தமிழனுக்கு தமிழன் உதவி செய்வானா?

தமிழர் திருவிழா FETNA : 4

Swab Test

ஃபெட்னாவின் தமிழர் திருவிழா விமரிசையாக நடந்து கொண்டிருக்கும் போது நடுவிலே பல அறிவிப்புகள் வந்த வண்ணம் இருந்தன. அதிலே  ஜான்  நவீன் என்ற ஒருவர் அறிமுகப்படுத்தப்பட்டு அவருடைய மனைவி புற்றுநோயால் அவதிப்படுவதாகவும் "போன் மாரோ" செய்தால் மட்டுமே காப்பாற்றப்படமுடியும் என்று சொல்லி போன் மாரோவுக்கு எப்படி நாம் உதவ முடியும்? என்று சொன்னார்கள். அதிர்ச்சியான விஷயம் என்னவென்றால் இருவருக்கும் திருமணமாகி மூன்று வருடங்களே ஆகியிருக்கின்றன.

அதனைக் கண்டு பிடித்ததிலிருந்து ஜான் நவீன் பல தளங்களில் அதற்கான முயற்சிகளை முடுக்கிவிட்டு, பல தொடர்புகளை ஏற்படுத்தி இதற்கான விழிப்புணர்வை ஏற்படுத்திக் கொண்டிருக்கிறார்.  

இடைவேளையின் போது ஒரு ஸ்டாலில் அவரைச் சந்தித்தேன். அவரது முயற்சி வெற்றியடைய வாழ்த்துக்களைச் சொல்லிவிட்டு என்னுடைய பிளாக்கில் எழுதுவதாகவும் உறுதியளித்தேன். அதன்பின் அவரிடம் தொலைபேசிவழியாகவும், ஈமெயில் வழியாகவும் தொடர்பு கொண்டு, போன் மாரோ வைப்பற்றியும் அதற்கு எப்படி நாம் உதவமுடியும் என்று பல தகவல்களை அறிந்து கொண்டேன். அதனை இதோ உங்களுக்கு கீழே தருகிறேன்.

Add caption

1.   கேன்சர்  அல்லது புற்றுநோய் இன்னமும் சமூகத்தில் தண்டனை அல்லது விதி என்றுதான் பார்க்கப்படுகிறது. அது தன் சொந்தக் குடும்பத்தில் உள்ள  நபருக்கு நேரும் வரை யாரும், அது எப்படி தனிநபரையும் அவரின் குடும்பத்தையும் பாதிக்கிறது என்பதின் வலியை உணர்ந்து கொள்வதில்லை. நமக்கு மிகவும் தெரிந்த அல்லது குடும்ப நண்பருக்குத் தேவைப்பட்டால் ஒழிய, நாம் பிறருக்கு உதவ முயல்வதில்லை.

2.   ஸ்டெம் செல்களை தானம் செய்வது மூலம் தேவையிருக்கும் ஒருவருக்கு அது பயன்பட முடியும்.

3.   'ஸ்டெம் செல்' அல்லது போன் மாரோ' என்பது ரத்தவகையின் பொருத்தம் அல்ல (Blood Group Match). தானம் செய்பவரும், தானம் தேவைப்படும் நோயாளியும் ஒரே HLA டைப்பாக இருக்க வேண்டும். அது பத்துவகைகளில் பொருந்த வேண்டும். அறுவை சிகிச்சை நிபுணர்களுக்கு, அந்தப்பத்தில் குறைந்தபட்சம்   ஒன்பது வகைகள் பொருந்தினால் மட்டுமே அவர்கள் முயற்சி செய்வார்கள்.   

4.   புற்றுநோயாளியின் HLA (Human Leukocyte antigen) என்பது பத்து லட்சத்தில் ஒருவரில்தான் பொருந்துவதற்கு வாய்ப்பிருக்கிறது  (Probability).

5.   இந்த நோயால் பாதிக்கப்பட்டவர்கள், ஒவ்வொரு வாரமும் ரத்தமும், பிளேட்லட் இன்ஃபியூசனும் (Platelet Infusion) எடுத்துக் கொள்ள வேண்டும். தொற்று ஏற்படுமென்பதால் அதிக மக்கள் இருக்கும் அல்லது கூடும் எந்த  இடத்துக்கும் இவர்கள் போகமுடியாது.  

6.   நம்முடைய தானம் பெரும்பாலும், இது தேவைப்படும் தமிழருக்கோ அல்லது ஒரு தென்னிந்தியருக்கோ மட்டுமே பொருந்த வாய்ப்பிருக்கிறது.

