கர்நாடகக்கச்சேரியும் கனவைத்தொலைத்த பேராசியரும் !!!!!!!!!!!!!

  ஃபெட்னா தமிழர்  திருவிழா 2016 பகுதி 12

TM Krishna

முதல் நாள் இரவின் இறுதி நிகழ்ச்சியாக TM கிருஷ்ணா அவர்களின் கர்நாடக இசைக்கச்சேரி நடந்தது. அரங்கு நிறையவில்லை என்றாலும் என்னைப்போன்ற பல இசை ரசிகர்கள் அங்கே மிகுந்த எதிர்பார்ப்புடன் கூடியிருந்தோம். எங்கள் எதிர்பார்ப்பை ஏமாற்றாமல் அருமையான இசைக்கச்சேரியை நடத்தினார். செம்மங்குடி சீனிவாசங்கய்யரின் சீடர் என்றால் சும்மாவா.

அதுமட்டுமல்ல TM கிருஷ்ணா ஒரு வித்தியாசமான புரட்சிவாதி. முற்றிலும் வேறான சிந்தனை கொண்டவர். உலக முழுதும் 2000 கச்சேரிகள் பண்ணியிருந்தாலும் தலை தோளில் இருக்கும் வெகு சிலரில் இவரும் ஒருவர். அவர் பாடிய பாடல்களில் "மாயா மணிவண்ணா",” சுட்டும் விழிச்சுடர்தான்", ஆகியவை என்னை மிகவும் கவர்ந்தன. விழா முடிந்து ஓரிரு நாட்களில் அவருக்கு மகசேசே விருதும் கிடைத்தது .(நான்தான் அந்த விருதை வாங்கிக்கொடுத்தேன் என்று சிலர் நினைப்பது  உண்மையில்லை ஹி ஹி  )

வந்திருந்த சிறப்பு அழைப்பாளர்களுள் பேராசிரியர் மு.ராமசாமியும் ஒருவர். மனோன்மணியம் சுந்தரனார் பல்கலைக் கழகத்தில் பேராசிரியராக இருக்கும் இவர் எனக்கு மிகவும் நெருங்கிய கனவைத் தொலைத்தவர்களுள் ஒருவர். என்ன ஒன்றும் புரியவில்லையா? நான் அமெரிக்கன் கல்லூரியில் படிக்கும்போது சில நண்பர்களோடு இணைந்து ஒரு கவிதைத் தொகுப்பை வெளியிட்டேன். என்னைத்தவிர, அதில் பேராசிரியர் பிரபாகர், இயக்குனர் முத்துராமலிங்கன், கவிஞர் மகுடி தவிர தீர்க்க வாசகன் என்பவர்கள் எழுதியிருந்தனர். தீர்க்கவாசகன் என்ற புனைபெயரில் எழுதியவர்தான் பேராசிரியர் மு.ராமசாமி. எனக்கும் வேறு ஒரு புனைபெயர் இருந்தது அது 'பாணன்' என்பது. சில விறலியர் மீது பற்றுக் கொண்டதால் அப்போது பாணன் என்று என்னை அழைத்துக் கொண்டேன். விரலிகளின் குறளி வித்தையில் பாணன் வீணன் ஆகிவிடக் கூடாதென்று அந்தப் பெயரை விட்டுத்தள்ளிவிட்டு வெளிநாடு வந்ததால் 'பரதேசி' ஆயிப்போனேன். அந்தக் கவிதைத் தொகுப்பின் பெயர்"கனவைத் தொலைத்தவர்கள்" என்பது. இப்போது புரிகிறதா நான் ஏன் அப்படிச் சொன்னேன் என்பது? அதில் கவிதைகள் புனைந்த எல்லோரும் தங்கள் தொலைத்த கனவுகளை மீட்டெடுத்து விட்டனர் என்னைத்தவிர என்று நினைக்கிறேன்.   

With Ramasamy

பல ஆண்டுகளுக்குப் பிறகு நேரில் பார்க்கிறேன், சில வருடங்களுக்கு முன்னால்  முகநூலில் சந்தித்தோம். முகநூலில் தொடர்ந்து எழுதிவரும் ராமசாமி ஒரு இரண்டு வருடங்கள் வார்சா பல்கலைக்கழகத்தில் தமிழ் பயிற்றுவித்தார். ஐரோப்பிய மாணவர்கள் தமிழ் கற்றுக் கொள்ள எவ்வளவு ஆர்வமாக இருக்கிறார்கள் என்பதை தன் சொற்பொழிவில் விளக்கியது ஆச்சரியமாக இருந்தது. ராமசாமி அவர்கள் கலந்து கொண்ட தனித்தமிழ் இயக்க நூற்றாண்டு விழா கடைசி நாள் நடந்தது. சில தவிர்க்க முடியாத காரணத்தால் அதில் என்னால் கலந்து கொள்ள முடியவில்லை. மன்னித்துக் கொள்ளுங்கள் ராமசாமி. பாஸ்டனில் உங்கள் பையன் இருப்பதால் நீங்கள் அடிக்கடி வருவீர்கள் என்பதால் நாம் மீண்டும் நியூயார்க்கில் சந்திக்கலாம். ராமசாமி பல புத்தகங்கள் எழுதி வெளியிட்டு இருக்கிறார் .அவரைப்பற்றி மேலும் அறிய இங்கே சுட்டவும் . http://ramasamywritings.blogspot.com/

Sangangalin sangamam 

இரண்டாவது நாள் மாலையில் "சங்கங்களின் சங்கமம்" என்ற நிகழ்ச்சி நடந்தது. இப்படியொரு கொண்டாட்டத்தை இதுவரையில் நான் அமெரிக்காவில் பார்த்ததில்லை. அரங்கத்தின் வெளியே வந்திருந்த அனைத்துத் தமிழ்ச் சங்கங்களும் தங்கள் தங்கள் பேனர்களை பிடித்துக் கொண்டு ஒவ்வொரு குழுவாக ஊர்வலமாக வந்தனர். அரங்கின் முன்னால் இருந்த மேடையில் ஏறி சுற்றி வந்து இறங்கி கீழே உள்ளே சதுக்கத்தில் பிரிவுகளாக நின்றனர்.

