சீனாவில், நான்கு முறை அழிந்து எழும்பிய நானூறு வருட கத்தோலிக்க ஆலயம் !!!!!!

சீனாவில் பரதேசி 30

Cathedral of the Immaculate Conception

இதற்கு முந்திய பகுதியைப்படிக்க  இங்கே சொடுக்கவும்.

http://paradesiatnewyork.blogspot.com/2017/01/blog-post_5.html

"ஆரம்ப காலம் போல அல்லாது இப்போதெல்லாம் கம்யூனிச அரசாங்கம் மத விஷயங்களில் தலையிடுவதில்லை. எனவே இங்கு எல்லா மதத்தினரும் அவரவர் மதங்களை கடைப்பிடிப்பதற்கும் விழாக்கள் கொண்டாடுவதற்கு அனுமதியிருக்கிறது”.

"மதமென்று பார்த்தால் இங்கு எந்த மதத்தினர் அதிகமாக வாழ்ந்திருக்கிறார்கள் ?”. “புத்தமதம் அதிகம் என்று சொல்லலாம். டாவோயிசமும் இருக்கிறது. கிறிஸ்தவர்கள் மிகவும் குறைவு. எந்த மதத்தையும் சாராதவர்களும் அதிகமாக இருக்கிறார்கள்”.

"சரி இந்த ஆலயத்திப் பற்றி மேலும் விவரங்களைச் சொல்லு"

“முதலில் சேப்பல் என்று அழைக்கப்படும் சிற்றாலயமாக அமைக்கப்பட்டு பின்னர் விரிவு படுத்தப்பட்டு பேராலயமாக ஆக்கப்பட்டது. 1650ல் சிங் வம்சத்தைச் சேர்ந்த ஷின்ஜி பேரரசர், அவர் ஆட்சிக்கு வந்த ஏழாவது வருடத்தில் ஜெர்மனியிலிருந்து வந்த ஜேஸுட் பாதிரியாரான ஜோகன் ஆடம் ஷ்கால் வான்பெல் (Johann Adam Schall Von Bell) என்பவருக்கு விரிவாக்கத்திற்கு அனுமதி வழங்கினான்.அப்போது ஆரம்பித்து இரண்டு வருடங்களில் இந்தப் பேராலயம் கட்டி முடிக்கப்பட்டது.

From outside( I am standing in the front)

ஷுன்ஜி பேரரசர் பாதிரியாரோடு  மிகவும் நட்பு பாராட்டியதோடு 24 முறை இந்த பேராலயத்துக்கு வந்து சென்றாராம்.

கி.பி.1690ல் பீஜிங் தனது முதல் ரோமன் கத்தோலிக்க பிஷப்பான ஃபிரான்சிஸ்கன் பெர்னட்டின் டெலா சிசியா வை பெற்றது. அது முதல் இதற்கு ஒரு பேராலய( கதீட்ரல்) அந்தஸ்து கிடைத்தது. அதுமட்டுமல்ல பலமுறை அழிந்தாலும் மறுபடியும் மறுபடியும் இந்த ஆலயம் மீண்டு வந்தது என்பதைக் கேள்விப்பட்ட போது மிகவும் ஆச்சரியமாக இருந்தது. தொடர்ந்து சொல்கிறேன்.

கி.பி. 1703ல் காங்லி பேரரசரின் 24 ஆவது ஆண்டு ஆட்சியில் அவரின் உதவியோடு இது மராமத்து செய்யப்பட்டு விரிவாக்கம் செய்யப்பட்டது. அப்போது ஐரோப்பிய கட்டிடக்கலை நடைமுறைப்படுத்தப்பட்டது. ஆனால் 1720-ல் பீஜிங்கில் ஏற்பட்ட நில நடுக்கத்தால் இந்த ஆலயம் முற்றிலும் அழிந்து போனது. மீண்டும் சிலுவை வடிவத்தில் எழும்பிய ஆலயம் 1730ல் மீண்டும் வந்த நில நடுக்கத்தால் சிதிலமடைந்து போனதாம்.