7.   பலவிதமான உறுப்புதானங்கள் நீங்கள் இறந்தபின் தான் தரமுடியும். ஆனால் ஸ்டெம் செல் அல்லது ரத்த செல் தானம் ஒன்றுதான் நீங்கள் உயிரோடு இருக்கும் போதே கொடுக்க முடியும்.

8.   ரிஜிஸ்டரியில் சேருவது ஒரு வங்கிக் கணக்கு ஆரம்பிப்பதுபோலத் தான். தானம் செய்வது அவ்வளவு விரைவிலோ அடிக்கடியோ நடக்காது. உங்கள் செல் ஒருவருக்குப் பொருந்துவது மிகமிக அபூர்வம். ஆனால் அப்படிப் பொருந்தினால் ஒரு உயிரைக் காப்பாற்றும்  வாய்ப்பு உங்களுக்குக் கிட்டும்.

9.   நிறைய இந்தியர்கள் இப்படி வாடிக் கொண்டிருக்கிறார்கள். ஆனால் இறுதி நிலையில் இருப்பவர்கள்  உங்களைப்போல ஒரு டோனர் செல்லால் அவர்கள் 2-ஆவது ஜென்மத்தைப் பெறுவார்கள்.

10.               இதன் முக்கியத்துவத்தை உணர்ந்ததால் 99% சதவீத டாக்டர்களும் நர்சுகளும் இந்த ரிஜிஸ்டரியில் இருக்கிறார்கள். உங்களுக்குச் சந்தர்ப்பம் கிடைக்கும்போது யாராவது தெரிந்த மருத்துவரிடம் இதனைப்பற்றிப் பேசிப் பாருங்கள். மற்றவிவரங்கள் உங்களுக்குக் கிடைக்கும்.

தவறான  கருத்துக்கள் - Myths

1.   எல்லா தானமும் அறுவை சிகிச்சை மூலம் நடைபெறும்.

2.   இந்த தானம் வலிமிகுந்தது.

3.   உங்கள் எலும்பின் ஒரு பகுதி வெட்டியெடுக்கப்படும்.

4.   இந்த தானம் செய்ய உங்களுக்குச் செலவாகும்.

5.   நீங்கள் நோயாளியின் மருத்துவமனைக்கு செல்ல வேண்டும்.

உண்மைகள் - Facts

1.   PBSC  (Peripheral Blood Stem Cell) என்ற முறை மூலம் தானம் செய்வது அறுவை சிகிச்சையின்றி நடக்கும். போன் மாரோ என்பதுதான் சிறிய அறுவை சிகிச்சை தேவைப்படும் தானம்.

2.   PBSC  தானம் மூலம், தானம் செய்பவருக்கு ஏற்படும் சிறு சங்கடங்கள் (Side Effects) விரைவில் தீரக்கூடிய ஒன்று. தானம் செய்ப்பவர்கள் ஒரு ஐந்து நாட்களுக்கு முன்னால் சில மருந்துகளை உட்கொள்ள வேண்டும்.

3.   ஸ்டெம் செல் தானம் என்பது ரத்ததானம் செய்வதைப்போலவே எளிமையானது.

4.   மாரோ தானத்தின் போது உங்களுக்கு ஜெனரல் அல்லது லோக்கல் அனஸ்தீசியா கொடுக்கப்படுவதால் உங்களுக்கு எந்த வலியும் தெரியாது. இந்த முழு சிகிச்சையும் ஒரே மணிநேரத்தில் முடிந்துவிடும். அதே நாளில் வீட்டுக்குத்திரும்பலாம். இரண்டு நாளில் வேலைக்குத் திரும்பலாம்.

5.   மாரோ தானத்தில் ஒரு உயிரைக் காப்பாற்ற 1 முதல் 5 சதவீத மாரோ மட்டுமே தேவைப்படுகிறது. இதனால் உங்களுக்கு எந்தப்  பாதிப்பும் இல்லை 4-6 வாரங்களில் அது தானே வளர்ந்துவிடும்.

6.   மில்லியனில் ஒருவராக தாங்கள் தேர்வு செய்யப்பட்டாலும் உங்கள் உடல் நிலை, வலிமை, சோதிக்கப்பட்டு எந்த விதத்திலும் உங்களைப் பாதிக்காது என்று தெரிந்தால் மட்டுமே தானம் ஏற்கப்படும்.

7.   போன் மாரோ தானத்தில் எலும்பின் ஒருபகுதி வெட்டியெடுக்கப்படும் என்பது தவறான எண்ணம். பெல்விக் போனின் உள்ளே உள்ள திரவமாரோதான் எடுக்கப்படும். அது மட்டுமே ஒரு உயிரைக் காப்பாற்றப் போதுமானது. நோயுற்றவருக்கு PBSC மட்டுமே தேவைப்பட்டால் அது ரத்ததானம் போல்தான்.

