ஏங்க இதையெல்லாம் முதல்லயே சொல்லமாட்டீங்களா? (Super Bowl -Feb 3 ,2013)

 அன்று ஞாயிற்றுக்கிழமை. நண்பர் பிரபாகர் தன் கவிதை ஒன்றில் சொன்னபடி, மாதம்முழுதும் செய்கிற  பாவங்களுக்கு வாரவட்டி கட்டும் நாள். ஆனால் சர்ச்சில் பொங்கி வழிய வேண்டிய கூட்டத்தைக்காணோம். வந்திருந்த ஒரு சிலரும் அவசர அவசரமாக வீடு திரும்பிக்கொண்டிருந்தனர். கேட்டால் ‘சூப்பர் போல்’ என்றார்கள். மாலை நடக்கவிருக்கும் சூப்பர் போலுக்கு இப்பவே என்ன பரபரப்பு, படபடப்பு என்று கேட்டால், ‘ஸ்நாக்ஸ் வித் ஸ்நேகிதர்ஸ்க்கு இப்பவே ரெடியானால் தானே ஆச்சு’ என்று றெக்கை கட்டிக்கொண்டிருந்தார்கள்.

எங்கும் பரபரப்பு. மதியத்திலேயே தெருக்கள் வெறிச்சோட ஆரம்பிக்க, நான் விசிட் அடிக்கும் ,ரிச்மண்ட் ஹில் Flea மார்க்கெட் ஏரியாவும் கடைகளில் வாங்க ஆட்கள் இன்றி காற்றுவாங்கிக் கொண்டிருந்தது. இருந்த ஒன்றிரண்டு வியாபாரிகளும் தங்கள் கடையை ஏறக்கட்டிக்கொண்டிருந்தனர்.

சூப்பர் போல் என்பது அமெரிக்காவின் மிகப்பெரிய ஃபுட்பால் திருவிழா. அந்த மேட்ச்களை தொடர்ந்து பார்க்காதவர்களும் கூட ஃபைனல்ஸை கண்டிப்பாக பார்த்துவிடுவர். சிக்ஸ்பேக்கும், இன்னும் செவரல் பேக்கும் கொண்டவர்களும் விளையாடக்கூடிய விளையாட்டின்மேல் உனக்கு என்ன அவ்வளவு அக்கறை? என்ற கேள்வி  உங்களுக்கு வரலாம். வரணும். வந்தால்தானே நான் அதைப்பற்றி  எழுத முடியும்.

 அன்று பால்டிமோர் அணியும் சான்ஃபிரான்சிஸ்கோ 49-ம் மோதினார்கள். அந்த மேட்சை நாங்க டி.வியில பார்த்த கதைக்கு முன்னாடி, இந்த ஃபுட்பால் வளர்ந்த கதையைக்கொஞ்சம் கதைப்போம்.

பழைய ரக்பி விளையாட்டோட மறுபிறவிதான் இந்த அமெரிக்கன் ஃபுட்பால்.  அரதப்பழைய ஜோக்கான ஒரு பாலுக்கு ஏம்பா இத்தனை பேர் அடிச்சிக்கிறீங்க? என்பதை காதிலேயே வாங்கிக்காம, 1869- லிருந்தே பல முக்கிய வேலைவெட்டிகளை விட்டுட்டு, இந்த வெட்டிவேலையை செய்துட்டு வர்றாங்க. டீமுக்கு பதினோரு பேரு.

ஒட்டகம் போட்ட முட்டை மாதிரி ஓவல் ஷேப்புல இருக்குற பந்தை, எதிரி டீம்  கிங்கரனுகளை  மீறி , பத்துப்பத்து யார்டுகளாத்தாண்டி கடத்தி ‘டச் டவுன்ல கொண்டுவந்து சேர்க்கனும். அப்பிடி வந்து சேஃபா சேர்ந்தா, ஆறு பாயிண்டும் ஒரு ஃப்ரீ கிக்கும் கிடைக்கும்.

ஆரம்பத்துல மாநிலங்கள் ரீதியா சின்னச்சின்ன டீம்கள், இரு பிரிவுகளாய் முட்டிமோதி முடிக்க,  கடைசியாய் ஜெயிச்ச ரெண்டு டீம்கள் சாம்பியனுக்கு போட்டி போடுவாங்க. அப்பிடி ஃபைனலுக்கு வந்த டீம்களோட மோதலைப்பாக்கத்தான், அன்னைக்கு நடந்த அத்தனை பில்ட்-அப்களும். இந்த வருஷம் இறுதிப்போட்டி நடந்த நகரம் நியூ ஆர்லியன்ஸ்.

