ஜெயலலிதாவின் சோக முடிவு !!!!!!!!!!!

படித்ததில் பிடித்தது

மைசூரு முதல் போயஸ் கார்டன் வரை

மு.நியாஸ் அகமது - விகடன் பிரசுரம்.

ஜெயலலிதா என்ற மாபெரும் ஆளுமை மறைந்தபின் அ.தி.மு.க பல அணிகளாக உடைந்து பிரிந்து, சரிந்து காணப்படுகிறது. இப்படி இருப்பதற்கும் அவரே காரணம்.

எம்ஜியார் என்ற ஒற்றை ஆளுமை, கருணாநிதி என்ற பெரும் சக்தியை எதிர்த்து வெளியே வந்து அதிமுக கட்சியை கட்டமைத்து பத்து ஆண்டுகளுக்கும் மேலாக அசைக்க முடியாத சக்தியாக இருந்தது எம்ஜியாரின் ரசிகர்கள் என்ற பெரும் தொண்டர் பலத்தால்தான். நெடுஞ்செழியன், ஆர் எம் வீரப்பன், பண்ருட்டி ராமச்சந்திரன், திருநாவுக்கரசர் போன்ற இரண்டாம் கட்ட தலைவர்கள் பலர் இருந்தாலும் கட்சியின் வாரிசு என்று ஒருவரை சுட்டிக் காட்டாமலேயே எம்ஜியார் மறைந்தார். அதே தவறைத்தான் ஜெயலலிதாவும் செய்திருக்கிறார். எம்ஜியாருக்குப்பின் கட்சியை கட்டுக்கோப்பாக கொண்டு செல்ல ஜெயலலிதா இருந்தார். ஆனால் அதிமுகவில் ஜெயலலிதா பொறுப்பேற்ற பின் முதலில் செய்தது எம்.ஜியார் காலத்து இரண்டாம் கட்டத் தலைவர்களை ஒழித்துக் கட்டியதுதான். அதே சமயத்தில் அடுத்த தலைவராக ஜெயலலிதா கைகாட்டும்  அளவுக்கு அதிமுகவில் யாரும் இல்லை என்பதும் உண்மை. இரண்டாம் கட்டம் மட்டுமில்லாமல் மூன்றாம் நான்காம் நிலைத்தலைவர்களும் இல்லை.

Jaya with his brother with their mother Sandhya

பெரியார், அண்ணாவின் திராவிட சமத்துவ கொள்கைகள் எம்ஜியார் இருக்கும்போது பெருமளவிற்கு பின்பற்றப்பட்டது கூட ஜெயலலிதா காலத்தில் முற்றிலுமாக கைவிடப்பட்டது. கொள்கைப்பிடிப்பு எதுவுமில்லாத சுயநலமிக்க ஒரு பெருங் கூட்டமாகவே அதிமுகவின் கூடாரம் காணப்பட்டது. தன் தனிப்பட்ட ஆளுமையின் மூலம் எம்ஜியாரின் தொண்டர்களையும்,  ஒரு பெண் என்பதால் தாய்மார்களையும் கவர்ந்த ஜெயலலிதா ஒரு தனிப்பெரும் சர்வாதிகாரியாக இருந்தார். ஆனால் மக்கள் அவர் மீது வைத்திருந்த பாசத்திற்கும் நேசத்திற்கும் ஜெயலலிதா மக்களுக்கு எதுவும் செய்யவில்லை. அவர் நினைத்திருந்தால் தமிழ்நாட்டை தன்னிகரற்ற நாடாக ஆகியிருக்க முடியும். எதுவும் செய்யாமல் பெரும்பாலும் வீட்டில் முடங்கி, சசிகலாவின் கூடாரத்திற்கு நாட்டையும் கட்சியினையும் தாரை வார்த்துக் கொடுத்து மாபெரும் அழிவைத் தேடிக்கொண்டார்.

Jaya in her young age

இருந்தாலும் அவர் இறந்தது கட்சி வித்தியாசம் இல்லாமல் எல்லோரையும் துக்கத்தில் ஆழ்த்தி விட்டது. தமிழ்நாடே கலங்கிப் போய் இலட்சக் கணக்கான மக்கள் தலை நகரில் குவிந்து தங்கள் இறுதி மரியாதையினைச் செலுத்தினர். அதன் பின்னும் தொடர்ந்து வந்து கொண்டே இருக்கின்றனர்.