முகப்பின் முன் இருந்த DJ  ஒவ்வொரு சங்கம் வரும்போதும் கட்டியம் கூறி அவர்களுக்கு ஏற்ற அல்லது சார்ந்த பாடல்களை ஒலி பரப்பினார். தாரை தப்பட்டைகள் ஒலிக்க உற்சாகமாக ஆட்டபாட்டத்துடன் அரங்கேறியது சங்கங்களின் சங்கமம் நிகழ்ச்சி. நான் சார்ந்த நியூயார்க் தமிழ்ச் சங்கமும் பெருமையுடன் வந்த போது, அதன் கருத்துப்பாடலான "நிலைபெறும் தமிழ் அங்கமே, எங்கள் நியூயார்க்கின் தமிழ்ச் சங்கமே" என்ற பாடல் இசைக்கப்பட்டது. இது அந்தக் காலத்திலேயே கண்ணதாசன் எழுதி சீர்காழி கோவிந்தராஜன் பாடிய பாடல். அந்தப்பாட்டுக்கும் மீறி பறைகளின் சத்தம் ஒலிக்க நியூயார்க் தமிழ்ச் சங்கத் தலைவர் விஜயகுமார் உட்பட பலரும் முற்றத்தில் தன்னை மறந்த நிலையில் ஆட்டம் போட்டனர். ஒவ்வொரு குழு வரும் போதும், 2016 ஃபெட்னா விழாவை நடத்திய நியூஜெர்சி தமிழ்ச்சங்கத்தின்  தலைவி உஷா மற்றும் கவிதா ராமசாமி வரவேற்றனர். சில பல சமயங்களில் கவிதா ராமசாமியும் சேர்ந்து ஆடி மகிழ்ந்தார்.

போலீஸ் பாதுகாவலுடன் (ஒரே ஒரு போலீஸ் என்றாலும்) நடைபெற்ற இந்த நிகழ்ச்சி மாலை நேரத்தை மகிழ்ச்சியாக்கியதோடு அந்த ஏரியா முழுவதையும் வண்ண மயமாக்கியது.

அது முடிந்தபின் இரவு உணவு முடிந்து எல்லோரும் உள்ளே போய் முண்டியடித்து உட்கார்ந்தனர். அங்கு ஃபெட்னா விழாவுக்கு உதவிய, உழைத்த பல பேருக்கு மரியாதை செய்யப்பட்டது. இதற்காகவா நம் மக்கள் அடித்துப் பிடித்து வந்தனர் என்று   ஆச்சரியப்பட்டபோது அதற்கில்லை அதன்பின் நடக்கப்போகும் சூப்பர் சிங்கர் இசை நிகழ்ச்சிக்காகத்தான் என்பது பின்னர் விளங்கியது.

இவர்கள் எல்லாரும் இங்கேதான் இருந்தார்களா என்று நினைக்குமளவுக்கு அரங்கு கீழே, மேலே என்று முதல்முறையாக முற்றிலும் நிறைந்திருந்தது.

Vijay Prakash

பிரபல பின்னனிப் பாடகர் விஜய்பிரகாஷ், ஜெசிக்கா, ஹரிப்பிரியா  பழைய சீசனைச் சார்ந்த நியூஜெர்சியில் வாழும் சுரேஷ் ஆகியோர் கலந்து கொண்டனர்.

ஜெசிக்கா வந்து "அமுதே தமிழே அழகிய மொழியே" என்று உருகிப் பாடிய தமிழிசைப் பாடலோடு கச்சேரி களைகட்டியது.  ஹரிபிரியாவும் இணைந்து பாடினார். இருவர் குரலும் நன்கு பண் பட்டிருந்தது. அடுத்து விஜய் பிரகாஷ் வந்து" என் இதயம்" என்ற பாடலைப் பாடி எல்லோருடைய இதயங்களையும் கவர்ந்து கொண்டார். விஜய் பிரகாஷ் அவர் பாடிய "ஓம் சிவோகம்", "இன்னும்  கொஞ்ச நேரம்", எந்திரன் படத்தின் "காதல் அணுக்கள்" போன்ற பல பாடல்கள் தவிர "என் இனிய பொன் நிலாவே போன்ற சில பழைய பாடல்களையும்  பாடினார். "பாட்டுப் பாடவா", பாடலை அரங்கில் உட்கார்ந்திருந்த ஆடியன்ஸை இருபிரிவாக பிரித்து பாட வைத்தது வந்திருந்த அனைவரையும் உற்சாகப் படுத்தியது. ஜெசிக்கா பாடிய "பால் போலவே", "கவிதைகேளுங்கள்" ஆகியவை சிறப்பாக இருந்தன. குறிப்பாக இசைக்குழுவும் சவுண்ட் சிஷ்டமும் மிகவும் தரத்துடன் இருந்ததால் ஃபெட்னாவின் முத்தாய்ப்பான பொழுதுபோக்காக இந்நிகழ்ச்சி அமைந்தது.

மொத்தத்தில் விழா அமைப்பு, அரங்கு, தங்குமிடங்கள், தரமான நிகழ்ச்சிகள், சாப்பாடு என  மொத்தத்தில் மிகப்பிரம்மாண்டமான ஃபெட்னாவின், 29வது திருவிழாவை நாஞ்சில் பீட்டர் அவர்களும், நியூஜெர்சி தமிழ்ச் சங்கமும் இணைந்து வெற்றிகரமாக நடத்தியிருக்கிறார்கள். அனைவருக்கும் எனது நன்றிகளும், பாராட்டுகளும்.

அடுத்து வருடம் ஃபெட்னாவின் 30வது தமிழர் திருவிழா நடக்கும் மினசோட்டாவில்   சந்திக்கலாம் . நன்றி வணக்கம்.

