கள் தோழிகள் புடை சூழ வந்து குளிப்பார்களாம்."

"சரி அதை விடு ராணிகள் இல்லாட்டி தோழிகளாவது குளிச்சதைப் பாத்தியா?"

இருங்க இந்த மகேந்திரனை வெட்டிவிட்டு  வருகிறேன். நான் அருகே சென்றபோது ஏரியின் நீச்சல் குளப்பகுதியில் சளசள வென்று சுத்தம் கேட்டது. யாரோ குளிக்கிறார்கள் இன்னும் அரச குடும்பத்தின் மிச்சம் சொச்சம் இருக்கிறார்களா என எட்டிப் பார்த்த போது எங்கிருந்தோ விரைந்து வந்தான் காவல்காரன். 

-தொடரும்.

எழுச்சிப்பாடகர் K.A குணசேகரன் !!!

FETNA  2017 இதழில் வெளிவந்த எனது கட்டுரை 

K.A   குணசேகரன்

      சுறு சுறுப்பாய் மேடை ஏறிய மனிதரைப்பார்த்ததும், அட K.A. குணசேகரன் இங்கே எங்கே வருகிறார் ? என்று நினைத்தேன். பிறகுதான் தெரிந்தது  அவர்தான் சிறப்பு விருந்தினர் அதோடு மணமகனின் நெருங்கிய உறவினர் என்று. இது நடந்தது 90 களில் மதுரையில் . மணமகன் எட்வின் ராஜ்குமார், மதுரை சமூகப்பணி கல்லூரியில் படித்த போது என்  சீனியர். K.A. குணசேகரன் அதன்  பின்னர் புதுச்சேரி பல்கலைக் கழகத்தின் நிகழ்கலைத் துறையின் தலைவரானார். தனித்துவமிக்க நாட்டுப் புறப்பாடகரான இவர் “தன்னானே” 'என்ற இசைக்குழுவை நடத்திவந்தார். பறை, பம்பை , தவில், நாதஸ்வரம், உடுக்கை உள்ளிட்டப் பாரம்பரிய இசைக்கருவிகளை இவரின் குழுவினர் வாசித்தால் மேடையே அதிரும், அதனை மேற்கொண்டு இவருடைய கணீர்க்குரல் எல்லோரையும் கட்டிப்போட்டுவிடும். “மனுசங்கடா... நாங்க... மனுசங்கடா”, என்ற இவர் பாடும் பாடலைக் கேட்டு அதிர்ந்து உறைந்து போனவர்களில் நானும்  ஒருவன். 

சிவகங்கை மாவட்டம், இளையான்குடி அருகேயுள்ள மாரந்தை என்ற சிறிய கிராமத்தில் பிறந்தவர். மதுரை தியாகராசர் கல்லூரி மற்றும் காமராசர் பல்கலைக்கழகம் ஆகியவற்றில் பி.ஏ.(பொருளாதாரம்) எம்.ஏ (தமிழ் இலக்கியம்) படித்த இவர் நாட்டுப்புற நடனப் பாடல்கள் குறித்து ஆய்வை மேற்கொண்டு முனைவர் பட்டம் பெற்றார். சென்னை தரமணியில் உள்ள உலகத் தமிழராய்ச்சி நிறுவனத்தின் இயக்குனராகவும் பொறுப்பு வகித்தார். ஒடுக்கப்பட்ட சமூகத்தை உயர்த்தும் வண்ணமாக எழுதியும் பாடியும் உலகமெங்கும் இயங்கியவர் இவர். இவர் எழுதிய நூல்கள்  புதுச்சேரி பாரதிதாசன் அரசு மகளிர் கல்லூரியில் முதுகலைப் பாடத்திட்டத்திலும், புதுச்சேரி பல்கலைக் கழக தமிழ்த் துறையின் பாடத்திட்டத்திலும் இடம் பெற்றிருக்கின்றன.

கடந்த 2017  ஜனவரி மாதம் எதிர்பாராதவண்ணமாக நம்மை விட்டு இவர் மறைந்தாலும் , இவர் தம்முடைய பாடல்கள் மற்றும் படைப்புகள் மூலமாக என்றும் வாழ்வார்.

  

விடுதலைப்புலிகள் கண்டி புத்தர் கோவிலை ஏன் தாக்கினார்கள் ?