ஆனால் அப்போதிருந்த யாங் செங் (Yang zhang) பேரரசர் 1000 வெள்ளிக்காசுகளை அளித்து அதனை மறுபடியும் கட்ட உதவியிருக்கிறார்.

1775ல் அந்தோ இது தீ விபத்தில் முற்றிலும் எரிந்து போனது. அப்போது தன்னுடைய 40 ஆவது ஆண்டுஆட்சியில் இருந்த சிங்லாங் பேரரசர் இதனை மறுபடியும் கட்ட 10 ஆயிரம் வெள்ளிக்காசுகளைக் கொடுத்திருக்கிறார்.  

இப்படி கத்தோலிக்க ஆலயம் சீன நாட்டில் சீரோடு வளர்ந்து வரும் வேளையில், ஒரு பெரும் பிரச்சனை வந்தது. கி.பி.1838ல் தனது 14 ஆம் ஆண்டு ஆட்சிக்கட்டிலில் அமர்ந்திருந்த டாவோ குவாங் பேரரசர் ,பல குழப்பங்கள் நிலவிய சூழ் நிலையில், சீனாவில் கத்தோலிக்க ஆலயங்களைத் தடை செய்தார். அதனால் இந்த ஆலயம் அரசால் கைப்பற்றப்பட்டு அதில் நடந்து வந்த ஆராதனைகள் நிறுத்தப்பட்டன. அதன்பின் இரண்டாவது ஓப்பியம் யுத்தமெல்லாம் முடிந்தபின் கி.பி. 1860ல் தான் இது மீண்டும் திறக்கப்பட்டது. அப்போது அதன் பிஷப்பாக வந்தவர் ஜோசப் மார்ஷியல் மெளலி ( Joseph Martial Mouli) என்பவர்.

அதன் பின்னர் 1900ல் பாக்சர் புரட்சி நடைபெற்றபோது சீனா முழுவதிலும் இருந்த எல்லா கத்தோலிக்க ஆலயங்களும் அடித்து நொறுக்கப்பட்டன. அவ்வமயம் இந்தப் பேராலயம் தீக்கிரையாக்கப்பட்டு முற்றிலும் தூர்ந்து போனது.

Arch Bishop Joseph Li Shan

நான்கு ஆண்டுகள் கழித்து நான்காவது முறையாக மீண்டும் இந்தப் பேராலயம் எழுப்பப்பட்டது. அதுதான் இன்று வரை நிலைத்திருக்கிறது.

இப்போது தினமும் அதி காலையில் சீன மொழியிலும், ஞாயிறுகளில் ஆங்கில மற்றும் இத்தாலிய ஆராதனைகளும் இங்கு நடக்கின்றன. இந்த வளாகத்தில் தான் சீனக் கத்தோலிக்க தலைமை குருவான ஆர்ச் பிஷப் ஜோசப் லி ஷான்  என்பவர் இருக்கிறார்.

சமீபத்தில் கிறிஸ்துமஸ் விழா நடந்ததென் அடையாளங்கள் இருந்தன. ஐரோப்பியக் கட்டிடக்கலையில் உள்புறம் அற்புதமாக இருந்தது. உள்ளே அமைதியாக சில நிமிடங்கள் அமர்ந்து பிரார்த்தனை செய்தேன்.  புதுவருடமும் அதுவுமாக ஆலயத்தில் அந்த நாளை ஆரம்பித்தது மனதுக்கு மகிழ்ச்சியைக் கொடுத்தது.

வெளியே வந்து  லீக்கு நன்றி சொல்லி “அடுத்து எங்கே?” என்றேன்.

“அடுத்து ஒரு டாவோ ஆலயம்” என்றான்.

"ஏன் நீ போக வேண்டுமா புது வருடத்திற்கு?