Add caption

தமிழர் விழா பதிவுகள் நிறைவடைந்தன.  

அமெரிக்காவில் மீண்டும் இளையராஜா -பகுதி-1

நியூஜெர்சி மாநிலத்தில் உள்ள நுவார்க் (Newark) (இதனை நெவார்க் என்று பலர் உச்சரிக்கின்றனர்,அது தவறு) என்ற ஊரில் உள்ள மிகப்பெரிய புருடென்ஷியல் சென்ட்டரில்  மறுபடியும் இளையராஜா கச்சேரி என்று கேள்விப்பட்டவுடன் மனைவியிடம் சொன்னேன். "ஐயையோ இளையராஜாவா வேணவே வேணாம்", என்றாள். என்னவென்று கேட்டபோது போன தடவை இளையராஜா கச்சேரிக்குப்போய் அவஸ்தைப் பட்டு வந்ததைச் சொன்னாள். அவள் ஏற்கனவே சொன்னது அப்போதுதான் ஞாபகம் வந்தது.

போன முறை 3-4 வருடங்களுக்கு முன்னர் இளையராஜா வந்தபோது, கச்சேரி ஆரம்பிக்குமுன் யாரும் நடுவில் கை தட்டக்கூடாது, விசில் அடிக்கவே கூடாது என்று சொன்னதோடு அப்படிச் செய்த கூட்டத்தைப் பார்த்து திட்டினாராம். அதோடு கச்சேரியும் சுதி சேராமல் நன்றாகவே இல்லை என்று சொன்னாள். ஆலயத்தில் ஏதோ மீட்டிங் இருந்ததால் அப்போது நான் செல்ல முடியவில்லை. இளையராஜாவின் ரசிகன் (அவர் பாடல்களுக்கு மட்டும்) என்ற முறையில் இந்தத்தடவை எப்படியாவது போய்விட வேண்டும் என்று என் மனைவியை ஒத்துக் கொள்ள வைத்து, நான், என் மனைவி , என் தம்பி அவன் மனைவி ஆகிய நாலு பேருக்கும் டிக்கட் வாங்கினேன்.

கச்சேரி செப்டம்பர் 24, 2016 சனிக்கிழமை மாலை ஏழு மணிக்கு.  கொஞ்சம் சீக்கிரமாகவே கிளம்பி வெரஜோனா (இந்தப்பாலத்திற்கு என் வயது ஆனால் அது மிகவும் உறுதியாய் இருக்கிறது.) பாலத்தைத் தாண்டி நான்காவது மாடியில் காரை பார்க் செய்துவிட்டு அரங்கில் நுழைந்தோம். என் தம்பி மனைவி ஊர் ஞாபகத்தில் முறுக்கு, மிக்சர், காராச் சேவு என்று ஒரு பைநிறைய தின்பண்டங்களை எடுத்துவர அதை அனுமதிக்க மறுத்தனர். எனக்கு ஆஹா வடை போச்சே மொமெண்ட். திரும்பவும் ஒரு நடை போய் காரில் வைத்துவிட்டு மெட்டல் டிடக்டர் மூலம் உள்ளே நுழைந்தோம். ஒரு ஆப்பிரிக்கப்  பெண்மணி எங்களை அன்போடு(?) வரவேற்று உள்ளே அழைத்துச் சென்று, எங்கள் டிக்கட்டுகளை வாங்கிக் கொண்டு, “உங்களுக்கு இடதுபுறம்  முன்வரிசையில் இருக்கைகள் ஒதுக்கப்பட்டிருக்கின்றன”, என்று சொல்லி $250 டாலர் டிக்கட்டுகளைக் கொடுத்தாள். “இல்லை இல்லை $70 டாலர்  டிக்கட்டுகளே போதும்”, என்று சொன்னபோது, "இல்லை இது உங்களுக்கு இலவச அப்கிரேட்", என்றாள். என்னடாது நான் வருமுன்னேயே என் புகழ் இங்கு வந்துவிட்டதோ என்று நினைத்து அரங்கில் உள்ளே நுழைந்தால் அரங்கு கிட்டத்தட்ட காலி, ஓ அதுதான் விஷயமா? என்று உள்ளே போய் உட்கார்ந்தோம்.

Add caption

புருடன்ஷியல் அரங்கு 5000 பேர் அமரக்கூடிய அரங்கு. போன தடவை டொரன்டோ மற்றும் நியூஜெர்சி ஆகிய இரண்டு இடங்களுக்கு மட்டுமே இளையராஜா வந்ததால் ,அதுவும் முதல்முறை என்பதால் பல தூர  ஊர்களிலிருந்து மக்கள் விமானத்தில் பறந்து வந்து கலந்து கொண்டதால் அரங்கு நிறைந்ததாகக் கேள்விப்பட்டேன். இப்போது பல ஊர்களில் கச்சேரி இருந்ததால் நியூயார்க், நியூஜெர்சி, டெலவேர் மற்றும் கனடிக்கட் ஆகிய ஊர்களிலிருந்து மட்டுமே வந்திருந்தனர். அதுமட்டுமல்லாமல் இது தெலுங்குப் பாடல்களும் கொண்ட கச்சேரி என்பதால் பல தமிழர்கள் வராமல் இருந்திருக்கலாம். அதோடு போன தடவை திட்டு வாங்கியவர்கள் வருவதைத் தவிர்த்திருக்கலாம். என் மனைவி கூட மிகுந்த தயக்கத்துடன் தான் வந்தாள்.

ஒரு வருடம் முன்பு ஆரம்பிக்கப்பட்ட 8K ஆன்லைன் தமிழ் ரேடியோவின் பொறுப்பாளர் சுரேஷ் அவர்கள்தான் இளையராஜாவின் அமெரிக்க டூருக்கு ஏற்பாடு செய்தவர். இம்முறை, வாஷிங்டன் DC, சான் ஃபிரான்சிஸ்கோ , சியாட்டல் ,டல்லாஸ் ,அட்லாண்டா, நியூஜெர்சி ஆகிய  இடங்களில் கச்சேரி இருந்தது. நியூஜெர்சியில் நடந்த இசை நிகழ்ச்சிக்கு, நியூஜெர்சி, நியூயார்க், டெலவேர், கனடிக்கட் தமிழ்ச் சங்கங்களும், தெலுங்கு அசோயேஷன்களும் உதவி புரிந்தன.