8.   தானம் செய்பவர்க்கு தானம் செய்வதற்கு எந்தக் கட்டணமோ செலவோ இல்லை. மாறாக உங்கள் பயணச் செலவு மற்றும் இதர செலவுகளை மருத்துவமனை நிர்வாகமே ஏற்றுக் கொள்ளும்.

9.   நோயாளி இருக்கும் இடத்திற்கு தானம் செய்பவர் செல்லத்தேவையில்லை. உள்ளூரில் தானம் செய்யும் இடத்தில் கொடுத்தால் கூட அது தேவைப்படும் இடத்திற்கு அனுப்பப்படும்.

ரிஜிஸ்டரியில் சேர்வதற்கு உங்கள் வாயில் காட்டன் ஸ்வாப்  மூலம் திரவம் சேகரிக்கப்பட்டு அதனை சோதனை செய்து கண்டுபிடிப்பார்கள். 

ஜான் நவீனின் மனைவியின் பெயர் மெர்லின். 2013-ல் அவருக்கு Aplastic Aremia இருப்பதாகக் கண்டுபிடிக்கப்பட்டது.அதிலிருந்து கடந்த மூன்று வருடங்களாக அவர் அந்த நோயுடன் போராடி வருகிறார். மேரிலாண்டில் உள்ள ஜான் ஹாப்கின்ஸ் மருத்துவ மனையில் சிகிச்சை பெற்று வருகிறார். போன் மாரோ சிகிச்சையின் மூலமாக மட்டுமே இதனைக் குணப்படுத்த முடியும்.  இது வரை அவருக்கு ஏற்ற தானம் கிடைக்கவில்லை.

இந்த ரிஜிஸ்டரியில் தானம் செய்யப் பதிவு செய்த இந்தியர்கள் மிகக் குறைவு. அதிலும் தென்னிந்தியர்களோ தமிழர்களோ மிகமிக குறைவு.

ஜான் நவீன் அவர்களின் தொலைபேசி அலைபேசி  எண்கள்: 805-304-5802 அல்லது 201-247-8567.

அவருடைய ஈமெயில் முகவரி: john.navin@gmail.com

நீங்கள் ஜான் நவீனை நேரடியாகத் தொடர்பு கொண்டாலும் அவர் உங்களுக்கு மேலும் விவரம் அளிக்கவும் ரிஜிஸ்டரியில் பதியவும் உதவுவார்.

உயிர்  காக்கும் உபாயம் ஒன்று உங்கள் கையில் இருக்கிறது  என்று  தெரிந்தும் வாளாயிருக்கலாமா  நண்பர்களே .

உதவிக்கரம் நீட்டுவோம் உயிர் ஒன்றைக்காப்போம்.

தமிழர் திருவிழா பதிவுகள் தொடரும்

நியூயார்க்கில் கபாலி !!!!!!!!!!

Add caption

கலைப்புலி தாணுவின் கனவுப்படம், அட்டக்கத்தி, மெட்ராஸ் போன்ற வித்தியாசமான படங்களைக் கொடுத்த பா.ரஞ்சித் இயக்கும் படம், விமானத்தில் கூட விளம்பரம், உலகமெங்கும் ஆயிரக்கணக்கான திரையரங்குகளில் வெளியீடு, மலேசியாவிலும், தாய்லாந்திலும் படப்பிடிப்பு, தாய்லாந்து  இளவரசியின் தனிக்கவனிப்பு, ரஜினியின் வெள்ளைத்தாடி, இது போன்ற எதிர்பார்ப்புகளை எகிற வைக்கிற செய்திகள், விளம்பரம், ஹைப். டீஸரே சாதனை படைத்தது.

விளம்பரம் தேவைதான். அதுவே மிகுந்த எதிர்பார்ப்பை ஏற்படுத்தும். கடலளவு எதிர்பார்ப்புடன் ஒருவன் படத்திற்குச சென்றால், மலையளவு அவனுக்குக் கிடைத்தாலும் திருப்தியிருக்காது. இது படத்துக்கு மட்டுமல்ல எல்லாவற்றிற்கும் பொருந்தும்.