 என்னைச்சுத்தி வறுத்த வேர்க்கடலை, உப்புக்கடலை,முறுக்கு மாதிரியான நொறுக்கு அயிட்டம்ஸ் அல்ரெடி ஆஜர். மேற்படி சைடிஷ்களைப் பார்த்துட்டு, ஏதோ ஒரு சபை நாகரீகம் கருதி மெயின் டிஷைப் பத்தி நான் எதுவும் சொல்லாம விட்டுட்டேன்னு நெனச்சிக்காதீங்க. வெளிய சொல்ல கொஞ்சம் வெக்கமாத்தான் இருக்கு. ஆளு வளந்த அளவுக்கு நல்ல பழக்கவழக்கம் வளரலையேன்னு நீங்க குறைபட்டுக்கவும் செய்வீங்க. ஆனா வாட் டு டூ. கடைசிவரைக்கும் அந்த குடிப் பழக்கத்தை நான் நெருங்கவே முடியலை.

சரி மேட்சுக்கு வர்றேன்,..

தனியா உட்கார்ந்து பாத்தா போரடிக்குமேன்னு என் பொண்ணுங்களை கூப்பிட்டா,.’ அதை நாங்க ஃபாலோ பண்றதே இல்லைன்னு ரிஜக்ட் பண்ணிட்டாங்க. அடுத்து என்னோட இல்லத்தரசியை கூப்பிட்டப்ப, ‘பாத்திரம் கழுவுறது, சமைக்கிறதுல்லாம் யாருங்க செய்யிறதுன்னு ரொம்ப பணிவா [அட  சத்தியமா பணிவாத்தாங்க] சொன்னாங்க. வேறவழி. தனியாவர்த்தனம் தான்.

கண்ணைப்பறிக்கும் ஒளிவெள்ளத்துல, ஜனவெள்ளம் ஆடிட்டோரியத்தில் நிரம்பி வழிய, ஏலியன்கள் போல் வந்திறங்கினார்கள் வீரர்கள். ஒவ்வொருத்தனையும் பார்த்தால் ‘டேய் அது ஒடம்பா, அல்லது உடும்பா? என்று கேட்கத்தோன்றும் அளவுக்கு அவர்கள் திடகாத்திரம். அவற்றோடு நம் உடம்பை ஒப்பிட்டுப்பார்ப்பது தேவையில்லாத ஆத்திரம்.

வீரர்கள் அறிமுகம் முடிந்ததும்,  கனெக்டிக்கட்டில் உள்ள சாண்டிஹூக்    (சமீபத்தில் ஒரு பைத்தியக்காரன் சில குழந்தைகளை சுட்டுக்கொன்றானே)பள்ளியைச்சேர்ந்த குழந்தைகள் பாடகர் குழு,  ஒரு அருமையான பாடலைப்பாடினர். அதனைத்தொடர்ந்து ,  ஜெனிஃபர் ஹட்சன் பாடினார்.(America the Beautiful)

அதனையடுத்து ராணுவக்கொடியசைப்பு, 14 முறை கிராம்மி விருது வாங்கிய அலிசியா  கி அமெரிக்க தேசிய கீதத்தை பியானோவில் இசைக்க என்று மேட்சுக்கு பிட்ச் ஏற்றிக்கொண்ட போக ஒரு வழியா விளையாட்டு ஆரம்பம்.

ரெண்டு அணிகளும் மோத தயாராகுறப்ப ஏறத்தாழ அங்க போர் நடக்கப்போற மாதிரிதான் இருந்துச்சி. ஒரு வழியா முதல் குவார்ட்டர் முடிவுல பால்டிமோர் ஏழு புள்ளிகளும், சான்ஃபிரான்சிஸ்கோ மூனு புள்ளிகளும் எடுத்திருந்தாங்க. நேரம் ஆக ஆக சவுண்டு ஜாஸ்தியானதை முன்னிட்டு, கிச்சன் வேலைகளை கொஞ்சம் மிச்சன் வச்சிட்டு, என்னோட திருமதி எண்ட்ரிய குடுத்தாங்க. மேட்ச் பாக்குறதுன்னு ஆரம்பிச்சுட்டா யாரையாவது சப்போர்ட் பண்ணியாகனுமே, அடிக்கடி போன ஊர், மற்றும் மனைவிக்கு பிடிச்ச ஊர்ங்கிறதுனால பால்டிமோரை சப்போர்ட் பண்றதுன்னு முடிவு பண்ணிட்டோம்.