இந்தத் தொடர் விகடனில் வெளிவந்த போது படிக்க ஆரம்பித்தேன். தொடர் முடிவதற்குள் அவரே மடிந்து போனது ஒரு அசம்பாவிதம். அவர் இறப்பைச் சுற்றி உள்ள மர்மம் இன்னும்விடுபடாத சூழ்நிலையிலும், அவருடைய கட்சியினர் பல துண்டுகளாய்ப் பிரிந்து ஒருவரை ஒருவர் குற்றம் சொல்லிக் கொண்டு இருக்கும் நிலையில், இந்தப் புத்தகம் ஜெயலலிதாவின் ஆரம்பத்தையும், வளர்ச்சியினையும், முடிவையும் தெரிவிக்கும் ஆவணமாக இருக்கிறது. தமிழக அரசியலில் நீண்ட காலம் கொடியுயர்த்தி இந்த ஆளுமை ஆரம்பத்தில் இருந்த நிலைமைக்கு முற்றிலும் மாறாக எப்படி எல்லாம் மாறிப்போனார்  என்பதை படித்துத் தெரிந்து கொள்ளலாம்.

Jaya with MGR

1.   ஜெயாவின் பூர்வீகம் ஸ்ரீரங்கப்பட்டினத்திலிருந்து இடம்  பெயர்ந்து மைசூருக்கும், அவரின் தந்தை ஜெயராமன் இறந்த போது பெங்களூருக்கும் அதன் பின் சென்னைக்கும் வந்து குடியேறியது. இவர்களின் தாய்மொழி தமிழ் என்பதில் எந்த சந்தேகமுமில்லை.

2.   ஜெயாவின் தாத்தா மைசூர் மகாராஜாவின் அரண்மனையில் ஆலோசகராய் இருந்தவர்.

3.   ஜெயாவின் அம்மா சந்தியா, அவருடைய அப்பா ஜெயராமுக்கு இரண்டாம் மனைவி.

4.   ஜெயா சர்ச் பார்க்கில் தன் வகுப்பில் முதல் மாணவியாகத் திகழ்ந்தார். அதோடு நடனப் பயிற்சியும் பெற்றார்.

5.   அம்மா சந்தியா இரவும் பகலும் படப்பிடிப்பில் பிஸியாக இருந்ததால் அம்மாவின் பாசத்திற்கும் அரவணைப்பிற்கும் அதிகமாக ஏங்கினார்.

6.   அம்மா நடிகை என்பதால் பள்ளியில் பல கிண்டல்களுக்கும் பழிச்சொற்களுக்கும் ஆளாகினார். எனவே எப்பொழுதும் தனிமையையே நாடினார். நண்பர்கள் யாருமில்லை. கிடைத்த ஒரே தோழியிடம் துரோகம்தான் கிடைத்தது என்பதால் கசப்புணர்ச்சியுடனே வளர்ந்தார்.  ( தோழிஎன்றாலே  இவருக்கு துரோகம்தான் போலும் பாவம்)

7.   ஜெயாவின் நடன அரங்கேற்றத்திற்கும் தலைமை தங்கவந்த சிவாஜி கணேசன் பெரிய நடிகையாவாள் என்று ஆருடம் கூறியிருக்கிறார்.

8.   ஒருமுறை படப்பிடிப்பில் தாயோடு போயிருக்கும் போது எம்ஜியார் பார்த்து சிலாகித்தார்.

9.   ஜெயாவின் ஆசை ஒரு மருத்துவர் அல்லது டாக்டர் ஆக வேண்டும் என்பது. நடிகையாக இருக்கும் போது அளித்த ஒரு பேட்டியில் நடிகையாக ஆகியிருக்கவிட்டால் அரசியலுக்கு வந்திருப்பேன் என்கிறார், அதுபோலவே ஆனது.

10.                Y.G. பார்த்தசாரதி இயக்கிய ஒரு ஆங்கில நாடகத்தில் பிரெஞ்சு நாட்டுப் பெண்ணாக நடித்ததுதான் ஜெயாவின் முதல் நடிப்பு அனுபவம் இந்த நாடகத்தில் வில்லனாக நடித்தவர் சோ.அப்போதிருந்தே அவர்களுக்குள் நெருக்கம் ஆரம்பித்தது.