என்னிடம் சமீபத்தில் பேசிய நண்பர்கள் இங்கேயும் சரி, இந்தியாவிலும் சரி கேட்ட முதல் கேள்வி "கபாலி பாத்தாச்சா?”, என்றுதான். இங்கே எல்லாப் படத்துக்கும் விரைவில் DVD வந்துவிடும் என்றாலும், ரஜினி படத்தை தியேட்டரில்தான் பார்க்க வேண்டும் என்பதை தார்மீகக் கடமையாக பலபேர் நினைத்தது எனக்கு உள்ளபடியே ஆச்சரியமளித்தது. ரஜினி படத்தை உண்மையிலேயே பார்க்க வேண்டும் என்று நினைப்பவர்கள் ,முதல் நாள் முதல் ஷோ என்றெல்லாம் ஆசைப்பட்டால் அது நடக்காது. ஏனென்றால் வெறும் கூச்சலும், குழப்பமும், விசில் சத்தமும் மட்டும்தான் மிஞ்சும்.

"ரஜினி படம் வருது, நாம் தியேட்டருக்குப் போய்ப் பார்க்க வேண்டும்.", இது என் மனைவி. பிரதி வெள்ளிக்கிழமை இரவு ஒரு தமிழ்ப்படம் பார்த்து விட வேண்டும் என்பது என் மனைவியின் எழுதப்படாத சட்டம். தமிழ்ப்படம் பார்ப்பதன் மூலம் தமிழ்நாட்டோடு  ஒரு தொடர்பில் இருப்பது போல் அவளுக்குத் தெரிகிறது. அந்த அளவுக்கு நம்ம நாட்டு நினைப்பு இருப்பது மகிழ்ச்சிதான். நானும் அவளுக்கு கம்பெனி கொடுக்கத் தயாராகி உட்காருவேன். ஆனால் பெரும்பாலான தமிழ்ப்படங்கள் பார்க்கும்போது, 10 நிமிடம் அல்லது மிஞ்சிப் போனால் 30 நிமிடங்களில், நான் அப்படியே தூங்கிச் சாய்ந்து விடுவேன். இந்த இயக்குநர்கள் பணத்தையும் வாய்ப்பையும் எப்படியெல்லாம் வீணடிக்கிறார்கள் என்று நினைத்து ஒரு புறம் ஆச்சர்யமும் மறுபுறம் அதிர்ச்சியாகவும் இருக்கும்.

 ரிலீஸ் ஆகி ஒரு வாரம் ஓடியபின் நண்பர் கவிஞர் சிவபாலன் அவர்கள் அனுப்பிய குறுஞ் செய்தியில் "Bargain Wednesday", கபாலி படம் ஆறு டாலர்கள் மட்டும் என்று வந்ததை என் மனைவிக்கு ஃபார்வேர்டு  செய்தேன்.

அமெரிக்காவில் பல திரையரங்குகளில் இந்தமாதிரி சிஸ்டம் உண்டு. மற்ற நாட்களில் 15முதல் 20 டாலர்கள் வரை உள்ள கட்டணம், வாரத்தில் ஒரு நாள் 'பார்கெய்ன் டியூஸ்டே' அல்லது வெட்னஸ்டே என்று அனைத்து ஷோக்களும் ஆறு அல்லது ஏழு டாலர் மட்டும் இருக்கும்

ஆறு  டாலர் என்பது ரஜினி படத்திற்கு இந்தியாவில் டிக்கட் வாங்குவதை விடக் குறைவு என்பதும் ஊக்கம் கொடுக்க,நான், மனைவி இளைய மகள் மற்றும் இரு நண்பர்களின் குழந்தைகள் என ஆறு பேர் இரவு 10 மணி ஷோக்கு போனோம். போகும் வழியில் எதற்கும் ஃபோன் செய்து அட்வான்ஸ் புக்கிங் செய்துவிடுவோம் என்று அழைத்தபோது, “தேவையில்லை டிக்கட்டுகள் நிறைய உள்ளன, நேராக கவுன்ட்டரில் வாங்கிக் கொள்ளலாம்", என்கிறார்கள்.

நியூயார்க்கில் எனக்குத் தெரிந்து நான்கு தியேட்டர்களில் ரிலீஸ் செய்திருந்தார்கள். எங்கள் வீட்டுக்குப் பக்கத்தில் இருந்த டக்ளஸ்டன் பார்க்வேயில் இருந்த,  மூவி வேர்ல்ட் தியேட்டர்தான் நாங்கள் போன இடம். இங்கு அதிகமாக ஹிந்திப் படங்களும், எப்போதாவது தமிழ், தெலுங்குப் படங்களும் வரும்.