அடுத்த குவார்ட்டர் முடிந்தபோது, பால்டிமோர் 21 புள்ளிகள் எடுத்து முன்னேற சான்ஃபிரான்சிஸ்கோ 49’ வெறும் 6 புள்ளிகள் மட்டுமே எடுத்து பின்  தங்கியிருந்துச்சி.

இதுக்கு நடுவுல ‘ஹால்ப் டைம்’ வரவே, எல்லாரும் ஆவலா எதிர்பாத்த பியான்சே ’ வோட இசை விருந்து. பெப்சி வழங்குன இந்த நிகழ்ச்சிக்கு இணையான இன்னொரு நிகழ்ச்சியைப் பாக்க சான்சே இல்லை. அப்படி ஒரு மிரட்டல்.

ஒபாமாவின் இரண்டாவது பதவியேற்பு விழாவில் வெறுமனே வாயை மட்டும் அசைத்து வம்பில் மாட்டிக்கொண்டவருக்கு, இதில் தன்னை நிரூபித்தாகவேண்டிய கட்டாயம்.

ஏராளமான நடனப்பெண்களுடன், அதிவேகமாக கோரியோகிராபி செய்யப்பட்ட பாடல்களை அனாயசமாக அவர் பாடி ஆடி அசத்தியபோது, சமீபத்தில் குழந்தைபெற்ற பெண்ணா இவர்? என்ற கேள்விக்குறிகளுடன் பார்க்கிறவர்களை பரவசப்படுத்தி குழந்தைகளாக்கிவிட்டார். அந்த சமயம் யார் கண்பட்டதோ, 75 ஆயிரம் பேர் திரண்டிருந்த அந்த ஸ்டேடியத்தில் திடீர் பவர் கட். [ஒருவேளை அம்மா அமெரிக்காவை நெனச்சிருப்பாங்களோ?] விளக்குகளின் ஓவர் வர்ணஜாலம் தான் இந்த திடீர் பவர்கட்டுக்கு காரணமாக இருக்கலாம் என்று எங்க வீட்டு ‘அம்மா’ காரணம் கண்டுபிடித்தாள். நானும் தலையாட்டிவைத்தேன்.

ஒரு வழியாக மூனாவது குவார்ட்டர் ஆரம்பித்த சமயம், என் மூத்த பெண் அனிஷா வந்து சான்ஃபிரான்சிஸ்கோவுக்கு சப்போர்ட் பண்ண, மம்மி அவளை வார்த்தைகளால் கும்மி விரட்டி அடித்தாள். அனிஷா புகுந்த நேரமோ என்னமோ அதுவரை டஃப் காட்டாத SFO திடீரென வீறுகொண்டு எழுந்து விளையாட ஆரம்பித்து, நெக் டு நெக் மேட்சாக மாறி எங்களை நகம் கடிக்கவைத்துவிட்டது.

இதற்கிடையில் ,கேமின்  நடுவில் வரும் விளம்பரங்களை பத்தி சொல்லியே ஆகவேண்டும் .ஒவ்வொரு கம்பெனியும் தங்கள் புதிய விளம்பரங்களை ஒளிபரப்பி, அதுவும் ஒரு போட்டி போல் நடக்கும் .விளம்பரத்தின் 30 வினாடிகளுக்கு இந்த வருட கட்டணம் நாற்பது மில்லியன் டாலர்கள் .நம் மதிப்பில் 220 கோடி .(அம்மோடியோவ் ).

பயந்தது போல் அங்கிருந்து வெளியேறிய அனிஷா, சில நிமிடங்களிலேயே ‘யு டர்ன்’ அடித்து என் அருகில் அமர்ந்தாள். எஸ்.எஃப்.ஓவை சப்போர்ட் பண்றவ இங்க இருக்கக்கூடாது என்று பழையபடி விரட்ட,’மம்மி வெயிட் வெயிட், நான் பால்டிமோரைத்தான் சப்போர்ட் பண்றேன். இதோ பாரு பெட் கூட கட்டியிருக்கேன்’ என்றபடி தனது ‘ஐ போன் 5’ யோடு  வந்தாள். நான்காவது குவார்ட்டர்  சூடு பிடிக்க எங்கள் அனைவரின் அட்ரினலும் எகிறியது .அவள் பெட் கட்டின நேரமோ என்னவோ, பால்டிமோர் 3 புள்ளிகள் மட்டுமே அதிகம் பெற்று த்ரில்லிங்காய் வென்றது.