“இல்லை உன்னைத்தான் கூப்பிட்டுப் போகிறேன். மற்ற நம்பிக்கைகளை பற்றியும் உனக்குத் தெரிய வேண்டுமல்லவா”.

“நல்ல ஐடியாதான் போகலாம்”.

அங்கிருந்து ஒரு கேப்பை பிடித்து அரைமணிநேரத்தில் ஒரு ஆலயத்திற்குச் சென்றோம்.

“இதன் பெயர் என்ன லீ?”.

“இதன் பெயர் வெள்ளை மேக ஆலயம் (White Cloud Temple) டாவோயிஸக் கோவில்களின் முக்கிய மூன்று இடங்களில் இதுவும் ஒன்று ஆகும். இது சொர்க்கத்தின் கீழுள்ள முதல் ஆலயம் (The First Temple Under Heaven) என்றும் சொல்கிறார்கள்”.

White cloud Temple

இப்போதுள்ள ஆலயம் 14 ஆம் நூற்றாண்டில் மிங் வம்சத்தால்  கட்டப்பட்டது. ஆனால் இதே இடத்தில் 8 ஆம் நூற்றாண்டு முதலே ஆலயமிருக்கிறது. 1215ல் மங்கோலியரின் ஆக்கிரமிப்புக்கு முன்னால் முக்கிய அரசியல் முடிவுகள் எடுக்கும் இடமாக இது செயல்பட்டிருக்கிறது.

1222ல் டாவோயிஸ குரு குயு (Qiu) என்பவர் ஜெங்கிஸ்கானைச் சந்தித்து டாவோயிஸத்தின் விளக்கத்தைக் கொடுத்தார். அவருடைய நினைவகமும் இதன் உள்ளே இருக்கிறது. அதன் மேல்தான் இந்தக்கோவில் கட்டப்பட்டிருக்கிறது.

நாட்டில் பலவித மாறுபாடுகள் ஏற்பட்டாலும்  ஆலயம் அதனால் பாதிக்கப்படாமல் பாதுகாக்கப்பட்டது.

Forgot to remove the mask for pollution 

1949ல் நடந்த கம்யூனிஸ் புரட்சியின் போது  மூடப்பட்டது. ஆனால் திரும்பவும் திறக்கப்பட்டு இப்போது முழுவதும் செயல்படும் ஆலயமாக இருக்கிறது.

உள்ளே சில படங்கள் எடுத்தோம். அதன்பின் சாப்பிடப் போகலாம் என்றேன் லீயிடம்.

“பக்கத்தில் நல்ல திபெத் உணவகம் இருக்கிறது, அங்கே போகலாம்”, என்றான்.

தொடரும். 

பின்குறிப்பு :

"சீனாவில் பரதேசி" அடுத்த பகுதியில் முடியும் .விரைவில் எதிர்பாருங்கள் “இலங்கையில்  பரதேசி”.உங்களின் தொடர்ந்த ஆதரவுக்கு நன்றி

முதுகெலும்பில்லாத தமிழ் சமூகம் !!!!!

தமிழ்நாட்டில் என்னதான் நடக்கிறது? முதலில் ஜல்லிக்கட்டுக்குத் தடை. இப்போது பொங்கல் தினம் தேசிய விடுமுறை நாளிலிருந்து நீக்கப்படுகிறது.

முதுகெலும்பாத சமூகமாக தமிழ் சமூகம் மாறிவருகிறது. நெஞ்சை நிமிர்த்தி விழுப்புண்களை வாங்கி, தப்பித்தவறி முதுகில் புண்பட்டால் உயிரை விட்டு மானத்தோடு வாழ்ந்த சமூகம் இது. யார் வந்தாலும் வாருங்கள், தலைகுனிந்து இடுப்பை வளைத்துக் கும்பிடுவோம், தாள் பணிவோம், காசுக்கு ஆள் சேர்ப்போம் , தகுதியாவது ஒன்றாவது, பணமும் பதவியும் மட்டுமே எங்களுக்கு முக்கியம். பொதுமக்களோ, நாட்டு முன்னேற்றமோ ம்ஹும் அதைப்பற்றி எல்லாம் எங்களுக்கு கவலையில்லை. எலும்பைப் போட்டால் நாய் வாலாட்டாமல் போய்விடுமா?.நம்ம மக்கள் தானே காசைக் கொடுத்தால் ஓட்டுப் போடுவார்கள்.