My wife with kabali 

நாங்கள் தியேட்டருக்குள் நுழைந்தபோது அங்கே தெரிந்த முகங்கள் நிறைய இருந்தன. குறிப்பாக இலங்கைத் தமிழர் அமைப்பான முத்தமிழ் மன்றத் தலைவர் என்னுடைய நியூராலஜிஸ்ட் Dr. நந்தக்குமார் தன் குடும்பம் மற்றும் நண்பர்கள் புடை சூழ இருந்தார். பரவாயில்லை நிறையப் பேர்கள்  இருக்கிறார்கள் என நினைத்தபோது, "என்ன படம் முடிந்தபின் வருகிறீர்களா?”, என்றார் நந்தகுமார். அவர் கேட்டபோது தான் தெரிந்தது, அவர்கள் 6.30 மணிக்கு மாலைக் காட்சி முடித்து வெளியே வருகிறார்கள் என்று. " 10 மணிக்காட்சிக்கு வந்திருக்கிறோம்", என்றேன்.

ஒவ்வொருவரும் ஒவ்வொரு விதமாக தங்கள் விமர்சனங்களை வைக்க, நான் நந்தக் குமாரிடம் கேட்டேன் "படம் எப்படியிருந்தது?” என்று. அவர் சிரித்துவிட்டு, "அதான் நீங்களே பார்க்கப் போகிறீர்களே", என்றார். அவரும் குழுவும் விடைபெற்றுச் செல்ல, தியேட்டர் வளாகம் காலியாகி வெறிச்சோடியது.

எனவே என் மனதில் கபாலியின் பிம்பங்கள் விமர்சனங்கள் அனைத்தையும் அழித்துவிட்டு உள்ளே சென்று உட்கார்ந்தேன். நாங்கள் தியேட்டருக்குள் நுழைந்தபோது மொத்தத் தியேட்டரிலும் நாங்கள் ஆறு பேர்தான் இருந்தோம். படம் ஆரம்பிக்கும் முன்னால் இன்னும் இரண்டு குடும்பங்கள் வந்து சேர்ந்தன.

இதற்கு முன்னால் எப்போது தியேட்டருக்குப் போய் தமிழ்ப்படம் பார்த்தேன்? என்று யோசித்துப் பார்த்த போது அது எந்திரன் என்று ஞாபகம் வந்தது எனக்கே ஆச்சரியமாக இருந்தது. எந்திரனை ஒற்றை  ஆளாகப் பார்த்ததும் ஞாபகத்துக்கு வந்தது. 

ரஜினி திரையில் தோன்றும் போது , என்னை அறியாமலேயே ஒரு அனிச்சைச் செயல் போல விசிலடிக்க என் கைகள் வாய்க்குப் போனது.அப்புறம்தான்  எனக்கு நினைவு வந்தது எனக்கு விசிலடிக்கத் தெரியாது என்று.

'கபாலி' முழுப்படத்தையும் தூங்காமல் பார்த்தேன். இப்படிச்சொல்லும்போதே படம் எனக்குப் பிடித்தது என்று புரிந்து கொண்டிருப்பீர்கள்.

படத்தைப்பற்றி என்னுடைய கருத்துக்களை கீழே தருகிறேன்.

இது ரஞ்சித் படமா அல்லது ரஜினிபடமா என்று கேட்டால் நான் சொல்வேன் இது ரஜினிபடம் தான் என்று. ஏனென்றால் கீழ்க்கண்ட ரஜினிபட அம்சங்கள் வழக்கம் போலவே இருந்தன.

1.   அதிரடி ஓசையுடன் ரஜினியின் அறிமுகம்

2.   ரஜினி வரும்போதெல்லாம் உரக்க ஒலிக்கும் BGM.

3.   கைதட்டல் கிடைப்பதற்காகவே ரஜினி வழக்கம்போல் பேசும் பஞ்ச் வசனங்கள் (நெருப்புடா, கபாலிடா, மகிழ்ச்சி )

4.   'உலகம் உனக்காக’ , ‘வீர துரந்திரா’ என்று ரஜினியைப் போற்றிப்பாடும் பாடல்கள்.

5.   ரஜினி சுடும்போது மட்டும் தவறாது இலக்கைத் தாக்கும் தோட்டாக்கள்.

6.   பல இடங்களில் லாஜிக் இல்லாத தருணங்கள்.

7.   ரஜினியின் எல்லாப் படத்திலும் வரும் ஸ்டைல் மேனரிசங்கள்.

8.   ரஜினியை பலம் மிகுந்த வஸ்தாதுவாக மட்டுமே காட்டும் சண்டைக் காட்சிகள். தனி ஆளாக ஒரு கூட்டத்தையே பதம் பார்த்தல்.

9.    ரஜினியைத் தவிர அங்கே நடிப்பதற்கோ ஸ்கேன் செய்வதற்கோ வாய்ப்பேயில்லை. (ராதிகா ஆப்தே ஒரு முறை விக்கிவிக்கி அழுது விட்டால் போதுமா?)