11.                ஜனாதிபதியாக இருந்த வி.வி.கிரியின் மகன், சங்கர் கிரி எடுத்த ஒரு ஆங்கில ஆவணப்படத்தில் நடித்ததுதான் முதல் திரை அனுபவம்.

12.                "இந்த உலகத்தின் கடினமான வேலை எனக்குப் பணிக்கப்பட்டாலும் நான் அதற்கு என்னைத் தயார் செய்து கொள்வேன்" என்பது ஜெயா ஒரு பேட்டியில் சொன்னது.

13.                கர்ணன் வெற்றிவிழாவில் ஜெயாவைப் பார்த்த BR பந்துலு "சின்னப கோம்பே" என்ற படத்தில் அவரை நடிக்க வைத்தார். மிகுந்த தயக்கத்திற்குப்பின் இப்படத்தில் நடித்தார். ஆனால் அதற்கு முன்னால் “நன்ன கர்த்தவ்யா” வெளிவந்தது.

14.                டைரக்டர் ஸ்ரீதர் வெண்ணிற ஆடையில் கொடுத்த வாய்ப்பின் மூலம் ஜெ திரையுலகில் ஒரு இடம் பிடித்தார். பிறகு ஸ்ரீதருக்கும் அவருக்கும் பிரச்சனை வந்தது.

15.                பள்ளிப்படிப்பு முடிந்து ஸ்டெல்லா மாரீஸில் சேர்ந்த போது ஆசிரியை "பொம்மை மாதிரி உடை உடுத்தினால் போதுமா?" என்று கேட்டதால் நடிப்பையும் படிப்பையும் ஒன்று சேர செய்யமுடியாதென்று எண்ணி படிப்பைக் கை கழுவினார்.

16.                23 வயதில் சந்தியா இறந்தபின் எம்ஜியாரின் கண்காணிப்பும் பாதுகாப்பும் கிடைத்தது.

17.                எம்ஜியாரின் தீவிர ரசிகையாக இருந்த ஜெயா, அவருக்கே நாயகியானதோடு அவருடைய கட்சியிலும் அடுத்த தலைமையைப் பிடித்தது ஆச்சரியம்தான். ஆனால் அவருடன் அவர் ஒத்துப்போக முடியவில்லை. அவருக்கு எதிராகக் திரைமறைவில் களமிறங்கினார்.

18.                நடிகையாக இருக்கும்போது ஊடகங்களோடு மிகுந்த நட்பில் இருந்தவர் பதவிக்கு வந்ததும் அவர்களைப் பகைத்து 2000 கேஸ்களைப் போட்டார்.

19.                மிகவும் தாராள மனப்பான்மை உள்ள அவர் பிற்காலத்தில் வெற்று  மரியாதை, காலில் விழுவதை ரசிப்பது என பிற்போக்காக நடக்க ஆரம்பித்தார்.

20.                அவருடைய மொழி ஆளுமை, தமிழ் தவிர, மலையாளம், கன்னடம், தெலுங்கு ஹிந்தி ஆங்கிலம் என வியக்க வைக்கும் ஒன்று.

21.                இந்திரா காந்தி அவருக்கு மிகவும் பிடித்த தலைவர்.

22.                இறுதியில் நட்புக்காக மானம் மரியாதை இழந்து சிறை சென்று அழிந்து போனது பெருந்துயரம்.

முற்றும்

பேரரசி சசிகலா வாழ்க !!!!!!!!!!!!!!!!

பெரும்பான்மையான எம் எல் ஏக்கள், எம்பிக்கள், கையில் இருந்தும், பொதுச் செயலாளர் பதவியைக் கைப்பற்றியிருந்தும் நினைத்தது போல் உடனடியாக சசிகலா முதலமைச்சர் பதவியை அடைய முடியவில்லை.

ஜெயலலிதா இறந்து போனதைத் தொடர்ந்து துக்கம் அடங்குவதற்குள், வர்தாப்புயல் மற்றும் ஜல்லிக்கட்டு விவகாரம் வந்து தாமதப்படுத்தியது. ஒரு புறம் தீபா குடைச்சலைக் கொடுக்க இப்போது பன்னீர் என்ற ருசி கண்ட பூனை புயலாக எழுந்துள்ளது. அது தவிர சொத்துக் குவிப்பு வழக்கின் இறுதித் தீர்ப்பும் வந்து இருந்த கொஞ்ச  நஞ்சம் நம்பிக்கையையும்  தகர்த்துவிட்டது

 இப்போது  சசிகலா என்னதான் செய்யமுடியும் ?.