உள்ளே நுழைந்த போது மேடை முழுதும் இந்தியாவிலிருந்து வந்திருந்த சுமார் 50 இசைக்கலைஞர்கள் தங்கள் கருவிகளை ஆயத்தம் செய்து கொண்டு இருந்தனர். முக்கிய பாடகர்களாக, மனோ, சித்ரா, கார்த்திக், சாதனா சர்க்கம், ஆகியோரும் கோரஸ் பாடுவதற்காக சுறுமுகி, அனிதா, NSK ரம்யா, பிரியா ஹிமேஷ், வாசு, செந்தில், ஷ்யாம், ஹரிஷ்  போன்ற தேர்ந்த பாடகர்களும் வந்திருந்தனர். இதுதவிர சர்ப்ரைஸ் கூடுதலாக யுவன் சங்கர் ராஜாவும் வந்திருந்தார்.

பேஸ் கிடார், ரிதம் கிட்டார், லீட் கிட்டார், ஷெனாய், சாக்சபோன், டிராம்ஸ் 3, கீபோர்டு -3, தபேலா 3, காங்கோ, தவில், செல்லோ 3, எஃபக்ட்ஸ், ரிதம் பேட்ஸ், வயலின் 20, புல்லாங்குழல், வீணை-3, ஆகியவை இருந்தன. லீட் கிடாரில் சுதர்சனம் மாஸ்டர் மகன் சதா, சாக்சபோன் MSV  ராஜா, காங்கோ தவிலில் மதுரைக்கார நண்பர் சுந்தர், செல்லோவில் குன்னக்குடி வைத்தியநாதனின் பையன், தபேலாவில் பிரசாத், பேஸ் கிட்டாரில் சசி, கீபோர்டு பரணிதரன், புல்லாங்குழலில் நெப்போலியன் என்ற அருண்மொழி இவர் சிறந்த பாடகரும் கூட, சாக்சபோன் மேக்ஸ் ஆகியோர் குறிப்பிடக் கூடிய கலைஞர்கள். இதுதவிர இளையராஜாவிடம் வெகுகாலமாக இருக்கும் கண்டக்டர் பிரபாகர். எல்லோரையும் ஒரே மேடையில் பார்ப்பது மிகவும் ஆனந்தமாக இருந்தது. ஒவ்வொருவரும் அற்புதக்கலைஞர்கள்.

 8k மைல்ஸ் தீனாவும் தெலுங்கு RJ ஒரு பெண்ணும் வந்து தமிழிலும் தெலுங்கிலும் வந்தவரை வரவேற்று, நடிகர் நெப்போலியனை மேடைக்கு வரவழைத்தனர். நெப்போலியன் இப்போது பெரும்பாலும் இருப்பது நியூஜெர்சியில். பாரதிராஜாவின் துணை இயக்குநராக இருந்து, அவரால் ‘புதுநெல்லு புதுநாத்து' என்ற படத்தில் அறிமுகப்படுத்தப்பட்டு பல படங்களில் நடித்துப் புகழ்பெற்றார். பின்னர் திமுகவில் இணைந்து MP யாகி, முக அழகிரியை வெளிப்படையாக ஆதரித்ததால் ஒதுக்கப்பட்டு அரசியலில் இருந்து தற்சமயம் விலகி யிருக்கிறார்.

ஒரு மென்பொருள் நிறுவனத்தை ஆரம்பித்து அது நன்றாக நடப்பதாகக் கேள்வி. அவரின் முழுக்குடும்பமும் முன்னால் அமர்ந்திருந்தது. தேனிக்காரர் என்பதால் மேடையில் வந்து இளையராஜாவின் பண்ணைப்புரம், பாரதிராஜா, இப்போது பாரெங்கிலும் உள்ள புகழைப்பற்றி சுருக்கமாக உரையாற்றி இறங்கினார்.

இசை கூட்டி கூடி அரங்கை நிரப்ப, கோரஸ் பாடகர்கள், "குருப்பிரம்மா, குரு விஷ்ணு" என்று தங்கள் குருவான இளையராஜாவைப் பற்றிப்பாட, வெள்ளை ஜிப்பா, வெள்ளை வேட்டி, வெள்ளை செருப்புடன் ஒரு சிறிய உருவம் மேலே ஏறி மேடைக்கு நடுவில் வந்தது. அரங்கு முழுவதும் கிட்டத்தட்ட எழுந்து நின்று அதிர அதிர கைதட்டி அமர, இளையராஜாவின் ஹார்மோனியம் உயிர் பெற்றது. அதன்பின் எதிர்பார்த்தவண்ணமே, "ஜனனி ஜனனி ஜகத்காரணி நீ" என்று சற்றே கரகரத்த குரலில் இளையராஜாவின் நாதம் எழுந்து அரங்கில் மிதந்து வந்து காதில் பாய்ந்தது. பின்னால் திரும்பிப்பார்த்தால் மக்கள் ஓரளவுக்கு வந்து சேர்ந்திருந்தனர்.

அதன்பின் வந்த பாடல்களையும், நடுவிலே நடந்த சுவையான நிகழ்வுகளையும் அடுத்தடுத்த பதிவுகளில் எழுதுகிறேன்.

தொடரும்

அமெரிக்காவில் திருக்குறள்!!!!!!!!!!!!!!!