மேட்ச் ஒரு பக்கம் த்ரில்லிங்காய் நடக்க, கோச்கள் வெறிகொண்ட வேங்கைகளாய் நடந்துகொண்டது பார்க்க பயங்கரமாய் இருந்தது. இதில் பெரிய காமெடியே, இரு அணி கோச்களாகிய, ஜான் ஹார்பக்கும், ஜிம் ஹார்பக்கும் அண்ணன் தம்பிகள்.மேட்ச் முடிவில் இவர்கள் இருவரும் கைகொடுத்து ஹக் பண்ணி மகிழ்ச்சியைப் பகிர்ந்துகொண்டது பார்க்க நெகிழ்ச்சியாக இருந்தது. உண்மையில் அது அற்புதமான நாள்தான்.

அந்த விளையாட்டைப் பற்றி அரைகுறையாகத்தெரிந்த எங்களயும் சேர்த்து அன்று அந்த விளையாட்டைப்பார்த்தவர்களின் எண்ணிக்கை 113 மில்லியன் அமெரிக்கர்களாம். இது மொத்த அமெரிக்கவாழ் மக்கள் தொகையில் 46.3 சதவிகிதம். தட்டு உடைந்தது. அதாங்க ரெகார்ட் பிரேக்கு.

ஒரு ஃபன் குறிப்பு: சரி அரைகுறையா தெரிஞ்சி பாக்க ஆரம்பிச்சாச்சி. இனிமேலாவது இந்த கேம் சம்பந்தமா நம்ம அறிவை கொஞ்சம் கொஞ்சமா வளத்துக்குவமேங்கிற எண்ணத்துல, ஒரு நண்பருக்கு போன் போட்டு ஃபுட்பால்ன்னு சொல்லிட்டு, மொத்த கேமும் கையாலயே வெளயாடுறாய்ங்களேன்னு கேட்டேன். அதுக்கு அவர் ஃபுட்டுன்னா நீ நினைக்கிறது போல்  இல்ல. இந்த புட்’டுக்கு அடின்னு அர்த்தம். அதாவது அந்தப்பந்து ஒரு அடி நீளம் கொண்டதுங்குற அர்த்ததுத்ல புட்பால்ன்னு சொல்றாங்கன்னார்.

ஏண்ணே இதையெல்லாம் முதல்லயே சொல்றதுக்கென்ன?

கிரௌண்ட் ஹாகும் நிமோ பனிப்புயலும்

அமெரிக்கா  மெத்தப்படித்த மேதாவிகள் அதிகம் நிறைந்த நாடென்றாலும், மூடநம்பிக்கைகள் அதிகம் கொண்ட, மூதேவிகள் நிறைந்த நாடும் கூட.

நம்ம ஊரில் எட்டு எப்படி கெட்ட நம்பரோ, அதே போல் 13 இவர்களுக்கு துஷ்ட நம்பர்.  இங்குள்ள பல கட்டடங்களில் , 12க்கு அப்புறம்  14 ஆகவோ, 12 ஏ’ வாகவோ இருக்கும்.

பல நாடுகளிலிருந்து வந்தவர்கள்,  தமது  மூடநம்பிக்கைகளையும் மூட்டைகட்டிக்கொண்டு வந்து விட்டார்கள் . நம் இந்தியர்களும் . அமெரிக்காவுக்கு பேண்ட்-சர்ட்களை பேக் அப் பண்ணுவதற்கு முன் பில்லி சூன்யங்களை பிக்-அப் பண்ணியவர்கள். ஜோசியர்கள்தான் இங்கு குடியேறிய முதல் இந்தியர்களோ  என்ற சந்தேகம் எனக்கு வருவதுண்டு .இங்கே வெளியாகும் இந்தியப் பத்திரிகைகளில் கல்யாணம் முதல் கட்டையில போற சமாச்சாரம் வரை அத்தனைக்கும் இவர்களிடம் பரிகாரம் இருக்கும்.