10.               படம் முழுதும் ஒவ்வொரு பிரேமிலும் வரும் ரஜினி.

11.               ரஜினியின் பிரமாண்டத்திற்கு ஈடு கொடுக்க முடியாத வில்லன்கள்.

12.               எதிரிகள் அனைவரும் குண்டடிபட்டு செத்துப் போதல். அதே சமயத்தில் குடும்பத்தில் செத்தவர்கள் மீண்டு வருதல்.

இதையெல்லாம் பார்த்துவிட்டும் இது ரஞ்சித் படம் என்று எப்படி சொல்லமுடியும். ரஞ்சித் முற்றிலுமாகத் தொலைந்து போனார் என்றுதான் நினைக்கிறேன். ரஜினி படத்தின் எல்லா இயக்குனர்களுக்கும் இது பொருந்தும்.

ஆறுதல் தருபவை:

1.   தொங்கிப் போன முகத்தில் விக்கைப்பொறுத்தி பேத்திகளுடன் காதல் டூயட ஆடாதது.

2.   'கபாலிடா' என்ற பன்ஞ் வசனத்தை ஒருமுறை மட்டுமே சொல்வது.

3.   சந்தோஷ் நாராயணனின் மெலடி பாடல்கள் (மாய நதி போன்றவை)

4.   அருமையான, அழகான, திறமையான ஒளிப்பதிவு.

5.   ஒரிஜினல் வெள்ளைத் தாடியுடன் அதிக நேரம் தோன்றுவது. (பின்னால் ஏன்தான் ஷேவ் செய்தார்களோ ?)

6.   பன்ச் வசனங்கள் போக மீதமுள்ள நல்ல உரையாடல்கள்.

7.   கார் ரேஸ்/ பைக் ரேஸ் மற்றும் வானத்தில் நிகழும் சாகசங்கள் இல்லாமை. 

தேவையில்லாதவை:

1.   கொஞ்சம் கூட பொருந்தாத விக்கில் வரும் இளமைக்கால ஃபிளாஸ்பேக் .

2.   சென்னை பாண்டிச்சேரி எபிசோட்.

3.   'உலகம் உன்னை' பாடலும் ரஜினி ஆடுவதும்.

லாஜிக் இல்லாத விஷயங்கள்.

அடப்போப்பா ரஜினி படத்துல போய் யாராவது லாஜிக் பாப்பாங்களா?

ரஞ்சித் ஓரிரு இடங்களில் திரைக்கதையை கிரிஸ்ப் ஆக்கி, ஒதுக்கி செதுக்கியிருந்தால் இன்னும் சிறப்பாக அமைந்திருக்கும். ஆனால் அவருக்கு எவ்வளவு பிரஷர் இருந்திருக்கும் எனவும் தெரிகிறது. ரஜினி படத்தில் காமடி நன்றாக இருக்கும். ஆனால் யோசித்துப் பார்த்தால் இந்தப் படத்தில் எந்த இடத்திலும் அது சாத்தியமில்லை.

மொத்தத்தில் இது லிங்காவை விட சிறப்பான படம். நன்றாகவே இருந்தது. பார்க்கவே முடியாது என்றளவுக்கு மோசமில்லை.

"ஆறிலிருந்து அறுபது வரை" இது ரஜினி நடித்த படம். ரஜினியின் வித்தியாச நடிப்பைப் பார்க்க விரும்புவர்கள் ஒருமுறை இந்தப் படத்தைப் பாருங்களேன். ஆனால் ஆறிலிருந்து அறுபது வயது வரை  முப்பது வருடத்திற்கு மேல் ரசிகர்களை கட்டிப்போட்டு வைத்திருப்பது ரஜினி மேஜிக்.

ரஜினி நல்ல நடிகர்தான். ஆனால் அவர் தன்னை இழந்து, தயாரிப்பாளரின் நடிகர் ஆகி வெகுகாலம் ஆகிவிட்டது . ரசிகர்களின் எதிர்பார்ப்பு,  படங்களின் உலக வணிகம் என்று அவரின் நடிப்புத்திறமை அமிழ்ந்து போனது.

ரஜினி சமீபத்திய அமிதாப் படங்களைப் பார்த்து தானும் மாறிக்கொள்ள வேண்டிய நேரம் வந்துவிட்டது. ரஜினி மேஜிக் இதற்கு மேல் தாங்காது.

முற்றும்.  

நடைப்பயணத்திலும் நாவல் படிக்கும் சீன அரச வம்சம் !!!