பரதேசியின் பகிரங்க ஆலோசனைகள் :

1.   உடனடியாக ஜெயலலிதாவின் சொத்து மதிப்பை துல்லியமாகக் கணக்கிட்டு அதனை எம்.எல்.ஏ. எம்பிக்களிடம் தெரிவித்து அதனை அனைவருக்கும் பகிர்ந்தளிப்பதாக உறுதி அளிக்கலாம். இதன் மூலம் அவர்கள் திட்டுக்கு அடங்காவிட்டாலும் துட்டுக்கு அடங்கிப்போக வழியுண்டு. உள்ளே இருந்தாலும் வெளியே இருந்தாலும் ஆட்சியை தொடர்ந்து நடத்தலாம்.

2.   தீபாவிடம் பேசி அவர் ஏன் தனியாக ஃபிளாட்டில் தங்க வேண்டும் போயஸ் கார்டனுக்கு  வந்துவிடலாம் என்று சொல்லி அழைத்து வந்துவிட்டால் போதும். பிறகு தானாக மற்றவை( ?) நடந்துவிடும்.

3.   பன்னீர் செல்வத்திற்கு ரகசியமாக மிடாஸ் ஆலையை எழுதி வைத்துவிட்டு, கண்ணீர் செல்வம், வெந்நீர் செல்வம் ஆனதின் பின் இப்போது மிடாஸ் ஆலையின் அதிபராக தண்ணீர் செல்வமாக ஆகிவிட்டார் என்று சொல்லி அவரை ஓய்த்துவிடலாம்.

4.   எம்.எல்.ஏக்கள் அனைவரிடமும் பத்தாண்டுக்கு பாண்டு எழுதி வாங்கி கட்சி மாற்றத்திற்கு தடை செய்யலாம்.

5.   முடிந்தால் மு.க.அழகிரிக்கு ஒரு ஆயிரத்தைக் கொடுத்து ( அட கோடிதான் பாஸ்)  அதிமுக முதலமைச்சர் ஆக நிறுத்தி கருணாநிதியின் ஆதரவைப் பெறலாம். அவர் படியவில்லையென்றால் மு.க.ஸ்டாலினை அதிமுக முதலமைச்சர் ஆக்கிவிட்டால் எல்லாம் சரியாகி முடிந்து விடும்.

6.   நடராஜன் அவர்கள் பொங்கல் விழாவில் ஏற்கனவே தான் மாடு பிடித்த கதையைச் சொல்லியதால், தஞ்சாவூரில் சிறப்பு ஜல்லிக்கட்டு ஒன்றை ஏற்பாடு செய்து  ஒத்த மாடோ இல்லை ஒரு தொத்த மாடையோ அடக்குவதற்கு ஏற்பாடு செய்து, மாவீரன் நடராஜனை முதலமைச்சராக ஆக்கலாம்.

7.   பேசாமல் திமுகவுடன் அதிமுகவை இணைத்துவிட்டால், தீபா பன்னீர் இருவரையும் ஒரே சமயத்தில் கவிழ்த்து விடலாம். 

8.   கொடநாடு, சிறுதாவூர், பையனுர் ஆகிய இடங்களை ஆக்ரமித்து அனுபவிக்கும் அனுபவத்தை வைத்து, ஆளுநர் இருப்பிடமான ராஜ்பவனை ஆக்ரமித்து, சொந்தமாக்கி ஆளுநரின் பேரிலேயே எழுதிக் கொடுத்துவிடுகிறோம் என்று சொல்லி முதலமைச்சர் ஆக அனுமதி வாங்கலாம்.

9.   தேர்தல் சமயத்தில் இருந்த டிரக்கில் பணத்தை நிரப்பி டெல்லிக்குச் சென்று சூப்ரீம் கோர்ட்டை அதன் நீதிபதிகள் உள்பட  விலை பேசலாம்.  

