இங்கிலாந்து அரச குடும்பத்தில் ஒரு சூனியக்காரி ? !!!!!!!!!!!

படித்ததில் பிடித்தது

தி லேடி ஆஃப் தி ரிவர்ஸ் /பிலிப்பா கிரிகரி

(The Lady of the Rivers by Philipa Gregory)

எனக்குப் பிடித்த இங்கிலாந்து எழுத்தாளர்களுள் பிலிப்பா கிரிகரியும் ஒருவர். இவர் ஒரு வரலாற்று ஆய்வாளர் (Historian) அப்படியே வரலாற்றுப் புதினங்களை(Historical Fiction)  எழுதிப் புகழ் பெற்றார். அந்த மாதிரிப் புத்தகங்களோ திரைப் படமோ எனக்கு மிகவும் பிடிக்கும் என்பது என்னுடைய பதிவுகளை தொடர்ந்து வாசிக்கும் அனைவருக்கும் தெரியும். இவர் எழுதிய Red Queen, White Queen போன்ற பல புத்தகங்களை நான் ஏற்கனவே படித்த்திருக்கிறேன். குறிப்பாக இங்கிலாந்தின் அரச வம்சங்கள் அதிலும் குறிப்பாக "டியூடர் வம்சாவளி"  அரசர்களையும் அவர்களைச் சுற்றிப்பின்னப்பட்ட நிகழ்வுகளையும் எழுதியிருக்கிறார். நியூயார்க் டைம்சின் பெஸ்ட் செல்லிங் எழுத்தாளர் இவர். இவர் எழுதிய 'ஒயிட்குயின்' என்பது இப்போது ஸ்டார்ஜி(Starz) டெலிவிஷனின் ஒரிஜினல் ரிலீசாக  வெளிவந்து கொண்டிருக்கிறது.

Philippa Gregory

இன்னும் சிறப்பாக ஹிஸ்டரி (History) என்றால் ஹிஸ் ஸ்டோரி (His Story) என்று  பெரும்பாலான வரலாறுகள் எழுதப்பட்டாலும் அதிலே பின்னிப் பிணைந்திருக்கும் ஹெர் ஸ்டோரி (Her Story) என்று ஒன்று இருப்பதை உலகுக்கு வெளிப்படுத்த நினைப்பவர் இவர்.  பெரும்பாலும் அரச இனப் பெண்களைச் சுற்றி அவர்களுடைய வரலாற்றை  ஒட்டின நிகழ்வுகளை சிறிதே கற்பனை சேர்த்து பல புத்தகங்கள் எழுதியிருக்கிறார். இவர் பெண் என்பதாலும் அப்படி  நினைத்திருக்கலாம். அந்த மாதிரி மறக்கப்பட்ட மறைக்கப்பட்ட சில ஆளுமை நிறைந்த அரச குடும்பத்து பெண்கள் சார்ந்த நாவலில் ஒன்றுதான் "தி லேடி ஆஃப் ரிவர்ஸ்".

இந்த நாவலின் மையக்கதாப்பாத்திரம் லக்சம்பர்க் இளவரசி 'ஜக்கிட்டா'  (Jaquetta) என்பவரைப் பற்றி.

Jaquetta 

ஃப்ரென்ச் நாடு அப்போது இங்கிலாந்தின் பிடியில் இருந்தது. இங்கிலாந்தின் பிரதிநிதியாக (Regent) டியூக் ஆஃப் பெட்ஃபோர்டு இருந்தார். பிரான்ஸ் வறுமையில் வாடியது. அப்போது மீண்டும் ஃபிரெஞ்ச் படை “ஜோன் ஆஃப் ஆர்க்”கின் தலைமையில் எழுந்து ஒரு போரில் இங்கிலாந்துப் படையை முறியடித்து ஃபிரெஞ்ச் அரச வம்சத்து சிறுவனை மீண்டும் அரசராக முடிசூட்டியது. இந்த வெற்றி அதிக நாட்கள் நீடிக்காமல் டியூக் ஆஃப்  பெட்ஃபோர்டு திரும்பவும் வந்து   ஃபிரெஞ்ச் படைகளை முறியடித்து ஜோன் ஆஃப்  ஆர்க்கையும் சிறைப்பிடித்தார். அப்போது லக்சம்பர்க் இங்கிலாந்திடம் நட்புப் பாராட்டியதால் ஜோன் ஆஃப் ஆர்க் அவர்களுடைய அரண்மனையில் வீட்டுச் சிறையாக வைக்கப்  பட்டிருந்தாள். அப்போது நம் கதாநாயகி ஜக்கிட்டாவும் ஜோனும் நெருங்கிப் பழகி தோழிகள் ஆகிறார்கள்.

ஆனாலும் ஜோனை விட்டுவிட்டால் ஆபத்து என்றெண்ணி டியூக் அவளை இன்னொரு கோட்டைக்கு வரவழைத்து அங்கே பொதுமக்கள் மத்தியில் அவளை சூனியக்காரி என்று குற்றம் சுமத்தி எரித்துக் கொன்றுவிடுகிறார்கள். இதற்கு லக்சம்பர்க் அரச குடும்பமும் அழைக்கப்பட்டு இந்தக் கொடுமை ஜக்கிட்டா கண் முன்னரே நடைபெறுகிறது.

லக்சம்பர்க் அரச வமிசம் நீர்க்கடவுளான (Water Goddes) மெலுசினாவின் பரம்பரையில் வந்தவர்கள் என்று நம்பப்பட்டு இந்த வம்சத்தில் பிறக்கும் பெண்கள் மெலுசினாவின் அம்சம் என்று நம்பப்படுகிறது. அதோடு இவர்களுக்கு சில சிறப்பான அமானுஷ்ய சக்திகள்  இருப்பதாகவும் நம்பப்பட்டது . ஜக்கிட்டாவுக்கும் அந்த மாதிரி சில சக்திகள் இருந்தன .

  கோட்டைக்கு வந்த ஜக்கிட்டாவை, ட்யூக் பார்த்து அவளுடைய அழகில் மயங்கி விடுகிறார். ஆனால் இங்கிலாந்தில் அப்போது ஒருவருக்கு ஒருத்தி என்ற ஒழுக்கம் (திருமணத்தில் மட்டும்) கடைப் பிடிக்கப்பட்டு வந்தது. ஆனால் சிறிது காலத்தில் ட்யூக்கின்  மனைவி இறந்துவிட டியூக் ஜக்கிட்டாவைப் பெண் கேட்கிறார். வயது வித்தியாசம் இருந்தாலும் இதைவிட நல்ல சம்பந்தமும் அரசியல் உயர்வும் கிடைக்காது என்பதால் ஜக்கிட்டாவின் எதிரிப்பையும் மீறி திருமணம் நடக்கிறது. ஜக்கிட்டா “டச்சஸ் ஆஃப் பெட் ஃபோர்டு  ஆகிறார்.