சீனாவில் பரதேசி -18

அன்றைய நாளில் சூரியனும் நன்கு வெளிவந்ததால் குளிர் குறைந்து போக, ஏரிக்கரை பூங்காற்று இதயத்தையும் சேர்த்து குளிர்விக்க உற்சாக நடை போட்டேன்.

நாங்கள் வந்த கிழக்குப்பகுதியின் முன்புறம் இரண்டு பிரம்மாண்ட வெங்கலச் சிங்கங்கள் இருபுறமும் இருந்தன. சீன வரலாற்று இடங்கள் எல்லாவற்றிலும் இதேபோல் இருந்ததை ஏற்கனவே சொன்னேன்.

வரிசையாக நான் பார்த்தவற்றையும் அதன் முக்கியத்துவத்தையும் அப்படியே கீழே கொடுக்கிறேன்.

Hall of Benevolence and Longevity ( Courtesy Google Maps) 

1.   ஹால் ஆஃப் பெனவலன்ஸ் &லாங்ஜிவிட்டி: இங்குதான் அரசவைக் கூட்டங்கள் நடக்குமாம்.

2.   ஹால் ஆஃப் ஜேட் பில்லோஸ்: சிங் பேரரசரின் காலத்தில் இது பேரரசர் தங்குமிடமாக இருந்தது. ஒரு கட்டத்தில் குவாங்சு பேரரசர் சொன்னபடி கேட்காததால் பேரரசி ஸிக்சி, அவரை இந்த இடத்தில் சிறிது காலம் அடைத்து வைத்திருந்தாராம்.

3.   யியுன்  ஹால் (Yiyun Hall): ஸிங்லாங்  பேரரசர் காலத்தில் இது நூலகமாக இருந்ததாம். பின்னர் பேரரசி லாங்யு இங்கு தங்கியிருந்தாராம். தற்சமயம் இங்கு ஸிங்லாங் (Qinlong Emperor) பேரரசர் சேகரித்து வைத்திருக்கும் கற்சிற்பங்கள் அவர் தன் கையால் எழுதிய (Calligraphy) வண்ண அலங்கார எழுத்துக்கள் ஆகியவை பார்வைக்கு உள்ளன.

4.   டெஹி கார்டன் (Dehe Garden) இது மூன்று தளங்களைக்  கொண்ட ஓப்பரா கூடம் .அரசர்களுக்கு பொழுதுபோக்கு முக்கியம் அல்லவா? .

5.   ஹால் ஆஃப் ஜாய் & லாங்ஜிவிட்டி : இங்குதான் பேரரசி சிக்ஸி தங்கியிருந்தாராம்.  

Long Corridor

6.   சேங்லாங்க் அல்லது லாங் காரிடர்: இது பேரரசி சிக்ஸியின் அரண்மனையிலிருந்து தொடங்கி நீண்ட தூரம் இருந்தது. நம்மூரில் இருக்கும் வீடுமுன் இருக்கும் முற்றம் போல ஆனால் நீளமாக இருந்தது. நீளம் என்றால் மிக நீளம். சுமார் 750 மீட்டர் நீளம். மேலே கூரையமைத்து இருபுறமும் பல தூண்கள் அமைக்கப்பட்டு, தரையிலிருந்து சற்றே உயரத்தில் தளமமைக்கப்பட்டு இருந்தது. கூரைபோடப்பட்ட வாக்கிங் தடம் போல இருந்தது. இதில் இருபுறம் மற்றும் தூண்களிலும் கூரையின் உட்பகுதியிலும் மரசிற்பங்கள், அலங்கார வளைவுகள், ஓவியங்கள் என்று இருந்தன. 

Lomg Corridor 

   ஏதோ மகாபாரதக் கதை போன்று தெரிந்ததால்  லீயிடம் கேட்டேன்.  "சீனாவில் இருக்கும் சிறப்பு வாய்ந்த இடங்கள், சீனப்புராணங்கள் மற்றும் நான்கு  சின்ன நாவல்களும் ஓவியவடிவில் அமைக்கப்பட்டிருக்கிறது", என்றான். நடந்து பார்த்துக் கொண்டே போனால் காமிக்ஸ் படிப்பது போல நாவல்கள் படிக்கலாம் போலத் தெரிந்தது. நடைப்பயணத்திலும் நாவல் படிக்கும் சீன அரச வம்சத்தினரை நினைத்தால் மிகுந்த வியப்பாக இருந்தது .ஒரு நிமிடம் கூட வீணாகக் கழிக்க மாட்டார்கள் போல . லீ என்னுடைய பாடிகார்டாக  வர, நானும் அந்த தடத்தில் ராஜநடை போட்டு நாவல்களை பார்த்து புரிந்து கொள்ள முடிந்தேன். லீ  போதும்  வா இன்னும் நிறைய இடம் பார்க்க வேண்டும் என்று சொல்ல, திரும்பி அவன் பின்னால் நடந்தேன்.   