Add caption

10.                இதெல்லாம் ஒத்து வரவில்லையென்றால்,அருமையான யோசனை ஒன்று. கட்சியைக் கலைத்து விட்டு தமிழ்நாட்டை தனியாகப்பிரித்து ,தமிழகத்தின் பேரரசியாக முடிசூட்டிக் கொள்ளலாம். தனிநாடாகி விட்டால் உச்ச நீதிமன்றத்தின் உத்தரவு செல்லாமல் போய் விடுமே. என்ன புனித ஜார்ஜ் கோட்டையின் டம்மி பீரங்கிகளைக் களைந்துவிட்டு நிஜ பீரங்கிகளை நிறுவிவிட்டால் போதும். கமிஷனர் ஜார்ஜை படைத்தளபதியாக நியமித்தால் விசுவாசமாக இருப்பார்.

11.                மூன்றாவது வரை மட்டுமே படித்திருக்கிறார் என்பதனை மாற்றி ஏதாவது ஒரு பல்கலைக்கழகத்தில் டாக்டர் பட்டத்தை வாங்கிவிட்டால் முடிந்தது பிரச்சனை டாக்டர் சசிகலா என்று மாற்றிக் கொள்ளலாம். ஏனென்றால் மறுபடியும் ஆரம்பப் பள்ளியிலிருந்து ஆரம்பித்தால் நன்றாக இருக்காது.

12.                ஒற்றர் படைத்தலைவராக சுப்ரமணிய சுவாமியை  நியமித்து விடலாம். தா. பாண்டியனை அரண்மனை பேச்சாளர் ஆக்கலாம்.

13.                அகழியை வெட்டி ஆழப்படுத்தி கூவத்தைவிட்டுவிட்டால் ஒரு பயகிட்ட வருவானா?

14.                அந்தப்புரத்தை விரிவுபடுத்திவிட்டால் நடராஜன் ஏன் கனடா பக்கம் போகப்போகிறார்?

15.                இளவரசி ஏற்கனவே இருப்பதால் வேறுயாருக்கும் தனியாக இளவரசிப்பட்டம் சூட்டத் தேவையில்லை.

16.                சுதாகரனை இன்னும் கொஞ்சம் பின்னால் முடிவளர்க்கச் செய்து பட்டத்து இளவரசனாக்கிவிடலாம்.

17.                வெளிநாட்டு பொறுப்புகளை நமது பிரதமரிடமே கூடுதலாகக் கவனிக்கச் சொன்னால் அவர் உவகையுறுவார்.

18.                ஒத்துவரும் எம்.எல்.ஏக்களை அந்தந்த பகுதியின் சிற்றரசர்களாக்கி விடலாம். தன் குடும்ப வாரிசுகளான திவாகரன், தினகரன் , பாஸ்கரன், வெங்கடேஷ் ஆகியோரை, பல்லவ, சோழ, பாண்டிய, சேர மண்டலங்களின் மன்னர்களாக நியமித்துவிடலாம்.

19.                சிரிப்பதற்கு தடை: தமிழ்நாடு சசிநாடு என்று மாற்றப்பட்டு உடனடியாக யாரும் யாரையும் பார்த்து சிரிப்பதற்கு தடை விதிக்கப்படுகிறது. யார்ட்ட? மீறி சிரித்தால் அவர்கள் தலைகள் கொய்யப்பட்டு கோட்டை வாசலில்  தொங்கவிடப்படும்.

20.                விரைவில் முல்லைப் பெரியார் மற்றும் காவிரி நீர்ப்பிரச்சனைக்கு கேரளா மற்றும் கர்நாடகா மீது படையெடுக்கப்படும், இலங்கையில் நடராஜன் தலைமையில் தமிழீழம் அமைக்கப்படும் எனவும் தெரிகிறது.

அம்மாவும், சின்னம்மாவும், வீட்டம்மாவும் !!!!!!!!!!!!

“ஹலோ பரதேசி”

“சொல்றா புல்தடுக்கி”

“என்னடா நானே ரொம்ப நாளுக்கு முன்னமே மறந்துபோன பட்டப் பேரைச் சொல்ற?”

“ஆமா, நீ மட்டும் பரதேசின்னு சொல்லலாமா?”

"அட நான் எங்கடா சொன்னேன், நீதானே உன்னை பரதேசின்னு சொல்லிக்கிட்டு அலையுற".

“உண்மைதான் சரி என்ன விஷயம், சொல்லுறா மகேந்திரா?”

“ஒன்னுமில்லை, புத்தாண்டு வாழ்த்துச் சொல்லத்தான் வந்தேன்”.

“நன்றி ,உனக்கும் உரித்தாகுக,”.

“ஆமா நாட்டு நடப்பெல்லாம் பாக்கிறியா?”.