ஃபெட்னா தமிழர் திருவிழா பகுதி -11

Advika with her Mom

இதற்கு முந்திய பகுதியைப்படிக்க   இங்கே சொடுக்கவும் 

http://paradesiatnewyork.blogspot.com/2016/09/blog-post_22.html

இலக்கிய வினாடிவினாவுக்கு அடுத்து என்னை மிகவும் கவர்ந்த ஒரு நிகழ்ச்சி எதுவென்று கேட்டால் "குறள் தேனீ" என்பேன். அது என்ன 'குறள் தேனீ" என்றால், இரு குழுக்களாகப் பிரிந்த இளைய தமிழர்கள் திருக்குறள் சம்பந்தமான கேள்விகளுக்கு விடையளித்தனர். பிள்ளைகளின் முயற்சி மற்றும் பெற்றோர்களின் உழைப்பு இந்தப் போட்டியில் வெளிப்பட்டது. கேள்விகள் பல வடிவங்களில் வந்தாலும் பிள்ளைகள் திறமையாக திருக்குறள்களை கண்டுபிடித்தனர். ஒரு சிலரின் ஆங்கில உச்சரிப்பில் திருக்குறளைக் கேட்டது கொஞ்சம்  வித்தியாசமாக இருந்தாலும் இந்தளவுக்கு அவர்கள் திருக்குறளை படித்திருப்பது மிகவும் பாராட்டப்பட வேண்டிய முயற்சி.

நான் சென்னையில் இருக்கும்போது, என் பிள்ளைகள் ஆங்கிலவழிக்கல்வி கற்றாலும் தமிழ்மொழியைக் கற்றே  ஆக வேண்டும் என்று சொல்லி பள்ளியில் தமிழ்ப் பாடம் எடுத்திருந்தேன். என் பெரிய மகள் அனிஷா அதுபோல தமிழ் கற்றுக் கொண்டாள். என்னுடைய அப்பாவும் வீட்டில் அவளுக்கு தமிழ் சொல்லித்தந்தார். தவிர வீட்டில் தமிழ் பேசும் பழக்கத்தை ஏற்படுத்தியிருந்தேன். எனவே அவளுக்கு நன்றாக தமிழில் எழுதவும் பேசவும் தெரியும்.

நாங்கள் நியூயார்க் வரும்போது பெரியவளுக்கு ஏழு வயது, சின்னவளுக்கு ஐந்து வயது. வீட்டில் தமிழில் பேசுவது இங்கு வந்ததும் தொடர்ந்தது. சிறிது காலம் சென்று, வெளியில் ஆங்கிலம் மட்டுமே பேசிய மகள்கள் வீட்டிலே நாங்கள் தமிழில் பேசினாலும் ஆங்கிலத்தில் பதில் சொல்ல ஆரம்பித்தார்கள். “இல்லை நீங்கள் வீட்டிலே தமிழில் மட்டும் தான் பேச வேண்டும்”, என்று சொல்லி, பிள்ளையார் கோவிலில் நடக்கும் தமிழ் வகுப்பில் சேர்த்துவிட்டேன்.

பலமாதங்கள், ஒவ்வொரு சனிக்கிழமையும் காலையில் மிகவும் முயன்று அவர்களை எழுப்பி அங்கே தமிழ்ப் பள்ளியில்விட்டு காத்திருந்து கூப்பிட்டுக் கொண்டு வரும்போது மதியம் ஆகிவிடும்.பிள்ளைகள் இருவரும் நன்கு எழுதப்படிக்க கற்றுக் கொண்டனர். இப்பொழுது அவர்கள் வயது 22 மற்றும் 20. தமிழ் பேசுவார்கள். பெரியவள் ஓரளவுக்குப் படிப்பாள், சின்னவள் எழுத்துக் கூட்டி மட்டுமே  படிப்பாள். கொஞ்சம் கொஞ்சமாக  மறக்கிறார்கள்.

எனவே அமெரிக்காவில் வளரும் பிள்ளைகளுக்கு தமிழ் கற்றுக் கொடுப்பதோ, தமிழ்மொழியில் ஆர்வம் ஏற்படுத்துவதோ மிகவும் கடினமான காரியம். அது நன்கு தெரிந்திருந்ததால் குறள் தேனீயில் கலந்து கொண்ட பிள்ளைகளின் உழைப்பை என்னால் உணர முடிந்தது.

குறிப்பாக அதில் ஒரு சிறிய பெண், எப்படி மடக்கி மடக்கி கேட்டாலும் அதற்கான திருக்குறளை கொஞ்சமும் யோசிக்காமல் சொன்னாள். அதற்கப்புறம் நாஞ்சில் பீட்டர் அவர்கள் அந்தப் பெண்ணை மேடையில் அழைத்து பாராட்டுப் பத்திரம் கொடுத்தார். அவள் பெயர் அத்விகா. தனது ஏழு வயதில் 1330 குறளையும் பொருளுடன் ஒப்பித்துப் புகழ் பெற்றிருக்கிறாள். அதிலும் ஒரு வார்த்தையைச் சொல்வதோடு அதன் அதிகாரம் மற்றும் அதன் வரிசை எண்ணையும் யோசிக்காமல் சொல்லும் அவள் ஒரு அதிசயப்பிறவிதான்.

Advika Reciting Thirukkural 

இந்தப் பதிவை எழுதும் போது நாஞ்சில் பீட்டர் அவர்களிடம் விவரம் கேட்டு அந்தக் குடும்பத்தை தொடர்பு கொண்டு மேலும் சில தகவல்களைக் கேட்டுப் பெற்றேன்.

அவளின் அம்மாவான  திருமதி பிரசன்னா அனைத்து குறள்களையும் பொருளையும் இடைவெளி இன்றி 3 மணி 52 நிமிடங்களில் சொல்லியிருக்கிறார்.

        அவளின் தந்தை சச்சிதானந்தன் சொல்கிறார், “அத்விகாவிற்கு ஒவ்வொரு நிலையிலும் தமிழ் ஆர்வத்தை ஊட்டி வளர்த்து வருகிறோம். இங்கேயே பிறந்து வளரும் பிள்ளைகளுக்கு ஆங்கில மொழியோடு உள்ள தொடர்பு அலாதியானது. இதனூடே தாய்மொழியுடனான உறவை உயிர்ப்புடன் வைப்பது பெரும் சவாலான கடமை எனலாம். அனைவரும் வீட்டுக்குள்ளே நுழையும்போது காலணியை கழட்டி விடுவது போல் ஆங்கிலத்தையும் உதறிவிட்டு உள்ளே வரவேண்டும் என்பது எங்கள் வீட்டிலே அனைவரும் எழுதப்படாத சட்டமாக கடைப்பிடிக்கிறோம் “, என்று .