ஆனால் முதலிரவில்   ஜக்கிட்டாவுக்கு அதிர்ச்சி காத்திருந்தது என்னவென்றால் ட்யூக் அவளை குடும்பம் நடத்துவதற்காக திருமணம் செய்யவில்லை. அவர்  நடத்தும் ஆல்கெமி ஆராய்ச்சிக்கு ஒரு உயர்சாதி கன்னிப் பெண் தேவைப்பட்டது. அதற்காகத்தான் திருமணம் செய்தார்.

அதன் பின்னர் அவர்கள் இங்கிலாந்துக்குச் செல்ல லண்டன் மக்கள் ஜக்கிட்டாவின் அழகில் மயங்கி அவளை “பிரட்டி டச்சஸ்”( Pretty Dutchess) என்றழைத்து மகிழ்கிறார்கள். ஒரு புறம் ரசிகர்கள் இருந்தாலும் மறுபுறம் அவளை சூனியக்காரி என்று  சொன்னவர்களும் உண்டு. அப்போது ஹென்ரி என்ற ஒரு சிறுவன் இங்கிலாந்தின் அரியணையில் இருக்கிறான்.

Richard Woodville

ட்யூக்கின் ஸ்கொயராக துடிப்பான இளைஞராக இருக்கும் ரிச்சர்டு வுட்வில் மீது  ஜக்கிட்டாவுக்கு ஒரு ஈர்ப்பு ஏற்படுகிறது. ஆனாலும் எல்லை மீறவில்லை. இதற்கிடையில் ட்யூக் நோய்வாய்ப்பட்டு இறந்துவிட ஜக்கிட்டாவின் நிலைமை தலைகீழாக மாறி சாதாரண ரிச்சர்டு வுட்வில்லை திருமணம் செய்து கொள்கிறாள் .

மீண்டும் அரச குடும்பத்தில் இடம்பெற என்னவெல்லாம் சாகசங்கள் தியாகம் செய்ய வேண்டியதிருந்தது என்பதை புத்தகத்தைப்   படித்து தெரிந்து கொள்ளுங்கள். இவரின் மகளான எலிசபெத் வுட்வில்லைத்தான் இங்கிலாந்தின் அரசன் நான்காம் எட்வர்டை மணந்து இங்கிலாந்தின் அரசி ஆகிறாள் . எந்த இடத்திலும் சுவாரஸ்யம் சிறிதும் குன்றாத புத்தகம் இது.  

பரதேசிக்கு நீச்சல் தெரியுமா தெரியாதா ?

இலங்கையில் பரதேசி -29

Gale Beach

இதற்கு முந்திய பகுதியைப்படிக்க  இங்கே சொடுக்கவும்.

https://paradesiatnewyork.blogspot.com/2017/11/blog-post_27.html

          

அங்கிருந்து சிறிது தூரம் பயணித்து காலே பஸ் நிலையம் அருகில் இருந்த ஒரு இந்திய உணவகத்தில் மதிய உணவு சாப்பிட்டோம். சாலட் தவிர எதுவும் சொல்லிக் கொள்ளும் போல இல்லை. இந்திய உணவை மட்டுமே தேடிப்போகாமல் வெவ்வேறு உணவுகளைச் சாப்பிட்டுப் பார்க்கும்படி மனது சொல்கிறது. ஆனால் நாக்கும் வயிறும் கேட்க மாட்டேன்கின்றன. எத்தனை முறை ஏமாந்தாலும் இதுவே தொடர்கிறது. நான் என்ன செய்வது. அம்ரி நன்றாகவே சாப்பிட்டான்.  அவனுக்கு எந்தப்பிரச்சனையும் இல்லை போலிருக்கிறது. வயிறு நிரம்பினால் போதும்போல தெரிகிறது. ஆள் நல்ல வாட்டசாட்டமாகவே இருந்தான். நல்லதுதான் டூர் கைட், டிரைவர் மட்டுமல்லாது என்னோட பாடிகார்டும் அவன்தானே. எனக்குத்தான் பிரச்சனை சுடர்மிகும் அறிவுடன் ஆண்டவன் படைத்தானோ இல்லையோ 'ருசிமிகும் நாவினைப் படைத்துவிட்டான் என்ன செய்வது.

          “சார் நீங்கள் ஸ்விம்மிங் போறீர்களா? இல்லை சர்பிங்கா இல்லை ஸ்நார்க்லிங்கா?

          “எங்கே எதில்?”

          "என்ன இப்படிக் கேட்கறீங்க, கடலில்தான்"

          (அடடே அம்ரிக்கு என்னைப்பற்றித் தெரியாது போலிருக்கு)

          “என்ன சார் சீக்கிரம் சொல்லுங்க”.

          “அந்தப் பொருட்களோ உடையோ எடுத்து வரவில்லையே”

          “சார் அதனால்தான் கேட்கிறேன் இங்கே அவையெல்லாம் வாடகைக்குக் கிடைக்கும்”.

          “அப்படியா இருக்கட்டும் பரவாயில்லை. இன்னொரு நாள் பார்த்துக் கொள்ளலாம்”.

          “சார் இங்கு திருப்பி வரமாட்டோம். இதுதான் கடைசி சான்ஸ். ஆமா உங்களுக்கு நீச்சல் தெரியுமா? தெரியாதா”?

          “தெரியும்ம்ம்ம் ஆனா தெரியாது?”

          “சார் கரெக்டா சொல்லுங்க, தெரியுமா? தெரியாதா?”

          “அட நீச்சல் கூடவா தெரியாது, ஏன் அழுத்தி அழுத்தி கேட்கற”,

 “அப்ப சரி வாங்க ரெண்டு ஸ்நார்க்ளிங் கிட் வாடகைக்கு எடுக்கலாம்”.

          “அது என்ன வென்று 5 வரிகளுக்கு மிகாமல் விளக்க முடியுமா?”

          “சார் ஸ்நார்க்ளிங் என்பது ஆழ்கடல் டைவிங், ஆக்சிகன் உதவியோடு கண்ணில் கண்ணாடி உரையை மாட்டிக் கொண்டு ஆழ்கடல் அதிசயங்களைப் பார்க்கலாம்”.

          “ஐயையோ அம்ரி நிச்சல் தெரியும் ஆனால் தண்ணீரில் தெரியாது”.

          “என்னாது, தண்ணீரில்லாமல் எப்படி நீச்சல் அடிக்க முடியும்?”

“ இல்லை தப்பாச் சொல்லிட்டேன். கடலில் அடிக்கத்தெரியாது. ஆறு, ஏறி, குளம் கிணறு,  ஆகியவற்றில் அடிப்பேன்”.