இந்த மூடநம்பிக்கைகளில்  ஒன்றுதான் கிரவுண்ட் ஹாக் டே[ground hog day].ஒவ்வொரு வருடமும் பிப்ரவரி மாதம் 2-ம் தேதி இது கொண்டாடப்படுகிறது. குறிப்பாக பென்சில்வேனியா மாநிலத்தில் உள்ள ஜெர்மானிய மக்கள் இதை அதிகம் அனுபவித்து கொண்டாடுகிறார்கள்.

அன்றைய தினம் அதிகாலை அணில் போன்ற தோற்றமுடைய அந்த மிருகம் தன் கூட்டைவிட்டு வெளியே வருவதற்காக பல்லாயிரக்கணக்கில் மக்கள் குழுமியிருப்பார்கள். அது வெளியே வந்து தன் நிழலைப் பார்த்துவிட்டு மீண்டும் உள்ளே ஓடிவிட்டால், குளிர்காலம் இன்னும் குறைந்த பட்சம் ஆறுவாரங்களுக்காவது நீடிக்கும் என்று அர்த்தமாம். தன் நிழலைப்பார்க்காமலே திரும்பிவிட்டால், விரைவிலேயே வசந்தகாலம் வரப்போகிறது என்று அர்த்தமாம்.

நம்ம ஊர் வானிலை அறிக்கை ரமணனே வெட்கித் தலைகுனியும் அளவுக்கு, ’பூவா தலையா’ போட்டு வருடந்தோறும் நடைபெறுகிறது  இந்த காமெடி கலாட்டா நிகழ்ச்சி .

சீதோஷண ஜாதகம் சொல்லப்போகும் அந்த அணிலின் வரவுக்காக கொஞ்சநஞ்சமல்ல சுமார் முப்பதாயிரம் பேர் காத்திருந்தார்கள்.கூட்டத்தினரின் குதூகலத்தை அதிகரிக்கும்  செவிக்கு உணவாக பேண்டு முழக்கங்களும்,வயிற்றுக்கு வாகாக பல்வேறு உணவு அயிட்டங்களும் நிரம்பி வழிந்தன.

கி.பி 1800லிருந்தே நடைபெற்று வருவதாகக் கூறப்படும் அந்நிகழ்ச்சியில் கலந்துகொள்ளுபவர்கள் கண்டிப்பாக ஜெர்மன் மொழியில் மட்டுமே பேசவேண்டுமென்பது ஒரு செல்ல உத்தரவு. அப்படி பேசாமல் ஆங்கிலத்திலோ வேறுமொழியிலோ பேசினால் சின்னதாய் ஒரு அபராதமும் விதிக்கிறார்கள்.

காத்திருந்த கொஞ்ச நேரத்திலேயே சோம்பலாய் அந்த அணில் போன்ற ஒன்று வெளியே வந்துவிட்டு, ‘ஏம்பா ஒங்களுக்கெல்லாம் வேற வேலைவெட்டி இல்லையா? என்பதுபோல் பார்த்துவிட்டு தன் நிழலைப்பார்க்காமல் விடுக்கென உள்ளே சென்றது. அங்கிருந்த அனைவருக்கும் அத்தனை மகிழ்ச்சி. அணிலின் ஐதீகப்படி, அவர்களுக்குத்தான் சீக்கிரமே வசந்த காலம் வரப்போகிறதே? நாங்கள் இங்கே அனுபவிக்கும் குளிரை அனுபவிக்காதவர்கள் இதைப்படிக்கும்போது ‘அட மூடர்களே’ என்று கமெண்ட் அடிக்கத்தான் தோன்றும். ஆனால் உடலில் நுழைந்து, உயிரில் கலந்து உலுக்கி எடுக்கும் குளிரில் ஒருமுறை மாட்டினால், நீங்களும் அணில் ஜோஸியத்துக்கு ஆஜராவீர்கள்.

குளிர்காலத்தில் நாங்கள் எப்படி அவஸ்தைப்படுகிறோம் என்பதை அட்லீஸ்ட் நீங்க படித்தாவது அனுபவிக்கவேண்டுமென்று விரும்புகிறேன்.