“எதைச் சொல்ற, அதான் இங்க தமிழ் சேனல்கள் எல்லாம் வருதே? பாத்துக்கிட்டுதான் இருக்கிறேன்”.

“இல்லடா ஜெயா டிவி பாத்தியா?”

“ஆமா பாத்தேன், சின்னம்மா புண்ணியத்தில நாடு மிகவும் அமைதியாகவும், சுபிட்சமாகவும் பொன் விளையும் பூமியாகவும் இருக்குதாம்”.

“சன் டிவி கூட வருதா அங்க?”.

“ஆமா பாத்தேன்,  நாடு வரட்சியில் வாடுது, கொலை கொள்ளை பெருகிப் போச்சு, சட்ட ஒழுங்கு சுத்தமா இல்ல, விவசாயிகள் தினமும் தற்கொலை செய்றாங்க”.

“ஆமாடா, அப்ப நாட்டு நடப்புன்னு நீ எதை நம்புற?”

“மகேந்திரா நான் எதையும் நம்புறதில்லை.நாட்டு நடப்பை விடு, நம்ம வீட்டு நடப்பும் சரியில்லை”.

“என்னடா சொல்ற மனைவி கூட தகறாரா?”.

“ஐயையோ அதெல்லாம் நான் எப்பவும் பண்றதேயில்லை.”

“சமீபத்தில் நீ போட்ட போட்டாவப் பார்த்தேன். ரெண்டு பேரிடமும் நல்ல மாற்றம் இருக்குடா.”

“ஆமடா சமீபத்தில் கூட கல்யாண போட்டோவை நான் எடுத்துக் பார்த்தேன் வித்தியாசம் ரொம்பத்தான் இருக்கு”.

“மாற்றம் தானடா வாழ்க்கை. மாற்றம்தானடா என்னைக்கும் மாறாதது”.

“என்னடா மகேந்திரா, புது வருஷ தத்துவமா?”

“அப்படியெல்லாம் இல்ல, நீ சொல்லுடா என்னடா வீட்டு நடப்பு?”

“அடுத்தவன் கதைன்னா ரொம்ப ஆவலாயிருவேயே”.

“ஏலேய் உங் கூட ரொம்ப நொம்பலம்டா, நீ தானடா பேச்சு எடுத்த”.

“சரிசரி சொல்றேன், என் மனைவிதாண்டா”

“என்னடா சொல்ற தங்கச்சி என்ன சொல்லுது ?”.

“தங்கச்சி அக்கா ஆகி அக்கா பக்காவாயிட்டா?”

“நல்லவேளை அக்கா அம்மா ஆகலைடா”.  

“யார் சொன்னா அவளும் மாறிட்டே இருக்காடா”.

“என்னடா மாற்றம்?”

“கல்யாணம் ஆகும் போது குழந்தை போல இருந்தா. அப்புறம் படிப்படியா முன்னேறி டீனேஜ் பெண்ணாகி கொஞ்சம் கொஞ்சமா முன்னேறினா”.

“ம் அப்புறம்”.

“அப்புறம் ஒரேயடியா முன்னேறி, கொள்கை பரப்புச் செயலாளர் ஆயிட்டா”.

“ஜெயலலிதா மாரியா?”

“ஆமடா”

 “ஆமாம் யாருடைய கொள்கைகளைப் பரப்பிச்சு ?

“தன் சொந்தக் கொள்கைகள் தான்”

“அது என்ன கொள்கைகள்”.

“அதுவா புருஷன், வீட்டில் சரிபாதி வேலை செய்யனும், சமையல் செய்யனும், பத்துப்பாத்திரம் தேய்க்கனும் அப்படின்னா நிறைய கொள்கைகள்”. அப்புறம் பொதுச் செயலாளர் ஆயி, முதலமைச்சர் ஆயிட்டா “.

“ஐயையோ அப்புறம்?”

“அப்புறம் அதிகாரம் ஒரே இடத்தில குவிய ஆரம்பிச்சிருச்சு. அவளோடு உறவினர் பெருகிப் போய்ட்டாங்க”.

“எங்க நியூயார்க்கிலயா”?

“அட ஆமாண்டா ,அப்ப தோழின்னு யாரும்?”

“தோழி கிடையாது, தோழன் மட்டும்தான்?”

“ஐயையோ யாராது அந்த தோழன்?”