“சார் இந்தக் கடல் ஆழமில்லை, ஆறு கிணறைவிட இது ரொம்ப சேஃப் சார்”.

          “அம்ரி உண்மையைச் சொல்லாறேன் எனக்கு  நீச்சல் தெரியாது?

நீச்சலும் தெரியாது பாய்ச்சலும் தெரியாது. கூச்சலும் தெரியாது என்னை இப்படி வளர்த்துவிட்ட என் அம்மா அப்பாவின் மேல் கோபங்கோபமாய்  வந்தது.

          "சரி விடுங்க சார், அப்ப போட்டில் போகலாம்”

“அட அம்ரி போட் இருக்கா?, இதை முதல்லயே சொல்ல வேண்டியதுதானே?"

          எங்கள் வண்டி சந்துபொந்துகளில் நுழைந்து சென்றது.

          “என்னப்பா பீச்சுக்குப் போறேன்னு சொல்லிட்டு சந்து பொந்துக்குள்ள போற”.

          “சார் இது தான் வழி மத்ததெல்லாம் பிரைவேட்”.

 வழியெங்கும் சிறுசிறு கடைகள் இருந்தன. அவற்றுக்குள் நீச்சல் உபகரணங்கள் வாடகைக்கு கிடைக்கின்றன. அதுதவிர கடல்  பொருட்களை வைத்து செய்யப்பட அழகுப் பொருட்கள் விற்கும் கடைகள் இருந்தன. அதனையெல்லாம் வேடிக்கை பார்த்துக் கொண்டே சென்றோம். வீடுகளுக்கு முன்னால் ஆட்கள் உட்கார்ந்து கொண்டு சில பண்டங்களை விற்றுக்கொண்டு இருந்தனர். அதுதவிர அவர்கள் வீட்டின் முன்னால் கார்களை விட கட்டணம் வசூலித்துக் கொண்டும் இருந்தனர். பீச்சுக்கு மிக அருகில் இருந்த ஒரு வீட்டின் முன் காரை நிறுத்திவிட்டு சிறிது தூரம் நடக்க, பீச் வந்தது.

          மதிய வெய்யில் சுள்ளென்று அடித்தாலும்  கடற்காற்று அதனைத்தடவித்தடவி சாந்தப்படுத்தியதால் இ தமாகவே இருந்தது. வழியெங்கும் வெள்ளைக் காரர்கள் வெறும் ஷார்ட்ஸில் கையில் நீச்சல் சாதனங்களோடு வந்து கொண்டிருந்தார். வாயைப் பிளக்க வேண்டாம் ஆண்கள்தான். பெண்கள் டூபீசில் இருந்தார்கள். வழி சந்து பொந்தாக இருந்தாலும் உள்ளே நீண்ட கடற்கரை அழகாகவும் சுத்தமாகவும் இருந்தது. கடற்கரை முழுவதும் பலதரப்பட்ட மக்களைப் பார்க்க முடிந்தது. பெரும்பாலும் வெள்ளைக்கார வெளிநாட்டினர். சர்ஃபிங் செய்பவர்கள். ஸ்நார்க்லிங் செய்பவர்கள், வெறுமனே கடலில்           நீந்துபவர்கள், சன்பாத் எடுப்பவர்கள் என்று பலரும் இருந்தனர். ஸ்னார்க்லிங் செய்பவர்கள்  கிட்டத்தட்ட மீன் போன்றே மாறியிருந்தனர். சன்பாத் செய்பவர்கள் பெரும்பாலும் அரை நிர்வாணமாக இருந்தார்கள். ஆம் பெண்களும்தான். உடனே திரும்பவும் வாயைப் பிளக்க வேண்டாம். அவர்கள் குப்புறப் படுத்திருந்தார்கள்.

          அம்ரி ஒரு போட்காரரிடம் பேரம் பேசினான். பேரம்முடிந்து நானும் அம்ரியும் மட்டும் படகில் ஏறினோம். அது ஒரு மோட்டார் படகு.  அடடே நீச்சல் தெரிந்திருந்தால் கடலில் டைவ் செய்து ஆழ்கடல் அதிசயங்களை ஆத்மார்த்தமாக அனுபவித்திருக்கலாமே என்று ஆதங்கப்பட்டேன். (ஆஹா அ, ஆ ஐந்து தடவை வந்துவிட்டதே,இந்தப் பழைய புதுக்கவிஞன் அவ்வப்போது எட்டிப்பார்த்து அடம் பிடிக்கிறான், விட்டுவிடுங்கள் பாவம்)

          போர்ட்டில் இன்னொரு துடுப்பு போல இருந்தது. அந்தப் படகோட்டியின் கையைப் பிடித்துக் கொண்டு ஒருபுறம் உட்கார, அம்ரி அநாயசமாக ஏறி அடுத்தப்புறம் அமர்ந்தான் (மறுபடியும் அ நான்கு முறை அஹ்ஹா)

          கடல் பளிச்சிடும் நீல நிறங்களில் ஜொலித்தது. போட்டின் மேல் கூரை இருந்ததால் வெயில் தெரியாமல் அட்டகாசமாக இருந்தது அந்த மதிய நேரம். அப்போது போட் ஓட்டுபவர் கீழே இருந்த பலகையை உருவி விலக்க என்ன ஆச்சரியம் கடல் ஆழம்வரை தெரிந்தது. ஆம் படகின் கீழ்ப்புறம் நல்ல கெட்டியான ஃபைபர் கண்ணாடியால் செய்யப்பட்டிருந்தது. கீழே பவளப்பாறைகள், கலர் கலராய் சிறுசிறு அழகு மீன்கள் ,பவளப்பாசிகள்  என்று வேறு ஒரு உலகம் விரிந்தது. இவ்வளவு பாதுகாப்பாக இத்தனை அருகில் கடலின்  ஆழத்தைப் பார்ப்பது பிரமிப்பாக இருந்தது. அப்போதுதான் என் காலுக்குக் கீழே அந்த பெரிய மிகப்பெரிய மீனைப் பார்த்தேன்.

-தொடரும்.  

மேளம் கொட்ட நேரம் வரும்!!!!!

எழுபதுகளில் இளையராஜா: பாடல் எண்: 36

இதற்கு முந்திய பகுதியைப்படிக்க  இங்கே சொடுக்கவும்.

http://paradesiatnewyork.blogspot.com/2017/10/spb.html

1979ல் வெளிவந்த 'லட்சுமி' என்ற திரைப்படத்தில் இளையராஜா இசையமைத்து ஹிட்டான பாடல் இது.இதோ அந்தப்பாடல் லிங்க் 

பாடலின் பின்னணி:

          தன் திருமணத்தை எண்ணி கனவு காணும் கன்னிப்பெண் ஒருவள் பாடுவது போல அமைந்த துடிப்பான பாடல். கன்னி என்ற கான்செப்ட் இந்தக் காலத்தில் பதமிழந்து போனதால் நான் கன்னி என்று குறிப்பிவதை திருமணமாகாத பெண் என்று எடுத்துக் கொள்ளவும்.