Add caption

 இதோ ஜல்லிக்கட்டு மற்றும் பொங்கலைத் தொடர்ந்து வரும் புதிய உத்தரவுகள். முடிந்தால் தடுத்துப்பாருங்கள்.

1.   பொங்கல் விழா தடை செய்யப்படுகிறது. பொங்கல் மற்றும் கரும்பு சாப்பிடுவதற்கும் தடை.

2.   இட்லி, தோசை, அரிசி உணவுகள் முற்றிலுமாக தவிர்க்கப்பட்டு சப்பாத்தி, ரொட்டி போன்ற கோதுமை உணவுகள் மட்டுமே உட்கொள்ள ஆணை பிறப்பிக்கப்படுகிறது.

3.   சாம்பார் ரசம், மோர் ஆகியவை ஒதுக்கப்பட்டு, தடுக்கா நவரத்தன் குருமா, சன்னா   மசாலா ஆகியவை அறிமுகப்படுத்தப்படுகின்றன.

4.   வேட்டி கட்டுவது முற்றிலுமாகத் தடை செய்யப்படுகிறது. இனிமேல் தார் பாட்சா, குர்தா ஆகியவற்றை மட்டுமே அணிய வேண்டும்.

5.   சேலை கட்டுவது மொத்தமாக நிறுத்தப்பட்டு சுரிதார் தேசிய உடையாக அறிமுகப்படுத்தப்படுகிறது.

6.   தமிழ்மொழி பேசினால் அபராதம் விதிக்கப்படுகிறது. தமிழ்மொழி தவிர வேறு எந்த மொழியையும் பேசத்தடை இல்லை.

7.   ஆட்சி மொழியாக சமஸ்கிருதமும், பேச்சு மொழியாக இந்தியும் இனி நடைமுறைப்படுத்தப்படும்.

8.   தமிழகத்தின் காய்கறிகளான கத்திரிக்காய், முருங்கைக்காய் ஆகியவை ஒழிக்கப்பட்டு ,உருளை, முட்டைக்கோஸ், பீட்ரூட் மட்டுமே உண்ண  பணிக்கப்படுகிறது.

9.   நெல் பயிரிட தடை செய்யப்படுகிறது. வேணுமென்றால் பாசுமதி மட்டுமே பயிரிடலாம். மற்றபடி கோதுமைக்குத் தடையில்லை.

10.                தமிழ்த் தொலைக்காட்சிகள் முற்றிலுமாக தூர்தர்ஷனாக மாற்றப்படுகிறது.

11.                தமிழ் விளையாட்டுக்களான கிட்டிப்புள், ஆடுபுலி ஆட்டம், பரமபதம், பல்லாங்குழி, கண்ணாமூச்சு, கிச்சு கிச்சுத்தாம்பாளம் ஆகியவை ஒழிக்கப்படுகின்றன. 

12.                தமிழ் தெய்வங்களான, முருகன், மதுரை வீரன், முனியாண்டி, பாண்டி முனி, காளி, முத்தாலம்மன், இசக்கி, கண்ணகி ஆகியவை  தடை செய்யப்படுகின்றன.

13.                முருகனின் அறுபடை வீடுகள் , தொல்பொருள் ஆராய்ச்சிக்கழகத்தின்  மூலம் தேசிய   உடமை ஆக்கப்படுகின்றன.