Advika' with father, Mother and sister

         மினசோட்டா தமிழ்ச் சங்கம் நிகழ்த்தும் ஒவ்வொரு போட்டியிலும் தனது மூன்று வயது முதல் பங்குபெற்று வருகிறாள் அத்விகா. அவ்வையார் மற்றும் பாரதியாரின் ஆத்திசூடிகளை நான்கு வயதில்  ஒப்புவித்தாள். ஐந்து வயது தொடங்கி ஏழு வயது வரை மூன்று பகுதிகளாக அறம், பொருள், இன்பம் எனும் முப்பாலையும் பொருளுடன் சொல்லி முடித்தாள். மினசோட்டா தமிழ்ச் சங்கத்தின்   "செந்தமிழ்ச் செல்வி", "குறள் மொழியாள்", விரிகுடாக் கலைக்கூடத்தின் " குறள் அரசி " , 2016 பேரவை தமிழ் விழாவில் "குறள் தேனீ" என பல பட்டங்கள் பெற்றாள். நிலா, புறநானூறும் பெண் வீரமும், நேர்மை, ஏன் தமிழ் எனும் தலைப்புகளில் இவர் தந்த மழலை பேச்சுகள் பலரின் கவனத்தையும் கவர்ந்தது. ஹார்வார்ட் பல்கலைகழகத்தில் அமையவிருக்கும் தமிழிருக்கைக்கு நிதி திரட்டுவதில் தனது சேமிப்பிலிருந்து சிறுதொகை அளித்ததுடன், பேரவை விழாவில் கிடைத்த பரிசு பணம் ஐநூறு டாலரையும் தமிழ் இருக்கைக்கு அளித்தது குறிப்பிடத் தக்கது. இது மட்டும் இன்றி தான் செல்லும் இடங்களில் எல்லாம் தமிழிருக்கை பற்றி எடுத்து சொல்லி இந்த நிதி திரட்டலுக்கு உதவி வருகிறாள்.

          சச்சிதானந்தன் மேலும் சொல்கிறார், “திருக்குறள் உட்பட தமிழ் இலக்கியங்களை சின்னசின்ன கதைகள் மூலம் அத்விகாவிடம் கொண்டு செல்லும் பெருமை முழுதும் எனது மனைவி பிரசன்னா அவர்களையே சாரும். குழந்தைக்கு சொல்லிக் கொடுக்க படித்ததால் தானும் திருக்குறள் முழுவதையும் தொடர் பொழிவாய் சொல்ல முடிந்தது என்பார் அவர்”. இந்தப்பெருமைமிகு குடும்பம் மினசோட்டா  மாநிலத்தில் வசித்து வருகிறார்கள் .

          முதல் தலைமுறையில் புலம் பெயர்ந்தவர்கள் தமிழைத் தாங்கிப் பிடிப்பது பெரிய காரியமல்ல. ஏனென்றால் பெரும் பாலானவர்களுக்கு நம் மொழியின் அருமை வெளிநாடு வந்தபின்தான் தெரிய வருகிறது. இதில் இரண்டாவது தலைமுறைக்கு தமிழைக்  கொண்டு போவதுதான் மிகமிகமிக சிரமமான காரியம். அதனைச் செய்யும் தமிழ் உள்ளங்களுக்கு என் வாழ்த்துதல்களும் பாராட்டுகளும். இதில் பலபேர் வெளியிலும் சரி வீட்டிலும் சரி ஆங்கிலம் பேசிக் கொண்டு, தமிழை மறந்து தாய் நாட்டையும் மறந்து முற்றிலுமாக மாறிவிடுகின்றனர். இவர்களுக்கு  நம் நாட்டு நடப்பு கூட சுத்தமாக தெரியாது. "என்ன சிவாஜி  செத்துட்டாரா " கதைதான்.  

நம்நிலை இப்படியிருக்க இலங்கைத் தமிழர்களை பாராட்டியே ஆக வேண்டும்.இன உணர்வும் மொழி உணர்வும் மிகுதியாக உள்ளவர்கள் இவர்கள். இவர்களுள் பெரும்பாலானவர்கள் முதல் தலைமுறை இரண்டாம் தலைமுறை என்று வித்தியாசம் இல்லாமல், எல்லோரும் தமிழ் பேசவும் தமிழ் படிக்கவும் கற்றுக் கொண்டு சரளமாக தமிழ் பேசுகிறார்கள். இவர்களின் விழாக்களில் நம் விழாக்கள் போலன்றி இளைஞர்கள் ஏராளமாக கலந்து கொள்வதைப் பார்த்திருக்கிறேன். பெரும்பாலான திருமணங்களும் அவர்களுக்குள்ளேயே நடக்கிறது.

ஃபெட்னாவும் தமிழ் மொழி வளர்ச்சிக்காக தொடர்ந்து முயற்சி செய்து வருகிறது. ஏனென்றால் நாடிழந்து அல்லது நாடு துறந்து வெளிநாட்டில்  வாழும் நாம் மொழியையும் துறந்தால். நாம் யார் நம் இனம் என்ன என்பது அழிந்துபோய்  நாம் முகமிழந்து உருவிழந்து போய்விடுவோம்.

(தமிழர்  திருவிழா பதிவுகள் தொடரும்.)

மாவீரன் மாவோ சேதுங்!!!!!!!!!

சீனாவில்  பரதேசி 24

Mao 

இதற்கு முந்திய பகுதியைப்படிக்க   இங்கே சொடுக்கவும்.

http://paradesiatnewyork.blogspot.com/2016/09/blog-post_19.html

மாவோ சேதுங்கின் மசூலியத்தில் நுழையும் முன் அவரைப் பற்றிய விவரங்களைத் தெரிந்து கொள்வது நல்லது என்பதால் இந்தப்பதிவில் அவற்றைத் தர முயல்கின்றேன்.