இசையமைப்பு:

          இளையராஜாவுக்கு கைவந்த கலையான கிராமிய இசையை தன்னுடைய மேட்டில் அருமையாகக் கொண்டு வந்திருக்கிறார். பலவிதமான வெஸ்டர்ன் இசைக்கருவிகள் பயன் படுத்தப்பட்டிருந்தாலும் பாடல் அந்த கிராமிய மணத்திலிருந்து கொஞ்சம் கூட விலகாமல் ஒலிக்கிறது. முழுவதுமாக பெண் குரலில் ஒலிக்கும் சோலோ பாடலான இது ம்ம்ம் என ஹம்மிங்கில் ஆரம்பித்து ரரிரரிரா ரரிரரிரா என்ற தாலாட்டு போல ஒலிக்கும் ஹம்மிங்கில் முடிய, அதோடு புல்லாங்குழல் வயலின், செண்டை  மேளம் ஒழிக்க, “மேளம் கொட்ட நேரம் வரும்”, என்று பல்லவி ஆரம்பிக்கும் போது  தபேலா சேர்ந்து கொள்கிறது. முதல் பீஜிஎம்மில், கீ போர்டு , புல்லாங்குழல் , பெல்ஸ், பேஸ் கிட்டார் ஆகியவை கலந்து கட்டி தாளம் போட்டு அப்படியே மகிழ்ச்சி மூடில் தொடர "ஆல வட்டம் போடு தடி" என்று சரணம் ஒலிக்கிறது. 2-ஆவது பிஜிஎம்மில் வயலின் குழுமம் அப்படியே ஆரோகரித்து தலைமையேற்க அதோடு இணைந்து கீபோர்டும் தாளத்திற்கு கடசிங்காரியும் இணைந்து இடத்தையும் காதையும் நிரப்ப 2 ஆவது சரணம் "ஊருக்கெல்லாம் பாக்கு வச்சு" என்று ஆரம்பித்து இறுதியில் மீண்டும் ஹம்மிங் வந்து பாடல் நிறைவு பெறுகிறது.

பாடலின் வரிகள்:

மேளம் கொட்ட நேரம் வரும் பூங்கொடியே
மேளம் கொட்ட நேரம் வரும் பூங்கொடியே
அன்னமே சொர்ணமே அன்றுதான் இந்த ஊர்வலம்
மேளம் கொட்ட நேரம் வரும் பூங்கொடியே
மேளம் கொட்ட நேரம் வரும் பூங்கொடியே

ஆல வட்டம் போடுதடி நெல்லுப்பயிரு
ஆள வட்டம் போடுதடி கள்ளப்பருந்து
மாலையிட போறவன கண்ணில் கலந்து
மங்கை மனம் அலையுதடி மெல்லப்பறந்து
தங்கமே வைரமே இளங்கிளியே குயிலே மயிலே
இது உண்மையடி

மேளம் கொட்ட நேரம் வரும் பூங்கொடியே
மேளம் கொட்ட நேரம் வரும் பூங்கொடியே

ஊருக்கெல்லாம் பாக்கு வச்சு காத்திருப்பேன்
ஊரையெல்லாம் பாக்க வச்சு மணம் முடிப்பேன்
கூரச்சேல சரசரக்க அஞ்சி நடப்பேன்
கொண்டவனின் குணம் அறிந்து கொஞ்சிச் சிரிப்பேன்
அம்மம்மா செல்லம்மா இந்த மயக்கம் எனக்கும் பொறக்கும்
புது சுகமிருக்கும்

மேளம் கொட்ட நேரம் வரும் பூங்கொடியே
மேளம் கொட்ட நேரம் வரும் பூங்கொடியே
ம்ம் ம்ம் ம்ம் ம்ம்ம் ம்ம் ம்

ஆலங்குடி சோமு

          கிராமிய மெட்டுக்கு ஒத்த அருமையான பாடல் வரிகளை எழுதியவர் கவிஞர்  ஆலங்குடி சோமு அவர்கள். இவர் பழைய காலத்து ஆள். எம்.எஸ்.வியிடம் அநேக சிறப்பான பாடல்களை எழுதியிருக்கிறார். "ஆண்டவன் உலகத்தின் முதலாளி", "தாயில்லாமல் நானில்லை", உள்ளத்தின் கதவுகள் கண்களடா”, போன்ற பல கருத்துள்ள தத்துவப்பாடல்களை இவர் எழுதியுள்ளார். இவர் எழுதிய "பொன் மகள் வந்தாள், பொருட்கோடி தந்தாள்" என்றபாடல் ஆல்டைம் ஃபேவரைட். தன் மனைவி இறந்த சமயம் எழுதிய "மலை சாய்ந்து போனால் சிலையாகலாம்" என்ற பாடல் சிறப்பான வரிகளைக் கொண்டது  .

          இந்தப்பாடலிலும் மெட்டில் ஒட்டும் உறுத்தாத வரிகளை கிராமியக் கண்ணோட்டத்தில் எழுதியிருக்கிறார். "ஆலவட்டம் போடுதடி நெல்லுப்பயிறு, ஆள வட்டம் போடுதடி கள்ளப்பருந்து" என்ற வரிகளிலும், "ஊருக்கெல்லாம் பாக்கு வச்சு காத்திருப்பேன், ஊரையெல்லாம் பாக்க வச்சு மணம் முடிப்பேன்" என்ற வரிகளிலும் கவிஞரின் எளிய கவிதை மனம் வெளிப்படுகிறது.

பாடலின் குரல்:

B.S SasiRekha

          முழுவதும் பெண் குரலில் வரும் சோலோ பாடலான இந்தப் பாடலைப் பாடியவர், B.S. சசிரேகா. இனிமையான குரலைக்  கொண்ட   சசிரேகா, இளையராஜாவுக்கு ஏராளமான பாடல்களைப் பாடினாலும் பெரும்பாலானவை  ஹிட் ஆகவில்லை. "வாழ்வே மாயமா? வெறுங்கனவா", “என் புருஷந்தான் எனக்கு மட்டும்தான், "செவ்வானமே பொன்மேகமே " போன்றவை விதிவிலக்குகள். A.R ரகுமானுக்குப் பாடிய, “மானூத்து மந்தையில”, பாடலும் ஹிட் ஆனது. மனோஜ்கியான், T. ராஜேந்திரர் போன்ற பல இசையமைப்பாளர்களுக்கு பாடியிருக்கிறார். இவரின் சிறப்பான தமிழ் உச்சரிப்பு போற்றத்தகுந்தது. ஆனால் மக்கள் இவரை மறந்துவிட்டார்கள் என்றே நினைக்கிறன் .