காலை எழுந்ததும் கொதிக்கும் தண்ணீரில் குளித்தோ அல்லது குளித்தது போல் நடித்தோ முதலில் உடம்பு முழுக்க பாடி லோஷன் தடவ வேண்டும். அப்படி தடவா விட்டால் தோலெல்லாம் செதில் செதிலாக வெடித்துப் பாம்புத்தோல் போல் ஆகிவிடும்.அதன் பிறகு தெர்மல் என்று சொல்லப்படுகிற உள்ளாடைகளை [பாகிஸ்தானில் தயாரானது - . வேற வழி?] ஜட்டி,  மேல் அணியவேண்டும். ஏறத்தாழ பரிதாபத்துக்குரிய ஸ்பைடர்மேன் எஃபெக்ட்தான் என்று வைத்துக்கொள்ளுங்களேன். அதுவும் சமீபத்தில் திருப்பூரில் வாங்கி வந்த பனியன்கள் மீது சனியன் பாகிஸ்தானியர்களின் தெர்மல்களை அணியவேண்டி வந்தபோது அவமானமாகத்தான் இருந்தது. அதன்பிறகு எப்போதும் அணியும் சட்டை, பேண்ட், முழங்கால் வரை முரட்டு சாக்ஸ், பூட்ஸ் அணிந்து ஏதோ போருக்குப் புறப்படுவது போல் வீட்டை விட்டு புறப்படுவோம். இதில் பிரஸ்டீஜ் எதுவும் பார்த்து ஸ்டைலுக்காக சாதாரண ஷூ அணிந்து ஐஸ்கட்டிகளில் வழுக்கி விழுந்தால் நம்ம ஊர் தர்ம அடிகளுக்கு கொஞ்சமும் குறைச்சல் இல்லாத வர்ம அடிகள் கிடைக்கும்.

கெட்டப் இன்னும் முடியவில்லை. இவ்வளவுக்கு அப்புறமும் ஒரு லாங் கோட் அணிந்து, காதுகளுக்கு ஒரு மினி ஹீட்டர், தலைக்கு ஒரு க்ரிப்பான குல்லாய் அணிந்து முடிக்கிறபோது நம்மை நாமே நலம் விசாரிக்கிற பரிதாப நிலைக்கு வந்துவிடுவோம்.

இவ்வளவு பகீரத பிரயத்தனங்களுடன் கிளம்பினாலும் வெளியே வந்தவுடன் ஒரு காற்று அடிக்கும் பாருங்கள். உடுப்புகள் அத்தனைக்குள்ளும் ஊடுருவி, எலும்பைப் பதம் பார்த்து, உயிரை ஒரு கணம் ஊசலாடவிட்டுச்செல்லும். அந்த சமயங்களில் எல்லாம் ‘பேசாம ஊருக்கே ஓடிப்போய் ஊறுகாய் வித்தாவது பொழச்சிக்குவோமா? என்று தோணும். அடுத்த கணமே இந்தப் புலிவால் விளையாட்டை விட்டுப்போகமுடியாது என்கிற பிராக்டிகல் புத்தி வந்து தொலைக்கும்.

இங்கு பெய்கிற பனி எப்போதும் பார்க்க அழகாக இருக்குமே ஒழிய, அதனால் அடைகிற இம்சைகள் அளவிட முடியாதது. வீட்டுமுன்னால் சேர்கிற பனிக்கட்டிகளை உடனுக்குடன் மெல்டிங் சால்ட் போட்டு அப்புறப்படுத்திவிட வேண்டும். இல்லாவிட்டால், நம்ம ஊர்ப்பக்கம் ரோட்டில் குறுக்கே ஆட்டுக்குட்டிகளைத்தூக்கிப் போட்டுவிட்டு, அடிபட்டதற்கு நஷ்ட ஈடு கேட்பார்களே, அதுபோலவே, நம் வீட்டுமுன்னால் உள்ள பனியில் வழுக்கி விழுந்துவிட்டு, கேஸ் போடுவார்கள் சில அல்பைகள்.

இந்த குளிர்காலத்தின் உச்சக்கட்ட கோரம் ஷவ்லிங் [shoveling] தள்ளி முடிப்பதற்குள் நாக்கு தள்ளி ,ரெக்கைகள் பிஞ்சுறும்  .உறைந்தும் உறையாமலும் இருக்கிற பனிக்கட்டிகளுக்கு மத்தியில் விழுந்துவிடாமல் வீடு திரும்புவதென்பது ஒரு அட்வென்சருக்கு சமம். சில சமயம் பூட்ஸ் வழியாக சாக்ஸுக்குள் தண்ணீர் புகுந்து கால் எலும்பு சில்லிடுமே,. அந்த வேதனையை சொல்லிட வார்த்தைகள் இல்லை.