14.                தமிழ்நாடு என்ற ஒன்று இனிமேல் இல்லை. மராட்டியர் ஆண்ட திருச்சி, தஞ்சாவூர் மகாராஷ்டிரத்துடன் இணைக்கப்படுகிறது. திருநெல்வேலியும் கன்னியாகுமரியும்,கோயம்புத்தூரும் கேரளத்துடனும் சேருகிறது. காஞ்சிபுரமும், சென்னையும் ஆந்திரத்துடன் இணைகிறது. வேலூர், தர்மபுரி, ஓசூர் கர்நாடகத்துடன் வருகிறது. ராமநாதபுரமும் ராமேஸ்வரமும் கச்சத்தீவு போல இலங்கைக்குத் தாரை வார்க்கப்படுகிறது.

கற்பனையில் எழுத்துவதற்கே கை நடுங்குகிறது. இதுவே உண்மையானால். 

இந்த லட்சணத்துல பொங்கல் வாழ்த்து எப்படி சொல்றது ?

 இருந்தாலும் தடை  செய்யும்வரை சொல்லித்தானே ஆகவேண்டும் .

நண்பர்கள் அனைவருக்கும் என் இனிய பொங்கல் வாழ்த்துக்கள்.

பின் உரையாடல் :

"ஆமா  சேகரு தலைப்புல முதுகெலும்பு   இல்லாத சமூகம்னு போட்டிருக்கியே , அதுக்கு என்னடா அர்த்தம் ?"

"அதுவாடா மகேந்திரா , அதான் நல்லா  குனிஞ்சு   வளைஞ்சு கும்பிடுறாய்ங்களே அதைத்தான்   சொன்னேன்".

மு.க. ஸ்டாலின் முன்னால் உள்ள சவால்கள் !!!!!!!!

1966ல் இளைஞர் அமைப்பாளராக தி.மு.கவில்   இணைந்து, 23 வயதில் மிசாவில் சிறை சென்று, சட்ட மன்ற உறுப்பினர், சென்னை மாநகர மேயராக மக்களால் இருமுறை தேர்ந்தெடுக்கப்பட்டு பின் உள்துறை மந்திரியாக வளர்ந்து, துணை முதல்வராக உயர்ந்து, 2015ல் சட்டமன்றத் தேர்தலைத் தனியாகச் சந்தித்து அதிக இடங்களை வென்று, தற்சமயம் சட்ட மன்ற எதிர்க்கட்சித் தலைவராக இருக்கும் ஸ்டாலின் அவர்கள் இப்போது திமுகவின் செயல் தலைவர்.

அவர் திமுகவின் செயல்படும் தலைவராகி பல ஆண்டுகள் ஆனாலும் இந்தப் பொறுப்பு தாமதமாக வந்தாலும், கருணாநிதியின் காலத்திலேயே இது வந்தது மிகவும் நல்லது. இதைத்தான் நானும் என்னுடைய முந்தைய பதிவு ஒன்றில் சொல்லியிருந்தேன். ( http://paradesiatnewyork.blogspot.com/2016/05/blog-post_31.html) என்ன, கருணாநிதியும் பொதுக்குழுவுக்கு வந்திருந்தால் நன்றாக இருந்திருக்கும்.

ஆனாலும் அன்பழகன் மற்றும் துரைமுருகன் புடைசூழ ஸ்டாலின் கருணாநிதியிடம் ஆசி வாங்கும் புகைப்படம் ஒன்று   போதும், இது கருணாநிதியின் சம்மதத்துடன் நடந்த ஒன்று தான் என்று நிரூபிக்க. அதோடு பேராசிரியர் அன்பழகன் அவர்களும் மிகப்பெரிய தலைவர்தான். திமுகவின் பொதுச் செயலாளரான அவர் தலைமையில் பொதுக்குழு நடந்ததும் ஒன்றும் குறைவானதில்லை.