Hall of Dispelling clouds

7.   ஹால் ஆஃப் டிஸ்பெல்லிங் கிளவுட்ஸ்: லாஞ்சிவிட்டி ஹாலின் நடுப்புறத்தில் அமைந்திருக்கும் இந்த மண்டபத்தில்தான் பேரரசி சிக்ஸி உட்கார்ந்து தன்னை சந்திக்க வரும் முக்கிய நபர்களை பார்ப்பாராம். அதுதவிர ஏதாவது விழாக்கள், பூஜைகளும் அங்குதான்  நடக்குமாம். மேலும் இங்குதான் அவரின் பிறந்தநாள் மிக விமரிசையாக கொண்டாடப்பட்டதாம்.

8.   டவர் ஆஃப் புத்திஸ்ட் இன்சென்ஸ்: 

லாஞ்சிவிட்டி மலையின் நடுவில் மிக உயரமான இந்த புத்தர் கோவில் இருக்கிறது. சிங்லாங்  பேரரசர் காலத்தில் கட்டப்பட்ட இது எட்டு அடுக்குகளைக் கொண்டது. 20 மீட்டர் உயரமான பிரம்மாண்ட கற்பாறை மேலே கட்டப்பட்ட இது 41 மீட்டர் உயரம் உடையது. அதில் சிறப்பான கல்மரத்தால் ஆன எட்டு பெரிய தூண்கள் இருந்தன. அதனைத் தொட்டுக் காண்பித்த லீ சொன்னான். இது மிகவும் உறுதியான மரம் இங்கே இரும்பு மரம் (Iron wood) என்று சொல்வார்கள் என்றான். அது இரும்பா மரமா என்று எனக்கே சந்தேகமாக இருந்தது. விரலால் தட்டிப் பார்த்தேன். விரல் வலித்தது. இந்த மாதிரி சின்னச் சின்ன தகவல்கள் ஒரு வழிகாட்டி மூலம் மட்டும்தான் கிடைக்கும். எனவே அவனை அமர்த்தியதில் மகிழ்ச்சி. இங்கு நடக்கும் பூஜையில் பேரரசி சிக்ஸி தவறாது கலந்து கொண்டு பத்தி பொருத்தி பிரார்த்தனை செய்வார்களாம்.

9.   சி ஆஃப் விஸ்டம் (Sea of wisdom) :லாஞ்சிவிட்டி மலையின் உயரத்தில் அமைந்திருக்கும் இந்த வண்ணக் கண்ணாடி மாளிகையில் ஏராளமான புத்தர் சிலைகள் இருந்ததாம். இப்போது பராமரிப்புக்காக மூடப்பட்டிருந்தது.

திரும்பவும் மலையிலிருந்து கீழிறங்கி நடந்து வரும்போது ஏரியின் மேலே குறுக்கே ஒரு பாலம் இருந்தது அதற்குக் கீழே சில படகுகள் இருந்தன. குளிர்காலத்தில் அனுமதி இல்லை.

அதற்கு மறுபுறம் அலங்கரிக்கப்பட்ட விதானம் அமைந்த ஒரு பெரிய படகு இருந்தது. முற்றிலும் வேலைப்பாடுகள் அமைந்து பளபளவென்று அமைந்தது.

"அது என்ன என்று தெரிகிறதா?”

"அது பேரரசி சிக்ஸி  உலாவரும் ராயல் பார்ஜ்".

"பாதி சரி பாதி தவறு".

"எது சரி எது தவறு?”

"பேரரசி சிக்ஸியின்  படகு என்பது சரி, உலா வருவார்கள் என்பது தவறு?”

என்று சொல்லிவிட்டு இன்னும் கொஞ்சம் அருகில் அழைத்துச் சென்று காண்பித்தான்.

கிட்டப்போய் பார்த்த பின் என் கண்களையே என்னால் நம்ப முடியவில்லை.

பிரமாண்டமான வேலைப்பாடுகளும், சிற்பங்களும் அமைந்த அந்தக் கப்பல், ஆமாம் படகென்று சொல்லுமளவுக்கு சிறியதல்ல.

ஆனால் அது உண்மையில் படகுமல்ல கப்பலுமல்ல.

பளபள வென்று சூரிய ஒளியில் மின்னிய அந்த அமைப்பின் அதிசயம் கண்டு அசந்தே போனேன். புன்னகையுடன் லீ வந்து அதைப்பற்றி சொல்ல ஆரம்பித்தான்.

தொடரும்.