இப்போது புரிந்திருக்கும் அந்த அணில் ஐதீகத்தை அவ்வளவு ஆர்வமாக நம்பியதற்கான காரணத்தை.

நாட்டு நிலமை இப்படி இருக்க வீட்டு நிலைமையும் விபரீதம் தான். என் வீட்டுத்தோட்டம் ஒரே பழுப்பு நிறமாக்க் காட்சியளிக்கிறது. ரோஜாச் செடிகளில் வெறும் குச்சிகள் மட்டும் குடியமர்ந்து கொண்டிருக்க,புதினா, ஸ்ட்ராபெர்ரி, அத்தி,மற்றும் ஆப்பிள் செடிகள் அத்தனையும் கதம் கதம் ஹோ கயா தான். ஆனால் வசந்த காலம் வந்ததும் புத்தெழிலுடன் இவர்கள் அனைவருமே ஆஜராகிவிடுவார்கள்.

இத்தனை களேபரங்களுக்கும் மத்தியில் என் மனைவியின் மல்லிகைச்செடிகள் மட்டும் தோட்டத்திலிருந்து கிச்சனுக்கு இடம் சிஃப்ட் ஆகி சில்லென்று பூத்திருக்கும். கிச்சனில் சமையல் வாசனையை விட, மல்லி வாசனை தூக்கலாக மணக்கும். இதில் ஒவ்வொன்றாக பூக்க பூக்க, அதை ஃபிரிட்ஜில் எடுத்து சேர்த்து வைத்து, ஞாயிறன்று அதைக் கோர்த்து, என் மனைவி தலையில் சூடிக்கொள்வதைப் பார்த்து நாங்கள் ஆச்சர்யம் அடைவோம். [அடடா  ஒரு மல்லிகையே இன்னொரு மல்லிகையை சூடிக்கொள்கிறதே,.. மூனு புள்ளி, ஒரு ஆச்சர்யக்குறி!]

இவ்வளவையும் நான் எழுதிக்கொண்டிருந்த பிப்-8 அன்றுதான், அணிலின் ஆருடத்தை மீறி, இந்த ஆண்டு பெரும் பனிப்புயல் வீச இருப்பதாக அபாய அறிவிப்பு வெளியிட்டார்கள். பொதுவாக சூறாவளிப் புயலுக்கு மட்டுமே  பெயர் சூட்டி அழைப்பவர்கள், இந்த முறை வரவிருக்கும் பனிப்புயலுக்கு ‘நிமோ’ என்று பெயர் சூட்டி, எல்லா சானல்கள் வழியாகவும் ஏடாகூடமாக எச்சரித்தார்கள். அதை சீரியஸாக எடுத்துக்கொள்ளாமல் நான் வழக்கம்போல் இயங்கிக்கொண்டிருக்க, சுமார் மூனு மணி அளவில் உறைபனி  கொட்டோ கொட்டென்று கொட்டித்தீர்க்க ஆரம்பித்தது. சரி நம்ம பொழப்பு இனி நிமோ நாராயணாதான் என்று முடிவு பண்ணி, நண்பன் ஜூடுக்கு போன் செய்தால், அவன் ஷவ்லிங் செய்வதற்காக  ட்ரெட் மில்லில் ஓடிக்கொண்டிருந்தான்.

நாமளும் எக்சர்சைஸில் இறங்கி நிமோவுக்கு ஒரு மெமோ கொடுக்கத்தயாரானால் என்ன என்று யோசித்த கணமே ‘வெறும் எலும்புக்கெல்லாம் எதுக்குடா எக்சர்சைஸு?’ என்று அப்பா ஒரு முறை கேட்டது  ஞாபகம் வந்ததும், நேற்றுதான் இந்தியாவிலிருந்து திரும்பியிருந்த டெனண்ட் பின்னி  தந்த ‘நடுவுல கொஞ்சம் பக்கத்தைக் காணோம்’ டி.வி.டி.யை ஆன் பண்ணிவிட்டு அமர்ந்தேன்.பார்த்தா நடுவில கொஞ்சம் படத்தை காணோம் .திருட்டு DVD போல இருக்கு .