          இந்தப்  பாடலில் மறுபடியும் கிராமிய மணத்தை அப்படியே கொண்டு வந்திருக்கிறார் இளையராஜா.கேட்க இனிமையான இந்தப்பாடலின் மெட்டு, வரிகள், குரல் என்று எல்லாமே கச்சிதமாகப் பொருந்துகிறது. இளையராஜாவின் ஆரம்பக்கட்டமென்றாலும் பாடலின் பல இடங்களில் இளையராஜாவின் தனித்துவம் வெளிப்படுகிறது. மனதை வருடும் இந்தப் பாடலை எப்போது வேண்டுமானாலும் கேட்கலாம்

-தொடரும்.

 

கடல் ஆமைகள் கடத்தப்படுவது ஏன் !!!!!!!!

இலங்கையில் பரதேசி-28

இதற்கு முந்திய பகுதியைப்படிக்க  இங்கே சொடுக்கவும்.

http://paradesiatnewyork.blogspot.com/2017/11/blog-post_20.html

            100 மில்லியன் வருடங்களுக்கு முந்தியது ஆமை என்று சொன்னபோது வாயைப் பிளக்காதவர்களே இல்லை. மில்லியன் வேணாம்ப்பா கோடியில சொல்லு அப்பத்தான் எனக்குப்புரியும்னு சொல்றவங்களுக்கு இதோ கோடியில். ஒரு மில்லியன் என்பது பத்து லட்சம், பத்து மில்லியன் என்பது 10 கோடி ஆண்டுகள், அடேங்கப்பா இது கல்தோன்றி மண் தோன்றா காலத்தில் வாளோடு ( அல்லது வாலோடு என்றும் வைத்துக்கொள்ளலாம் ) முன் தோன்றிய தமிழ் இனத்திற்கும்  இது முந்திய இனம் போல் தெரிகிறதே . ஆமைகள் தற்போது மொத்தம் எட்டு வகைகள் மட்டுமே இருக்கின்றன. பல வகைகள் அழிந்துவிட்டன. ஆனால் ஆமைகள் வேட்டையாடப்படுவதால் இந்த 8 இனமும் அழியும் சூழ்நிலையில் இருக்கிறதாம். ஆமைகளை வேட்டையாடுகிறார்களா, எனக்குப் புதிராக இருந்தது.

          ஆமைகள்  தாங்கள் இனப்பெருக்கம் செய்வதற்காக ஆண்டிற்கு ஒரு முறை சில குறிப்பிட்ட இடங்களில் சேருமாம். இனப்பெருக்கம் முடிந்து, பெண் ஆமைகள் கடற்கரைக்கு வந்து முட்டையிடுமாம். ஆமைகள் முட்டையிடும் வயது 30 வயதுக்கு மேல் இவைகள் இரவில்தான் முட்டைகளையிடுமாம். ஆமைகள் கடற்கரைக்கு வந்து முட்டையிடுமாம். ஆமைகள் தாங்கள் எந்த கடற்கரையில் பிறந்தனவோ, அதே கடற்கரையில்தான் தன் முட்டைகளை இடும் என்று சொல்கிறார்கள்.  ஆச்சரியமாக  இருந்தது. ஒரு தடவையில் அவைகள் 120 முட்டைகள் வரை இடுமாம். நல்லவேளை மனிதர்களுக்கு இப்படி ஒரு இனப்பெருக்கம் இல்லை. இல்லையென்றால் ஒருவர் தலைமீது ஒருவர். நடக்குமளவுக்கு நெருக்கம் அதிகரித்துவிடும். இந்த முட்டைகள் டேபிள் டென்னிஸ் (பிங்பாங்)பந்துகளின் சைசில் வெள்ளைக் கலரில் இருக்குமாம்.

          தன்னிடமிருந்து உருவாகும் ஒருவித திரவத்தால் இந்த முட்டைகளை பெண் ஆமைகள் ஈரப்பதத்தில் வைத்திருக்குமாம். அப்படி வைத்துவிட்டு திரும்பவும் கடலுக்குத் திரும்பி விடுமாம். அதன்பின் முட்டைகளுடனோ அல்லது அவைகளின் குஞ்சுகளுடனோ அவைகளுக்குத் தொடர்பு இருக்காது.

          கடற்கரை மணலில் சூரிய வெப்பத்தில் இருக்கும் இவைகள் சுமார் 60 நாட்கள் கழித்து தாமாகவே குஞ்சு பொரிந்து ஓட்டை உடைத்துக் கொண்டு வெளியே வந்து தாமாகவே கடலை நோக்கிச் சென்று கலந்து விடுமாம். பிறந்த ஆமைக்குஞ்சுகளின் அளவு வெறும் 5 சென்ட்டி  மீட்டர் தான்.

          ஆமைகளும் அவைகளின் முட்டைகளும் வேட்டையாடப் படுகின்றன அல்லது அழிகின்றன என்று சொன்னேனே அது எப்படி என்று பார்ப்போம்.

          ஆமை ஓடுகள் அல்லது அதன் முட்டை ஓடுகளால் அழகுப் பொருட்கள் மற்றும் ஆபரணங்கள் செய்யப்படுகின்றன. ஆமைகளின் முட்டைகளுக்கு நல்ல டிமாண்ட் இருக்கிறது. ஆமைகள் கறிக்காகவும் வேட்டையாடப்படுகின்றன. மீன் வலைகளில் மாட்டிக் கொண்டு இறந்து போகின்றன. மோட்டார் படகுகள் அதிவேகத்தில் செல்லும்போது ஆமைகள் அடிபட்டு இறந்துவிடுகின்றன.   மாசுபட்ட கடற்கரைகள், கடல் நீர், கடற்கரைகளில் இருக்கும் ஹோட்டல்கள், ரிசார்ட்டுகள் ஆகியவை ஆமைகளின் இனப்பெருக்கத்திற்குத் தடையாக இருக்கின்றன. பாலித்தீன் மற்றும் பிற கழிவுகள் கடலில் வீசப்படுவதாலும் அது ஆமைகளால் சாப்பிடப்பட்டு அழிவு ஏற்படுகிறது.

          ஆனால் இதனை எப்படித்தடுக்கலாம் என்பதற்கும்  உள்ள பல வழிகளை விளக்க ஆரம்பித்தார்.

          மக்களுக்கு விழிப்புணர்வு கொண்டு வந்து அழிந்து போய்க் கொண்டிருக்கும் இனத்தை மீட்டு அடுத்த தலைமுறைக்கு விட்டு வைக்கலாம்.