மாவோ சேதுங் சீனாவில் ராணுவப்புரட்சியை மட்டுமல்ல ,பண்பாட்டுப் புரட்சியையும்  ஏற்படுத்திய ஒருவர். 1893 டிசம்பர் 26-ல் ஹியூனன் மாவட்டத்தில் (Hunan Province) உள்ள, ஷாவோஷான் (SHAOSHAN) என்ற ஊரில் பிறந்தார். விவசாயக் குடும்பத்தில் பிறந்த இவர்களுக்கு மூன்று ஏக்கர் நிலம் இருந்தது.  பல  தலைமுறைகளாக அந்த நிலம் மட்டும்தான் தான் இருந்தது. பல சீனக் குடிமக்கள் அப்போது வறுமையில் வாடிய சமயம் அது.  மாவோவின் குடும்பம் எவ்வளவோ பரவாயில்லை. விவசாயம் தவிர மாவோவின் அப்பா தானிய விற்பனையிலும்  ஈடுபட்டிருந்தார். அவர் பெயர் மாவோ ஜெதுங்  (Mao Zedong) மாவோவின் அம்மா வென் சிமெய் (Wen Qimei) மிகவும் அன்பானவர்.

Mao with his brothers and mother and father is in the next photo 

மாவோ எட்டு வயதில் அவர் ஊரிலுள்ள ஒரு சிறு பள்ளியில் சேர்ந்து கொஞ்சம் கல்வி கற்றார். அவருக்கு 13 வயது ஆனபோது அப்பாவின் வயலில் முழுநேர விவசாயப் பணி புரிந்தார். ஆனாலும் எப்போதும் துறுதுறுவென்று ஏதாவது இன்னும் அதிகம் செய்ய வேண்டும் என்ற எண்ண ஓட்டம் இருந்தது.

அவருக்கு 14 வயதான போது, அவருடைய அப்பா அவருக்கு திருமணம் செய்து வைக்க ஆசைப்பட்டார். ஆனால் மாவோ அதை ஒத்துக் கொள்ளவில்லை. அவருக்கு 17 வயதான போது வீட்டைவிட்டு வெளியேறி ஹியூனன் மாவட்டத்தின் தலைநகரான சாங்ஷா (Changsha) என்ற இடத்தில் உள்ள உயர்நிலைப்பள்ளியில்  சேர்ந்தார்.

Mao at young age

19ஆம் நூற்றாண்டின் பிற்பகுதியில் சீனாவை ஆண்ட சிங் (Qing Dynasty) பரம்பரையின் மேல் மக்களுக்கு வெறுப்பு இருந்தது. எனவே ஆங்காங்கே புரட்சிச் சிந்தனைகள் வெளிப்பட்டன. முடியாட்சிக்கு எதிரான சின்ஹுவா புரட்சி  (Xinhuva) வெடித்தது. மாவோ, குவோமின்டாங் (Kuomintang) என்ற தேசியக் கட்சியில் சேர்ந்ததோடு, அதன் புரட்சிப் படையிலும் சேர்ந்தார். Dr.சான் யாட் சென்  (Dr.Sun Yat Sen) தலைமையில் குவோமின்டாங், 1912ல் முடியாட்சியைத் தகர்த்து சீனக்குடியரசை உருவாக்கியது. மாவோவும் சீனாவின் புதிய எதிர்காலத்தை மனதில் வைத்து தீவிர அரசியலில் ஈடுபட ஆரம்பித்தார்.

Dr.Sun Yat Sen

மாவோ 1918ல் பீகிங் பல்கலைக்கழகத்தின் ஹுயூனன்  பள்ளியில் ஆசிரியராக பட்டம் பெற்றார் . அதே ஆண்டில் அவருடைய அன்பு அம்மா இறந்து போனதால், வீட்டுக்குத் திரும்பும் விருப்பம் குறைந்து  போனது. அங்கிருந்து பீஜிங் வந்து சிறிது காலம் வேலை தேடியலைந்து எதுவும் கிடைக்காதலால், பீஜிங் பல்கலைக் கழகத்தின் நூலகத்தில் உதவியாளராக சேர்ந்தார். அந்தச் சமயத்தில்தான் வெற்றிகரமாக நடந்த ரஷ்யப் புரட்சியைப் பற்றியும், கம்யூனிஸ்ட் சோவியத் யூனியன் அமைந்ததைப் பற்றியும் அறிந்து கொண்டார். அதன்பின் 1921ல் உதயமான சீனக்கம்யூனிஸ்ட் கட்சியை உருவாக்கிய வர்களில் இவரும் ஒருவர்.

சீனக்கம்யூனிஸ்ட் கட்சி வெகுவாக  வளர்ந்ததால் சன் யாட் சென், அவர்களோடு ஒத்துழைப்புடன் செயல்பட்டார்.  மாவோ இரு கட்சிகளுக்கும் ஆதரவாளராக முதலில் இருந்தாலும், லெனினின் கருத்துக்களில் பெரிதும் ஈர்க்கப்பட்டார். சீனக்கம்யூனிஸ்ட் கட்சியில் சிறிது சிறிதாக வளர்ந்து  ஷங்காய்  பகுதியின் தலைவராக உருவெடுத்தார்.  

மார்ச் 1925ல் சீன அதிபராக இருந்த சான் யாட்சென் இறந்து போனதால் அவருடைய சீடர், சியங் கைஷேக் குவோமின்டங்கின் தலைவரானார். 