இலங்கையில் பரதேசி -21

இதற்கு முந்திய பகுதியைப்படிக்க  இங்கே சொடுக்கவும்.

https://paradesiatnewyork.blogspot.com/2017/08/blog-post_21.html

கரும்புலிகள்

1998 -ஆம் ஆண்டு ஜனவரி மாதம் 25ஆம் தேதி அதிகாலை, விடுதலைப்புலிகள் இயக்கத்தைச் சேர்ந்த மூன்று கரும்புலிகள் ஒரு பெரிய டிரக்கை ராஜ வீதி வழியாக ஓட்டிக் கொண்டு வந்தனர். அந்த மூவரும் கரும்புலிகளின் உட்பிரிவான தற்கொலைப்படையினர். அந்த டிரக்கில் 300 முதல் 400 கிலோ அளவுள்ள வெடிமருந்துகள் நிரம்பியிருந்தன. ராஜவீதியைக் கடந்து வந்த டிரக் காலை சரியாக 6:10 மணிக்கு வேகமாக வந்து தலதா மாளிகை யின் நுழைவாயிலை உடைத்துக் கொண்டு உள்ளே புகுந்தது.

பொதுவாக இந்தக் கோவில்களுக்கும் விடுமுறை நாட்களில் தான் கூட்டம் அதிகமாயிருக்கும். அன்றைய நாள் கூட ஒரு ஞாயிற்றுக்கிழமைதான், ஆனால் தாக்குதல் நடந்தது காலை 6 மணிக்கு என்பதால் இந்த அளவோடு ஆட்சேதம் அதிகமில்லை. இல்லையென்றால் அங்கு நிச்சயமாக பெருத்த உயிர்சேதம் நடந்திருக்கும். விடுதலைப்புலிகள் பெரும் உயிர்ச்சேதத்தைத் தவிர்ப்பதற்குக்கூட அதிகாலையில் தாக்குதல் நடத்தியிருக்கலாம் என்று நினைக்கிறேன்.

உள்ளே நுழைந்த டிரக் பெரும் சத்தத்துடன் வெடித்துச் சிதறியது. மொத்தம் 16 பேர் அந்த இடத்திலேயே உடல் சிதறி இறந்து போனார்கள். அதிலே தற்கொலைப்படையைச் சேர்ந்த 3 கரும்புலிகளும் அடங்குவர். இதிலே ஒரு 2வயது குழந்தையும் இறந்து போனதாகப் படிக்கும்போது மனது கனத்தது. அந்தப்பச்சிளம் குழந்தை முளை விடும்போதே அழிந்து போனது ஏன்? அது என்ன பாவம் செய்தது?.

கிட்டத்தட்ட 25 பேருக்கு மேல் படுகாயம் அடைந்தார்கள். அதிலே நான்கு பெண்கள், ஒரு புத்தத் துறவி, ஒரு போலீஸ்காரர் ஆகியோரும் அடங்குவர்.

இன்னொரு  துயரம் என்னவென்றால் P.W.விதாநகே என்னும் ஜியாலஜி பேராசிரியர் இந்த தாக்குதலைக் கேட்டவுடனே ஏற்பட்ட அதிர்ச்சியில் மாரடைப்பு ஏற்பட்டு இறந்து போயிருக்கிறார்.

இந்த சக்தி வாய்ந்த தாக்குதலின் தாக்கம் 5 கி.மீ சுற்றளவுக்கு இருந்ததாம். பல கட்டிடங்களின் கண்ணாடி சுவர்கள், ஜன்னல்கள் உடைந்து சிதறியதால் அந்த ஏரியாவே அதிர்ந்து போனதாம். நாநூறு கிலோ வெடிமருந்து என்றால் சும்மாவா?

இந்தத் தாக்குதல் புனித பற்கோவிலில் கடுமையான சேதத்தை ஏற்படுத்தியது. குறிப்பாக மேற்கூரையும் முகப்பும் சேதமடைந்தன. ஆனால் கோவிலின் உள்வளாகமோ புனிதப்பல் இருக்கும் பீட அறையோ எந்தப் பாதிப்புமடையவில்லை. 'மஹாவஹல் கடா' என்றழைக்கப்பட்ட பெரிய நுழைவாயில் முற்றிலும் தகர்ந்து போனது. பத்திரிப்புவா, கண்டி அரசர்களின் அரண்மனை, மூன் ஸ்டோன் என்ற ரத்தினக்கல், ராணிகளின் குளியலிடம், ஆலய நூலகம், சில முக்கிய கற்சிலைகள் ஆகியவை சேதமடைந்தன. பக்கத்தில் இருந்த குயின்ஸ் ஹோட்டல் மற்றும் புனிதபவுல் ஆலயமும்  பாதிக்கப்பட்டன. மூன்ஸ்டேன் மட்டும் 43 சில்லுகளாக உடைந்து போனதாம்.

The Infant who died.