          ஆமைகள் இனப்பெருக்கம் நடக்கும் கடற்கரைப் பகுதிகள் பாதுகாக்கப்பட்டு செயற்கை விளக்குகள் அகற்றப்படவேண்டும். பவளப்பாறைகள் கடற்பாசிகள் போன்ற ஆமைக்கு உணவாக இருக்கும் இடங்கள் பாதுகாக்கப்பட வேண்டும்.

          ஆமை உட்பட கடல்வாழ் உயிரினங்களுக்கு பாதிப்பு ஏற்படாத வண்ணம் மீன் பிடித்தொழில் நடத்தப்படவேண்டும். கடல் மாசுபடுவதை முற்றிலும் தடுக்க வேண்டும். ஆமை ஓடுகளை வைத்து செய்யும் பொருட்களுக்குத்தடை செய்ய வேண்டும் .மக்கள் ஆமை முட்டைகள் மற்றும் ஆமை இறைச்சியைச் சாப்பிடுவதை தவிர்க்க வேண்டும்.

          "அதெல்லாம் சரி இதில் உங்களின் பங்கை எப்படிச் செய்கிறீர்கள்?" என்று கேட்டேன். அதற்குக் கிடைத்த பதிலைக் கீழே தருகிறேன்.

          "எங்களுடைய முக்கிய நோக்கம் இந்த ஆமை இனத்தை முடிந்த வரையில் பாதுகாத்து  அடுத்த தலைமுறைக்கு எடுத்துச் செல்வதுதான். அதற்கு நாங்கள் ஆமை முட்டைகளை எடுத்து பாதுகாப்புடன் எங்களிடத்தில்  இருக்கும் இன்குபேட்டர்களைப் பயன்படுத்தி குஞ்சு பொரிக்கிறோம். அதன்பின் அவற்றை மிக கவனத்துடன் கடலில் கொண்டு போய்ச் சேர்க்கிறோம். அது தவிர உடல்நலம் பாதிக்கப்பட்ட ஏராளமான ஆமைகள், மீனவர்களின் வலைகளினால் சேதப்படுத்தப்பட்டவைகள் ஆகியவற்றை எடுத்துக் கொண்டுவந்து, பராமரித்து சுகப்படுத்தி மீண்டும் கடலில் கொண்டு போய் விடுகிறோம்”.

          “அது தவிர வெவ்வேறு ஆமை இனங்களை கொண்டு வந்து வளர்த்து நான்கு அல்லது 5 வருடங்கள் கழித்து கடலில் கொண்டுபோய் விடுகிறோம். இதன் மூலம் பல ஆமை இனங்களும் காப்பாற்றப்படும். அது தவிர அந்த இனங்களை  இங்கே பொதுமக்கள் பார்ப்பதற்காக வைத்திருக்கிறோம். உங்களைப் போல பல மக்களும் வெளிநாட்டு சுற்றுலாப் பயணிகளும் வந்து பார்த்து எங்களை ஆதரிக்கிறார்கள். இது முழுக்க முழுக்க வருகை தருபவர்கள் நன்கொடையால்தான் நடக்கிறது தவிர பலர் நினைப்பது போல் அரசாங்க உதவி என்று ஒன்றுமில்லை”.

          “ஆமை முட்டைகளை மீனவர்களிடமிருந்தும் கடற்கரையின் அருகில் வாழும் மக்களிடமிருந்து நாங்கள் விலை கொடுத்து வாங்கித்தான் குஞ்சு பொரிக்கிறோம். மொத்தம் 4000 முட்டைகள் இதில் வைத்திருக்கிறோம். அவற்றுள் சுமார் 3000 வரை குஞ்சு பொரிக்கும். இது ஒரு மாதக் கணக்கு. ஒரு சில நாட்களில் இவற்றை கடலில் விட்டுவிடுவோம். நாங்கள் விலை கொடுத்து வாங்குவதால் பலர் முட்டைகளை சாப்பிடுவதை நிறுத்தி எங்களிடம் விற்றுவிடுகிறார்கள். அதனால் பல ஆமைகள்  எங்களால் காப்பாற்றப்படுகின்றன என்கிறார். சமீபத்தில் மட்டும் லட்சக் கணக்கான ஆமைகள் காப்பாற்றப்பட்டிருக்கிறதாகச் சொன்னார்கள்.

            நாமும் நட்சத்திர ஆமைகள் கடத்தப்படுவதைப்பற்றி செய்திகளில் அடிக்கடி பார்த்திருப்போம் .ஆமை வகைகளிலேயே மிக அழகானவை என அறியப்படுவது நட்சத்திர ஆமைகள்.உணவு, மருந்து தயாரிப்புக்காக கடத்தப்படும் இந்த ஆமைகள், வீட்டில் செல்லப் பிராணிகளாகவும் வளர்க்கப்படுகின்றன. சர்வதேச சந்தையில் இவை நல்ல விலை போவதால், இந்தியாவில் இவற்றின் கடத்தல் வணிகம் அதிகரித்துள்ளது.

                    அம்மாடி இந்த ஆமைகள் வரலாற்றில் இவ்வளவு இருக்கிறதா என்றபடி தொட்டிகளில் உள்ள ஆமைகளைப் பார்த்தேன்.  எல்லாம் நல்ல ஆரோக்யத்துடன் இருந்தன. இந்த இல்லம் கடற்கரை  ஓரத்தில் இருக்கிறது. பின்னால் வங்காள விரிகுடா ஆர்ப்பரித்து எழுந்து கொண்டிருந்தது. ஆமைகளுக்காக இவர்கள் தங்கள் வாழ்க்கையை குடும்பமாக அர்ப்பணித்து வாழ்வது ஆச்சரியத்திலும் ஆச்சரியமாக இருந்தது. வாருங்கள் கடலுக்குள் பயணித்து அதன் மற்ற ஆச்சரியங்களைப் பார்ப்போம்.

தொடரும்

மருதநாயகம் நல்லவனா? கெட்டவனா ?

படித்ததில் பிடித்தது

சுதந்திர வேங்கை - பூலித்தேவன் வீரவரலாறு.

கெளதம நீலாம்பரன் - ஸ்ரீ செண்பகா பதிப்பகம் - சென்னை

சென்னையில் புனித ஜார்ஜ் கோட்டையைக் கட்டி நிரந்தரமாய் (?) உட்கார்ந்து கொண்டனர் வெள்ளைக்காரர்கள். கல்கத்தாதான் அவர்களின் முதல் தலைநகர். தென்பகுதியில் ஆதிக்கம் செய்ய சென்னை அவர்களுக்கு வசதியாய் இருந்தது.