Chiyang Kai-shek

இவர் சன் யாட்சென்னைப் போலன்றி, மிகவும் பழைய வழக்கங்களில் ஊறியிருந்தார். எனவே ஏப்ரல் 1927ல் கம்யூனிஸ்ட்டுகளிடம் செய்த ஒப்பந்தத்தை முறித்து கம்யூனிஸ்ட்களை ஒழிக்க முனைந்து பல பேரைக்  கொன்றார். அதே ஆண்டு செப்டம்பரில் மாவோ, விவசாயிகளை ஒன்றிணைத்து ஒரு படையை உருவாக்கி அரசாங்கத்தைத்  தாக்கினார். ஆனால் குவோமின்டங் அரசுப்படைகள் அதை முறியடித்து அவர்களை விரட்டியடித்தனர். மாவோ எஞ்சிய மக்களுடன் ஜியாங்ஸி பகுதிக்கு (Jiangxi).  தப்பியோடினார் . அங்கே அந்த மலைப்பகுதியில் சோவியத் சீனக்குடியரசை நிறுவி அவரே அதன் சேர்மன் ஆனார். அதன்பின் சிறிய ஆனால் வலிமையான ஒரு கொரில்லாப்படையை உருவாக்கி, கம்யூனிஸ சட்டத்தை எதிர்ப்பவர் மற்றும் மீறுபவர்களை சித்தரவதை செய்து கொல்ல உத்தரவிட்டார்.

1934ல் பத்துக்கு மேற்பட்ட மாவட்டங்கள் கம்யூனிஸ்ட் ஆட்சியில் இணைக்கப்பட்டன. இதனால் ஆத்திரப்பட்ட சியங்  காய்ஷேக் சிறுசிறு தாக்குதல்களை நடத்தினார். ஆனால் அது உதவாதலால் 1934 அக்டோபர் மாதம் கம்யூனிஸ்ட்களை முற்றிலும் ஒழிக்க 10 லட்சம் பேர் கொண்ட அரசுப்படைகளை அனுப்பினார். மற்ற தலைவர்கள் ராணுவத்தை எதிர்க்க வேண்டும் என்று ஆத்திரப்பட்டாலும், மாவோ அது ஞானமற்ற செயல் என்று மறுத்து, பின்வாங்குவதே  நல்லது என்று  முடிவெடுத்தார். எனவே மலைப்பகுதிகளில் சுமார் 1 லட்சம் கம்யூனிஸ்ட்கள் மற்றும் அவர்களின் குடும்பத்தினரோடு, ஒரு வருடம் மலைக்காடுகளில் சுமார் 8000 மைல்கள் கடந்து வந்தனர். கடினமான அந்தப்பயணத்தை 'லாங் மார்ச்' என்று அழைக்கிறார்கள். கடும் குளிருக்கும், பஞ்சத்துக்கும் 70 ஆயிரத்துக்கும் மேற்பட்ட கம்யூனிஸ்ட்கள் இறந்து போனார்கள்.

அதன் பின் மாவோ சென்ற அந்தப் பகுதிகளில் தன்னுடைய பேச்சுத்திறமையால் பல இளைஞர்களை கட்சியுடன் இணைத்தார். கம்யூனிஸ்ட் கட்சியின் தன்னிகரற்ற தலைவராக வளர்ந்தார்.  

இதற்கிடையில் 1937ல் ஜப்பானின் படைகள் சீனாவில் நுழைந்து அதகளம் செய்து பல பகுதிகளைப் பிடித்துக் கொண்டனர். சீன அதிபர் சியங் கைஷேக்  தலைநகர் நான்கிங்கை விட்டு தப்பியோட நேர்ந்தது. கடற்கரை நகரங்கள் மற்றும் பல பெரிய நகரங்கள் ஜப்பானின் கட்டுப்பாட்டுக்குள் வந்தன. சியங் இருபுறமும் நெருக்கிய சண்டையைச் சமாளிக்க முடியாமல் கம்யூனிஸ்ட்களிடம் சமாதானம் பேசி ஜப்பானுடன் சண்டையிட அவர்களின் உதவியை நாடினார். கூட்டு ராணுவத்தின் தலைவராக மாவோ இருந்தார். 1945ல் ஜப்பானியர் தோற்கடிக்கப்பட்டனர்.

அமெரிக்க அரசின் மத்தியஸ்தத்துடன் இருபெரும் கட்சிகளும் இணைந்து ஒரு அரசை ஏற்படுத்தினர். ஆனால் அது உள்நாட்டுப் போரில் முடிந்தது. அக்டோபர்   1, 1949-ல் மாவோ இதே டியன்மனன்  சதுக்கத்தில் சீனமக்கள் குடியரசை நிறுவினார். சியங் கைஷேக்கும் அவரைப் பின்பற்றியவர்களும் தைவானுக்குத் தப்பிச்சென்று அங்கு சீனக் குடியரசை உருவாக்கினார்.

Mao in Military Uniform

மாவோவின் சில திட்டங்கள் சீனாவின் முன்னேற்றத்திற்கு உதவியது. பல உதவவில்லை. அவருடைய ஆட்சியில் வந்த பஞ்சத்தில் 40 மில்லியன் சீன மக்கள் அழிந்தனர். எனவே அவர் ஓரம் கட்டப்பட்டார். 1960 முதல் 1966 வரை தலைமையை இழந்த அவர் தன் 73-ஆவது வயதில் தலைமைக்குத் திரும்பினார். சீனாவின் வளர்ச்சிக்கு பல முயற்சிகளை எடுத்தார். 1972ல் அமெரிக்க அதிபர் நிக்சனைச் சந்தித்தார். உலக நாடுகளுடன் உறவைப் புதுப்பிக்க முயற்சித்தார். ஆனாலும் ஒரு வெற்றிகரமான ராணுவத்தலைவராக உருவெடுத்த அவருக்கு, நாட்டை வளர்ச்சியின் பாதையில்  நடத்த முடியவில்லை. இறுதியில் மாவோ1976ல் தன் 82-ஆவது வயதில் பீஜிங்கில் இறந்தார்.

இப்போது நிம்மதியாக உறங்கும் சேர்மன் மாவோ சேதுங்கைப் பார்க்க வாருங்கள் உள்ளே போவோம்.

-தொடரும்.