தாக்குதல் நடந்ததுமே அது இந்துக்களுக்கு எதிரான கலகமாக உருவெடுத்தது. புத்த மதத்தைச் சேர்ந்த ஏராளமான மக்கள் கோவிலைச் சுற்றிலும் நின்று கொண்டிருந்தனர். திடீரென்று அதில் சிலர் கிளம்பி பக்கத்தில் இருந்த "ஹிண்டு கல்ச்சுரல் சென்ட்டரில்" இந்த மூன்று வாகனங்களுக்கு தீ வைத்தனர். தமிழ் மக்களும் தாக்கப்பட்டனர். போலீஸ் கண்ணீர்ப் புகைக்குண்டுகளைச் சுட்டு கூட்டத்தை விலக்கினார். ஆனால் நல்லவேளையாக அந்தக் கலவரம் பெரிதாகப் பரவவில்லை. அதற்கு முழு முதற்காரணம் அப்போது அதிபராக இருந்த திருமதி. சந்திரிகா குமாரதுங்கே. அவர்கள் கொடுத்த வேண்டுகோளை அடுத்து மக்கள் அமைதி காத்தனர். கலவரங்கள் பரவி யாழ்ப்பாணம் தேர்தலை தடுத்து நிறுத்துவதுதான் விடுதைப்புலிகளின் நோக்கம் என்பதாகச்சொல்கிறார்கள் .

தாக்குதல் நடந்த அடுத்த நாளே விடுதலைப்புலிகள் இயக்கம் தடை செய்யப்பட்ட இயக்கமாக அறிவிக்கப்பட்டது. அவர்களை ஜனநாயக வழிக்குள் கொண்டுவரவேண்டும் என்று நினைத்ததால் அதுவரை தடைசெய்யவில்லை என்பது ஆச்சரியமளிக்கும் செய்தி. இந்தத் தடையோடு விடுதலைப்புலிகளுடன் பேச்சுவார்த்தை அல்லது சமசரத்துக்கும்  முடிவு கட்டப்பட்டது.

Chandrika Kumaratunga

பாதுகாப்புக்குறைபாடுகளுக்குப் பொறுப்பேற்று, இலங்கையின் ராணுவ மந்திரி அனுருத்தா ரத்வாத்தே தன் பதவியை ராஜினாமா செய்தார்.

இந்தக் கலவரங்களின் மத்தியிலும் யாழ்ப்பாண தேர்தல் திட்டமிட்டபடி நடந்தது. மக்கள் பெருந்திரளாய் வந்து வாக்களித்தனர்.

இலங்கையின் சுதந்திர நாள் கொண்டாட்டங்கள் கொழும்புவிற்கு மாற்றப்பட்டது. இளவரசர் சார்லஸ் முதற்கொண்டு எல்லா வெளிநாட்டு விருந்தினரும் வந்திருந்தனர். அதே மாதம் 28ஆம் தேதிதான் ராஜீவ் கொலையை ஒட்டி மெட்ராஸ் ஹைகோர்ட் பிரபாகரன் மற்றும் 25 பேருக்கு பிடி வாரண்ட் கொடுத்தது.

அக்டோபர் 2003ல் கண்டி உயர் நீதிமன்ற திட்டத்தில் மூன்று புலிகளுக்கு மரணதண்டனையும், இன்னும் இருவருக்கு 680 வருட கடுங்காவல் தண்டனையும், மற்றும் ஒருவருக்கு 490 வருட தண்டணையும் கொடுத்தது. வெளியே விடக்கூடாது என்று  நினைத்து விட்டனர் போலும்.

பல புத்தமதத் தலைவர்கள், இந்து மதத் தலைவர்கள், கொழும்புவின் கிறித்தவ ஆர்ச் பிஷப், இலங்கை இஸ்லாமிக் செண்ட்டர், உலக அமைப்புகளான, ஆம்னெஸ்டி இன்ட்டர்நெஷனல், யுனெஸ்கோ மற்றும் ஐநா சபைகளும் தங்கள் கண்டணத்தைத் தெரிவித்தனர்.

இடிபாடுகளை அகற்றிவிட்டு பிப்ரவரி 10ஆம் தேதி கோவில் மீண்டும் பொதுமக்களுக்காக திறந்துவிடப்பட்டது. ஆனால் கோவில் முற்றிலுமாக புனரமைக்கப்பட ஒன்றரை வருடங்கள் ஆனதாம். அதிபர் சந்திரிகா குமாரதுங்கே  அவர்களே இந்த புனரமைப்புக்குழுவின் தலைவராக செயல்பட்டு தன நேரடிப் பார்வையில் சீக்கிரமாக செய்து முடித்தனர். அரசு கொடுத்த 20 லட்சம் இலங்கை ரூபாய்கள் தவிர பொதுமக்கள் 1 கோடிக்கு மேல் வசூல் செய்து கொடுத்தார்களாம்.

ஏற்கனவே இருந்த சிற்பங்கள், மூன்ஸ்டோன் முதற்கொண்டு எல்லாவற்றையும் திரும்பவும் செய்துவிட்டார்கள். நான் செல்லும் போது தாக்கப்பட்ட எந்த அடையாளமும் கொஞ்சம் கூட இல்லை. இந்தத் தாக்குதலில் சில நன்மைகளும் நடந்தன அவை என்னவென்று அடுத்த வாரத்தில் பார்ப்போம்.

- தொடரும்.