மதுரையில் ராணி மங்கம்மாவிற்குப்பின் நிலையான ஆட்சி இல்லை. விஜயரங்க சொக்கநாதர் ஏதோ சில காரணங்களுக்காக தலைநகர் மதுரையை விட்டுவிட்டு திருச்சிக்கோட்டைக்குச் சென்றார். அவர் இறந்த பின் ஆட்சிக்கு வந்த ராணி மங்கம்மாவிடம் பொய்ச்சத்தியம் செய்து சந்தா சாகிப் பெண்டாள முயன்றான். ராணி மங்கம்மாள் தற்கொலை செய்துகொள்ள மதுரை ராஜ்ஜியம் ஆற்காட்டு நவாபான சந்தாசாகிப்பிடம் சென்றது.

அதன்பின் சிறிது காலம் சென்று முகமது அலி ஆற்காடு நவாபாக பட்டம் சூட்டிக் கொண்டு, மதுரை  ராஜ்ஜியத்தில் வரி வசூலிக்கும் பணியை தன் அண்ணன் மாபூஸ் கானிடம் ஒப்படைத்தான்.

 நவாப்  முகமது அலி

மாபூஸ் கானிடம் படைத்தளபதியாக இருந்தவன்தான் கான்சாகிப் கம்மந்தான் என்று அழைக்கப்பட்ட மருதநாயகம் என்ற முகமது யூசுப்.  பாண்டிச் சேரியைச் சேர்ந்த இவன் பிரெஞ்சுப் படையில் பயிற்சி பெற்று, அங்கு ஏதோ பிரச்சனையில் வெளியே வந்து ஆற்காடு நவாபிடம் தஞ்சமடைந்தான். மதுரை ராஜ்ஜியத்தில் இருந்த பாளையக்காரர்கள் பலர் வரிகொடுக்காமல் புரட்சி செய்ய, இந்த தலைவலியை எப்படி சரிசெய்வது என்று நவாப் தவித்துக் கொண்டிருக்கும்போது தான், கொஞ்சம் கொஞ்சமாக உள்ளே வந்த ஆங்கிலேயர் வரிவசூலை தாம் செய்து கொடுப்பதாக நவாபிடம் சொல்ல, நவாப்பும் ஒப்புக் கொண்டார்.

நவாபின் படையோடு ஆங்கிலேயர் படையும் இணைந்து கொள்ள அந்தப்படைக்கு தலைவனாக ஆங்கிலேயரின் செல்லப்பிள்ளையாக வந்தவன்தான் மருதநாயகம். இந்தக் கூட்டுப்படை பாளையக்காரர்களின் கோட்டைகளை துவம்சம் செய்ய பலபேர் வரிகொடுக்க ஒப்புக் கொண்டார்கள். அதையும் மீறிய சில பாளையக்காரர்கள் நெற்கட்டுச் சேவலின் மன்னனாக இருந்த பூலித்தேவனிடம் அடைக்கலம் புகுந்து அவனை தலைவனாக ஏற்றுக்கொண்டனர். மதுரைப் பாளையங்களில் பெரிய பாளையமான நெற்கட்டாஞ்செவலின் தன்னிகரற்ற  தலைவனாக பூலித்தேவன் மாபெரும் வீரனாய், தன்மானத்தமிழனாய் உருவெடுத்து ஆற்காடு நவாப் ஆங்கிலேய கூட்டுப் படைகளை எதிர்த்து பலமுறை நடந்த போர்களில் தன் கோட்டையைக் காத்துக் கொண்டான்.

Maruthanayagam

இதற்கிடையில் ஆங்கிலேயப் படைகளின் தலைவனான மருதநாயகத்திற்கும் ஆற்காடு படைகளின் தலைமைப் பொறுப்பில் இருந்த ஆற்காடு நவாப் முகமது அலியின் அண்ணன் மாபூஸ்கானுக்கும் அடிக்கடி பிரச்சனைகள் வந்தது. மருதநாயகம் ஆங்கிலேயரிடம் புகார் செய்ய ஆங்கிலேயர் மாபூஸ்கானைக் கூப்பிட்டு கண்டித்தனர். ஏற்கனவே தோல்வியால் வாடி இருந்த மாபூஸ்கான் நொந்து நூலாகி பூலித்தேவனிடம் தஞ்சமடைய, பகையை மறந்து பூலித்தேவன்  அவனை நண்பனாக ஏற்றுக் கொண்டதோடு தன் கோட்டையின் உள்ளே மாபூஸ்கான் தொழ ஒரு சிறு மசூதியையும் கட்டிக்கொடுத்தான்.

ஒரு முறை பேச்சு வார்த்தைக்குக் கூப்பிட்ட மருதநாயகம் தான் மதுரையில் இருப்பதால் தன்னாட்சி செலுத்தி சுதந்திர நாடாக பிரகடனம் செய்யவிருப்பதாகவும் அதற்கு பூலித்தேவன் ஆதரவளிக்க வேண்டும் எனக் கேட்டான். அப்படி அளித்தால் தென் பகுதியை சுதந்திரமாக ஆளும் உரிமையை அவனுக்குக் கொடுப்பதாகவும்  வாக்களித்தான். அடிக்கடி விசுவாசத்தை ஏன் மதத்தையே மாற்றிக்கொள்ளும் மருதநாயகத்திடம் நம்பிக்கையில்லாத பூலித்தேவன் அதற்கு மறுப்புத் தெரிவிக்கிறான். பின்னர் அவனிடமிருந்து தப்பியோடி தன் கோட்டைக்குள் புக, மருதநாயகம் பெரும் படையுடன் வந்து நெற்கட்டாஞ் செவல் கோட்டையைத் தகர்த்து எறிகிறான். பூலித்தேவன் தப்பித்து ஓடி திருச்சி கோட்டையில் உள்ள மாபூஸ்கானிடம் தஞ்சம் புக, நவாப் முகமது அலியும் ஆதரவளிக்க ரகசியமாய் சிலகாலம் தங்கியிருக்கிறான்.

இதற்கிடையில் மதுரையை ஆக்கிரமித்து சுல்தானானாகும் மருதநாயகத்தை ஆங்கிலப்படையினர் மிகுந்த முயற்சியுடன் தாக்கி முறியடித்து அவனைப்பிடித்து தூக்கிலிடுகின்றனர்.

அதன்பின் தன நாட்டிற்குத்திரும்பும் பூலித்தேவனை நண்பனே ஆங்கிலேயரிடம் காட்டிக்கொடுக்க, போகும் வழியில் இருந்த கோவிலில் சாமிகும்பிட உள்ளே நுழையும் பூலித்தேவன்  அப்படியே மறைந்து போகிறான். வெளியேற வேறு எந்த வழியும் இல்லாத அந்தக் கோவிலில் நுழைந்த பூலித்தேவன்  அப்படியே அங்கிருந்த இறைவனிடம் ஒன்றி மறைந்துபோனான்  என்று அந்தப்பகுதி மக்கள் நம்புகிறார்கள்.