பொறுப்பு ஏற்ற முதல் நாளே முதலமைச்சரை(?) நேரில் சந்தித்து சில கோரிக்கைகளை வைத்தது, மிகவும் நல்ல காரியம்

செயல்தலைவர் என்பது தலைவருக்கு இணையான பதவி என்பதோடு இது பதவியல்ல பெரும் பொறுப்பு என்று முகஸ்டாலின் சொல்லியிருக்கிறார். சொல்வதோடு அதை உணர்ந்து செயல்பட்டால் திராவிட இயக்கம் பாதுகாக்கப்பட்டு அதனை  அடுத்த தலைமுறைக்கு  எடுத்துச்செல்ல  முடியும்.

மு.க.ஸ்டாலின் முன் உள்ள சவால்களை ஒவ்வொன்றாக பார்ப்போம்.

1.   ஆரோக்கியமான அரசியலை முன்னெடுத்து கடந்த கால எதிர்க்கட்சி  என்றில்லாமல் எதிரிக்கட்சி நிலை போன்ற கசப்பான நினைவுகளை களைய வேண்டும்.

2.   எல்லாத் தலைவர்களுடனும் பொது நிகழ்வுகளிலும், தனிப்பட்ட குடும்ப நிகழ்ச்சிகளிலும் கலந்து கொண்டு காழ்ப்புணர்ச்சி அரசியலை கட்டுப்படுத்த வேண்டும்.

3.   “மக்கள் பணியே மகேசன் பணி”  என்று  செயல்பட்டு எந்த முடிவினை எடுத்தாலும் அது மக்களுக்கு உதவுமா இல்லையா  என்று பார்த்து எடுக்க வேண்டும்.

4.   உடனடியாக குடும்ப உறுப்பினர்களை முதலில் தனித்தனியாகவும் பிறகு மொத்தமாகவும் சந்தித்து குடும்ப ஒற்றுமையை நிலை நிறுத்த வேண்டும். இதுதான் ஸ்டாலினின்  தலையாய தலைவலி.

5.   அண்ணன்தானே என்பதால் எந்த விதத்தயக்கமும் இன்றி முக.அழகிரியை மதுரைக்கே சென்று சந்தித்து மனக்கசப்புகளையும் மனவேறுபாடுகளையும் களைய வேண்டும். தேவைப் பட்டால் முக.அழகிரியின் மகனுக்கு ஏதாவது பொறுப்புக் கொடுக்கலாம்.

6.   கனிமொழியையும் ராசாத்தி அம்மாவையும் சந்தித்து, எந்தப் பயமும் வேண்டாம் என்று உற்சாகப் படுத்தி தொடர்ந்து கட்சிப் பணிகளில் ஈடுபடுத்தலாம். அவர் மேல் உள்ள குற்றச் சாட்டு நீங்கும்வரை அரசுப் பணிகள் கொடுப்பதை தவிர்ப்பது நலம்.

7.   முடிந்த அளவுக்கு குடும்ப உறுப்பினர்களுக்கு கட்சிப்பதவி வழங்காமல் மற்ற பொறுப்புகளைக் கொடுக்கலாம்.

8.   கட்சிக்குள் கட்டுப்பாட்டை கொண்டுவந்தாலும் ஒரு நல்ல ஜனநாயக அமைப்பாக செயல்பட உறுதியெடுக்க வேண்டும்.

9.   ஊழலில் ஈடுபட்டு வெளியே தெரிந்தும், தெரியாமலும் இருக்கும் பழம்பெருச்சாளிகளை ஓரம் கட்டி பதவி நீக்கி, கட்சிப் பணியில் ஈடுபடுத்த வேண்டும்.

10.                எல்லோரும் குறிப்பாக கட்சித் தொண்டர்கள் இலகுவில் அணுக முடியும் தலைவராக விளங்க வேண்டும்.