 “வேறுயாரு நாந்தேன்”.

“நீ தோழனா? தோலனா?”

“டேய் மகேந்திரா என்ன திமிரா?”

“இல்லடா இப்பவும் உனக்கு என்பு தோல் போர்த்திய உடல் தானடா?”

“ஆமாடா அது சரிதான்”.

“சரி அப்புறம்?”

“அசைக்க முடியாத சக்தியா உருவாயிட்டா, எதிர்பேச  யாருமில்ல,

என்னைத்தான் தலைதலைன்னு எல்லாரும் சொல்வாய்ங்க”.

“இப்ப என்னாச்சு?”.

“தலை சிறுதலையாகி தறுதலையாகிப் போச்சு”.

“வெறுந்தலையாகிப் போச்சுன்னு சொல்லு”.

“டேய் என்னடா வார்த்தை தடுமாறுது”.

“சர்ரா விட்ரா  விட்ரா நீதான் அறிவாளியாச்சே, மேல சொல்லு.

சொத்துக் குவிப்பும் நடந்துச்சு”.

“அப்படியா உன் மனைவி பேர்லயா”?

“நீ வேற எல்லாம் பினாமிதான்”.

“பினாமியா அது யார்றா”?

“வேற யாரு  நாந்தேன்”.

“அடப்பாவிகளா அப்புறம்”?

“நெனைச்சதெல்லாம் நடத்திக் காட்டினா, எல்லாத்தையும் பேசியே சாதிச்சா”.

“அபாரம்டா”

“சில சமயம் அருகில் உறங்கும் போது திரும்பிப் பார்த்தால் கூட ஜெயலலிதா உருவம் போலவே தெரியும்”.

“ஐயையோ பிறகு”.

“இப்ப டிசம்பர் லிருந்து அடியோட மாறிட்டா”?

“ஒண்ணும் புரியலயே”

“அவளுக்குள்ளிருந்த ஜெயலலிதா செத்துப்போன மாதிரி தெரிஞ்சுது.

இப்ப ஒண்ணுமே பேசறதேயில்லை. ஆனா பேசாமலேயே எல்லாத்தையும் சாதிக்கிறா. ஒரே மிரட்டலாய் இருக்கு. பிரமிப்பாய் இருக்கு. ஆனா ஒண்ணும் பேசறதேல்லை”.

“அப்புறம் என்னாச்சு.

நேத்து ராத்திரி தற்செயலா படுக்கையிலே திரும்பிப் பார்த்தேன். இப்ப அடையாளம் சுத்தமா மாறிப்போச்சு”.

“ என்னடா சொல்ற?”,

“ஆமாடா, இப்ப சசிகலா மாதிரியே தெரியறடா”

“ஐயையோ”

“ஜெயலலிதாவைக் கூட சமாளிச்சரலாம்டா, எல்லாமே வெளிப்படை இந்த சசிகலாவை எப்படிரா சமாளிக்கிறது?”

“அதாண்டா தூக்கமே வரமாட்டேங்குது”.

“

ஹலோ மகேந்திரா ஹலோ மகேந்திரா,

(என்ன இது அடி வாங்கும் சத்தம் கேட்கிறது ஐயையோ ஏற்கனவே என்ட்ட சொல்லியிருக்கிறான். அவன் மனைவி இரவு 12-க்கு மேல் பத்ரகாளி என்று பாவம். நான் தான் ரொம்பப் பேசிட்டேன் போல இருக்கு.)

ஒரு 15 நிமிடம் கழித்து.

“ஹலோ சேகர் ஹலோ சேகர் (குசுகுறுக்கிறான்)”.

“என்னடா அடி பலமா?”

“ஆமாடா, லைட்டா”

“பிறகேண்டா திரும்பவும் கூப்பிடுற”.

“இல்லடா அவ டயர்டாகி  தூங்கிட்டா”.

“சேகரு உன் பாடு எவ்வளவோ பரவாயில்லடா”.

லேசாக சிரித்துக் கொண்டே,

“என்னடா உன் மனைவி அம்மாவா சின்னம்மாவா ?”

Ilavarasi

“இரண்டுமில்ல இவ இளவரசிடா”

“என்ன இளவரசியா?”

“ஆமடா அடுத்த வாரிசுடா ,கொஞ்சம் பொறுத்துப்பார் தெரியும்”.

பரதேசி திகைத்துப் போகிறான்.