இந்த பூலித்தேவனின் வரலாற்றை மையமாக வைத்து எழுதப்பட்ட வரலாற்று நவீனம்தான்   இந்தப்புத்தகம். தனக்கே உரிய தனிப்பாணியில் கெளதம நீலாம்பரன் இதனை எழுதியுள்ளார்.

இதில் என்னை ஆச்சரியமூட்டும் சில விடயங்களை கீழே தருகிறேன்.

1)   பூலித்தேவனின் தாத்தா காத்தப்பராசன் , மதுரை மன்னன் வரகுண பாண்டியனின், வேண்டுகோளுக்கிணங்க மக்களை அச்சத்தில் ஆழ்த்திய 16 அடி வேங்கையை கொன்றதால், பாளையத்தை சுதந்திரமாகக் கொடுத்து மகளையும் கொடுக்கிறார். எனவே அதன் வழியில் வருவதால் பாண்டிய பரம்பரையின் எஞ்சிய மன்னனாகிறான் பூலித்தேவன்.

2)   பூலித்தேவனும் அதே போல் வேங்கையை அடக்க, மதுரையை ஆளும் பொறுப்பு விஜயரங்க சொக்கநாதர் (ராணி மங்கம்மாவின் கணவன்) நாயக்க மன்னரிடமிருந்து கிடைத்தும் மறுத்து தன்னிடத்திற்கே திருப்புகிறான்.

3)   சாகேப் என்ற மரியாதை வார்த்தைத்தான் சாப்பு என்று திரிந்து விட்டது.

4)   வரி கட்ட மறுத்ததால் அந்தக் கோட்டையின் பெயர் நெற்கட்டாஞ் சேவல் என்றானது.

5)   தென்பாண்டிய அரசர்களுள் 'பூழியர் கோன்'என்ற பட்டப்பெயர் இருந்தது. அதுதான் பூலித்தேவன் என்று திறந்துவிட்டது.

6)   சேர்ந்து வாழும் இடம் என்பதால் சேரி என்ற பெயர் வந்தது. உதாரணம்: பாண்டிச்சேரி, புதுச்சேரி, வேளச்சேரி, Etc.,

7)   ஆங்கிலேயர் வரிவசூல் உரிமையை மாபூஸ்கானிடமிருந்து பிடுங்கி தீத்தாரப்ப முதலி மற்றும் அழகப்ப முதலிக்கு வழங்கினர். இதனை ஜெனரல் லாரன்ஸ் துரையிடம் ஏற்பாடு செய்தது மருதநாயகம்.

8)   பூலியின் படைத்தளபதிகள் கொல்லங் கொண்டான் பாளை வாண்டையத் தேவர், தலைவன் கோட்டை ஈஸ்வரத்தேவன், வடகரை குமார சின்னனைஞ்சாத்தேவர் ஆகியோர்.

9)   பூலித்தேவனை மன்னனாக ஏற்றுக் கொண்ட பாளையங்கள், சேத்தூர், ஊத்துமலை, சுரண்டை, ஊர்க்காடு, சிங்கம்பட்டி, நடுவக்குறிச்சி ஆகியவை.

10)               பாளையங்கோட்டையில் மருதநாயகத்தை எதிர்த்து இறந்து போன பூலித்தேவனின் படைவீரர்கள், வல்லயம் நெடுஞ்சித்தேவன் வளரி வீரநாதத் தேவன், வளைதடி ஞானசக்தித்  தேவன், வேல் குத்தித்தேவன், வாள் கோட்டைத்தேவன் ஆகியோர். ஆனால் இவர்கள் பீரங்கி வாயில் வைத்து கொல்லப்படுவதற்கு முன் மருதநாயகம் படையில் பெருத்த சேதத்தை ஏற்படுத்தினராம்.

11)               பூலித்தேவன் வரலாற்றுக் கதையோடு காத்தவராயன், பட்டவராயன், மதுரைவீரன், பொம்மக்கா திம்மக்கா, நாஞ்சில் குறவன், ஆகியோர்களின் கதையோடு அலெக்சாண்டார் படையெடுப்பு பற்றியும் ஆசிரியர் விளக்கமாக எழுதியுள்ளார்.

12)               எல்லாக் கோட்டைகளும் விழுந்தபின் பூலித்தேவனின் கோட்டைகளான, குலசேகரன் கோட்டை, வாசுதேவ நல்லூர், மற்றும் நெற்கட்டான் சேவல் ஆகிய கோட்டைகளும் தரைமட்ட மாக்கப்பட்டன.  

13)               நெற்கட்டான்சேவலின் மற்றொரு  பெயர் ஆவுடையார் பாளையம்.

14)               மாலிக்காபூர் படையெடுப்பின் பின் மதுரையில் இஸ்லாமிய ஆட்சி தொடர்ந்ததைப்பற்றி எழுதுகிறார். முகமதுபின் துக்ளக்கின் தளபதி, உலூக்கான், கியாஸ் உதின் தம்கானி, அலாவுதீன் சிக்கந்தா, ஆகியோர் மதுரையின் சுல்தான்கள் ஆக பதவி வகித்தனர்.

15)               மிகமுக்கியமாக மருதநாயகம் என்ற முகமது யூசூப்பைப் பற்றி எதிர்மறைவான விஷயங்களே இந்தப் புத்தகத்தில் இடம் பெற்றிருக்கின்றன. ஆங்கிலப் படைகளுக்கு தலைமை தாங்கி அவன் செய்த அட்டகாசங்களும் கொலைகளும் எண்ணிலடங்காதவை என்பதைத் தெரிந்து கொள்ளும் போது அவன் மீது இருந்த ஹீரோ இமேஜ் என்னை விட்டு விலகியது.

16)               முக்கிய தலைவர்களான, திருவாங்கூர் சமஸ்தானம், சிவகங்கை, ராமநாதபுரம் சேதுபதி, தஞ்சை மராட்டியர், புதுக்கோட்டை தொண்டைமான், மற்றும் தெற்குப்பகுதி பாளையங்கள் ஆகியவையை பூலித்தேவன் தலைமையில் ஒன்றுபட்டு எதிர்த்திருந்தால்  ஆங்கிலேயர் ஆதிக்கம் வெகுவாகக் கட்டுப் படுத்தப்பட்டிருக்கலாம். ஒன்றுபடாமல் அதன்பின் தனித்தனியாக எதிர்த்து அழிந்துபட்டனர் என்பது வேதனைக்குரிய விஷயம்.

தென்பாண்டிய சீமைகளில் வீரத்திருமகனாக விளங்கிய பூலித்தேவன்  பற்றிய இந்தப்புதினம் படிப்பவர்களுக்கு பரவசமூட்டும்  என்பதில் சந்தேகமில்லை. 

முற்றும்