11.                தலைவர்களின் தலைவர் என்பதைவிட தொண்டர்களின் தலைவர் என்பது தான் எப்போதுமே உயர்வைத்தரும்.

12.                அடுத்தக் கட்ட தலைவர்களை உருவாக்க முயன்று திமுகவில் திறமையான பலரை தயார்ப்படுத்த வேண்டும்.

13.                அண்ணா அறிவாலயத்தில் அன்பழகன் தலைமையில் திராவிடப் பல்கலைக்கழகம் அமைத்து, திமுகவின் சட்டமன்ற, பாராளுமன்ற உறுப்பினர்களாக விரும்புவர்கள், கட்சிப் பொறுப்புகளுக்கு வருபவர்கள் என எல்லோரும் அதில் பயின்று சான்றிதழ் பெறுவது அவசியம் என்ற நிலையினைக் கொண்டு வரவேண்டும்.

14.                திமுகவின்  சட்டமன்ற உறுப்பினர்கள் உட்பட பொறுப்பிலிருக்கும் அனைவருக்கும் கணிணிப் பயிற்சி அளித்து அடுத்த கட்ட தலைமைக்கு ஆயத்தப்படுத்த வேண்டும்.

15.                தலைமைப் பொறுப்புகளுக்கு மேலிருந்து கீழ் என்றில்லாமல் கீழிருந்து மேல் என்று கொண்டுவரும் நிலையை உருவாக்க வேண்டும்.

16.                கட்சியின் உறுபினர்களிடம் மாத உறுப்பினர் தொகை வசூலிக்கப்பட்டு கட்சியின் கிளைக்கழக பொறுப்பாளர்களுக்கு ஊதியம் வழங்கலாம்.

17.                கிராமங்களில் வளர்ச்சிப் பணிகளை முன்னெடுத்து எல்லாவற்றுக்கும் அரசாங்கத்தை எதிர்பார்க்காமல் கட்சியின் நிதியிலிருந்து செலவழித்து சிறுசிறு பணிகளைச் செய்து முடிக்க வேண்டும். கிராமத்து மக்களும் இத்தகைய பணிகளுக்கு மனமுவந்து உதவுவார்கள். அந்த ஒரு நம்பிக்கையை ஏற்படுத்தி கணக்கு வழக்குகளை பகிரங்கமாக அறிவிக்க வேண்டும்.

18.                ஓட்டுக்கு காசு கொடுக்கும் வழக்கத்தை முற்றிலுமாக ஒழிக்க வேண்டும். எப்போதும் மக்கள் பணி செய்வது திமுகதான் என்றால் மக்கள் மகிழ்ச்சியுடன் உதவுவார்கள்.

19.                எதிர்க்கட்சியாக இருப்பதால் எல்லாவற்றையும் எதிர்க்காமல் எதிர்க்க வேண்டியவற்றை எதிர்த்து, பாராட்ட வேண்டியதை பாராட்டி, வரவேற்க வேண்டியதை எதிர்த்து நல்ல அரசியல் செய்ய வேண்டும்.

20.                எதிர்க்கட்சியில் இருந்தாலும் ஆளுங்கட்சியில் இருந்தாலும் தமிழ்நாட்டின் ஒட்டு மொத்த வளர்ச்சியை முன்னெடுத்து நாடு நல்ல வளர்ச்சியடைய பாடுபட வேண்டும்.

எந்த ஒரு எதிர்க்கட்சியினையும் குறைவாக மதிப்பிடாமல் இருந்து,    இவற்றையெல்லாம் கடைப்பிடித்தால் மு.க.ஸ்டாலின் தனிப் பெருந்தலைவராக உருவெடுத்து மக்கள் மனதில் நீங்காத இடம் பிடிக்கலாம்.  திராவிட இயக்கத்தை அடுத்த தளத்திற்கு எடுத்துச் சென்று சாதி சமய வேறுபாடில்லாத சமத்துவ சமுதாயத்தை அமைக்கலாம்.